HADGE 29
SIŊ 121 Apprenons la maîtrise de soi
Lag wee go de pũygi jag jãɗge no
“Lag wee go de pũygi, tos we maga nday mo leɗ ge go nen re ma jãɗ weege wa.”—MAT. 26:41.
FẼN MAA KLUU ƁIL HADGE SEN LA
Hadge sen la kay maaga naa mo dur go de ẽgre naa ɓuy maaga naa mo leɗ go nen ɓlagge maa kwũy wo wa.
1-2. (a) Yeso hay ɓo’ sug jar maa wer ɓen wo ga hãylà? (b) Wer mayse ga jar maa wer Yeson men wo ne go là? (Ko foton wo ni lay.)
“JIILI je tabay yaŋ mbe de egre, amaa hõõgese ɓe go de gayre debaŋ.” a (Mat. 26:41b) Wer wããre sen wo, Yeso ngaɓ go ga se de ko hugli naa. Amaa ɓo’ge sug ɓil wããre ɓe sen wo ni lay: Naa mo hay ɗiggi ga naa joŋ yaŋ tum de ẽgre maa joŋ fẽẽre maa de deele wa. Go mẽ’ taŋgu maaga Yeso wãã wããre sen wo mo no, jar maa wer ɓen hay wo go de ha’ge ga koh jag re maa hõnla ɓuy, saara joŋ ge yaŋ de ɓe. (Mat. 26:35) Ɗiggi maaga wãã ne de ɓaara hay mbe de woore. Amaa, á hay bay wo de koge ga de maaga re da’ saara we, saara laa do yaŋ go gesiŋ gus wa. Diŋ wersen so ga Yeso fuŋ sug ɓaara go peel bol ga: “Lag wee go de pũygi, tos we maga nday mo leɗ ge go nen re ma jãɗ weege wa.”—Mat. 26:41a.
2 Ɓlag go diŋ ga, jar maa wer ɓen lag wo go de pũygi ga. De maaga à hay baa Yeso mono, á lag wo mbaara we ti jeŋ ɓe noga daŋ wo yawlà? Jag re sen mono, á raw wo joŋ fẽn maaga á hay wo go de ha’ge ga saara joŋn ge ti boŋ ga mono—á raw wo men Yeso go.—Mat. 26:56.
Yeso hay ɓo’ sug jar maa wer ɓen wo ga á mo lag wo go de pũygi, lan mo joŋ wo hayya ne see ɓaara jag jãɗgen wo; amaa saara men go (Ko paragraf maa 1-2)
3. (a) Maaga naa mo lag de deele peel Jeofa mono, wer mayse ga naa mo hay men kaŋ ɗiggi go ti see naa debaŋ là? (b) Ɓil hadgen la naa ko yaŋ diŋ mãyla?
3 Naa mo ɗig ga naa joŋ ge yaŋ tum de ẽgre maa joŋ mo maa ti ngeel ɓen wa. Á mbe cwãy ga naa go de baa wer see naa maaga naa joŋ mo maaga co jag Jeofa ga ga, amaa naa de ɓlagge see, lan naa go diŋ har ɓlagge no. (Rom. 5:12; 7:21-23) De bay koge, maapo naa da’ see naa go nen jãɗge maaga kaŋ wer naa go joŋ ɓlagge. Maaga naa mo lag de deele peel Jeofa wo de weel ɓen mono, naa mo hay joŋ joŋre de wããre maa ni Yeson wo, lan naa ɗaw see naa jag jãɗge maaga kaŋ wer naa joŋ ɓlagge mono. Hadge sen la kay naa maa joŋ se no. Taŋgu ɗa, naa ko ge yaŋ ga ti ɓaŋ maa hõn ga naa de lag go de pũygi la. Blam sen naa ndal yaŋ ti ɗeŋ maaga naa mo lag go pũygi jag jãɗge mono. Ti tawgeti ɓe mono, naa ko yaŋ diŋ ɗeŋ maaga naa lag de deele lagge la mono.
NAA LAG DEGED—TI ƁAŊ MAA HÕNLÀ?
4-5. Wer mayse ga naa mo hay joŋ hayya ne see naa, koh jag ɓlagge maa mẽ’mẽ’ wo là?
4 Koh ɓlagge maa mẽ’ mẽ caa mbaara holaŋ naa de Jeofa lay. Day, ɓlagge se mẽ’ mẽ’n kaŋ wo mbaara wer naa joŋ ɓlagge maa kluuri wo pa.
5 Naa ɓuy naa yiŋ de re maaga jãɗ wo naa joŋ ɓlagge. Wosela ɓuy yoo naa ngeel hugli ɓe yaŋ: maapo ga á diŋ fẽn maaga srog glog ɓe joŋ ɓlagge maa kwũy, joŋ fẽẽre maa de yeeɗe wo, noga ɗig ɗiggi doo jar maaga bay wo goŋ Jeofa wa nono. Maapo ga jobo dur jag jãɗge joŋge figliw. Maapo ga jee maa tigriŋ joŋ go le’ge gesiŋ maa joŋ fẽẽre maa de yeeɗe doo masturbasiyoŋ, koge pornografi. Jar maa po wo pa joŋ wo jag re maa po doo joŋge hẽẽne jee táabay; noga pa jee ɓen ko see ɓe go hala ga ga ya’ la à wãã ti se ga hãylà; noga sõõ ɓil go gusi. Doo maaga naa jaŋ ɓil kefder Jag ne mono: “Fen po ma de ɓlagge, jobo joŋ we de sãy ɓe ti no, fen sen raw kog ge ɓe, kaŋ wer ɓe go joŋ re ɓlagge”—Jag 1:14.
6. Ti mayse ga naa mo hay joŋ keɗed là?
6 Ndo yaŋ de ko fẽẽre po wo ga jãɗ wo ndo joŋ ɓlagge gus yawlà? Á bay de el wa de maaga naa ɗig ga naa bay de hugli ti ngeel po wa mono. Naa mo ɗig ga naa de ẽgre debaŋ nen maaga naa le’ nen ɓlagge ga na wa pa. (1 Jaŋ 1:8) Fer ɗig wããre Pol maaga á wãã ga koh “jar maga Nenterse Baa de koɗ [rage]” leɗ’ wo mbaara nen jãɗge lay, hayga á oo wo we jag saale ɓaara ga no. (Gal. 6:1) Naa mo hay de deele see see naa tu, lan ko ngeel maaga naa de hugli wo ni mono.—2 Kor. 13:5.
7. Naa de sãy mayse ti debaŋ maa koɗ see naa là? Hã saɓlaŋ po maa naa wer ɓe ɗa.
7 Hayga naa ko ngeel maaga ɓoɗ wo naa go gus gus nen jãɗge we go no, naa de hay joŋ na joŋge là? Naa mo dur maa da’ ẽgre maa ooge jag re sen wo no! Naa ngaɓ ba ne de saɓlaŋ po ɗa: ti kal maaga à yer Bible mono, ngeel hugli sir hay wo diŋ jag tiŋ maaga à laa le ni mono. Se diŋ wersen so ga à hay gor jag tiŋ wo debaŋ mono. Doo se no lay, naa mo hay ko nen go de woore ti fẽẽre maaga naa go de koge de woore ga naa de hugli ti ɓaara mono.—1 Kor. 9:27.
NAA OO JAG JÃƊGE WO DE JOŊGE ƁLAGGE NA OOGE LÀ?
8-9. Weel maaga naa da’ ɓil Jag Jõõ wo 7 mo hay joŋ joŋge maaga se mo le’ go nen ɓlagge maa kwũy wa là? (Jag jõõ wo 7:8, 9, 13, 14, 21)
8 Naa oo jag jãɗge wo de joŋge ɓlagge na ooge là? Naa ko wee hadge maaga naa da’ see weel maaga de ngaɓe ɓil Jag jõõ 7 mo ɗa. Á joŋ figliw de wãy figliw po. Verse maa 22 wãã ga weeln raw maŋ blam ɓe “keɗaw keɗaw tuu.” Amaa doo maaga naa da’ le go ti verse maa glogn wo le ne mono, á far ɗiggi po wo ngaɓa ga mẽ’ mẽ’ kaŋ taw ɓe go joŋ ɓlagge.
9 Weel sen hay joŋ mayse go taŋgu maaga se joŋ ɓlagge maa kwũy là? Taŋgu ɗa, de law daymola no kay, á “hay seege caw ti faage de ngar ngel maaga wãy figliwn ni mono.” Blam, se raw ɓo’ see ɓe wo kar kar ti jeŋ tiŋ ɓe no. (Jaŋ Jag jõõ wo 7:8, 9.) Day blam de maaga á ko wãyn mono, se caa go ti jeŋ ga. Nen maaga á hay caa go mono, se raw klewge ɓe lay, lan co’ sug ɓe de maaga á kaŋ nen ne hẽn ti ɗeŋres wããge ga se hay de re siigi jag maa tay jag jare mono, maapo ga maa ngaɓge ne hẽn ga se bay diŋ wãy maa de ɓlagge wa. (Jag jõõ wo 7:13, 14, 21.) Hayga weeln de hay ɗee we go see re maaga ɓo’n nen ɓlaggen no, á de hay le’ go nen re jãɗgen wo de ɓlaggen ga.
10. De ɗeŋ maa hõn ga jobo joŋ tee ɓlagge maa ni weel sen wara lay là?
10 Mbaa sen ngaɓ fẽn maaga da’ Sedeewa Jeofa maa hõnla ɓuy mono. Maapo ga á le’ go nen ɓlagge maa kwũy, day ko go blam ga fẽẽren ɓuy hay hres go “brus brus” tu. Amaa hayga á hay ɗig we ti re maaga hay hres cwãy no, maapo ga á hay ko yaŋ ga se hay far ɗiggi maa de baywoore wo taŋgu maaga se joŋ ɓlagge mono. Maapo ga se far ɗiggi maa seege de kããrebe maa de baywoore wo, maa joŋ hragge maa de yeeɗe, noga woge ti ngeel maa de baywoore— noga pa ti sid interned maa de baywoore wo. Maapo ga á men tos Baa, jaŋge Bible, woge ti taygeti, lan siigi wããre Baa go. Diŋ wer maaga á far ɗiggi po wo ngaɓa de baywoore ga weel maa ɓil Jag Jõõ wo joŋ ɓlagge maa kwũy mono.
11. Maaga naa mo le’ go nen ɓlagge wa mono, naa de hay joŋ mayse là?
11 Sen had mayse ne naa là? Naa mo hay ɗee go diŋ see ɓlaggen tawa wa, amaa see joŋre maaga kaŋ wo wer naa joŋ ɓlagge go mo lay. Sen diŋ fẽn maaga Salomoŋ joŋ blam maaga á ngaɓ re maaga da’ weel maa ɓil Jag Jõõ wo de wãy figliwn mono. Á baa yaŋ ti wãy figliwn ga: “Yee see ɓo go ti fããge ɓen wo wa”. (Jag jõõ wo 7:25) Á wãã ti wãy sen pa ga: “ɗee go see faage mani ɓen hãã; Ya’ wo de ngar jag tiŋ mani ɓen wa.” (Jõõ. 5:3, 8) Maa ɗaw see naa jag joŋge ɓlaggen mono, naa mo hay ɗee go see fẽẽre, lan re maaga kaŋ wo wer naa joŋ mopo maa de ɓlagge mono. b Sen da wããge ga koh mo sen mo hay ba diŋ ɓlagge nen kretiyẽ wo wa laybla’ no, naa mo joŋ ne wa, hayga á yaŋ kaŋ wer naa joŋ mopo maa de ɓlagge no.—Mat. 5:29, 30.
12. Job hay maŋ ɗiggi go ga hãylà, day ɗiggi sen hay kayn na kayge jag jãɗge là? (Job 31:1)
12 Maaga naa mo ɗee go see fẽẽre maaga kaŋ wo wer naa joŋ ɓlagge mono, ni naa mo hay go de baa wer see naa de woore. Se diŋ fẽn maaga Job hay joŋn mono. Á hay “ha’ go de nen ɓe ga se slag nen ti mãytigli po ga. (Jaŋ Job 31:1. NWT) Joŋge fẽn maaga á hay go de maŋge ɓe maa joŋge kay ne maaga á mo da’ see ɓe nen re wa. Naa lay, naa mbe de kããge maa baa wer see naa go maa ɗeege go see fẽẽre maaga kaŋ wo wer naa go leɗge jag jãɗge mono.
13. Wer mayse ga naa mo joŋ hayya ne fẽn maaga naa ɗign là? (Ko foton wo lay.)
13 Naa hay joŋ hayya ne see naa ti ɗeŋ maaga naa ɗig mo lay. (Laa. 20:17) Jar maa po ɗig wo ga á bay ɓlagge ti maaga ndo ɗig mopo maa de baywoore mo wa, hayga ndo bay we joŋ fẽn sen wa no. Amaa, sen bay diŋ ɗiggi maa ti ngeel ɓe wa. Jobo maaga yaŋ tum ɗiggi ti mopo maa de baywoore no, wur po se joŋ ge de sãy joŋge ɓe ti debaŋ. Sen da wããge ga maapo re maaga daɗ wo naa le glog ɓe diŋ naa ti see naa tu. Cwãy tu, de ngar ngeel maapo ɗiggi maa de baywoore a mbaara ne naa ti. Saŋgu ɓen diŋ ga naa mo nii ɗiggi sen wo go ti naa deparday tu, day ni naa mo coo ra de ɗiggi maa de woore wo. Hayga naa joŋ we doo sen ne no, naa de koɗ see naa jag joŋge ɓlagge maa kwũy, werga naa bay ɓo’ faage ne ɗiggi maa debaywoore kolge go diŋ mopo maaga naa de sãy ɓe ti debaŋ wa.—Flp. 4:8; Kol. 3:2; Jag. 1:13-15.
Naa mo hay ɗee go see fẽẽre maaga kaŋ wo wer naa go leɗge nen jãɗge mono (Ko paragraf 13)
14. Mayse kay naa maa ooge jag jãɗgen pa là?
14 Naa joŋ diŋ mayse maa ɗaw see naa jag jãɗge pa là? Naa hay go de bawge jag jiili naa ga de el ɓen joŋ yaŋ tum diŋ maa naa, de maaga naa hoo sug ti jag liŋgi maa ni Jeofan mono. Day maapo á joŋ gaali see naa maa ɗiggi ti fẽẽre maaga Jeofa da ga naa mo joŋ ra mono, amaa hayga naa dur we maa joŋge ɓe no, naa joŋ yaŋ go de fruygi debaŋ.
15. Wer mayse ga joŋge de sãy fẽẽre maa de el wo ti debaŋ koɗ naa jag jãɗge wo là?
15 Naa mo hay slag nen diŋ ti fẽẽre maa de el wo. Naa had “caa hee we de ɓlagge [ . . . ] da de ele” we no, ni naa de ya’ wer baa wer see naa go maa joŋ fẽn maa ti ngeel ɓe no, lan maa ɗeege go see ngeel maaga kaŋ wo naa ne ɓlagge jag mono. (Amos 5:15) Hayga naa yaŋ ɗiggi diŋ ti fẽẽre maa de el wo no, se kay naa yaŋ maa hooge jag jãɗge maaga naa hay bay gorge ɓe wa mono.
16. Joŋge fẽẽren maa ti nenterse kay wo naa maa joŋ hayya ne see naa na kayge là? (Ko foton wo lay.)
16 De ɗeŋ maa hõn ga naa had slag nen ti fẽẽre maa de eln wo là? Naa joŋ sen de maaga naa yaŋ tum joŋ fẽẽre maaga ya’ wo wer sa’ holaŋ naa de Jeofa mono. Hayga naa yaŋ woge ti taygeti wo, noga naa yaŋ woge ti siigi wããre Baa no, jãɗge joŋge ɓlaggen a naa gus ga. Day, naa joŋ debaŋ diŋ de sãy joŋ fẽẽre maaga co wo jag Jeofa ti mono. (Mat. 28:19, 20; Heb. 10:24, 25) Naa yaŋ jaŋ Bible, yaŋ frug nen ɓe lan yaŋ ɗiggi ti ɓe lay no, dage naa maa joŋ fẽn maa de eln ya’ yaŋ ciŋ ni, lan naa ya’ wer caa hee yaŋ de fẽn maa de ɓlaggen lay. (Jos. 1:8; Siŋ. 1:2, 3; 119:97, 101) Fer ɗiggi ga Yeso wãã ne jar maa wer ɓen wo ga: “Lag we go de pũygi, tos we maga nday mo leɗ ge go nen re ma jãɗ weege wa.” (Mat. 26:41) De maaga naa yaŋ tum iggi see Pan naa maa ciŋn nen tosge no, naa da’ kayge maa ɓen lan naa joŋ go de baa wer maaga naa mo hay de cõõre jag ɓe.—Jag. 4:8.
Hãge see naa tum joŋ fẽẽre maa ti nenterse ya’ naa see Jeofa, lan kay naa maa ooge jag jãɗge wo (Ko paragraf 16) c
HAY GO TUM DE PŨYGI
17. Hugli maa hõn ga Piyer hay tum durgi maa ooge jag ɓe là?
17 Maapo ga naa kaŋ mbe do go ne ngeel de hugli naan wo ɓuy tu. Amaa, maapo á wii wur do naa debaŋ maaga naa mo naa blum hugli naa sen wo no. Naa ko wee saɓlaŋ Piyer ɗa. Á dog faage ga se ko Yeso ga ɓaale swa’ diŋ werga á hay de hẽẽne jee táabay jiili. (Mat. 26:69-75) Go blam mono, sen doo ga Piyer naa blum hugli ɓe sen nono, werga á sii wããre go peel Sanhedreŋ wo ti Yeso go de baa wuu debaŋ. (Joŋre 5:27-29) Amaa kiŋgi go blam mbag mo kay, Piyer men rege go de jar maaga bay wo diŋ jar Jwif wa mono “doo hẽẽne jar ma de caa ɓĩĩnin wo”. (Gal. 2:11, 12) Hẽẽne hay fer joŋ Piyer pa. Maapo ga á hay bay go de naa blum hẽẽne ɓen ɓuy wa ɗa.
18. Naa mo hay fer ɗiggi ti mayse koh naa mo hay ba go de naa blum hugli po là?
18 Doo Piyer no lay, maapo naa da’ see naa nen re po maaga naa hay ɗiggi ga naa go de naa blum ɓe mono. Ko ba ɗa, hẽnbe po wãã ga: “Ndi go de men ko pornografi go kiŋgi 10, day ndi go de bawge jag jiili ɓi ga re maa de maŋ sen da’ me ga so. Amaa, day maapo se a me ɓil ga ndi mo fer koge ɓe tigriŋ pa.” Á de woore ti maaga hẽn naan laa do go gesiŋ ga mono. Á wo koge ga se mo hay dur go tum de ẽgre se ɓuy maa dur ɓlagge se no, maapo ga nen naw se maaga gwan ti wur maa waran mo ɓuy no. Á hay joŋ hayya ne see ɓe dedaŋ maa ɓaan ɓuy maaga se mo ɗee go hãã see pornografi no, wer kayge wãy ɓe wo de jar maa peel tayge wo.
19. Naa mo joŋ mayse hayga hugli po yaŋ maŋ do naa là?
19 Naa joŋ joŋge maaga hugli maaga naa bay go de naa blum ɓe wa ɗa mo kaŋ wer naa joŋ ɓlagge wa là? Naa mo hay joŋ fẽn maaga Yeso wãã ne naa ga: “Lag we go de pũygi” mono. Koh hay ba nen wur maaga naa ko see naa de ẽgre mono, naa mo hay tum ɗeege go see ngeel maaga wo de naa jag jãɗge mono. (1 Kor. 10:12) Hay tum joŋ fẽẽre maaga hay wo go de kay ndo maa naa blum hugli ɓo po mono. Jag Jõõ wo 28:14 wãã: “Woore ti je maga ɓen mbe tum de hẽẽne mono.”—2 Pi. 3:14.
NAA DA’ MAYSE WER MAAGA NAA YAŊ JOŊ HAYYA NE SEE NAA LÀ
20-21. (a) De maaga naa yaŋ tum joŋ hayya ne see naa jag jãɗgen wo no, naa da’ poɗge maa hõn wo wer ɓe là? (b) Hayga naa dur we go ɓuy maa ooge jag jãɗgen wo no, Jeofa joŋ mayse ne naa là? (2 Korente wo 4:7)
20 Naa mo hay go de bawge jag jiili naa ga joŋge hayya ne see naa jag jãɗge diŋ mopo maaga naa mo hay joŋn naŋ. Maaga naa joŋ ɓlagge we no, maapo se co mbe jag naa diŋ maa naw po mẽ’ koɗe, amaa hayga naa yaŋ seege doo maaga Jeofa da nono, naa joŋ ge de fruygi debaŋ. (Heb. 11:25; Siŋ. 19:8) Sen diŋ wer maaga Baa joŋ naa diŋ maaga naa mo hay hoo sug ti jag liŋgi ɓen mono. (Tĩĩ. 1:27) De maaga naa yaŋ seege doo maaga Jeofa da nono, jiili naa joŋ de suuli ti maaga ɗiggi naa bay ruu naa wa mono, lan naa joŋ yaŋ tenen maa tum.—1 Tim. 6:12; 2 Tim. 1:3; Jud 20, 21.
21 Cwãy tu, “hõõgese[ . . . ] go de gayre debaŋ.” Sen bay da wããge ga naa joŋ mopo maa naa blum hugli naan ga na wa. Jeofa de sãy kay naa de ẽgre ɓe maa bay ɗagn ti. (Jaŋ 2 Korente wo 4:7.) Amaa hay we de koge ga ẽgre sen diŋ ẽgre maa dedaŋ ẽgren ɓuy no. Ẽgre maa ti ngeel ɓe no, kaŋ nen ga durgi maaga naa dur hãã nen maaga naa naa blum hugli naan mono—diŋ durgi maaga naa hay dur de see naa tu. Hayga naa joŋ nen maa ni naan we go no, naa joŋ go de bawge jag jiili naa ga Jeofa laa ge tosge naa wo yaŋ maa hã ẽgre maaga naa de sãy ɓe ti ne naa de peel ni. (1 Kor. 10:13) De kayge maa ni Jeofan, naa kãã yaŋ maa joŋ hayya ne see naa maa ooge jag jãɗge no.
SIŊ 47 Prie Jéhovah chaque jour
a WÃÃRE MAAGA GO DE NAA WERE: “JIILI” maaga naa da’ ɓil Matiye diŋ ẽgre maaga srog glog naa maa joŋ mopo noga maa koge ga mopo de joŋ naa na joŋge la mono. “Hõõgese” ngaɓ diŋ maaga naa de ɓlagge see mono. Maapo ga naa joŋ mbe de ɗiggi maaga daŋgo maa joŋ fẽn maa ti ngeel ɓe, amaa hayga naa joŋ hayya we ne see naa ga no, naa le’ go nen jãɗge maa joŋ fẽẽre maaga Bible wãã ga bay wo de woore wa mono.
b Jobo maaga le’ go nen ɓlagge maa kwũy da’ kayge yaŋ ɓil kefder Hay mbay tenen ti’ tum!, hadge maa 57, maa klee ɓe 1-3, lan ɓil artikle “‘Regarde droit devant’ vers l’avenir” ɓil Ngeel Gor ti Jare maa nen Few Duugi 2020, pp. 27-29, pars. 12-17.
c NAAGE WER FOTO MAA TI : Hẽnbe po de jaŋ verse maa nen naw tum de jag toŋ, lan de jaŋ Bible de maaga se de ig see ɓe, lan se ti taygeti maa ti holaŋ naw renam mono.
