1. Wer mayse ga naa fer wããre ti taygeti naa wo là?

 WER mayse ga naa wo ti taygeti naa wo là? Taŋgu ɗa diŋ maa togoɗ Jeofa. (Siŋ wora 26:12; 111:1) Naa wo ti taygeti wo pa diŋ maa jor glog kããra nen wur maa de gayrin wo la no. (1 Tesalonig wo 5:11) De maaga naa maŋ doo ciŋ maa fer wããre ti taygeti wo mono, naa de joŋge diŋ nen maa naa ti bagge jag fẽẽre se ɓog wo no.

2. Naa yiŋ jag ti taygeti naa wo ti hadge maa hõn wo là?

² Ti naw renam tum, naa fer wããre ti taygeti naa wo. Doo ti hadge Ngeel gor ti jare, naa fer wããre ni. Ti taygeti Seele krétiyẽ de siigi wããre mono, naa fer wããre ti kiɗgi cõõre wããre maa ni Baa no, ti hadge kefder maa nen naw renam no, lan ti ngeel maa tigriŋ wo pa.

3. Wer mayse ga yiŋgi jag ti taygeti joŋ gayri see naa là, Hebre wo 10:24, 25 kay naa kayge là?

³ Naa de sãy goŋ Jeofa ti, lan de sãy jor glog hẽẽre naa maaga naa goŋ ne de kããra ti lay. Amaa maapo ferge wããre de gayri do naa. Noga ferge wããre joŋ hẽẽne ne naa, noga pa à bay baa naa tum de maaga naa maŋ do ciŋ mo wa. Mayse kay naa ti ngeel sen là? Naa da’ yiŋgi jag maapo ti ɓe nen leder maaga apotre Pol ɓo’ ne kretiyẽ maa Hebre  wo mono. De maaga á hay wãã ti de el age ti taygeti wo mono, á riŋ ga naa mo hay baa wuu diŋ ti “jorge glog kããra.” (Jaŋ Hebre wo 10:24, 25.) Naa maŋ do go ciŋ gus de maaga naa da’ we ga yiŋgi jag naa jor glog hẽẽre naa yaŋ wo no. Hayga à bay we hã wããre ne naa ceɓ wa no, naa mo joŋ we de fruygi ti maaga hẽẽre naa maa tigriŋ wo de yiŋ jag mono.​—1 Piyer 3:8.

4. Fẽẽre maa swa’ ga naa ndal ti ɓaara ɓil hadge sen la diŋ mayse wo là?

⁴ Ti hadge sen la, naa ko yaŋ taŋgu diŋ ɗeŋ maaga naa jor glog kããra jorge ti tayge maa klee ga jar bay ni ngaɓa wa mo la. Blam naa ko yaŋ diŋ ɗeŋ maaga naa jor glog kããra ti tayge maa kluu ga jar hoo do ciŋ ngaɓa maa yiŋ jag mono. Ti tawgeti ɓe mono, naa ndal yaŋ ti ɗeŋ maaga wããre naa jor glog jar lan wo jorge la mono.

5. Naa jor glog kããra na jorge de maaga jar bay we ti taygeti ngaɓa wa là?

⁵ Ti tayge maa klee noga ti groub mono, jar hoo do ciŋ bay ngaɓa wa. Day maapo jee hadgen gor maaga jar mo hoo do ciŋ ɗa maaga ni se hã wããre ne jobo kay. Taygetin kol bay de cõõre wa so, jor glog jar ga lay. Ndo joŋ joŋge là? Bag jag see ɓo go tum maa maŋ do ciŋ. Hayga ndo yaŋ joŋ ge doo sen ne no, ndo jor glog jar tigriŋ wo maa hoo do ciŋ lay.

6-7. Naa joŋ joŋge maaga hẽẽne ferge wããre mo joŋ naa wa là?

⁶ Hayga hẽẽne yiŋgi jag yaŋ joŋ ndo no, ndo joŋ joŋge là? Fẽn sen de joŋ jar debaŋ. Maa jor glog hẽẽre ɓon wo mono, dur maa naa blum hẽẽne maa joŋ mo ge no. Ndo joŋ na joŋge là?

⁷ Ndo da’ kayge yaŋ ɓil hadge Ngeel gor ti jare b maa taŋgun wo le go. Taŋgu, bag jag see ɓo go de woore peel bole. (Jag jõõ wo 21:5) Ndo laa wer fẽn maaga à had ne we go de woore, ndo ko see ɓo go de caage maa maŋ do ciŋ lay. Maa de ɓog no, wãã wããren jag de dogray. (Jag jõõ wo 15:23; 17:27) Ferge wããre maa jag de dogray joŋ hẽẽne debaŋ ga. Wããre maa jag de dogray joŋ de wããre ɓil boŋ noga ɓoge, se laa go ne hẽẽre naa wo gus de daŋ maaga ndo wãã ngaɓa mono. Hayga ndo yiŋ jag we diŋ de wããre maa jag ɓo no, ndo ngaɓ go diŋ ga ndo hay le go de bag jag see ɓo de woore peel bole, lan ga ndo de laa wer ne fẽn maaga ndo wãã ne de woore lay.

8. Jeofa ko durgi naa wo na koge là?

⁸ Day hayga ndo dur we maa joŋ joŋre de yaŋ sen wo, ga hẽẽne ferge wããre de daŋ boŋ noga ɓog yaŋ joŋ ndo ɗa no, ndo joŋ joŋge là? Hay go de baw ge jag jiili ɓo ga Jeofa de ko durgi maaga ndo dur maa joŋ fẽn maa de ngar ɓo mono. (Lug 21:1-4) Jeofa bay wii mopo do naa de daŋ maaga ẽgre naa kãã maa joŋ ge mo wa. (Filip wo 4:5) Ɗig go ti fẽn maaga ndo kãã yaŋ maa joŋge mono, hã see ɓo go maa joŋge ɓe, lan tos maaga hẽẽne mo joŋ mo wa. Tĩĩ wer ɓe diŋ de ɗiggi ga ndo fer ti wããre jag de dogray ɗa.

9. Re maa hõn ga naa yiŋ de ɓe ti tayge maa kluuri wo là?

⁹ Hayga jar yaŋ ɓil tiŋ-Baa ngaɓa se diŋ re pa. Maapo wer ngaɓan jar maapo hoo mbaara do ciŋ, amaa à hã wããre ne hara  swẽd ga. Sen diŋ saɓlaŋ maygeman naa Daniyele, ga yiŋgi jag ti taygeti coo jag ɓe debaŋ. c Á ko ne doo ɗeŋ maa goŋ Jeofa, lan maa jor glog jar la no; á ko pa ga sen kay se maa ya’ wer hãge ɓil ciŋ ti fẽẽre maaga Bible had ra mono. Amaa de maaga á ya’ ti tayge maa kluu po mono, à hay bay hã wããre ne hẽn ceɓ wa so​—maapo taygetin taw go ɓuy à hã wããre ne hẽn koh boŋ ga. Á wãã ga: “á hay cee me ge debaŋ. Sen doo ga à naa da’ge go me jag nono. De maaga à joŋ mbe ne toŋ pa, toŋ pa mono, ndo kol wii jag see ɓo ga à joŋ mo hã’ na bay do re’ wa yawlà.”

10. Naa joŋ joŋge maaga hã wããre ne naa ti taygeti là?

¹⁰ Tee re maa ni Daniyele da’ mo we go ti boŋ yawlà? Hayga yaŋ no, maapo ndo kal wããge ne see ɓo ga ndo maŋ do ciŋ ga so, ndo gwa’ laa taygetin de sug tawa tu. Amaa men fer wããre ti taygeti wa. Ndo joŋ na joŋge là? Maapo ndo da’ yaŋ ga bag ge jag see go peel bol maa yiŋ jag ɓaale pur ti taygeti diŋ mopo maa de woore. Day hayga à baa mo we taŋgu ti tĩĩgi wer hadgen tu ga no, maapo ga à baa mo yaŋ de maaga à de seege de hadgen mono. De maaga ndo de bag jag see ɓo see hadge Ngeel gor ti jare mono, ɗig ti ɗeŋ maaga paragrafn wo boŋ boŋ ɓuy wo de sa’ge see kluu hadgen na sa’ge la. Hayga ndo joŋ we doo sen ne no, ndo joŋ yaŋ tum de mopo maa wããge ti hadge no. Ni pa ndo joŋ go de bag jag see ɓo see paragraf maaga wãã wo ti cwãy maa kuɗum wo, ga wo gayri maa naa wer mono. (1 Korente wo 2:10) Wer mayse là? Wer ga ti ngeel sen wo jar hoo do ciŋ bay pur wa. Day ndo joŋ joŋge hayga ndo joŋ fẽẽre sen wo la we, amaa de sen ɓuy à bay hã wããre ne ndo wa pa là? Wo go see jee seege de hadgen peel bol maa wiigi ɓe ga ndo da yiŋ jag ti ngeel maa kay noga maa kay no.

11. Filip wo 2:4 jor glog naa maa joŋ mayselà?

¹¹ Jaŋ Filip wo 2:4. Jeofa ɓo’ Pol ga á mo jor glog kretiyẽ wo maaga á mo ɗig wo ti see ɓaara tawa wa. Ndo joŋ joŋre de yaŋ  sen ti taygeti wo na joŋge là? De ɗiggi ga jar lan wo de sãy yiŋ jag ti doo ndo no lay.

12. Ɗeŋ maaga daŋ go ga naa jor glog jar lan ti taygeti de ɓe diŋ maa hõnlà? (Ko foton lay.)

¹² Ko ba ɗa. De maaga ndo de ndalge de kããre ɓo wo mono, ndo yãã mbo wããren yaŋ deŋ boŋ tu, men ra wããge ga yaw? Bay wa hase! Ndo joŋ de sãy maaga á mo wãã wo ti lay. Doo sen no lay mono, naa da ga jar lan mo wãã wo wããre ti taygeti lay. Ɗeŋ maaga boŋ daŋ go maa jor glog hẽẽre naa wo diŋ de men ra ge naa nen hãge ɓil ɓaaran go. (1 Korente wo 10:24) Naa ko we ɗeŋ maa joŋ sen ɗa.

13. Naa joŋ joŋge maaga naa men wããre ne jar lan wo lay là?

¹³ Naa wãã wããre we jag de dogray no, se men ngeel ne jar tigriŋ wo maa fer wããre lay. Jar maa peel tiŋ-Baa wo de jar sii wããre maaga wo go de ruggi mo hay joŋ wo diŋ saɓlaŋ ti ɓaŋ se no. Koh wããre ɓon mo hay ba jag de dogray laybla’ no, wãã ti fẽẽre ngaɓa wa. Hayga ndo wãã we go ti fẽẽre maa ɓil paragrafn ɓuy, mopo gwa’ ni maaga jar lan wãã ga so. Yaŋ yaŋ ba wo ɓil paragraf sen la ɓoge: wãã wããre jag de dogray, lan wãã ti fẽẽre ngaɓa wa. Hayga à hã wããre we mo taŋgu no, se bay ba de woore maaga ndo yiŋ jag ti maapo boŋ wa yawlà.

14. Mayse kay naa maa ɗiggi ti maaga naa maŋ do ciŋ ɓaale gãyla là? (Ko foton lay.)

¹⁴ Joŋ nen maaga do ɓo mo hay ciŋ tum wa. Hayga do naa yaŋ ciŋ tum no, á joŋ doole jee seege de hadgen maaga á mo hã wããre mo ceɓ koh de maaga jar lan bay wo de da’ nen maa wããge wa ɗa. Sen woo do jar lan wo go maaga á mo maŋ wo do ciŋ.​—Eklesiyaste 3:7.

15. (a) Hayga à baa naa we no, naa mo hay ɗig ɗiggi là? (b) Jar seege de hadgen mo hay ɗig wo ti jar ɓuy na ɗiggi là? (Ko ngeel maa de gaɗge “ Hayga yaŋ seege de hadgen diŋ ndo no.”)

¹⁵ De maaga jar yaŋ hoo do ciŋ pur no,  naa da’ nen wãã wããre ɓaale pur doo ga naa hay da ne ga. Day maapo jee seege de hadgen hã mbe wããre ne ndo ga lay. Á cee mbe, amaa ɓil naa mo sõõ ti maaga à baa naa ga wa. Eklesiyaste 7:9.

16. Naa jor glog jar maaga yiŋ wo jag na de ɗeŋ maa hõn wo là?

¹⁶ Hayga à bay we hã wããre ne ndo doo ga ndo hay da ne wa no, á bay ba de woore maaga ndo co’ sug jar la no, blam ndo joŋ suse’ ne hara ti wããre ɓaaran wa yawlà? Keege ɓo sen jor glog hẽẽre ɓon wo doo wããre maaga ndo hay wãã ti taygetin no lay. (Jag jõõ wo 10:21) Joŋge suse’ diŋ ɗeŋ maa jor glog kããra pa.

17. (a) Pããrebe kay wo weere ɓaara wo maa kne’ nen wããre maa de ngar ɓaara wo na kayge là? (b) Doo maa ɓil videyon mono, fẽẽre maa 4 ga kay naa maa kne’ yiŋgi jag maa de woore diŋ mayse wo là? (Ko ngeel laa wer maa gesiŋ.)

¹⁷ Naa jor glog kããra ti taygeti naa wo na de ɗeŋ maa hõn wo pa? Hayga ndo yaŋ diŋ pããbe no, kay weere ɓo wo maa fer wããre maa de ngar kiŋgi ɓaara. (Matiye 21:16) Day wur maapo wo hadgen wãã diŋ ti seele maa bay ɗage, noga ti re maa ti holaŋ war wo de wãy; ti hadge maa de maŋ sen wo mo kay, paragraf maa de ngar weere wo joŋ ni boŋ noga ɓog tu. Kay weere ɓo wo maa  koge wer mayse ga à bay hã wããre ne hara tum de maaga á hoo wo do ciŋ wa là. Joŋge doo sen no kay kay ra maaga ɓil ɓaara mo sõõ wa, de maaga à hã wããre we ne hara ga no.​—1 Timote 6:18. d

18. Naa joŋ joŋge maaga à mo wii ga naa wa là? (Jag jõõ wo 27:2)

¹⁸ Naa ɓuy de kãã ge maa fer wããre maaga togoɗ Jeofa, lan maa jor glog hẽẽre naa maa ti jag-Baa wo. (Jag jõõ wo 25:11) Da ga naa mo hay wããge ti see naa debaŋ wa, koh de maaga á bay mbe diŋ ɓlagge ti maaga naa wãã ti see naa wa mono. (Jaŋ Jag jõõ wo 27:2; 2 Korente wo 10:18) Amaa ane, da ga naa mo dur maa wããge debaŋ diŋ ti Jeofa, ti Wããre ɓen, lan ti tayge maa ɓen ɓuy. (Naage nene 4:11) Hayga paragraf yaŋ wiigi ga naa mo wãã diŋ wããre maa ti see naa no, ni faage mbe de hãge ne naa. Saɓlaŋ sen yaŋ ɓil paragraf maa peel la no.

19. (a) Naa da’ mayse ti maaga naa yaŋ ɗig ti ti jar lan wo ti taygeti wo là? (Rom wo 1:11, 12) (b) Mayse coo jag ɓo ti yiŋgi jag ti taygeti wo là?

¹⁹ Jag liŋgi bay go ti’ ti ferge wããre ti taygeti wa, amaa naa mo dur we maaga wããre naa mo hay wo jor glog kããra. Sen da wããge ga naa mo hay far do ciŋ debaŋ. Noga, ga naa mo fruy ti maaga naa fer wããre we no, lan ti maaga jar lan da’ wo nen maa fer wããre we lay no. Hayga naa yaŋ ɗiggi ti jar lan wo ti taygeti naa wo no, naa “coɓ nen de kããra.”​—Jaŋ Rom wo 1:11, 12.