Wer mayse ga blo maaga hay ẽg hoo Rud wãã ga hooge Rud “ɓlag” taabul se là? (Rud 4:1, 6)

Le ɓaa ɓi sir Israyel hayga jobo húu we bay biŋ mbarga, à joŋ taabul ɓe na joŋ ge là? Ɗuu wer maa ɓen yee nen go maa tum yawlà? Jag liŋgi maa ni Moyis hay fer wããre ti wiigi jag sen wo no.

À hay joŋ ge de pay jobo maaga húu go, noga yee ne go doo coo na joŋ ge là? Hẽn ɓe po noga kaw ɓe maa mbaŋ po fer coo payn le. Doo sen no kay so mono, payn joŋ mbe tum diŋ maa jar maa ɓil feele ɓe wo.​—Joŋre Jar Lefid wo 25:23-28; Keege Jar Israyel wo 27:8-11.

Ɗuu feele jee húulín joŋ raage tum na joŋge là? Wer hooge wãy, doo saɓlaŋ maa ni Rud ne no. De maaga hẽn jee húulín hoo wãy no mono, á biŋ wo mbarga we no, à hã ɗuu war wãy maa taŋgun ne mbarga no; day mbarga sen hoo ge taabul maa ni jee húulí no. Hooge wãy le ti wur sen hay diŋ maa ɗaw wãy jee húulín no.​—Dogge Jag liŋgi. 25:5-7; Matiye 22:23-28.

Ko saɓlaŋ maa ni Nawmin ɗa. Á hay diŋ wãy blo po maaga à hay ɗe ge ɓe ga Elimeleg. Blam húulí blo sen de weere ɓe maa ɓogn wo mono, jobo maaga mo ɗaw Nawmi do ɓil feele ni hay bay wa so. (Rud 1:1-5) De maaga á fer wo le Juda mo kay, Nawmi ɓo’ kaa ɓe Rud wii Bowas ga á mo hoo ne. Bowas hay diŋ kaw Elimeleg maa mbaŋ. (Rud 2:1, 19, 20; 3:1-4) Amaa Bowas hay de koge ga kaw ɓe ma mbaŋ de daŋ se ge yaŋ. Jee maaga hay nen hoo Rud taŋgu diŋ se ɗa.​—Rud 3:9, 12, 13.

Taŋgu ɗa mono, jee sen hay yãã mbe ga se coo pay no. (Rud 4:1-4). Koh de maaga á hay mbe de koge ga cooge payn wii suŋgu do se laybla’ mono, se hay de koge pa ga Nawmi go de tããbe bay nen biŋ mbarga maa hoo taabul Elimeleg wa so. Werga á hay yãã pay maa ni Elimelegn le see maa ɓen ni so mono, se hay diŋ fẽn maa de woore nen ɓe.

Amaa de maaga blo sen wo laa ge ga se de hoo Rud ni pa mo kay, se laa dayge coo payn ga. Á wãã ga: “Ti sen mo ta’ ni ndi joŋ nen menge ɓe. Sen bay ma ɓlag taabul ma horge me la wa so.” (Rud 4:5, 6) Wer mayse ga á coo ɗiggi là?

Blo sen la noga jee tigriŋ de hoo Rud we, ga de biŋ mbarga we de ɓe no, taabul Elimeleg hay joŋ diŋ maa mbarga se no. Day hooge Rud hay ɓlag taabul blo sen go na ɓlag ge là? Bible bay fer wããre ti sen wa, amaa à ɗag re maa po wo ti sen ngaɓa.

• Taŋgu, maa po á hay ko ge nen ɓe diŋ rayge ti ngeel de koɗe, werga pay maa ni Elimeleg hay joŋ ge diŋ maa ɓe po tinoo ga. Á hay joŋ ge diŋ maa mbarga Rud po.

• Maa de ɓog no, maa po diŋ werga joŋre ɗaw ge Nawmi wo de Rud hay joŋ diŋ nen do ɓe.

• Maa de swa’ no, maa po diŋ werga Rud hay biŋ weere maa tigriŋ we de blo sen no, taabul ɓe hay joŋ diŋ maa weere maaga á biŋ ra de Rud wo de weere maa ɓen wo no.

• Maa de naa no, hayga blo sen hay bay we de mbarga maa tigriŋ wa no, mbarga maaga á hay biŋ ne de Rud hay hoo taabul ɓe de maa ni Elimelegn ɓuy. Blam húulí ɓe, pay maa ɓen hay joŋ diŋ maa mbarga maaga à ɗen diŋ de ɗuu Elimeleg; bay diŋ de ɗuu ɓe wa. Blo sen laa day ge kaŋ taw taabul ɓen go maa kay Nawmi ga. Á ɗig ga ɗawa ɓen diŋ ga se men faage ne Bowas, jee maaga ya’ wer se ɗaw ra ge do mono. Bowas yãã sen werga se hay de sãy “ferge maŋ ɗúu ɓe ciŋ ti tabul ma horge maa ni ɓe no.”​—Rud 4:10.

Blo sen hay de sãy maaga se mo ɗaw ɗuu se wo de taabul se wo no. Á hay ɗiggi diŋ ti see ɓe tawa. Amaa koh de maaga á hay dur mbe maa ɗaw taabul ɓen mo laybla’ no, ɗuu ɓe yee nen go wara hase. Á da’ togoɗge maaga Bowas da’ mo ga. Bowas kol diŋ moo Mesi, Yeso Krisi. Ko we re sõõre maaga da’ blo sen wer maaga á laa day ge kay jee maaga hay nen kay ge ga mo ɗa!! ​— (Matiye 1:5; Lug 3:23, 32)