Ɓil La Bible. Traduction du monde nouveau mono, Esay 60:1 wãã ga: ‘Ur go ciŋ, O wãy, see mbo sagge so werga poɗag ɓon naa nen we go. Day togoɗ ge maa ni Jeofa go de naage ne ndo ti doo wur nono.’ Ti verse maa peel wo de maa blamn wo mono, “wãy” maaga à hay wããge ti ɓe diŋ Siyoŋ, noga Jerusalem, ga hay diŋ kapital Juda le ti wur maa sen le mono. a (Esa. 60:14; 62:​1, 2) Jerusalem hay ngaɓge diŋ prog maa Israyeln eŋ ɓuy. Wiigi jag yaŋ wo ti versen la ni ɓog ga naa yiŋ ge jag yaŋ ti ɓaara: Maa taŋgun ga, hũnla, lan de ɗeŋ maa hõn ga Jerusalem “ur go ciŋ”, lan dus poɗag maa ti nentersen wo go là? Maa de ɓog ga, wããre Esay sen wo mbaara go de bag jag ti wur maa ni naan la lay yawlà?

Hun, lan de ɗeŋ maa hõn ga Jerusalem “ur go ciŋ”, lan dus poɗag maa ti nentersen wo go là? Jerusalem wo de tiŋ-Baa ɓen hay gwan wo diŋ taabul de maaga jar jwif hay wo le go de caa nen Babilon maa kiŋgi 70 mono. Amaa blam maaga jar Mede wo de Perse hay yãã wo Babilon mono, jar Israyel maaga hay wo le Babilon mo ɓuy hay wo mbaara go ti jawro see ɓaara maa ferge liŋ lan maa ferge ‘wũy tiŋ-Baa ɓaara no. (Esdras 1:​1-4) Tĩĩ wer le nen kiŋgi 537 T.W.N., jar maa de deele po wo yoo wer maa 12 tĩĩ wo joŋre booge Israyel wo de tiŋ-Baa no. (Esa. 60:4) Á hay tĩĩ wo wer joŋ siɗgi jag ne Jeofa, joŋ few mburyug, lan booge tiŋ-Baa no. (Esdras 3:​1-4, 7-11; 6:​16-22) De sen ni mo kay so mono, togoɗge maa ni Jeofan tĩĩ wer lerge go ti Jerusalem—kaŋ nen ga, tĩĩ wer lerge go ti jar maa ni Baan wo no. Saara ti see ɓaara kol wo diŋ kããge poɗag ti jar maaga hay wo nen suŋgu ti nenterse ɓi sir ni mono.

Amaa, profesi maa ni Esay ti ferge ‘wũy fẽẽren hay bay go de bag jag ti Jerusalem maa taŋgun le ɓuy wa. Daŋge jar Israyel laa wo yãã jag Baa tum ga. (Neh. 13:27; Mal. 1:​6-8; 2:​13, 14; Mat. 15:​7-9) Go blam hãã, saara laa yãã Yeso Kris Mesin ga pa. (Mat. 27:​1, 2) Nen kiŋgi maa 70 N.W.N, à hay fer go ɓlag Jerusalem wo de tiŋ-Baa ɓen tigriŋ pa.

Jeofa hay go de wããge peel bol ga fẽn se de baywooren hres ge yaŋ. (Dan. 9:​24-27) Ɗiggi ɓe hay bay ga profesi maa ti ‘wũygi Jerusalem maa ɓil Esay 60 mo bag jag go ti ngeel ɓe keɗed ti Jerusalem maa gesiŋ lan wa.

Wããre Esayn wo mbaara go de bag jag ti wur maa ni naan la yawlà? Debaŋe, wããre sen bag jag ti wãy maa tigriŋ de ngaɓge pa—kaŋ nen ga “Jerusalem maa ciŋ le” no. Apotre Pol wãã ti ɓe ga: “man naa diŋ se so.” (Gal. 4:26) Jerusalem maa ciŋn le diŋ caage ɓil tayge jar maa ni Baa maaga wo le ciŋ, ga à ɗe ra ga Jar peele Baa maa de deele wo mono. “Weere” ɓen wo diŋ Yeso wo de kretiyẽ maa 144 000 ga wo de-sreŋge de nenterse, ga wo de gorge maa rawge ciŋ doo Pol no lay mono. Kretiyẽ maaga nenterse Baa de sreŋ rage wo ɓuy diŋ “sir ma bay ɗage”—“Israyel maga wo diŋ jar ma Baa.”—1 Pi. 2:9; Gal. 6:16.

Jerusalem maa ciŋn le “ur go ciŋ” urgi là, day á “dus poɗag” go na dusgi là? Á joŋ ne de weere ɓe maaga wo de sreŋge de nenterse Baa ti tamsir la mono. Tab fẽẽre maaga á yiŋ wo de ɓaara wo de profesi maaga naa da’ ɓil Esay maa kluuri ɓe 60 mo ɗa.

Kretiyẽ maaga nenterse Baa de sreŋ rage hay “hoo wo go ciŋ” werga á hay da’ wo see ɓaara go nen suŋgu ti ɓaŋ nenterse de maaga aposta dus wo go yoo tayge kretiyẽ maa de sreŋge de nenterse blam húulí apotre wo mono. (Mat. 13:​37-43) Á kol wo go nen do Babilon maa kluu, tayge  jag-Baa maaga bay wo ti ngeel ɓe wa mono. Jar maaga nenterse Baa de sreŋ rage joŋ wo go nen do ɓe hãã ti “tawge fẽẽre maa ti tamsir” wo no, wur maaga tĩĩ wer nen kiŋgi 1914. (Mat. 13:​39, 40) Blam sen mẽ’, nen kiŋgi 1919 mono, á yãã wo le go, day saara tĩĩ wer dus poɗag maa ti nentersen go deparday tu de sii wããre maa de cõõre maa ti twaywaŋ maa ni Baan go ne jare. b De maaga kiŋgi wo hresge go ngaɓa mono, jar maa ti wer sir ɓuy a wo le nen poɗag se no, de jar maaga hay gwan wo diŋ Israyel maa ni Baan mo ɓuy—“waŋre” maaga wo de ngaɓge ɓil Esay 60:3 mono.—Naa. 5:​9, 10.

Ti naw maa peeln wo mono, kretiyẽ maa de sreŋge de nentersen dus wo poɗag maa ni Jeofan yaŋ go de peel ni debaŋ. De ɗeŋ maa hõn ne? De maaga á húu wo we go gesiŋ la no, á joŋ wo go yoo “Jerusalem maa defay,” noga wãy Krisi, kaŋ nen ga jar maa 144,000 ga wo diŋ waŋre lan jar siɗ jag wo mono.—Naa. 14:1; 21:​1, 2, 24; 22:​3-5.

Jerusalem maa defayn joŋ ge joŋre maa de woore debaŋ ti bagge jag Esay 60:1 no. (Tab Esay 60:​1, 3, 5, 11, 19, 20 de Naage nene 21:​2, 9-11, 22-26.) Doo maaga Jerusalem hay diŋ ngeel hayle ngomna maa Israyel maa ɓaa no mono, Jerusalem maa defay, de Krisi, kol ge diŋ ngomna tamsir maa defay lay. Jerusalem maa defay maaga “hay le ciŋ see Baa na ɗii gi le gesiŋ” na ɗiigi là? De kaŋ ɗiggi ɓaara le ti jar maa ti tamsir wo. Ngaɓa jar maa ti tamsir la “raŋ ge wo nen ngel maga á lern go mono”. Á joŋ ge wo go de pogge jag ɓlagge wo de húulí. (Naa. 21:​3, 4, 24) Ɓo’ge ti ɓen joŋ ge diŋ maaga “fẽẽren fer wo go joŋ ge defay ɓuy” doo maaga Esay wo de profed maa tigriŋ hay wããn wo le go ne mono. (Joŋre 3:21) Ferge joŋ fẽẽre se defay tĩĩ wer de maaga Kris hay waŋ mono, day se taw ge go ti tawgeti waŋ ɓe maa kiŋgi 1000 no.