Nikola wo de Selin hay yiŋ wo de re maa wer sar sare pa. Á raw wo ti tayge maaga filiyal maa Fraŋse wãã ne hara ga á mo raw wo wo ni mono. Á wãã wo ga: “Taŋgu ɗa, rawge ti taygeti maa tigriŋ fruy wùr debaŋ. Amaa, blam sen sãy bar wùrn le’ baa wùr debaŋ. Wùr hay bay go de baa barge de hẽẽre wùr maa ti tayge sen wo debaŋ wa ɗa.” a Koh de maaga ndo mbo de yiŋgi de re sen wo mono, ndo da’ fruygi de maaga ndo raw ti tayge maa tigriŋ na da’ ge là? Hẽẽrebe maa lan joŋ wo mayse maa kay ndo là? Day de ɗeŋ maa hõn ga ndo jor glog jar lan wo, lan ndo mo hay de jor glog ti tayge maa defay lay là?

‘PRINCIPES’ PO WO 4 GA KAY WO MO MAA ƊIIGI GO NE RE MAAGA NDO YIŊ DE ƁAARA TI TAYGE MAAGA NDO WO NI DEFAY MONO

1.Kaŋ ɗiggi ɓo ti Jeofa. (Siŋ. 37:5) Kazumi ɓi sir Japoŋ hay ig go ti tayge po nen kiŋgi 20. Se men tayge sen go blam maaga à ya’ war ɓe ti joŋre ɓi sir maa tigriŋ mono. Á “hã re ma see [ɓen] ne [Jeofa] doo” na hãge là? Á wãã ga: “Ndi wãã fẽẽre maaga wo de law ndi go ne Jeofa ɓuy, ti maaga ndi hay ko see ɓi go boŋ mono, jiili ɓi maaga hay go de caage debaŋ mono.Tum de maaga ndi tos Jeofa mono, á hã ẽgre maaga ndi hay de sãy ɓe ti me.”

Ndo joŋ joŋge maa ya’ kaŋge ɗiggi ɓo ti Jeofa ciŋ ni là? Doo maaga koo de sãy bii wo de ngeel maa de rumgi ti maa gẽẽge no lay mono, hãge ɓil naa de sãy rege ti maa gẽẽge ciŋ lay. Nikola maaga naa hay wãã le ti ɓe ciŋ la wãã ga, ɗiggi ti saɓlaŋ Abraham, Yeso, lan Pol—jar maaga joŋ wo sacrifis debaŋ maa coge jag Jeofa, kay wo me maa ya’ wer kaŋ ɗiggi ɓi ti Jeofa ciŋ ni debaŋ. Hayga ndo yaŋ frug nen Bible tum no, se kay mo yaŋ maa yãã fẽẽre maaga cor wo mo peel nen naw ɓon ɓuy;  day ndo had fẽẽre maa de woore maaga kay wo ndo yaŋ maa da’ coɓge, lan maa coɓ hẽẽrebe maa ti tayge wo lay.

2. Ngaɓ jag taygen wo wa. (Ekl. 7:10) Jul hay ko see ɓe ti tayge po ga hay sar debaŋ de tayge maaga se hay ni taŋgu de maaga á men Beneŋ go, raw Etasuni mono. Á wãã ga: “ndi hay ɗiggi doo ga ndi de hay wãã fẽn maaga hay hres nen naw ɓi ne wosela ɓuy maaga ndi yiŋ de ɓe mono”. Werga tayge sen hay sar de maaga á hay go de hadge de ɓe mono. Wersen, Jul le’ ɗeege go see jar maa ti taygen wo no. Amaa, blam maaga á da’ wer go ne hẽẽreben wo mono, se coo ɗiggi ɓe. Se wãã ga, “ti ngeel maa hõnla ɓuy ga naa da’ see naa ni mono, jar téebeere wo diŋ sen ɓuy. Sar diŋ wããre ɓaara wo de joŋre ɓaara tawa. Á de el debaŋ maaga naa mo yãã jar ɓuy doo maaga á wo nono.” Wersen, ngaɓ jag tayge ɓo maa taŋgun de tayge maaga ndo ni patala mo wa. Mãygeman naa piyoniyẽ po à ga ɗen ga Anelise wãã ga: “Ndi raw ti sir maa tigriŋ diŋ maa da’ wer fẽẽre maaga tigriŋ maa defay wo, amaa, bay diŋ ga ndi hay de ɗiggi ga fẽẽren mo hay joŋ wo ɓuy doo maa ti tayge maaga ndi hay le ni mo wa.

Jar maa peel tayge mo hay tab wo tayge ɓaara maa taŋguŋ de tayge maaga saara ni mo wa lay. Bay diŋ ga hẽẽrebe maa ti tayge ɓo maa de fayn joŋ wo fẽẽre sar sar ga á joŋ wo tum de ɓlagge na wa. Á de el debaŋ maaga ndo mo da’ wer go ne re maa ti ngeel sen wo de woore ɗa taŋgu maaga ndo wãã ga joŋ mopo no kay mono. (Ekl. 3:​1, 7b) Nen maaga ndo hay joŋ doole jar maaga á mo joŋ wo fẽẽren doo maaga ndo joŋ no mono, de ɓen yaw diŋ ga ndo mo hay hã saɓlaŋ maa ti ngeel ɓe ne hẽẽrebe sen wo yaw.—2 Kor. 1:24.

3.Hã see ɓo ti joŋre ti tayge ɓo maa defay no. (Fil. 1:27) Koh de maaga ya’ge ti ngeel maa tigriŋ wii joŋre wo de wur debaŋ laybla mono, á de el maaga ndo mo hay wo ti tayge ɓo maa de fayn gusi hayga ẽgre ɓo kãã we no. Dedaŋ sen ɓuy, hayga hẽẽrebe bay wo we ko ndo ti taygeti wa, noga bay wo we ko ndo de ngar ngeel maa po wo wa no, hẽẽrebe da’ mbaara nen maa kay ndo yawlà? Lusinda maaga hay ur de mãyre ɓe maa ɓogn wo Afrig du sud fer ɗiggi ga: “Bar ɓi baa wo yaŋ me ga ndi mo dur maa ya’ see ɓi see hẽẽrebe maa ti taygen wo, maa sii wããre de ɓaara, lan ndi mo hay fer wããre ti taygeti wo lay. Wùr wii ne hẽẽrebe wo ga á wo mbaara de kããge maa joŋ taygeti maa sii wããre liŋ ni wùri.”

Joŋge joŋre maa ti nenterse “de tay jag boŋ” de hẽẽrebe maa ti tayge ɓo maa defayn wo diŋ ɗeŋ po maa de woore maa bag jag “joŋre maa ti twaywaŋ maa ni Baan” go. Jar maa peel tayge baa wo yaŋ ne Anelise maaga naa hay wãã le ti ɓe ciŋ la maaga á mo dur maa sii wããre de hẽẽrebe maa ti taygen wo ɓuy. Ɓo’ge ti ɓen hay joŋ na joŋge ne? Á wãã ga: “Ndi ko go deparday tu ga joŋge doo sen no kay diŋ fẽn maaga bul faage me maa ko see ɓi de woore yoo tayge no”. Ni pa mono, hayga ndo yaŋ hã see ɓo ti joŋre maa doo torge tiŋ-Baa, kne’ge fẽẽre maa ɓil ɓe wo kay mo yaŋ maa ɓo’ nen go ne jar lan wo ga ndo ko tayge sen doo tayge ɓo no lay. De maaga ndo ya’ wer joŋ joŋre we ti taygen  no, ndo ko see ɓo yaŋ ti feele maa defay maa ti nenterse debaŋ.

4. Baa barge maa defay. (2 Kor. 6:​11-13) Hayga jar lan ko wo we ga ndo de sãy saara ti no, sen joŋ yaŋ go see ɓo gus maa baa barge de ɓaara. Wersen, hay age go ti taygeti wo taŋgu, lan blam taygeti wo mono, ya’ see hẽẽrebe wo nen maaga ndo mo wãã wããre de ɓaara. Dur maa ɗaw ɗuu ɓaara ti. Hayga ndo yaŋ ɗaw ɗuu jar ti, lan yaŋ desãy see ɓaara no, se joŋ ga jar ya’ le see ɓo, joŋge doo sen no kay mo maaga ndo mo baa barge maa de woore de ɓaara.

Nen maaga ndo mo joŋ hẽẽne maaga ya’ la à yãã mo ga mono, ɓo’ faage ne hẽẽrebe wo maaga á mo ko wo ga ndo diŋ jee maa ela. Maŋ saɓlaŋ Lusinda ga wãã ga: “Patala wùr de barge de jar debaŋ werga, werga wùr hay ɗe hẽẽrebe wo le liŋ ni wùri.”

“HAY WEE YÃÃ WAARE KÃÃRA DE WOORE”

Woge ti taygeti maaga ni diŋ jar maa waare ɓuy bay gus see jar maa po wo wa. Day naa joŋ joŋge maa kay jar maaga a wo le ti tayge naa defay maaga á mo ko wo see ɓaara waare wa là? Apotre Pol baa yaŋ ga “Yãɗ we waare kããra de el” “doo maga Kris yãã we nono.” (Rom. 15:7) Jar maa peel tayge mo hay maŋ wo saɓlaŋ Yeso de joŋge nen maaga jar maaga a wo le de fay mo ko wo see ɓaara waare wa. (Ko ngeel maa de gaɗge “ Mayse kay mo maaga ndo ur we á mo see là.”) Amaa, jar maa ti tayge wo ɓuy, koh hay ba weere kleere wo, wo de kããge maa kay jar maaga a wo le defay maaga á mo ko wo see ɓaara waare wa.

Yããge jar lan wo diŋ ga ndo mo ɗe jar le liŋ ni ɓo, amaa se da wããge pa ga ndo mo kay ra de fẽẽre maaga á wo de sãy ɓaara ti mo lay. Ba doo maaga mãygeman naa po kay mãygemanbe po maaga hay ur le ni ɓaara de fay maa ko sir no, lan ngaɓ ɗeŋ maaga à ɗii mooda wo ɗiigi la ne hẽne. Fẽn maaga mãygeman naan joŋn du’ jiili mãygeman naa maaga a le defay mono, lan kayn maaga á mo ko see ɓe waare wa so.

ƊEŊ MAA GẼẼGE CIŊ

De maaga maapoɗ gẽẽ mono, á naa cee go ɓaale ngaɓa ɗa, blam se le’ puɗgi go de woore kay. Doo sen no lay, maaga ndo ya’ ti tayge maa  tigriŋ mono, ndo hay men fẽẽre maaga maŋ wo jag ɓo go maa joŋ joŋre ne Jeofa go de caa see mo go ɓuy. Nikola wo de Selin wãã wo ga “urgi diŋ fẽn po maa de woore maaga ndo da’ hadge maa de woore ni debaŋ. Á wãã wo pa ga “hadge de jar maa tigriŋ wo lan de ngeel maa tigriŋ joŋ wo ga naa mo had joŋre maa defay maa tigriŋ wo.” Jaŋ-Carle maaga naa wãã le ti ɓe ti tõõge wer la wãã ti ɗeŋ maaga jar maa ɓi feele se da’ wo ni ga: “Ti tayge wùr maa de fayn mono, weere wùrn rug wo go ti ɓaŋ nenterse debaŋ, lan holaŋ ɓaara ya’ ciŋ see Jeofa ni debaŋ lay. Wo joŋge blam no kay mẽ’ mãy wùrn le’ joŋ joŋre ti taygeti maa ti holaŋ naw renam wo, lan wel wùrn kol go jee sii wããre Baa maa bay joŋ batem lay.”

Re mayse hres hayga ngeel maaga ndo nen ɓe bay we ɓo’ faage ne ndo maa urgi wa, doo urgi ti ngeel maaga à de sãy jar sii wããre ti ni là? Joŋ nen maaga ndo mo hay ko see ɓo waare diŋ ti tayge ɓo maa taŋgu no, de joŋ joŋre de yaŋ maaga à baa ra le ciŋ la mono. Hã see ɓo go ti joŋre maa ti taygen de kaŋ ɗiggi ti Jeofa, joŋ nen maaga ndo mo sii wããre de hẽẽrebe wo de baa barge de ɓaara, noga ya’ wer barge ɓo ciŋ ni de bar ɓo maaga hay wo go taŋgu mono. Maapo, ndo hay maŋ ɗiggi maa kay jar maaga a wo le defay ti taygen, noga jar maaga wo de sãy kayge ti mono. Werga dage diŋ joŋre maa de woore maaga à kon see jar maa wer Yeso wo so mono, kayge jar lan wo joŋ maaga ndo mo ya’ maŋ see Jeofa. (Jaŋ 13:35) Ndo joŋ yaŋ go de bawge jag jiili ɓo ga “Joŋre ma doo kay nom kay de cõõre jag Baa.”—Heb. 13:16.

Koh mbe de re maaga jar urgi yiŋ wo de ɓaara mo ɓuy, kretiyẽ wo ngaɓa hay wo mbaara de fruygi, lan kãã wo maa kay jar maa ti tayge ɓaaran wo no! Anelise wãã ga “cooge tayge kay me maaga ndi mo hay had de jar ngaɓa”. Kazumi go matala de bawge jag jiili ɓe ga, de maaga ndo ur we no, Jeofa kay ge ndo maa joŋ fẽn maaga ndo kon ti boŋ ga mono.” Jul hay ko see ɓe na koge lay là? Á wãã ga: “ Barge maaga ndi baa ra kay wo me maaga ndi mo ko see ɓi doo ga ndi liŋ tu nono. Ndi ko see ɓi matala maŋ see tayge ɓin debaŋ nen maaga se gaali see ɓi maa ya’ge ti ngeel maa tigriŋ.”