1. Ndo ɗig ti cwãyn na ɗiggi là?

 SEDEEWA Jeofa da wo cwãy maaga saara da’n ɓil Wããre Baa mono. Hãge ɓil naa de oole diŋ ti ɓe. (Rom. 10:17) Naa go de bawge jag jiili ga Jeofa joŋ tayge kretiyẽ wo diŋ doo “dog maga de ɗaw cwãyn ti ɓe ɓuy [ne]no.” (1 Tim. 3:15) Lan naa go de fruygi debaŋ maa yãɗ jag “jar kluuri [naa] ma pel [naa] koɗ [naa] gen wo”, ga naa wo wer cwãy maa ɓil Bible, lan ɓo’ wo faage maa kay naa maa joŋ dage Baa ne naa mono.—Heb. 13:17.

2. Doo maaga naa da’ ɓil Jag 5:19 no mono, re mayse da’ naa de maaga naa had cwãyn we mo là?

² Amaa, de maaga naa yãã cwãyn we, lan naa yaŋ hoo sug ti yaŋ maaga tayge maa ni Baan baa ne naa no, naa joŋ ge mbe go de yeege ɗa pa. (Jaŋ Jag 5:19.) Manhúulí da ga naa mo men hã ɓil go ti Bible, lan ti yaŋ maaga tayge maa ni Jeofan bag ra ne naa mono.—Efe. 4:14.

3. Wer mayse ga naa mo hay ɗaw cwãyn ngiŋ là? (Efes wo 6:​13, 14)

³ Jaŋ Efes wo 6:​13, 14. Ig la mẽ’ koɗe, Manhúulí bag bii jar maa ti tamsir wo krub ɓuy yaŋ de gete’ ɓen maaga á mo caa wo hee de Jeofa. (Naa. 16:​13, 14) Naa mo hay lag go gor maaga Manhúulí dur yaŋ debaŋ maa dus gete’ ɓen wo maa bag bii jar maa ni Jeofan wo mono. (Naa. 12:9) Diŋ wersen, á de el maaga naa mo hay tum had see naa maa caa ɓil cwãyn wo de gete’ go, lan maa hoo sug ti wããre Baa. (Rom. 6:17; 1 Pi. 1:22)  Naa joŋ ge go de yããge ti wur bon maa de hããn diŋ wer se no!

4. Naa ko ge yaŋ ɓil hadge sen la diŋ mayse là?

⁴ Ɓil hadge sen la, naa ko ɗeŋ joŋre maa de woore po yaŋ wo ɓog maaga kay wo naa maa ko cwãy maaga a le ɓil Bible mono, lan maa hoo sug ti ɓoɗge faage maaga tayge maa ni Jeofan ɓoɗ ne naa mono. Blam sen naa ndal yaŋ ti fẽẽre po wo swa’ ga naa joŋ ra maaga naa mo hay tum de sa’ge see cwãyn mono.

JOŊRE MAA DE WOORE MAAGA KAY WO NAA MAA KO CWÃY NO

5. Joŋge hẽẽne Jeofa kay naa kayge maa ɗaw cwãyn ngiŋ là?

⁵ Joŋ hẽẽne Jeofa. Hayga naa had joŋ hẽẽne Jeofa we no, naa dan debaŋ nen maaga naa joŋ mopo maaga ma’ ɓil ɓe ti boŋ ga hase. Naa joŋ go temge maa caa ɓil maa de el wo de maa de ɓlagge no, maa caa ɓil cwãyn wo de gete’ no, maaga naa mo hay de cõõre jag Jeofa. (Jõõ. 2:​3-6; Heb. 5:14) Naa mo men hẽẽne jee táabay go gẽẽge ne naa ɓil dedaŋ dage naa see Jeofa ti boŋ ga, werga day maapo mo maa de cõõre jag jee táabay co jag Jeofa ga.

6. De ɗeŋ maa hõn ga hẽẽne jee táabay kaŋ wer jar sur ngeel maa 10 wo go mbiɗ ti cwãyn go gesiŋ là?

⁶ Hayga naa yaŋ joŋ hẽẽne do jar téebeere wo dedaŋ Baa no, maapo naa kol hã ɓil ti fẽn maaga bay seege ti ɗiggi Baa wa mono. Naa mo ko wee saɓlaŋ see jar sur ngeel maa 12 maaga hay a wo sur sir maaga Jeofa hay hã ne jar Israyel wo mo ɗa. Jar maa po wo yoo ɓaara 10 hay wo de hẽẽne do jar Kanaŋ wo dedaŋ dage ɓaara see Jeofa. Á fer wo ne kããre ɓaara jar Israyel wo ga: “Naa bay de kããge maa woge dur jarn wo mo hã’ wa, werga á daŋ wo naa egre.” (Kee. 13:​27-31) Ti ɗiggi jee táabay mono, jar Kanaŋ wo de ẽgre dedaŋ jar Israyel wo—ti ɓaŋ sen se diŋ cwãy. Amaa, wããge ga jar Israyel kãã wo maa dur jar Kanaŋ wo ga mono, sen doo ga á bay wo de kaŋ ɗiggi ti Jeofa wa nono. Jar sur ngeel maa 10 hay  joŋ wo nen kaŋ ɗiggi ɓaara diŋ ti mo maaga Jeofa hay gorge ɓe do jar Israyel wo mono. Á de woore maaga á hay ɗig wo ti fẽn maaga Baa hay joŋ see ɓaara de ngar ngeel sen maŋ mono. Á hay joŋ wo we doo sen ne no, á hay ko wo yaŋ ga ẽgre jar Kanaŋ wo go mẽ’ bay maa ngaɓge de maa ni Jeofan wa. Josuwe wo de Kaleb hay wo sar de jar sur ngeel maa bay de deelen wo; á hay wo de sãy maaga saara mo hay de cõõre jag Jeofa ti. Á wãã wo ne ngaɓan ga: “Hayga [Jeofa] joŋ de el we see naa no, á wo yaŋ mbe laa naa ni, á hãn yaŋ mbe ne naa.”—Kee. 14:​6-9.

7. Naa ya’ wer joŋge hẽẽne Jeofa ciŋ ni na de ɗeŋ maa hõnlà? (Ko foton lay.)

⁷ Maaga naa mo ya’ wer joŋ hẽẽne Jeofa ciŋ ni mono, naa mo hay kiɗ wer fẽn maaga co jag ɓe tum de maaga naa le’ maŋ ɗiggi we no. (Siŋ. 16:8) De maaga ndo le’ jaŋ mbaa maa ɓil Bible wo we no, wii jag see ɓo ga: ‘hay wee ti ngeel sen diŋ ndi no, ndi hay maŋ diŋ ɗiggi maa hõn là?’ Ɗig ba doo ga ndi de laa wããre jar sur ngeel maa 10 wo de wããge ga jar Israyel bay wo de kããge maa yãã sir Kanaŋ wa mo ɗa. Ndo de hay hã ɓil ti wããre ɓaara no, lan hay joŋge hẽẽne jee táabay hay maŋ mo yaw; noga dage ɓo see Jeofa hay joŋ kwũy dedaŋ hẽẽne ɓon yawlà? Jar Israyel wo ndar ngaɓa laa wo yããge ga Josuwe wo de Kaleb hay wo wããge diŋ cwãy ga. Ɓo’ge ti ɓen diŋ ga á laa wo ɓil sir maaga Baa hay wãã ga se hã ne hara mo ga.—Kee. 14:​10, 22, 23.

8. Joŋre maa de woore maa hõn ga naa hay dur maa hadge ɓe là, day wer mayse là?

⁸ Ferge ti gesiŋ. Jeofa naa nen cwãy ɓen diŋ ne jar maaga fer wo ti see ɓaara gesiŋ mono. (Mat. 11:25) Naa yãã de ferge ti gesiŋ ga à mo had cwãy ne naa. (Joŋre wo 8:​30, 31) Amaa, naa mo hay tum joŋ hayya ne see naa maaga naa mo kol maŋ ti see naa ciŋ wa. Hayga naa yaŋ far ti see naa ciŋ no, maapo naa le’ ɗiggi ga ɗiggi maa ni naa ti ngeel ɓe doo maaga tayge maa ni Jeofan hãn no lay; noga doo maaga ‘principes’ maa ɓil Bible wãã wo no lay.

9. Naa joŋ joŋge maaga naa mo hay fer ti see naa gesiŋ tum là?

⁹ Hayga naa yaŋ de sãy fer ti see naa gesiŋ tum ti no, naa mo hay ɗig ga naa bay go diŋ mopo halla wa, de maaga naa ngaɓ see naa we de Jeofa, maaga kluu ɓe bay maa ngaɓge de mopo wa mo wa. (Siŋ. 8:​3, 4) Naa mo hay tos Jeofa maaga naa mo kol fer ti see naa gesiŋ, lan maaga naa mo hay yãã ga à mo had naa de fẽẽre. Jeofa kay naa yaŋ maa yããge ga ɗiggi ɓe, maaga naa da’ ɓil wããre ɓen wo de maaga tayge maa ɓen hã ra ne naa, wo go ciŋ ti maa ni naa no. De maaga ndo le’ jaŋ Bible we no, kiɗ fẽẽre maaga ɓo’ wo nen ga Jeofa da ferge ti gesiŋ, lan ga á caa hee de jar maaga mbar wo jiili ɓaara, lan far wo ti see ɓaara ciŋ mono. Day joŋ hayya ne see ɓo debaŋ maaga ndo mo hay fer ti see ɓo gesiŋ de maaga à hã joŋre po maaga joŋ ga jar mo ko mo debaŋ we mo do no.

NAA JOŊ DE SA’ SEE NAA SEE CWÃYN TUM NA DE ƊEŊ MAA HÕNLÀ?

10. Jeofa hay baa diŋ wose maa ɓoɗ faage fẽẽre, lan maa seege de jar maa ɓen wo là?

¹⁰ Hay tum hã ɓil ti ɓoɗge faage fẽẽre maaga tayge maa ni Jeofan ɓo’ ne mono. Le Israyel maa taŋgun mono, Jeofa joŋ joŋre de Moyis wo de Josuwe maa hã jag liŋgi ne jar maa Ɓen wo no. (Jos. 1:​16, 17) Jar Israyel hay wo de bosa’ ti de maaga á hay wo ko jar sen wo doo jar maaga Jeofa hoo ra no mono. Kiŋgi go blam kiskis pur de maaga à caa tayge kretiyẽ wo mono, jar maa wer Yeso maa 12 hay wo ɓoɗ faage fẽẽre ne tayge no. (Joŋre 8:​14, 15) Go blam mono, tayge sen gẽẽ ciŋ, jar kluuri maa Jerusalem kol wo yoo ɓaara ni lay. Hooge  sug ti jag liŋgi maaga jar se de hã ɓiln hãn wo ne hara joŋ nen maaga “ngaɓa ɓaara yaɗ pel ti naw tum” (Joŋre 16:​4, 5) Wara lay, Jeofa ɓo’ bosa’ ne naa ti diŋ de maaga naa yaŋ seege ti faage maaga tayge maa ɓen ɓoɗ ne naa mono. Day á joŋ see ne Jeofa na joŋge de maaga naa bay we hoo sug ti jar maaga á hoo ra maa lagge peel naa wa ne? Maaga naa mo yiŋ jag ti wiigi jag sen mono, naa ko we mo maaga hres de maaga jar Israyel hay wo seege maa woge ti sir maaga Baa hay wãã ga se hãn ne hara mo ɗa.

11. Re mayse hay da’ jar maaga laa wo hoo sug ti Moyis ga mo là? (Ko foton lay.)

¹¹ De maaga jar Israyel wo de seege maa woge ti sir maaga Baa wãã ga se hãn ne hara mono, Kore wo de jar maa wer ɓen laa wo hã ɓil ti Moyis wo de joŋre maaga Baa hay hã ne hẽn do mo ga. Saara wãã ne hẽn ga: “taygen ɓuy, á wo ɓuy bay ɗage, [bay diŋ Moyis tawa wa], [Jeofa] yoo ɓaara.” (Kee. 16:​1-3) Á mbe cwãy ga “taygen ɓuy” hay go de fããge nen Jeofa, amaa, Jeofa hay de baage maa ooge peel diŋ Moyisi. (Kee. 16:28) De maaga á wãã wo de baywoore ti Moyis mono, á wãã wo de baywoore diŋ ti Jeofa. Á kaŋ wo ɗiggi ɓaara bay diŋ ti mo maaga Jeofa dan wa, amaa diŋ ti fẽn maaga saara dan mono: á hay wo de sãy ngeel kluu ti, lan hay wo de sãy raage ɗuu ti. Jeofa taw jar maa peel jar giŋgi ɓen wo go, de jar maa ndar pur wer ɓaaran wo ɓuy. (Kee. 16:​30-35, 41, 49) Naa mbe de kããge maa joŋge wara go de bawge jag jiili ga, jar maaga bay wo hoo sug ti ɓoɗge faage fẽẽre maaga tayge maa ni Jeofan ɓo’n wa, bay wo de cõõre jag Jeofa wa.

12. Wer mayse ga naa mo hay tum kaŋ ɗiggi ti tayge maa ni Jeofa là?

¹² Naa mbe de kããge maa ɗaw hãge ɓil naa ti tayge maa ni Jeofa no. De maaga tayge maa ni Jeofan wãã we ga naa mo coo laage wer ne hadge maa ti ɓaŋ cwãy po, noga naa mo coo ɗeŋ maaga naa mo goŋ Jeofa de ɓe no, jar maa peeln yõõ wo ti maa hoo sug ti jag liŋgi  sen wo ga. (Jõõ. 4:18) Á joŋ wo sen diŋ wer maaga saara de sãy coge jag Jeofa ti dedaŋ fẽẽre lan wo ɓuy. De maaga á le’ wo maŋ ɗiggi we no, á dur wo go de ẽgre ɓaara ɓuy maaga á mo hay de oole diŋ ti wããre Baa, ga diŋ fẽn maaga Sedeewa Jeofa mo hay joŋ wo mo ɓuy no.

13. “Wããre ma cwãy” maa bay ɗagn diŋ mayse là, day naa joŋ joŋre de ɓe na joŋge là?

¹³ “Ɗaw wããre maa cwãy”no. (2 Tim. 1:13) “Wããre maa cwãy” ngaɓ diŋ hadge kretiyẽ maaga à da’ ra ɓil Bible mono. (Jaŋ 17:17) Hadge sen wo diŋ ɓo’ge wer fẽẽre maaga naa hã ɓil ti ɓaara ɓuy mono. Tayge maa ni Jeofan had naa maaga naa mo hay da’ wer go de woore ga, hadge maaga naa hã ɓil ti ɓaara wo de oole diŋ ti wããre maa cwãy maa ɓil Bible no. Maaga naa yaŋ joŋ sen we no, naa joŋ ge de bosa’ ti.

14. De ɗeŋ maa hõn ga jar maa po men wo hã ɓil go ti cwãyn là?

¹⁴ Mayse hres hayga hãge ɓil naa bay we de ooge diŋ ti “wããre maa cwãy” wo wa ne? Naa ko saɓlaŋ po ɗa. Ti siekle maa taŋgun wo le mono, kretiyẽ maa po hay dus wo wããre po ga wur maa ni Jeofan go de age. Maapo leder po hay we wããge nono, à hay ɗiggi ga hay yer ne diŋ apotre Pole. Kretiyẽ maa Tesalonig maa po maŋ wo wur ma ɗiggi ti ɓe de woore ga, hã wo ɓil ti wããre se no, lan ya’ wo wãɗge ɓe ne jar lay. Hayga á hay maŋ wo wur we maa ɗiggi ti fẽẽre maaga Pol hay had ne hara de maaga á hay see ɓaara we no, á hay hã wo ɓil ti wããre sen ga. (2 Tes. 2:​1-5) Pol had hẽẽreben wo maaga á mo hã wo ɓil ti fẽẽre maaga á laa wo ɓuy wa. Maa kay rage peel mono, Pol ɓo’ jag leder ɓe maa de ɓogn ga se yer ne jar Tesalonig wo go de wããge ga: “Ndi yer heege jag sen wo mokay diŋ ndi Pol de see ɓi. Ko we mbay lamba maga ndi kaŋ wo ti kefder ɓin wo mo ɓuy no. Ko we mbay yerge maga ndi yer ra wo mokay no.”—2 Tes. 3:17.

15. Naa joŋ joŋge maa koɗ see naa see gete’ maaga a wo le, day ga ko wo de maŋ cwãy mo là? Ngaɓ saɓlaŋ po ɗa. (Ko foton wo lay.)

¹⁵ Naa had mayse see wããre maaga Pol wãã ne jar Tesalonig wo mo là? De maaga naa laa wããre po we ga bay tabge de maaga naa had  ɓil Bible mo wa, noga wããre po ga go de dusgi jag jar debaŋ we no, naa mo hay lag go de ko re. Le ɓaa ɓi sir Union Sovietique mono, jar hee naa hã wo leder po ne hẽẽre naa wo. Leder sen hay koge doo ga yern le diŋ ngeel kluu Sedeewa Jeofa wo nono. Leder sen hay jor glog hẽẽrebe wo maaga á mo caa wo tayge maa tigriŋ go sara ti see ɓaara de tayge maa ni Jeofa no. Wããre maa ɓil leder sen hay koge diŋ cwãy. Amaa hẽẽrebe maa de deelen laa wo men see ɓaara bag bii ga. Á ko wo go ga wããre maa ɓil leder sen bay tabge de maaga à hay had ra de ɓe mo wa. Wara lay, jar hee naa joŋ wo joŋre de Interned lan de réseaux sociaux wo maa car ɓil naa go, lan maaga naa mo hay nen mbrawge. Nen maaga naa mo hay “men see naa go deparday hãy ɗiggi [naa]” mono, naa mbe de kããge maa koɗ see naa de tab wããre maaga naa laa ne, noga jaŋ ne, de cwãy maaga naa hay had ra mono.—2 Tes. 2:2; 1 Jaŋ 4:1.

16. Doo maaga naa da’ ɓil Rom wo 16:​17, 18 no mono, naa joŋ diŋ mayse de maaga jar po men wo cwãyn we go là?

¹⁶ Hay de tay jag boŋ de jar maaga wo de deele peel Jeofa mono. Baa da ga naa mo goŋ se de tay jag boŋ de hẽẽre naan wo. Naa joŋ yaŋ tum de tay jag boŋ, hayga naa yaŋ de sa’ see naa see cwãyn no. Jar maaga ɗee wo go see cwãyn ɓuy, joŋ wo ga taygen mo hay car ɓil go, diŋ wersen ga Baa wãã ne naa ga naa mo “dee wee see [naa] go see ɓaara” mono. Bay we wa no, maapo na ti see naa le’ hã ɓil ti fẽẽre maaga bay wo diŋ cwãy wa, lan naa men goŋ Jeofa go lay.—Jaŋ Rom wo 16:​17, 18.

17. Naa yaŋ go de ko caa ɓil cwãy no, lan yaŋ lagge ngiŋ no, na da’ mayse wer ɓe là?

¹⁷ De maaga naa ko cwãyn we go, lan naa ɗawn we ngiŋ no, naa joŋ yaŋ jam, lan go de yããge ti nenterse. (Efe. 4:​15, 16) Naa joŋ go de yããge jag hadge gete’ wo de wããre maa debaywoore maa ni Manhúulín wo no, day ti wur bon maa de hããn mono, “Baa maga lag jar jam ɗaw [naa] yaŋ doo ɓe jam” pa—Flp. 4:​8, 9.