1-2. Naa mo hay joŋ mayse taŋgu maaga sir maa defayn a mo là?

 NAA joŋ suse’ ne Jeofa ti maaga á wãã ga se coo tamsir maa waran yaŋ go de sir maa defay de deele mono. (2 Piyer 3:13) Koh de maaga naa bay mbe de ko wur maaga á ndu mo wa laybla mono, fẽẽre maaga nen naa de ko ra ge ngaɓ wo go ga á ig le ga so.​—Matiye 24:32-34, 36; Joŋre 1:7.

² Fẽn maaga naa nen joŋge patala diŋ ga, koh naa mo hay ba go de iggi ti jag-Baa gemãyla, wosela ɓuy mo hay ya’ hãge ɓil ɓe ciŋ ti wããre se no. Wer mayselà? Werga hãge ɓil maa kluu woo mbe go lay. Apotre Pol ɗe hãge ɓil maaga woo go gus ga “ɓlagge maga hag wo naa bay gaali.” (Hebre wo 12:1) Maaga hãge ɓil naa mo woo go wa mono, naa frug we nen fẽẽre maaga ngaɓ wo go ga sir maa defayn joŋ ge yaŋ cwãy mono. Hebre wo 11:1.

3. Ɓil hadge sen la naa wãã yaŋ ti mayse wo là?

³ Ɓil hadge sen la, naa ndal yaŋ ti ɗeŋ po wo swa’ maaga ya’ wo hãge ɓil naa ciŋ ti wããre maaga Baa wãã ga se fer kol tamsir yaŋ go defay mono: (1) de ɗig gi debaŋ ti cíi Yeso maaga kaa go wer naa mono, (2) de ɗig gi ti ẽgre Jeofa, lan (3) de hãge wur ne fẽẽre maa ti nenterse wo. Naa ndal yaŋ ti ɗeŋ maaga wããre maaga Jeofa hã ne Habakug jag ya’ wer hãge ɓil naa ciŋ wara ya’ge la. Taŋgu ɗa mono, naa ko we re po maaga naa  yiŋ de ɓaara patala, ga wii wo hãge ɓil ti sir maa defay maaga Baa ngaɓ mono.

RE MAAGA WII WO HÃGE ƁIL MAA DE ẼGRE

4. Farge ɗiggi maa ti ɓaŋ maa hõn wo ga wii hãge ɓil maa kluu do naa là?

⁴ Tum nen naw naa ɗig ɗiggi maaga wii wo hãge ɓil do naa debaŋ; doo tayge de kããrebe wo, joŋge hrage, woge ti lakol, dage wãy noga ware, gẽẽge weere wo, lan joŋre. Á de woore maaga naa wii jag see naa ga ‘ɗiggi maaga ndi far ra mbaara go de ngaɓ ge ga sir maa defay maa ni Baan nduu yaŋ coo tamsir maa de ɓlagge maa waran go la mbaŋ yawlà? Noga ɗiggi jar maaga bay wo hã ɓil ti tenen maa tum wa hãy wo maa ɓi no?’ (Matiye 6:19, 20; Lug 12:16-21) Naa far ɗiggi maa de woore wo yaŋ hayga naa yaŋ de hã ɓil ga sir maa defayn go de kos nduugi no.

5-6. Wer mayse ga naa de sãy hãge ɓil maa de ẽgre debaŋ ti nen ngeel maa de gayri wo là? Naa wer ɓe.

⁵ Naa yiŋ de gayri maaga wii wo hãge ɓil maa de ẽgre do naa lay. Maa po se diŋ joŋge bone, ceege maaga pẽẽ de gayri, noga fẽẽre maaga joŋ wo ga naa mo laa do go gesiŋ. Taŋgu maa po naa baa mbe wer see naa go maa dur gayrin ɗa. Amaa hayga á yaŋ bay wo go taw ge wa doo gayri maa po wo no, se wii hãge ɓil maa de ẽgre do naa maaga naa mo joŋ joŋre ne Jeofa de fruygi.​—Rom wo 12:12; 1 Piyer 1:6,7.

⁶ De maaga naa yaŋ nen gayri no, naa kal ɗiggi doo ga sir maa defay maa ni Jeofan nduu ga has nono. Sen da wãã ge ga hãge ɓil naa go de pẽẽre yawlà? Bay naŋ wa. Naa ko we ba ɗa. De maaga ceere yaŋ debaŋ no, naa kal ɗiggi doo ga his nduu ga so has nono. Pa ga ni his a ge yaŋ ge mbe le. Doo sen no lay de maaga re gay naa we go debaŋ, naa kal ko ge doo ga sir maa defay nduu ga so has no lay no. Day hayga hãge ɓil naa yaŋ de ẽgre no, se joŋ nen naa ga wããre maa ni Baan bag ge wo jag go. (Siŋ wora 94:3, 14, 15; Hebre wo 6:17-19) De kaŋge ɗiggi sen doo kay, naa joŋ yaŋ de ẽgre tum maa ɓo’ joŋge joŋre maa ni Baa naan go peel fẽẽren ɓuy.

7. Naa mo men ɗiggi maa hõn wo go là?

⁷ Naa ko we ɓaŋ joŋre maa tigriŋ ga wii hãge ɓil maa de ẽgre ɗa pa: joŋre siigi wããre no. Jar debaŋ maaga naa sii “wããre maa de cõõre” ti sir maa defay maa ni Baan ne hara kon wo doo mopo maaga joŋ ga nono. (Matiye 24:14; Esekiyel 33:32) Naa daw we see naa ti fẽẽre maaga Jeofa had naa de ɓaara doo saara no wa hase. Maaga sen mo da’ naa wa mono, nen da ga naa mo hay we tum ya’ wer hãge ɓil naa ciŋ ni. Naa ko we ɗeŋ po wo swa’ maa kay naa ti sen ɗa.

ƊIG TI CÍI YESO MAAGA KAA GO WER NAA MONO

8-9. Ɗiggi ti cíi Yeso maaga kaa go wer naa ya’ hãge ɓil naa ciŋ na ya’ge là?

⁸ Ɗeŋ po boŋ maaga naa ya’ hãge ɓil ciŋ diŋ de ɗiggi ti cíi Yeso maaga kaa go gesiŋ. Cíi Yeso maaga kaa go wer naa diŋ fẽn maaga hã bawge go ne naa ga dage Jeofan bag wo jag yaŋ go mono. Hayga naa yaŋ ɗig gi de woore ti fẽn maaga Baa hãn go lan ti re maaga á hãn go mono, se ya’ hãge ɓil naa ciŋ ti tenen maa tum ga Baa hã ge ne naa ɓil sir maa defay no. Wer mayse ga naa wãã doo sen no là?

⁹ Cooge maa de cíi Yeson wii mayse de gaali do Baa là? Jeofa ɓo’ weel dage ɓe maa boŋ, jee maa see ɓe maŋ le go gesiŋ maaga á mo biŋ go doo jee taabay maa bay ɓlagge see. Yeso yiŋ go de wer re maa de gayrin wo gesiŋ la ɓuy. Blam se jo bon, day húu jag bon pa. Ko kluu poɗge maa de gayri maaga Jeofa  poɗ mo ɗa! Baa dage naan hay day ti boŋ ga se men weel ɓen joŋ bone, lan húu gi go maaga naa mo hay gesiŋ la maa kiŋgi mbag koɗ ga . (Jaŋ 3:16; 1 Piyer 1:18, 19) Wer ga Jeofa hã Weel dage ɓen go maa kay naa so mono, á dur ge go ɓuy maaga tenen maa tum ɓi sir maa defay mo joŋ cwãy lay.

ƊIGGI TI ẼGRE JEOFA

10. Efes wo 3:20 wãã ga Jeofa de kãã ge maa joŋ mayselà?

¹⁰ Ɗeŋ maa de ɓog maa ya’ hãge ɓil naa ciŋ diŋ ɗiggi ti ẽgre Jeofa. Á de kãã ge maa bag jag fẽẽre maaga á wãã ga se joŋ ra yaŋ mono. Jar wara debaŋ ɗig ga tenen maa tum ɓi sir maa defayn joŋ ge ga. Amaa Jeofa wãɗ fẽẽre po wo ga jar téebeere kãã wo maa bag jag ɓaara go ga. Á joŋ sen wer ga se diŋ Baa maa de Ẽgre ɓuy no. (Job 42:2; Mark 10:27) Sen ngel naa de maaga á wãɗ fẽẽre maaga laa wo wer do naa ga mo ga!​—Jaŋ Efes wo 3:20.

11. Hã saɓlaŋ fẽn po boŋ ga joŋ do jee taabay ga ga Jeofa wãã ga se joŋ yaŋ ɗa. (Ko ngeel maa de gaɗge “ Wããre po maa jag Baa ga bag wo jag go.”)

¹¹ Ɗig we ba mbay ti fẽẽre po wo ga hay bay wo nen joŋ ge wa, ga Jeofa wãã ga se joŋ ne jar maa ɓe maa ɓaa po wo ɗa. Á wãã ne Abraham wo de Sara ga á biŋ wo yaŋ nen tããbe ɓaara no. (Tĩĩgi were 17:15-17) Á wãã ne Abraham pa ga wer maa ni ɓen yãã ge sir Kanaŋ yaŋ. De maaga wer maa ni Abraham, weere Israyel hay wo le ti gebee ɓi sir Ejipte mono, wããre sen hay kol ko ge doo ga se bag jag ti boŋ ga so has nono. Amaa se bag ge mbe jag go. Blam nen kiŋgi maa swa’ taŋgu biŋgi Yeso mono, Jeofa wãã ne Elisabed maaga hay go de tããbe ga á da’ mbarga yaŋ. Á wãã ne Mari, mãy maaga hay bay de yiŋgi de jee twar wa ɗa lay ga á biŋ Weel maa ɓe yaŋ lay. Sen bag jag wããre maa ɓil Tĩĩgi were 3:15 ga Jeofa hay wãã go peel bol ɓil pay Edeŋ kiŋgi ndar pur taŋgu. (Tĩĩgi Were 3:15) De sen ɓuy, Jeofa joŋ fẽn maaga se hay wãã ga se joŋ ge ne mono.

12. Josuwe 23:14 wo de Esay 55:10, 11 hã wo bawge go ne naa ti ẽgre Baa na hãge là?

¹² De maaga naa yaŋ ɗiggi ti wããre maaga Baa hay wãɗ ra ɓuy lan ti maaga á bag jag ɓaara go bagge la no, naa ko so ga á de ẽgre debaŋ. (Jaŋ Josuwe 23:14; Esay 55:​10, 11.) Sen kay naa maa wããge ne jar ga fẽẽre maaga Jeofa wãã ra bay wo diŋ gete’ wa. Jeofa ti see ɓe tu wãã ti ngeel maa ciŋ maa defayn wo de sir maa defayn ga: “wããre sen wo diŋ re maga à mo hã ɓil ti ɓaara, wo cwãy lay.” [NWT]​—Naage Nene 21:1, 5.

HÃ WUR NE FẼẼRE MAA TI NENTERSE WO

13. Taygetin ya’ wo wer hãge ɓil naa ciŋ ni na ya’ge là? Naa wer ɓe.

¹³ Fẽn maa de swa’ maaga naa ya’ hãge ɓil naa ciŋ de joŋ ge ɓe diŋ hãge wur ne fẽẽre maa ti nenterse wo. Ko we ba mbay doo fẽẽre maaga naa da’ ti taygeti naa wo ɗa. Ana b ga joŋ kiŋgi hwal hwal pur joŋ joŋre ne Jeofa wer sar sar wãã ga: “Taygetin kay wo ndi maa ɗaw hãge ɓil ɓin de ẽgre. Koh jee sii wããren mo hay ba de ko hadge de woore wa, noga mo wãã ba mopo maa defay wa, ndi laa mbi mopo yaŋ ni maaga kay me maa laa wer ne Bible de peel ni, lan maa ya’ hãge ɓil ɓi ciŋ ni.” Wããre maaga hẽẽrebe fer wo ti taygeti ya’ wo wer hãge ɓil naa ciŋ ni pa.​—Rom wo 1:11, 12; 10:17.

14. Siigi wããre Baa ya’ hãge ɓil naa ciŋ ni na ya’ge là?

¹⁴ Naa ya’ hãge ɓil naa ciŋ de maaga naa yaŋ laa ge go sii wããre Baa ɓi leege no. (Hebre wo 10:23) Barbara blo po ga joŋ joŋre ne Jeofa de daŋ kiŋgi 70 wãã ga: “Siigi wããre  Baa ya’ hãge ɓil ciŋ tum. De maaga ndi yaŋ wããge ne jar ti fẽẽre maa de woore wo ga Jeofa wãã ga se joŋ ra debaŋ no, se ya’ wer hãge ɓil ɓi ciŋ de peel ni lay.”

15. Fruggi nen wããre maaga ndo boŋ ɓo ya’ hãge ɓil naa ciŋ na ya’ge là?

¹⁵ Naa ko we joŋre maa ti nenterse maa tigriŋ ga ya’ hãge ɓil naa ciŋ ni ɗa pa: fruggi nen wããre Baa maaga ndo boŋ ɓo. Susan wãã ga joŋge program maa frug nen wããre Baa kay se debaŋ. Á wãã ga: “De dimasi ndi kne’ nen hadge Ngeel gor ti jare maa de dimasi maa peel no. Wur Faare wo de wur Halge ndi kne’ nen hadge maa taygeti seele kretiyẽ. Naw maa 4 lan wo mono, ndi frug nen Bible ti mayse la maaga ɓil ɓi da ne ɓuy.” Wer ga Susan hoo sug ti program ɓen so mono, sen ya’ hãge ɓil ɓe ciŋ tum. Iren maaga joŋ joŋre ti ngeel kluu Sedeewa Jeofa wo kiŋgi hwal hwal pur wãã ga frug gi nen profesi maa ɓil Bible ya’ hãge ɓil se ciŋ. Á wãã pa ga: “á ngris me debaŋ de maaga ndi ko ga profesi Jeofan bag wo jag go ti ngeel ɓe keɗed keɗed ɓuyn mono.” c

“Á JOŊ GE GO ƁEGDE’E !”

16. Wer mayse ga wããre maaga Jeofa wãã ne Habakug kay naa wara lay là? (Hebre wo 10:36, 37)

¹⁶ Sedeewa Jeofa maa po wo go de iggi gor tawge fẽẽre maa de ɓlagge maa ti tamsirn ɓaa ɓaa. Jar maa po ɗig wo ga tawge fẽẽre maa de ɓlaggen de yõõ ti. Jeofa de ko fẽn maaga naa ɗig mono. Day se hay hã bawge go ne profet Habakug ga: “Á diŋ mbuɗgi nen po maga wur ɓe go de ngaɓge. Day se go de nii a ge ti wur ɓen yaw. Se bay diŋ jããge wa lay. Hayga á yõõ ti we no, ni ndo gorn mbo werga á joŋ ge go ɓegde’e. Á joŋ ge kidolgi, naw ɓen ya’ge ga!” (Habakug 2:3) Jeofa hã bawge jag jiili ti ngeel sen ta la diŋ ne Habakug tawa yawlà? Noga á mbe de wããge ne  naa wara lay yawlà? Jeofa wii apotre Pol ga á mo yer wããre sen ne Krétiyẽ maaga wo de gor sir maa defayn mono. (Jaŋ Hebre wo 10:​36, 37.) Kidolgi, koh de maaga yããge naa ko mbe le yõõ ti laybla no, naa mo hay joŋ go de bawge jag jiili ga “á joŋ ge go ɓegde’e. Á joŋ ge kidolgi, naw ɓen ya’ge ga!”

17. Maygeman naa po joŋ joŋre de yaŋ maaga Jeofa hã ne Habakug na joŋge là?

¹⁷ Sedeewa Jeofa po wo ngaɓa joŋ wo joŋre de yaŋ maaga Jeofa wãã ga “gorn mbo” mono​—koh hayba kiŋgi hwal hwal puri. Louise tĩĩ wer joŋre ne Jeofa nen kiŋgi 1939. Á wãã ga: “Kal maa sen, ndi hay ɗig ga Armagedoŋ age go taŋgu maaga ndi taw ‘lycée’ go mono. Day se joŋ doo sen no ga. Nen kiŋgi maa blam wo mono, ndi ko ga á de el maaga ndi mo jaŋ mo maaga ndi ɗen ga ‘wããre jar maaga gor wo’​—kaŋ nen ga ti Nowe, ti Abraham, ti Josef, lan ti jar maa tigriŋ wo ga hay gor wo nen kiŋgi pur taŋgu maaga saara da’ poɗge maa ni Jeofan mono. Hayge ɓi gor ge kay me, lan kay jar maa tigriŋ, maaga wùr mo hay de kaŋ ɗiggi ga sir maa defayn a ge yaŋ cwãy.” Jar maapo ga wo go de iggi goŋ Jeofa ɗig wo doo sen no lay!

18. Ko ge fẽẽre maaga Baa joŋ ra ya’ hãge ɓil naa ciŋ ti sir maa defay na ya’ge là?

¹⁸ Cwãy, sir maa defay bay de age wa ɗa. Amaa ɗig ti fẽẽre maaga nen naa de ko rage, doo ger wo, koore wo, horog wo, lan naa jar téebeere. Jobo faa ti bon ga fẽẽre sen bay wo cwãy wa ga, koh de maaga á hay bay wo mbaara wa de ngar ngeel po ta’ mono. Naa ko ra diŋ wer maaga Jeofa joŋ ra ɗa mono. (Tĩĩgi were 1:1, 26, 27) Baa naan de wããge ga se joŋ sir maa defay lay. Á bag ge jag wããre ɓe sen go. Ti sir maa defayn mono, jar téebeere fruy wo yaŋ ti tenen maa tum, bay ceege. Sir maa defayn joŋ ge cwãy doo fẽẽre maa de kii ti naa wara no lay, ti wur maaga Jeofa go de ngaɓ ge ɓe mono.​—Esay 65:17; Naage Nene 21:3, 4.

19. Ndo joŋ mayse wo maa ya’ hãge ɓil ɓo ciŋ là?

¹⁹ Taŋgu maaga wããre sen deŋ bag wo jag go mono, dur go de ẽgre ɓo ɓuy maa ya’ hãge ɓil ɓo ciŋ. Hay tum joŋ suse’ ne Baa ti cíi weel ɓe maaga kaa go ti re ɓo mono. Ɗig ti ẽgre Jeofa. Hã se ɓo go ti joŋre maa ti nentersen wo. De joŋge doo sen, ndo joŋ ge yoo “jar maga yãã wo wããre Kris, ɗaw wo see ɓaara desãy, raw wo da’ fẽẽre maga Baa hay riŋ ga se hãn yaŋ ne hara nono.”​—Hebre wo 6:11, 12; Rom wo 5:5.