1. Weel po wãã ɗiggi ɓe maaga hay de kaŋ ge ti birgi jar húulí wo le go na wããge là?

 WEEL po à ɗen ga Matiye hay de ceege maaga wii mbuggi. De maaga á hay kiŋgi renam mono, á wo de jar maa liŋ ni ɓaara hay wo ko videyo JW Télédiffusion maaga kal le nen few tum mono. Go ti tawge ti videyon mono, á hay ko videyo maa de siŋ b were ga à de caa peel jar maaga bir wo le go ni. Blam maaga á ko wo videyon go mono, Matiye ya’ le see pããre ɓe wo, ɗaw do ɓaara day wãã ga: “Mama, Papa, nday ko we ti videyon la, koh ndi mo húu ba go, ndi fer ge yaŋ le go birgi. Gor we mbay ne desãy; sen joŋ ge yaŋ cwãy.” Nday mbay de ɗiggi ti maaga á joŋ see ne pããre ɓe wo de maaga á ko wo ga weel ɓaaran ko birgi húulín go diŋ mopo maa cwãy nen ɓe mo yawlà?

2-3. Wer mayse ga á de el maaga naa mo ɗig ti birgi húulín là?

² Tum, á de woore ti maaga naa ɗig ti birgi húulí maaga joŋge yaŋ wo peel mono. (Jaŋ 5:28, 29) Wer mayse là? Werga naa bay de ko wur maaga naa le’ ceege maa kwũy, noga wur maaga jobo maaga naa da ne húu mo wa. (Eklesiyaste 9:11; Jag. 4:13, 14) Kaŋge ɗiggi naa ti birgi húulín kay naa maa durgi jag bon maa de maŋ sen wo no. (1 Tesalonig wo 4:13) Wããre Baa hã bawge go ne naa jag jiili ga pan naa maa ciŋn go de ko naa de woore, lan da naa debaŋ lay. (Lug 12:7) Jeofa go de ko naa de woore nen maaga se ferge caa naa doo maaga naa hay taŋgu nono, de ɗiggi naan wo ɓuy. Jeofa da naa debaŋ, lan se joŋ ga naa mo hay tenen ti’ tum. Koh naa mo huɗ ba go, se birgi naa le go!

 ³ Ɓil hadge sen la, naa ko yaŋ wer mayse ga naa mo hã ɓil ti birgi húulín la. Lan, naa ko wããre maaga naa da’ kluu hadge maa waran ga wãã ga: “Welgeman ɓon fer yaŋ go tenene” ni lay. (Jaŋ 11:23) Blam, naa had ɗeŋ maaga naa kol gorge birgi húulín go diŋ mopo maa cwãy nen naa yaŋ.

4. Naa mo hay go de bawge ti mayse maaga naa mo hã ɓil ti wããre maaga hay go de wããge là? Naa wer ɓe de saɓlaŋ po.

⁴ Maa hã ɓil ti wããre maaga joŋ ge yaŋ wo peel mono, naa mo hay go de bawge jag jiili ga jee wããge ɓen de kããge lan de de sãy bag jag wããre ɓen go ti lay. Maa laa wer ɓe mono: ɗig ba doo ga tiŋ ɓo hay ɓlag go do leege maa kluu ɗa. Bar ɓo po kal nduugi day wãã mo ga, ‘Ndi kay mo yaŋ maa ferge boo tiŋ ɓo no.’ Se wãã ne go de ɓil ɓe ɓuy, day ndo go de baw ge jag jiili ɓo ga á de sãy kay ndo ti. Hayga á yaŋ diŋ jobo maa de ko boo tiŋ de woore, lan yaŋ de fẽẽre joŋre do de woore lay no, ni ndo ko ge yaŋ so ga á de kããge maa joŋ ge ɓe. De sen mo kay ndo hã ɓil ti wããre maaga á wãã mono. Day naa wãã ti maaga Baa wãã ga se bir húulín yaŋ wo le go ga hãy lay là? Á mbe na de kããge, lan de sãy bir ra ge le go ti lay yawlà?

5-6. Wer mayse ga naa go de bawge jag jiili ga Jeofa de sãy bir jar húulín wo le go ti là?

⁵ Jeofa mbe de sãy bir húulín wo le go ti yawlà? Cwãy tu, á de sãy bir ra ge le go ti. Á hã nenterse ɓe ne jar maa yer Biblen wo ga á mo yer wo ti birgi jar maaga joŋ ge yaŋ wo peel mono. (Esay 26:19; Ose 13:14; Naage nene 20:11-13) Day hayga Jeofa wãã mo po we go no, say se bag jag ɓe go. (Josuwe 23:14) Jeofa go de gorge maaga se fer húulín wo le go tenene. Wer mayse ga naa wãã sen là?

⁶ Ko wããre maaga Job wãã ɗa. Á hay go de bawge jag jiili ɓe ga koh se mo húu ba go, Jeofa go de gorge maa ko se go tenen pa. (Job 14:14, 15) Jeofa de sãy fer ge ko jar maaga joŋ wo joŋre ne hẽn wo le go ɓuy tu lay. Á go de gor ge de bay yõõ ti maa fer ra ge le go tenene, jam, lan de fruygi lay. Day à wãã ti jar maa milyar pur ga húu wo go bay ko Jeofa na ga hãy laylà? Baa dage naan de sãy bir ra ge le go ti lay. (Joŋre 24:15) Á de sãy maaga á mo kol wo bar se ti, lan mo joŋ wo tenen ti tamsir la maa tum. (Jaŋ 3:16) Cwãy tu, Jeofa de sãy ferge bir húulí wo le go ti.

7-8. Wer mayse ga naa go de baw ge jag jiili ga Jeofa de kããge maa bir húulín wo le go là?

⁷ Jeofa mbe de kããge maa bir húulín wo le go lay yawlà? Sen bay faare! Á diŋ “Baa Waŋkluu maa de ẽgre.” (Naage nene 1:8) Á de ẽgre debaŋ maa naa blum jee hee maa hõnla ɓuy, koh húulí. (1 Korente wo 15:26) Naa da’ ẽgre wo de coɓge de maaga naa laa wããre sen wo we no. Ko saɓlaŋ maygeman naa Ema Arnold ɗa. Á wo de jar maa liŋ ɓaara hay yiŋ wo de re maaga hay hãy hãge ɓil ɓaara ti kal durgi maa de ɓog ga hay joŋ go de tamsir krub ɓuy mono. Maa coɓ may ɓe jag húulí jar ɓaara maaga hay húu wo go ti daŋgay Nazi mono, Ema wãã ga: “Hayga húulí ɗaw jar téebeere wo ɓi tu ni maa tum no, kaŋ nen ga ni á de daŋ Baa ẽgre yaw ga?” Mopo bay de ẽgre de daŋ Jeofa wa! Baa maa de ẽgre ɓuy ga joŋ fẽẽren ɓuy de kããge maa ferge hã tenen ne jar maaga hay húu wo go mono.

⁸ Fẽn maa tigriŋ pa ga naa de koge ga Baa de kããge maa bir húulín wo le go diŋ ga ti ɓe bay go yõõge ti boŋ wa. Á ɗe ger wo go boŋ boŋ ɓuy de ɗu ɓaara. (Esay 40:26) Á fer ge  ɗig ti jar maaga wo go de húulí mo ɓuy lay. (Job 14:13; Lug 20:37, 38) Á de kããge maa ɗig ti ti fẽẽre maa see ɓaara me’ me’ wo ɓuy tu, de re maaga á yiŋ wo de ɓaara nen naw ɓaaran, lan de ɗiggi ɓaaran wo ɓuy.

9. Wer mayse ga ndo hã ɓil ti wããre birgi húulí maaga Jeofa de ngaɓge ɓe ti naw maa peeln là?

⁹ Cwãy tu, naa mbe nen hã ɓil ti wããre birgi húulí maaga Jeofa de ngaɓ ge ɓe ne naa ti naw maa peeln mono, werga naa de ko ge ga á de kãã ge lan se de sãy bir ra ge le go ti. Naa ko we fẽn maa tigriŋ ga naa hã ɓil ti wããre sen wer ɓe mo ɗa pa: Jeofa hay go de bir jar ti wurpo. Ti wur maa taŋgun le mono, á hay hã ẽgre ne werpiiri po wo maaga hay wo de hã ɓili, ne Yeso lay, maa bir jar go. Patala naa wãã we ti birgi húulí po ga Yeso bir, ga naa da’ ɓil Jaŋ maa kluu 11 mo ɗa.

10. Mayse joŋ de maaga Yeso de sii wããre faale peyew ɓi sir Betani là, day se joŋ mayse là? (Jaŋ 11:1-3)

¹⁰ Jaŋ Jaŋ 11:1-3. Ɗig ti fẽn maaga joŋ ɓi sir Betani nen kiŋgi maa 33 ti wur maa ni Yeson mo ɗa. Yeso hay baa barge wo ɓi sir sen ni, Lasar lan mayregemããre ɓe maa ɓog wo no, Mari wo de Marta. (Lug 10:38-42) Amaa Lasar le’ ceege, hẽẽre ɓen caa wo jiili go. Saara ɓo’ soole wo wer Yeso, ga hay le go faale peyew jurdeŋ. Hãã ngeel sen see Betani nen seele naw ɓoge. (Jaŋ 10:40) Amaa, Lasar húu go taŋgu maaga jee soolen wo wo ge see Yeso mono. Koh de maaga Yeso mbe go de ko ge ga bar sen go de húulí mono, se fer joŋ naw ti ngeel sen ni ɓog ɗa pa, blam se raw rawge Betani kway so. De maaga Yeso wo day ge mono, ni Lasar go de joŋ naw ɓi tu naa; patala se de sãy joŋ mopo maa kay bar ɓen wo ti, lan maa raa ɗu Baa lay. Jaŋ 11:4, 6, 11, 17.

11. Naa da’ hadge mayse see barge maa ɓil wããre sen la là?

¹¹ Naa da’ hadge see barge maa ɓil wããre se no. Ko ɗa: De maaga Mari wo de Marta ɓo’ wo soole wo ne Yeso mono, á bay wo de wiigi ɓe ga á mo a le Betani wa. Á wãã wo ne hẽn tu ga bar ɓe maa ti nen ɓen de ceege. (Jaŋ 11:3) Yeso hay mbe de kããge maaga se bir Lasar le hãã deŋ tu. Amaa á maŋ ga se mo wo Betani see bar ɓe Mari wo de Marta. Bar ɓo maaga ndu mbe kay ndo tu ga ndo bay le de ɗe ge ɓe wa yaŋ yawlà? Ndo de ko ge ga ndo mbo nen kaŋ ɗiggi ti jee sen maa da’ kayge “ti wur re wo.” (Jag jõõ wo 17:17) Doo Yeso no lay, naa mbe nen joŋ ge diŋ barge maa de maŋ sen see jar lay! Patala, naa fer we ti wããre sen, ni naa ko fẽn maaga hres blam mo ɗa.

12. Yeso hay wãã mayse ne Marta là, day wer mayse ga á mo hay hã ɓil ti ɓe là? (Jaŋ 11:23-26)

¹² Jaŋ Jaŋ 11:23-26. Marta laa ga Yeso go see Betani la mbaŋ. Se raw deparday tu yiŋgi de ɓe, day kal wãã ge ga: “Waŋkluu, ndo de hay we la no, hẽn ɓin de hay huu go gà.” (Jaŋ 11:21) Á hay pẽẽ Lasar go cwãy. Amaa Yeso de ɗiggi maa joŋ fẽn tigriŋ de daŋ maa se no. Á wãã ga: “Welgeman ɓon fer yaŋ go tenene.”  Á wãã fẽn maa tigriŋ ne Marta maaga á mo hay go de baw ge jag jiili ɓe ti bagge jag wããre ɓe no: “Ndi diŋ je fer ge lag jar go ciŋ tenene.” Cwãy, Baa hã ẽgre ne Yeso maa bir jar le go. Go taŋgu, á hay go de bir mãy po klee, lan weejõõ po maaga joŋ hay húu diŋ wur sen tu. (Lug 7:11-15; 8:49-55) Day á mbe de kãã ge maa bir jobo maaga hay go de joŋ naw ɓi tu naa, ga hay go buugi yaw lay yawlà?

13. Yeso joŋ joŋge de maaga á ko Mari wo de jar lan ti ro mo là?(Ko foton lay.) (Jaŋ 11:32-35)

¹³ Jaŋ Jaŋ 11:32-35. Ɗig ba ti fẽn maaga hres blam mo ɗa. Mari, hẽn Lasar maa la no, raw yiŋgi de Yeso. Á fer dog wããre maaga hẽn ɓen hay wãã mo pa: “Waŋkluu, ndo de hay we la no, hẽn ɓin de hay huu go gà.” Á wo de jar lan wo ɓuy hay wo nen lawge debaŋ. De maaga Yeso ko ra ti ro mokay, sen hã lawge ne Yeso debaŋ lay. Wer maaga á ko de coo bar ɓen wo debaŋ mono, Yeso ra. Á ko bon maaga jobo jo de maaga jee dage ɓe húu we mono. Sen go tinoo tu ga á go de gorge maa maŋ jag fẽẽre maaga laa wo naa nen lawge mo go!

14. Ɗiggi Yeso de maaga á ko Mari ti ro had naa ti Jeofa ga hãylà?

¹⁴ Ɗiggi Yeso de maaga á ko Mari raage had naa ga Jeofa diŋ Baa maa ko de coo jare. Naa wãã sen wer mayselà? Naa ko le ti hadge maa taŋgun la ga ɗiggi Yeso, de joŋre ɓe wo, wo de maŋ maa ni Pan ɓen taw taw tu. (Jaŋ 12:45) Wer sen so, de maaga naa jaŋ ga Yeso ko de coo bar ɓe maaga hay wo ti ro mono, sen had naa ga Jeofa ko de coo naa debaŋ lay. (Siŋ wora 56:9) Sen bay ba jor glog ɓo maa ya’ge see Baa maa ko de coo jarn wa?

15. Wãã ti fẽn maaga hres ti jeŋ tipaale Lasar mo ɗa.(Ko foton lay.) (Jaŋ 11:41-44)

¹⁵ Jaŋ Jaŋ 11:41-44. Yeso ndu ti jeŋ tipaale Lasar kal wiigi ga maŋ húulì maa jag tuun go. Marta hay day ẽgge, kal wããge ga á joŋ patããra la go fõõge. Yeso fer ne hẽn ga: “Ndi hay bay de riŋ mo ge ga hayga ndo yãã wããre ɓi we ndo ko ẽgre Baa yaŋ wa yawlà?” (Jaŋ 11:39, 40) Yeso kal maŋ nen ɓe ciŋ, kal tosge yoo ngaɓa no. Á hay da ga togoɗge fẽn  maaga joŋ ge blam mo hay diŋ maa Jeofa. Yeso kal ɗe ɗu kloŋ ga: “Lasar, kal le go!” Lasar kal kal ge le go ɓi tu no! Yeso hay joŋ fẽn maaga jar debaŋ hay ɗig gi ga sen joŋ ga.

16. Wããre maa ɓil Jaŋ maa klu 11 ya’ hãge ɓil naa ciŋ ti birgi húulín na ya’ge là?

¹⁶ Wããre maa ɓil Jaŋ maa kluu 11 ya’ hãge ɓil naa ciŋ ti gorge birgi jar húulí wo le go debaŋ. Sen joŋ doo sen ne na joŋ ge là? Fer ɗig ti ti wããre maaga Yeso wãã ne Marta ga “Welgeman ɓon fer yaŋ go tenene” mo ɗa. (Jaŋ 11:23) Yeso de kããge, lan de dage maa bag jag wããre sen go doo Pan ɓe no lay. Ɓerbe maaga laa le go nen Yeso ngaɓ go ga á de sãy bir húulí wo le go ti, lan de sãy caa wer lawge maaga húulí laa jar nen ɓe go ti. Day de maaga Lasar kal le go ɓi tu mo kay, Yeso ngaɓ go tigriŋ pa ga se de kãã ge maa bir húulín wo le go. Ɗig ti wããre maaga Yeso fer ɓo’ sug Marta de ɓe mo ɗa lay: “Ndi hay bay de riŋ mo ge ga hayga ndo yãã wããre ɓi we ndo ko ẽgre Baa yaŋ wa yawlà?” (Jaŋ 11:40) Fẽẽre maaga baw wo naa go jag jiili ga Baa fer yaŋ le go bir jar húulí wo mbaara deŋ. Day naa joŋ diŋ mayse maaga ɗiggi birgi húulín mo kol diŋ mopo maa cwãy nen naa de peel ni là?

17. Naa ɗaw mayse ti de maaga naa jaŋ wããre maa ti birgi húulín wo ɓil Bible mo là?

¹⁷ Jaŋ wããre ti húulí maaga à bir ra le go ɓaa mono, lan ni ndo ɗig ti ɓaara. Ɓil Bible jar maaga à hay bir ra le go wo nenma’. c Naa bay ba maa frug nen wããre sen wo go de woore wa? De maaga ndo de jaŋge mono, hay de ko ge ga jar maaga hay wo ni diŋ werpiiri, naare wo de weere maa cwãy cwãy wo. Kiɗ hadge maaga à da’ nen ɓaara mono. Ɗig ti ɗeŋ maaga birgi húulí sen wo boŋ boŋ ɓuy ngaɓ wo go ga Baa de kããge, lan de sãy maaga  se fer húulín wo le go tenen ti na ngaɓge la. Ɗig debaŋ ti birgi maa de daŋ lan wo ɓuy no: maa ni Yeso no. Hay de ko ge ga jar ko Yeso kis kis ngaɓa blam birgi ɓe, sen ya’ wer hã ɓil naa ciŋ ti birgi húulí maaga joŋ ge wo peel mono.​—1 Korente wo 15:3-6, 20-22.

18. Ndo joŋ joŋre de siŋ maaga wãã wo ti birgi húulí na joŋ ge là? (Ko naage wer maa gesiŋ no)

¹⁸ Siŋ maaga wãã wo ti birgi húulí wo mono, laa ra, ‘waa ra, lan ɗig ti ɓaara d (Efes wo 5:19) Siŋre sen kol wo birgi húulín go cwãy nen naa, lan ya’ wo wer hãge ɓil naa ciŋ ti gorge se no. Laa siŋ sen wo no. Had ‘waa ra ge go de woore, lan ndal we ti wããre maa ɓil ɓaaran ti hadge maa ɓil feele ɓay no. Ɗaw wããre maa ɓil ɓaaran go ti ɓo, lan ɗig go ti ɓaara de woore nen maaga á mo ya’ wo hãge ɓil ɓo ciŋ ni, lan mo du’ wo jiili ɓo lay. Hayga ndo yaŋ jag re maaga da wo woge go de ɓo jag húulí noga jobo maaga ndo dan húu we no, nenterse Jeofa kay mo yaŋ maa ɗiggi ti siŋ sen wo no, lan saara hã coɓge yaŋ mo.

19. Naa ko mayse wo go peel bol ti birgi húulín là? (Ko ngeel maa de gaɗge “Ndo wii jag ɓaara ti mayse wo là?”)

¹⁹ Ko see ɓo wo go ɓi sir maa defay no. Jeofa hã ɗiggi maaga naa mo ko see naa wo go ɓi sir maa defayn ne naa. Maygeman naa po wãã ga: “Ndi ig debaŋ ko see ɓi wo go ɓi sir maa defay no, sen doo ga fuɗgi fẽẽre maa ɓil paradis wo go de fõõ me ge yaw nono.” Ko see ɓo yiŋgi de jar maaga hay wo de hã ɓil ti Baa ti wur maaga à yer Bible mo ɗa. Ndo de sãy yiŋgi diŋ de wose ti wo ni là? Ndo wii ge jag ɓe diŋ ti mayselà? Ko see ɓo yoo jar ɓo maaga hay húu wo go mo ɗa. Ɗig ba ɓo ti fẽẽre maaga hres ti yiŋgi ɓay wur sen mo ɗa: tĩĩgi wer wããre ne kããra, klewge kããra, mberbe fruygi.

20. Naa go de baa wer see naa maa joŋ mayselà?

²⁰ Naa joŋ suse’ ne Jeofa ti wããre birgi húulí no! Naa mbe nen baw jag jiili naa go ga Baa bag jag wããre ɓen yaŋ go, wer ga á de sãy joŋ ge ɓe ti, day se de kããge maa joŋge ɓe lay. Naa mo hay we go de baa wer see naa maa ya’ hãge ɓil naa ciŋ ti birgi húulí no. Naa yaŋ joŋ ge doo sen ne no, naa ya’ see naa see Baa maaga wãã ne naa boŋ boŋ ɓuy ga, ‘Jar ɓo maaga ndo da ra fer wo yaŋ go tenene!’