HADGE 51
SIŊ 3 Ẽgre ɓi, jee maaga ndi de gorge ɓe, jee maaga ndi de kaŋ ɗiggi ti ɓe
Jeofa de ko re maaga laa wo mberbe go mo nen mono
“Yãã mberbe ɓin wo ɓi ndar bii ɓo no, á bay wo ɓil kefder ɓon wa?”—SIŊ. 56:9.
FẼN MAA KLUU ƁIL HADGE SEN LA
Naa ko ge yaŋ ga Jeofa de ko fẽn maaga de gay naa dera mono, koh mo hay baa diŋ re maa hõnla, lan ga á hã fẽn maaga naa de sãy ɓe ti maa coɓ naa ne naa.
1-2. Re maa hõn laa wo mberbe go ne naa nen là?
WOSELA ɓuy yoo naa go de da’ see ɓe nen re maaga laa mberbe go ne hẽn nene. De ngar ngeel maa po mberbe naa laa go diŋ do fruygi. Maapo ga ndo hay raa de maaga fẽn po maa de woore hres—doo biŋgi mbarga, ɗiggi ti fẽn maaga hay hres de woore, noga ndo yiŋ de bar ɓo maaga nday hay kiŋ go pur bay yiŋgi.
2 Naa raa debaŋ seɓaa diŋ werga naa nen lawge noga naa ti bone. Ko ba ɗa, maapo naa raa werga jobo maaga naa de kaŋ ɗiggi ti ɓe mbiɗ naa do debaŋ. Maapo ga naa raa de maaga naa yaŋ de cege, noga naa yaŋ ti bon wer maaga jobo maaga naa dan huu we no. Nen ngeel maa de maŋ sen, naa ɗig de maŋ profed Jermi de maaga jar Babilon hay ɓo’ wo Jerusalem go gesiŋ mono. Jermi wãã ga: “Mberbe yuu mbe le ceɓ nen ɓi tuu. . . Mberbe yuu mbe le ceɓ nen ɓi tuu bay hooge wa.”—Lam. 3:48, 49.
3. De maaga Jeofa ko jar goŋge ɓen wo ti bon mono, á joŋ see ne hẽn na joŋge là? (Esay 63:9)
3 Jeofa de ko re maa de gayri maaga laa wo mberbe go ne naa nen mo ɓuy. Bible wãã ne naa ga á de ko wur maaga wosela ɓuy yoo naa ti bon mono, lan se co’ sug naa de maaga naa wii kayge ɓen we no. (Siŋ. 34:16) Day Jeofa taw bay diŋ de ko naa, lan de co’ sug naa tawa wa. Doo pããbe maa de dage no lay mono, á cen debaŋ de maaga á ko weere ɓe wo we ti roo no, lan se joŋ go gorge maa kay rage.—Jaŋ Esay 63:9.
4. Saɓlaŋ maa ɓil Bible maa hõn wo ga naa wãã yaŋ ti ɓaara là, day naa had ge mayse yaŋ ti Jeofa là ?
4 Jeofa ngaɓ ɗeŋ maaga se ɗig de maaga jar maa ɓen hay laa wo mberbe go ne naa ɓil Wããre ɓe no. Naa kon ti saɓlaŋ maaga á joŋ see Ana, Dafid, lan Waŋ Esekiyas. Mayse joŋ ga á mo laa wo mberbe go là? Jeofa caa war ɓaara na caage là? Day saɓlaŋ ɓaara coɓ naa na coɓge de maaga naa laa mberbe we go do re wo là?
MBERBE MAA DO RE
5. Ana hay ɗiggi ɗiggi ti re maaga se hay nen ɓe mo là?
5 Ana yiŋ de re maaga laa wo mberbe go ne hẽn nen ngaɓa debaŋ. Ana hay wo liŋ ɓoge, à hay ɗe mangẽẽne ɓen ga Penina. Á hay bay de sãy Ana ti wa. Ni pa mono, Ana hay bay de mbarga wa, amaa, Penina hay de weere. (1 Sam. 1:1, 2) Penina hay bay men ɗar Ana wa wer maaga á hay go de gedge mono. Hay we nen re sen diŋ ndo no, ndo hay ɗig na ɗiggi là? Ana caa jiili go debaŋ hãã nen maaga se hay “rage, day rege gà lay,” day se “ra debaŋ de lawge” jiili.—1 Sam. 1:6, 7, 10.
6. Ana joŋ mayse maa da’ teŋge nen là?
6 Ana joŋ mayse maaga jiili se mo suu là? Fẽn maaga á joŋ diŋ ga á raw ɓil mburyug, ti ngeel goŋge Baa maa cwãy no. Wo ni, ti jeŋ mburyug no, “á raw tos [Jeofa], raa debaŋ de lawge jiili.” Á kem Jeofa de wããge ga: “[Jeofa] Pantway no, hayga nen ɓo ko re sõõre ma ti maygebee ɓon we, hayga ndo ɗig ti we ti ɓi day ndo yõõ ti we go ti maygebee ɓon gà no.” (1 Sam. 1:10b, 11) Ana wãã fẽn maaga hay ɗiggi ɓe, lan ga hay hã lawge ne hẽn jiili ne Jeofa nen tosge. Á hay diŋ mãy maaga Jeofa dan debaŋ, day se hay de sãy teŋ nen ɓe ti.
7. Coɓge maa hõn ga Ana da’ de maaga bul jiili ɓe go ne Jeofa mo là?
7 Ana ko see ɓe koge blam maaga á bul jiili ɓe go ne Jeofa nen tosge, lan da’ coɓge do Eli jee siɗ jag maa kluun là? Bible wãã ga: “Wãy sen la raw mbe maŋ faage ɓen so. Se kal rege, nen ɓe joŋ de swĩdgi doo ma seɓaan no gà so.” (1 Sam. 1:17, 18) Koh de maaga ren hay bay mbe de cooge ne Ana peel wa ɗa mo laybla no, jiili ɓe suu ɗawa. Á hay de kaŋ ɗiggi ga Jeofa de ko re maa see sen wo de fẽẽre maaga ɗig wo se mono, lan ga á kay se yaŋ. Sen diŋ fẽn maaga Jeofa joŋ mono. Á ko ɗiggi ɓe, laa tosge ɓe, lan blam se hã weere ne hẽne.—1 Sam. 1:19, 20; 2:21.
8-9. Doo maaga Hebre wo 10:24, 25 wãã ne mono, wer mayse ga naa mo dur maa woge ti taygeti là? (Ko foton lay.)
8 Hadge maaga naa da’ ra see Ana. Maapo ga ndo patala nen re maaga hã lawge mo debaŋ. Maapo ga jobo maa ɓi feele, noga bar ɓo húu go. De maaga re maa de maŋ sen hres we no, maapo ga ndo ɗig ga ndo mo hay go boŋ ɓo, day re bay go ni wa. Amaa ɗig ti saɓlaŋ Ana ɗa. De maaga á hay raw ɓil mburyug mono, Jeofa hay coɓ ne wo ni. Doo sen no lay, Jeofa coɓ ge mo yaŋ, lan jor ge glog ɓo yaŋ hayga ndo yaŋ woge ti taygeti—koh ndo mo hay ba go de gayri noga go nen lawge yaw. (Jaŋ Hebre wo 10:24, 25.) Ti taygeti wo, naa laa verse maaga coɓ wo naa ni. Sen diŋ ɗeŋ maaga Jeofa kay naa maa men ɗiggi go ti re maaga hã wo lawge ne naa mono. Ɓo’ge ti ɓen so, jiili naa suu ɗawa, koh re maa see naan mo hay ba de cooge wa laybla no.
9 Ti taygeti, hẽẽre naa coɓ wo naa, day ngaɓ wo go ne naa ga saara da naa debaŋ. Lan naa ko see naa de woore ɗawa de maaga naa yaŋ see ɓaara no. (1 Tes. 5:11, 14) Naa ko saɓlaŋ hẽn naa piyoniyẽ espesiyal po ga wãy ɓe húu go mo ɗa. Á wãã ga: “Ndi tum raa wãy ɓi. De ngar ngeel maa po, ndi da hayge go boŋ ɓi raage, wer ga sãy wãy ɓi baa me debaŋ, day ndi bay men roo wa lay. Amaa de maaga ndi wo ti taygeti mono, ndi da’ coɓge maaga ndi de sãy ɓe ti mono. Wããre maa de dage ga hẽẽrebe wãã wo ne ndi, lan ferge wããre ɓaara ti taygeti teŋ wo nen ɓi debaŋ. Ndi mo hay ba go de caa jiili, noga nen lawge taŋgu maaga ndi wo ti taygeti mo laybla no, ndi ko see ɓi wo ni tum ɗawa blam taygeti no.” De maaga naa ti taygeti mono, Jeofa joŋ joŋre de hẽẽre naa wo maa kay naa.
Naa da’ coɓge see hẽẽre naa wo (Ko paragraf 8-9)
10. Naa joŋ doo Ana de maaga naa yaŋ nen lawge debaŋ na joŋge là?
10 Ana ko see ɓe ɗawa blam maaga á wãã re maaga hay ɗiggi ɓe ne Jeofa nen tosge mono. Ndo mbo de kããge maa joŋge ga “ɗiggi fẽẽre maga [ndo] de sãy ɓaara tim ɓuy, men. . .ɗiggi sen diŋ ne [Jeofa],” de kaŋ ɗiggi ga á co’ sug ɓo yaŋ. (1 Pi. 5:7) Mãygemanbe po ga war ɓe huu go do jar le’ seege wo wãã ga: “Ndi hay ko see ɓi doo ga jiiri ɓi go de car nen nono, nen maaga ndi ferge go pẽẽge ti boŋ ga nono. Ndi da’ coɓge wo de teŋge nen de maaga ndi tos Jeofa, Pan ɓi maa de dage le ciŋ no. De ngar ngeel maa po, ɗeŋ fẽn maaga ndi de wãã hay bay nen ɓi wa so, amaa, á hay ko re maaga ndi hay nen ɓe mono. De maaga ndi hay go nen lawge, lan go de caa jiili debaŋ lay mono, ndi hay wii jam maa jiili do Jeofa. Deparday tu jiili ɓi woo, lan ndi da’ ẽgre maa joŋ fẽn maaga ndi hay de sãy ɓe ti maa joŋge wur sen mono.” De maaga ndi wãã fẽn maaga ɓo’ ndi nen lawge ne Jeofa mono, Jeofa joŋ nen lawge lay, lan se ko fẽn maaga de gay ɗiggi ɓi dera tu mono. Koh de maaga ren bay mbe go de tawge wa laybla mono, Jeofa coɓ nen ɓo, lan kay ndo maaga jiili ɓo mo suu. (Siŋ. 94:19; Flp. 4:6, 7) Á ko durgi ɓo maaga ndo dur maaga ndo mo hay de deele mono, lan se poɗ ge ndo.—Heb. 11:6.
MBERBE MAA DO MBIƊGI DO
11. Dafid hay ko see ɓe na koge de maaga jar hay wo joŋge ɓe de ɓlagge mo là?
11 Dafid soɗ re maaga laa wo mberbe ne hẽn nen nen naw ɓe debaŋ. Jar hee ɓe hay wo ngaɓa debaŋ. Koh bar ɓe maa po wo de jar maa liŋ ni ɓe hay lag wo de deele see ɓe ga, lan hay wo kiɗgi ga saara joŋ ne de ɓlagge. (1 Sam. 19:10, 11; 2 Sam. 15:10-14, 30) Nen re maa de gayri maaga á yiŋ de ɓaara nen naw ɓe wo mono, á yer ga : “Ndi go de gayge doo ndumgi. De suŋ tum mokay no, fen súuli ɓin taŋ go de mberbe. Roo maaga ndi ra mono ɓo’ bii go ti fen súuli no.” Dafid hay ko see ɓe doo sen nono wer maylà? Á wãã ga: ‘Do jar hee ɓin wo mo deŋ ɓuy no.’ (Siŋ. 6:7, 8) Jar sen hay wo joŋ Dafid de ɓlagge hãã nen maaga se raa debaŋ.
12. Doo maaga naa da’ ɓil siŋ wora 56:9 ne mono, Dafid hay go de bawge jag jiili ti Jeofa ga hãylà?
12 Koh de maaga naw Dafid hay mbe de gayri laybla mono, se hay go de bawge jag jiili ga Jeofa da se. Á wãã ga: “[Jeofa] laa roo ɓin wo we.” (Siŋ. 6:9) De ngar ngeel maa po, Dafid yer wããre maa de woore ga naa da’ ɓil Siŋ 56:8. (Jaŋ ne.) De maaga naa jaŋ wããre sen wo mono, naa ko go ga Jeofa da naa debaŋ, lan ko el naa ti re maaga gay wo naa mono. Dafid wãã ga sen hay doo ga Jeofa de tay mberbe maa nen sen ɓil klobo noga de yer rage ɓil kefder ɓen nono. Dafid hay go de koge ga Jeofa de ko lawge se no, lan á yõõ ti go ti ɓe ga. Dafid hay go de bawge jag jiili ga Pan se maa ciŋ de dagen hay bay de koge diŋ re maa see sen tawa wa, amaa á de ko fẽn maaga re sen ɓo’ se nen ɓe mo lay.
13. Naa mo hay kaŋ mayse ti naa de maaga jar mbiɗ naa we do, noga kaŋ taw naa we là? (Ko foton lay.)
13 Hadge maaga naa da’ ra see Dafidi. Jiili ɓo go de caage wer maaga jobo maaga ndo de kaŋ ɗiggi ti ɓe mbiɗ mo do noga kaŋ taw ɓo yawlà? Maapo jobo maaga nday hay de wããge ga nday da kããra men ndo go, noga wãy ɓo noga war ɓo men ndo go. Noga maapo ga pa, jobo maaga ndo da ne men goŋ Jeofa go. Hẽnbe po maaga wãy ɓe joŋ figliw de jobo maa tigriŋ day men go pa wãã ga: “Ndi hay bay de ɗiggi ga tee re sen da’ wo me ti boŋ wa. Ndi hay bay ko see ɓi go halla wa, go nen lawge, lan ɓil ɓi hay de sõõge.” Hayga jobo yaŋ de kaŋ taw ɓo noga mbiɗ mo do no, hay go de bawge jag jiili ga Jeofa men mo go ti boŋ ga hase. Hẽn naa sen la wãã ga: “Ndi ko go ga jar téebeere joŋ wo tum de deele see ɓo ga, amaa maa Jeofan joŋ mbe de deele see ɓo tum. Mo a ba diŋ re maa hõnla, Jeofa joŋ mbe tum see ɓo. Á men jar maa yãã jag ɓen wo go ga hase.” (Siŋ. 37:28) Kaŋ ti ɓo pa ga dage maa ni Jeofan de daŋ maa ni jee táabay maa hõnla ɓuy. Á cen de debaŋ de maaga jobo maaga ndo da ne mbiɗ mo do mono. Amaa re sen coo ɗiggi Jeofa maaga á ɗig ti ɓo mo ga. Ndo de el nen ɓe. (Rom. 8:38, 39) Fẽn maa ɗawge tin diŋ ga: Jobo mo joŋ ba ndo de baywoore joŋge laybla no, Pan ɓo maa ciŋn da ndo debaŋ.
Kefder Siŋ wora hã bawge go ne naa jiili ga Jeofa maŋ see jar maaga jiili ɓaara mbar ra mono. (Ko paragraf 13-14)
14. Siŋ wora 34:19 hã bawge maa hõn go ne naa jiili là?
14 De maaga jobo kaŋ taw naa we no, naa de kããge maa da’ coɓge ɓil wããre maa ni Dafid ga naa da’ ɓil Siŋ wora 34:19 mono. (Jaŋ ne.) Kefder po maaga wãã ti Bible wãã ga jar maaga “ɗiggi ɓaara mbar ra” maapo ga wãã diŋ ti “jar maaga bay wo de kaŋ ɗiggi ti mopo wo peel de woore wa mono.” Jeofa kay jar maaga ɗig wo de maŋ sen na kayge là? Jeofa “maŋ see” naa. Á doo pããbe noga mããbe maaga teŋ nen mbarga ɓe maaga hay ti roo nono. De maaga naa joo bon wer maaga jobo kaŋ taw naa noga men naa go mono, Jeofa ko maaga á ce naa mono, day se kay naa deparday. Jeofa go de gorge maa coɓ naa, lan maa woo jiili naa de maaga jiili naa yaŋ go de carge, noga naa bay we go ko see naa halla wa no. Day á hã fẽẽre po wo ngaɓa ne naa maaga naa mo kaŋ ɗiggi ti ɓaara. Fẽẽre sen kay wo naa maa lagge de deele jag re maaga naa yiŋ de ɓaara wara mono.—Esa. 65:17.
MBERBE MAA DO ƊIGGI MAAGA REN COO GE WO GA
15. Re mayse hã lawge ne Esekiyas ga hãã se raa là?
15 De maaga kiŋgi ɓe hay 39 mono, Esekiyas Waŋ Juda laa ga se de cege maa de hãã see. Jeofa ɓo’ profed Esay maa wããge ne hẽn ga cege sen ‘ĩĩ ge ne go. (2 Waŋ. 20:1) De maaga Esekiyas laa wããre sen mono, se joŋ go nen lawge debaŋ, lan se raa debaŋ lay. Á wii kayge do Jeofa nen tosge go de jiili ɓe ɓuy.—2 Waŋ. 20:2, 3.
16. Jeofa hay joŋ mayse ne Esekiyas là?
16 De maaga Jeofa laa tosge Esekiyas, lan ko mberbe maa nen ɓen mono, se ko decoo ɓe, day wãã ne hẽn ga: “Ndi laa tosge ɓon we, ndi ko mberbe ɓon wo we. Koɗa, ndi pẽẽ ge ndo yaŋ go.” Jeofa ɓo’ Esay wo wiigi ɓe ga se ya’ naw ɓen yaŋ ne hẽn ciŋ ni, lan se yãã Jerusalem yaŋ go do jar Asiri wo.—2 Waŋ. 20:4-6.
17. Jeofa kay naa de maaga naa de cege maa de gaali na kayge là? (Siŋ wora 41:4) (Ko foton lay.)
17 Hadge maaga naa da’ see Esekiyase. Ndo joŋ joŋge hayga ndo yaŋ de cege maaga ko doo ga se pẽẽ ga là? Wãã fẽn maaga de gay moge ne Jeofa nen tosge. Á laa tosge ɓon yaŋ koh ndo mo wãã ba ne ne hẽn ti roo. Bible hã bawge go ne naa jiili ga “Baa ma ko decoo jar debaŋ no, je coɓ nen jar maga wo nen bon ma honla ɓuy” coɓ ge naa yaŋ jag ren wo ɓuy. (2 Kor. 1:3, 4) Naa bay maa gorge debala ga Jeofa mo yãã naa go jag ren wo ɓuy wa, amaa naa mbe maa kaŋ ɗiggi ti ɓe maaga á mo kay naa soɗ rage. (Jaŋ Siŋ wora 41:4.) Jeofa hã ẽgre, koge re lan jam maa jag jiili ne naa maa ooge jag ɓaara de nenterse maa ɓe no. (Jõõ. 18:14; Flp. 4:13) Á coɓ naa pa de wããge ne naa ga jobo joŋ ge cege wo nen naw maa peeln ga so.—Esa. 33:24.
Jeofa yiŋ ge jag yaŋ ti tosge naa de hã ẽgre, koge re, lan jam maa jag jiili ne naa (Ko paragra 17)
18. Ndo da’ verse maa hõn ga coɓ nen ɓo jag re maa de gaali là? (Ko ngeel maa de gaɗge “Wããre maaga coɓ wo nen naa de maaga naa ti roo mono.”)
18 Fẽn maaga Jeofa wãã ne Esekiyas coɓ nen ɓe. Naa ti see naa, naa mbe de kããge maa da’ coɓge de co’ sug fẽn maaga Jeofa wãã ɓil wããre ɓen mo lay. De maaga naa yaŋ go de caa jiili no, wããre Jeofa maa ɓil Biblen hã coɓge ne naa, lan joŋ ga jiili naa mo hay de suuli. (Rom. 15:4) De maaga mãygeman naa po wo nen wur bolaw Afrique, laa ga se de ‘cancer’ mono, se hay raage tum. Á wãã ga: “Verse po maaga coɓ ndi debaŋ diŋ Esay 26:3. Koh de maaga naa bay mbe de kããge maa coo re maaga naa de yiŋgi de ɓe wa mo laybla no, verse sen wãã ga Jeofa hã jam maa jiili yaŋ ne naa. Sen kay naa maa soɗ re maa hõnla ɓuy.” Ndo de ko verse po maaga coɓ nen ɓo de maaga ndo nen re po, ga ɗeŋ ɓe bay nen ɓo wa yawlà?
19. Naa de gor mayse ti naw maa peeln là?
19 Tawge tamsir go de kosge. Lan re maa de gayri ga ɓo’ wo naa nen lawge, lan laa wo mberbe ne naa nen yaɗ wo de peel ciŋ ni yaɗge. Amaa doo maaga naa ko le ti saɓlaŋ Ana, Dafid, lan Waŋ Esekiyas ne mono, Jeofa ko mberbe maaga laa go nen naa, lan se cen debaŋ. Á da naa de maaga naa lag de deele peel ɓe koh nen re, lan se yõõ ti go ti mberbe maaga laa go nen naa mo ga. Day de maaga naa yaŋ nen re maaga hã lawge ne naa no, sen go tinoo tu ga naa wããn ne Jeofa nen tosge. Da ga naa mo caa see naa go see hẽẽre naa maa ti tayge ga da wo naa mo wa. Lan da ga naa mo ya’ wer jaŋ Wããre Baa maa da’ coɓge maa ni Jeofa no. Naa mo hay wee go de bawge jag jiili ga hayga naa soɗ bon wo we de deele peel Jeofa no, á poɗ ge naa yaŋ. Yoo poɗge sen, naa da’ wããre maa de woore ga wãã ga á tag ge mberbe maaga laa go nen naa do lawge, do mbiɗgi do, lan kaŋge taw yaŋ go. (Naa. 21:4) Blam sen, hayga naa raa we no, ni se joŋ ge diŋ roo fruygi tawa tu.
SIŊ 4 “Jeofa diŋ jee koɗ me ge”
