1. Naa go de bawge jag jiili naa ga hãylà?

 NAA jar maa ni Jeofan, naa de ko ge ga á da naa, lan da ga naa mo hay nen naw maaga daŋ go de ele. (Rom wo 8:35-39) Naa go de bawge jag jiili naa pa ga jag liŋgi maa ɓen wo diŋ maa kay naa hayga naa yaŋ joŋ joŋre de ɓaara no. (Esay 48:17, 18) Day hayga re da’ naa we naa joŋ joŋge là?

2. Re maa hõn wo ga naa yiŋ de ɓaara là, day sen kaŋ wer naa raw jag go ga hãylà?

² Sedeewa Jeofa wo ɓuy yiŋ wo de re wo. Maapo jobo maa liŋ ni naa joŋ mopo maaga coo jag naa ga. Ceege maa de gayri maŋ jag naa go maa joŋ joŋre ne Jeofa doo maa taŋgun ne no. Maapo fẽẽre maa doo leege wo de maŋge bii ɓlag wo fẽẽre naa go. Noga à joŋ bon naa wer hãge ɓil naa. De maaga naa yaŋ nen gayri wo no, naa raw jag go ga: “Re sen da’ me mo hõ’ diŋ wer mayselà? Ndi joŋ mopo de bay woore yawlà? Sen da wãã ge ga Jeofa bay kaŋ bosa‘ me ti wa so?” Ɗiggi maa sen a ba ne ndo ti ti boŋ ga? Hayga yaŋ no, laa do go gesiŋ wa. Sedeewa Jeofa maa de deele ga hay ɗig wo de maŋ sen wo pur debaŋ. Siŋ wora 22:2, 3; Habakug 1:2, 3.

3. Siŋ wora 34:20 had mayse ne naa là?

³ Jaŋ Siŋ wora 34:20. Ko fẽẽre maa kluuri ɓog ɓil siŋ  sen la ɗa: (1) Jar maa keɗedn jo wo bone. (2) Jeofa yãã naa go jag gayriŋ wo no. Jeofa yãã naa go na yããge là? Ɗeŋ po boŋ diŋ ga á kay naa maa ɗiggi ti naw maa waaran de woore. Koh de maaga Jeofa mbe de wããge ga naa da’ fruygi yaŋ wer joŋre maaga naa de joŋ ge ne se mo laybla’, á bay de wãã ge ga naa yiŋ de bon ga wa. (Esay 66:14) Á jor glog naa ga ɗiggi naa mo hay de kaŋ ge diŋ ti naw maa peel no: wur maaga naa da’ naw maa de woore maaga á da ga naa mo fruy de ɓe tum mono. (2 Korente wo 4:16-18) Taŋgu sen mono, se kay naa jag ren wo tum tu.​—Lawge mani Jeremin wo 3:22-24.

4. Nen hadge sen la naa wãã yaŋ diŋ ti mayse wo là?

⁴ Naa wãã we ti fẽn maaga naa da’ see saɓlaŋ jar maa ɓaa, lan maa wara maaga joŋ wo joŋre ne Jeofa de deele mono. Doo maaga naa kon ge wo peel la ne mono, naa yiŋ de bon maaga hoor wo nen naa do. Amaa hayga naa kaŋ ɗiggi naa we diŋ ti Jeofa no, á men naa go ti boŋ ga hase. (Siŋ wora 55:23) De maaga naa de ko saɓlaŋ sen wo mono, wii jag see ɓo ga: ‘Hayga tee re sen mo hay da’ me we lay no, ndi hay joŋ na joŋge là? Saɓlaŋ sen ya’ wo kaŋge ɗiggi ɓi ti Jeofa ciŋ na ya’ge là? Ndi joŋ joŋre de ɓaara nen naw ɓin na joŋge là?’

5. Bon maa hõn wo ga Jakob joŋ do Laban là? (Ko foto no.)

⁵ Jar goŋ Jeofa maa ti wur maa ɓaan le hay wo yiŋgi de re maaga á hay bay wo gor ra ge wa. Naa wãã we ti Jakob ɗa. Pan ɓe hã jag liŋgi ne hẽn ga á mo raw kiɗ wãy diŋ yoo mãyre maa ni Labann wo, jee maaga hay goŋ Jeofa. Pan ɓe hã bawge go ne hẽn ga Jeofa kaŋ bosa’ yaŋ ne hẽn ti debaŋ. (Tĩĩgi were 28:1-4) Jakob hoo sugi. Á men sir Kanaŋ go, wo ni Laban maaga mãyre ɓe hay ɓoge ​—Leya wo de Rasel. Jakob hay dage diŋ Rasel mãy maa nen klee no, day yãã ga se joŋ joŋre yaŋ ne hẽn kiŋgi renam taŋgu maaga se dan go wãy. (Tĩĩgi were 29:18) Amaa sen joŋ doo sen no ga. Laban bag bii Jakob, hã ne hẽn diŋ Leya, mãy ɓe maa kluu no. Laban wãã ne Jakob ga á mo da Rasel naw blam renam, hayga á joŋ joŋre yaŋ ni kiŋgi renam pa no. (Tĩĩgi were 29:25-27) Laban joŋ de deele ti fẽn maaga á joŋ Jakob de ɓe mo ga. Laban bag bii Jakob nen kiŋgi 20!​—Tĩĩgi were 31:41, 42.

6. Jakob hay soɗ bon maa hõn wo pa là?

⁶ Jakob hay soɗ bon maa tigriŋ wo pa. Feele ɓe hay kluu, amaa jag jar ni ɓe hay bay wo laa kẽẽ wa. Á yee wo hẽn ɓaara Josef go doo gebee ne no. Simeyoŋ wo de Levi dem wo ɗuu feele maa ni Jakob wo de ɗuu Jeofa. Ni pa mono, wãy dage Jakob Rasel húu go de maaga á hay biŋ mbarga ɓe maa de ɓog mono. Jakob hoo tiŋ ɓe wo go Ejipte wer koŋne maa kluu de maaga se hay go de tããbe mono.​—Tĩĩgi were 34:30; 35:16-19; 37:28; 45:9-11, 28.

7. Jeofa ngaɓ go ne Jakob na ngaɓge ga se de ɗawge ɓe do là?

⁷ Koh de bon sen mbaara ɓuy, Jakob men hãge ɓil ɓe go le’ge gesiŋ ti Jeofa wo de fẽẽre maaga á wãã ga se joŋ ra yaŋ ti boŋ ga hase. Jeofa ti see ɓe ngaɓ go ne Jakob ga se de ɗawge ɓe do. Koh de maaga Laban baa mbe bii Jakob laybla’ no, Jeofa hã fẽẽre ne hẽn debaŋ. Ɗig ba ti suse’ maaga Jakob joŋ ne Jeofa de maaga á fer yiŋgi de weel ɓe Josef maaga á hay ɗig ga go de húulí ɓaa ɓaa mo ɗa! Barge maaga Jakob hay sa’ de Jeofa kay ne maa soɗ bon sen wo no. (Tĩĩgi were 30:43; 32:9, 10; 46:28-30) De maaga naa yaŋ  ɗaw barge naan de Jeofa tum no, naa joŋ yaŋ de kããge maa soɗ bon maaga hoor wo nen naa do mo ɓuy.

8. Waŋ Dafid hay ɗig ga se joŋ mayselà?

⁸ Waŋ Dafid joŋ fẽẽre maaga se hay ɗig ga se joŋ ra ne Jeofa mo ɓuy ga. Ko ba ɗa, Dafid hay ɗig taŋgu ga se boo tiŋ-Baa ne Jeofa. Á wãã ne ne profet Nataŋ. Nataŋ fer ne hẽn ga: “Joŋ ɓo fen maga ndo ɗig le ɓil ɓo mono, wer ga Baa yaŋ de ɓo.” (1 Kronig 17:1, 2) Wããre sen jor wo glog Dafid debaŋ. Maapo ga á tõõ ɗiggi ti joŋre se kluun deparday tu.

9. Dafid joŋ joŋ ge de maaga á laa wããre maaga coo jag ɓe ga là?

⁹ Blam sen, Nataŋ fer le de wããre maaga coo jag Dafid ga. “De suŋ ɓen ni mono,” Jeofa wãã ne Nataŋ ga boo ge tiŋ ne se diŋ Dafid ga, amaa diŋ jobo yoo jar ni ɓe wo boŋ. (1 Kronig 17:3, 4, 11, 12) Dafid joŋ joŋ ge de maaga á laa wããre sen là? Á yãã jag Jeofa. Á kaŋ ti ɓe ti bagge jag fẽẽre maaga Salomoŋ hay joŋ ge de sãy ɓaara ti maa boo tiŋ-Baan mono.​—1 Kronig 29:1-5

10. Jeofa ɓo’ bosa’ ne Dafid ti na ɓo’ge là?

¹⁰ De maaga à ɓo’ sug Dafid ga boo ge tiŋ-Baan bay se wa mono, Jeofa joŋ tayge jag de ɓe blam deparday tu sen. Jeofa wãã ne Dafiɗ ga jobo ti wer maa ɓen wãã ge wããre jar yaŋ maa tum. (2 Samyel 7:16) Ɗig ba ɓo ti fruygi maaga Dafid joŋ ge de maaga á laa ga se ɓil sir maa defay maa kiŋgi 1.000 ga wãã re ɓe diŋ Yeso, Waŋ maaga a le ti wer maa ɓen dera mo ɗa! Wããre sen kay naa maa ko ge ga koh naa mo bag ba jag ɗiggi naa go ti fẽn maaga naa hay da ga naa joŋ ne Jeofa wa, Baa naan gor naa de bosa’ maa tigriŋ wo ga naa hay bay ɗiggi ti boŋ ga naa da’ yaŋ wa hase.

11. Bosa’ maa hõn ga kretiyẽ maa taŋgun da’ wo koh de maaga Twaywaŋn hay bay mbe de tĩĩ wer joŋre wa ɗa là? (Joŋre 6:7)

¹¹ Kretiyẽ maa ti wur maa ni Yeson hay wo yiŋgi de re maaga á hay bay wo gor ra ge wa. Ko ba ɗa, á hay wo gorge ga Twaywaŋ maa ni Baa mo a le deparday, amaa saara hay bay de ko wur maaga á nduuge mo wa. (Joŋre 1:6, 7) Day á joŋ wo na joŋge là? Á hay wo de hã see ɓaara ti joŋre siigi wããre Baa no. De maaga á sii wo wããren go ti ngeel sar sar pur mono, saara ko ga Jeofa de ɓo’ bosa’ ne durgi saaran ti.​—Jaŋ Joŋre 6:7.

12. Kretiyẽ maa taŋgun joŋ wo na joŋ ge de maaga koŋne hay le’ mo là?

¹² De ngar ngeel po ta’ koŋne hay le’ go “ti sir krub ɓuy.” (Joŋre 11:28) Kretiyẽ maa taŋgun hay bay wo go de yããge jag ɓe wa. Ɗig ba ɓo ti bon maaga á jo wo do koŋne sen mo ɗa? Sen go tinoo tu ga pããrebe hay wo ɗiggi debaŋ ti maaga saara joŋ joŋ ge maa hã rege ne jar maa liŋ ni saara wo là. Day à wãã ti weere jõõre maaga hay wo de ɗiggi maa sii wããren go ti ngeel ɓuy ga hãy lay là? Maapo jar po hay ɗig wo ga koŋnen mo taw go ɗa maaga saara raw kway. Koh de re sen wo mbaara ɓuy, kretiyẽ soɗ wo ra. Á hay wo mbaara tum sii wããre no, lan saara ɓrew fẽẽre maa do ɓaaran de hẽẽrebe maa Jude wo no.​—Joŋre 11:29, 30.

13. Jeofa joŋ mayse maa de woore ne kretiyẽ wo nen koŋnen là?

¹³ Bosa’ maa hõn ga Kretiyẽ hay da’ wo ti kal koŋne sen là? Jar maaga hay da’ wo kayge ko wo deparday tu ga Jeofa de ɗaw saara do. (Matiye 6:31-33) Á ko wo see ɓaara mbaŋ see hẽẽre ɓaara maaga a wo kay ra ge mono. Jar maaga hay a wo de fẽẽre ne hara, noga jar maaga hay kay wo de ɗeŋ maa tigriŋ da’ wo fruygi maaga a le wer hãge mono.  (Joŋre 20:35) Jeofa kaŋ bosa’ ne hara ti ɓuy wer maaga á soɗ wo ngeel se ga hay coo ne hara peel mono.

14. Re mayse da’ Barnabas wo de apotre Pol là, day se ɓo’ ti go ɓo’ge là? (Joŋre 14:21, 22)

¹⁴ À hay joŋ bon kretiyẽ maa ti wur maa ni Yeson wo, maapo saara hay bay gorge ɓe wa. Naa ko we bon maaga hay da’ Barnabas wo de apotre Pol de maaga á hay wo sii wããre ɓil prog maa Listre mo ɗa. Taŋgu, jar maaga hay wo co’ sug ɓaara hay yãã wo waare ɓaara de woore. Amaa blam mo kay, jar hee ɓaaran raw wo “jãɗ nen ngaɓa no,” day jar maa po wo yoo ngaɓan tu raw wo ɓod Pol, men wo ne de ɗiggi ga á go de húulí. (Joŋre 14:19) Barnabas wo de Pol ya’ wo wer sii wããre ɓaaran ti ngeel maa tigriŋ. Se ɓo’ ti go na ɓo’ge là? Á kol wo “jar go debaŋ diŋ jar maa wer Yeso”, lan wããre ɓaaran wo de saɓlaŋ ɓaaran coɓ wo hẽẽre ɓaaran wo debaŋ. (Jaŋ Joŋre 14:21, 22.) Jar debaŋ kol wo go jar maa wer Yeso wer ga Pol wo de Barnabas soɗ wo bon mono. Hayga naa men joŋ joŋre maaga Jeofa hã ne naa do we go ga lay no, naa da’ bosa’ yaŋ lay.

15. Saɓlaŋ hẽn naa Alesaŋder Makmilaŋ had mayse ne ndo là?

¹⁵ Taŋgu 1914 mono, Jar maa ni Jeofan hay wo gor bagge jag fẽẽre ngaɓa debaŋ. Naa ko we ba saɓlaŋ hẽn naa A. H. Makmilaŋ ɗa. Doo jar maa tigriŋ wo ngaɓa ti wur maa ɓen no lay, Makmilaŋ hay ɗig ɓen ga se da’ge poɗge maa rawge ciŋ go mbaŋ tu. Nen wããre maaga á sii nen Few Waŋ 1914 mono, á wãã ga: “Maapo ga kay diŋ siigi wããre ɓi maa blam taw no.” Amaa se joŋ diŋ siigi wããre ɓe maa blam tawn ga. Hẽn naa Makmilaŋ yer blam ga: “Jar maapo joŋ hay wo go gor rawge ciŋn deparday tu.” Á wãã pa ga: “Fẽn maaga naa mo hay joŋ diŋ ga naa mo hã see naa go ti joŋre maa ni Waŋkluuu no.” Hẽn naa Makmilaŋ hay go de hã see ɓe ne joŋre debaŋ. Á hay de baa wuu sii wããren debaŋ. Á jor glog hẽẽrebe maaga à hay laa ra ti daŋgay wer ga á day wo maŋ soode ga debaŋ. Koh de maaga á hay taw mbe tããbe go laybla’, á hay woge tum ti taygeti wo. Hẽn naa Makmilaŋ da’ mayse wer maaga á joŋ joŋre ne Jeofa debaŋ là? Nen kiŋgi 1966 taŋgu húulí ɓe, á yer ga: “Hãge ɓil ɓi woo go ti boŋ koh me’ ga has.” Á diŋ joŋre maa de woore maa wosela ɓuy yoo naa maaga naa mo joŋ doo sen nono​—ɓuy ɓe de maaga naa hay soɗ bon we debaŋ ga naa hay bay de koge ga á ig doo sen no wa!​—Hebre wo 13:7.

16. Re gayri mayse hay hoo nen Herbert Jenin wo de wãy ɓe do là? (Jag 4:14)

¹⁶ Sedeewa Jeofa wo ngaɓa debaŋ wo ti bon do ceege maaga hoor wo nen ɓaara do. Sen diŋ saɓlaŋ hẽn naa Herbert Jenin b ga wãã ti cõõre joŋre maaga saara da’ de wãy se ti joŋre ne Jeofa ɓi sir Gana mono. Amaa blam mo kay à da’ ceege maa de hãã debaŋ see ɓe. De maŋ wããre maaga à da’ ɓil Jag 4:14, mono, hẽn naa Jenin ɗe cege sen ga “Re maa ‘toŋ’ ga à hay bay gorge ɓe wa.” (Jaŋ ne.) Á yer ga: “Jag re sen mono, wùr men sir Gana go, men bar wùr wo go, wùr fer ɓi sir Kanada [joŋ dogda].” Jeofa kay hẽn naa Jenin wo de wãy ɓe maa lagge ti joŋre ɓaaran de deele koh de gayri maaga á yiŋ wo de ɓaara mono.

17. Saɓlaŋ hẽn naa Jenin kay hẽẽre naa po wo na kayge là?

¹⁷ Wããre maaga à da’ ti hẽn naa Jenin kay jar tigriŋ wo debaŋ. Maygeman naa po yer  ga: “Wããre po du’ jiili ɓi go ti boŋ doo maga ndi hay jaŋ wããre maa ti Herbert ne ga . . . Maaga ndi jaŋ ga hẽn naa Herbert men joŋre ɓen maa rawge joŋ dogta see ɓe kay me debaŋ maa ɗiggi de woore.” Hẽn naa po yer doo sen ne pa ga: “Ndi joŋ joŋre doo jobo maa peel tiŋ-Baa nen kiŋgi 10, amaa ndi men wer ceege maaga hay gay me ge. Ɗiggi ɓi hay gay me go debaŋ hãã nen maaga jaŋge wããre ti jar hay kol see ɓi gayri. . . . Amaa durgi maaga hẽn naa Jenin dur coɓ me debaŋ.” Sen ɓo’ sug naa ga de maaga naa lag we ngiŋ jag re maaga hoor wo nen naa do no, se kay maa jor glog jar tigriŋ wo. Koh ngeel mo see ba doo maaga naa hay da ne wa laybla’ no, naa mbe de kããge maaga naa joŋ tum diŋ saɓlaŋ ti mbaŋ wããre Baa, lan ti mbaŋ durgi.​—1 Piyer 5:9.

18. Doo maaga naa ko ti foton ne mono, naa da’ mayse see saɓlaŋ wãy dwur maa Nigeria là?

¹⁸ Ceege COVID-19 hay gay jar maa ni Jeofan wo debaŋ. Sen doo saɓlaŋ wãy dwur po Nigeria ga hay gwa’ go do koɗe, bay rege wo de suŋgu. Ti wur po de toŋ, mãy ɓe wii jag ɓe ga saara re mayse blam maaga malori maa me’n mo ta’ taw we go là. Maygeman naan fer ne mãy ɓen ga saara mbe go de gwa’ge do koɗe, bay rege wo de suŋgu, amaa ga saara mo joŋ rege maaga gwa’ ni me’ mo go doo wãy dwur maa Sareptan nono, blam saara mo kaŋ ɗiggi sara diŋ ti Jeofa. (1 Waŋre wo 17:8-16) Taŋgu maaga á ɗig wo ti rege maa wur sen de ceg mono, hẽẽrebe po a wo de rege ne hara. Regen hay pur nen joŋ naw ɓaara de daŋ 14. Wãyn wãã ga se hay bay de ɗiggi ga Jeofa hay co’ sug de woore ti wããre maaga se hay wããge ne mãy sen mo wa. Doo sen so de maaga naa yaŋ kaŋ ɗiggi naa ti Jeofa no, koh re maaga hoor wo nen naa do wara ya’ wo naa see Jeofa.​—1 Piyer 5:6, 7.

19. À hay joŋ bon Alexi Yershov na joŋge là?

¹⁹ Nen kiŋgi maa glog wo le la, hẽẽre naa  wo ngaɓa debaŋ dur wo jag bon maaga saara hay bay gorge ra ge wa. Naa ko saɓlaŋ hẽn naa Alexi Yershov, ɓi sir Rusi ɗa. De maaga hẽn naa Yershov joŋ batem nen kiŋgi maa 1994 mono, Sedeewa Jeofa hay wo de faage ti maa sii wããre. Nen kiŋgi maa glog wo le la ren coo wo ɓi sir Rusi. Nen kiŋgi maa 2020, soode nduu wo glum tiŋ ɓe, lan yãã wo fẽẽre ɓe debaŋ. Few blam mbage, gomna ‘waa kiida ne hẽn naan ti, caa re ne hẽn see ga á diŋ jee ɓlag siri. Ni pa mono, jee maaga hay maŋ videyo maaga gomna caa re ne hẽn see de ɓe diŋ jobo maaga á hay had Bible ne hẽn nen kiŋgi halla. Sen diŋ kaŋge taw mãy mo kay ne!

20. Hẽn naa Yershov ya’ hãge ɓil ɓe ciŋ ti Jeofa na ya’ge là?

²⁰ Joŋge bon maaga à joŋ hẽn Yershov ɓo’ mbe ti we go de woore yawlà? Ãã. Barge ɓe de Jeofa ya’ ciŋ ni debaŋ. Á wãã ga: “Wùr hay tosge de wãy ɓi ceɓ debaŋ. Ndi wo koge so ga ndi kãã maa soɗ re sen bay kayge maa ni Jeofan ga.” Á wãã ni pa ga: “Fruggi nen wããre Baa maaga ndi boŋ ɓi kay me maa soɗ bon sen wo no. Ndi hay ɗiggi ti jar maaga hay wo de hã ɓil ɓaa wo mono. Wããre maa ɓil Bible ga wãã wo ti de el lagge eŋ wo de kaŋge ɗiggi ti Jeofa mbaara deŋ.”

21. Naa wãã nen hadge sen la diŋ ti mayselà?

²¹ Naa ko nen hadge sen la na din mãy? Naw maa nen wur maa waran raw de gayri debaŋ. Mbe de sen ɓuy, Jeofa kay jar maaga kaŋ wo ɗiggi ti ɓe tum mono. Doo verse maaga à naa hadgen le ɓil ɓe mono: “Bon daɗ je ma keɗed pur debaŋ, day Manwur [Jeofa] yããn go jag ɓaara ɓuy.” (Siŋ wora 34:20) Daga naa mo hay kaŋ ɗiggi diŋ ti re maaga daɗ wo naa mo wa, amaa diŋ ti ẽgre maaga Jeofa hã ne naa maa soɗ re sen wo mono. Doo apotre Pol no lay mono, naa wãã yaŋ ga: “Ndi de kããge ma ɗaw see ɓi mbi soɗ bon ma honla ɓuy wer egre Yeso kris [jee] maga coɓ ndi mono.”​—Filip wo 4:13.