1. Hoole pẽẽ ngaɓ diŋ mayse ɓil Bible là?

 LE TI kal maaga à yer Bible mono, hoole pẽẽ hay diŋ rege maaga jar dan debaŋ mono. (Tĩĩ. 14:18; Lug 4:4) Diŋ wersen so ga, Bible wãã ti pẽẽ maa ngaɓ wer rege wo ɓuy. (Mat. 6:11; Joŋre 20:7) Ɓaale ɓoge, Yeso joŋ fẽẽre mbuɗgi de hoole pẽẽ. (Mat. 16:​9, 10) Naa da’ maa po boŋ yoo ɓaara ɓil Jaŋ maa kuu 6. De maaga naa frug nen wããre sen we no, naa da’ hadge maaga naa joŋ joŋre de ɓe wara yaŋ ni.

2. Nen re maa hõn ga ngaɓan hay wo de sãy rege ti là?

² Blam maaga jar peele Yeso taw wo le go de siigi wããre Baa mono, saara gay go debaŋ. Diŋ wersen so ga Yeso hoo ra ti daage, cegaɗ wo maarog maa Galile wo go, maa woge ig see ɓaara. (Mark 6:​7, 30-32; Lug 9:10) Á raw wo wo go lagge ti ngeel maaga jobo bay ni wa, ti jeŋ Betsayda. De ngar ngeel sen tu pa, jar ndar pur a wo le, day cir wo ti ɓaara go. Yeso joŋ doo ga see ko ra ga nono ga. Desãy, á had ra ti Twaywaŋ maa ni Baan, lan pẽɗ cege ɓaaran wo go. Werga wur hay raw ra go debaŋ so mono, jar maa wer Yeson ya’ wo wii jag see ɓaara ga jar sen da’ wo rege gen ɓuy la. Jar maa po wo yoo ɓaara hay wo de rege do mẽ’ mẽ’ẽ, amaa daŋge ɓaara hay wo de sãy rawge ɓi leege maa yee rege. (Mat. 14:15; Jaŋ 6:​4, 5) Yeso joŋ mayse là?

YESO JOŊ FẼN MBUƊGI MAA HÃ HOOLE PẼẼ NE JARE

3. Yeso hay wii jar peele ɓen wo ga á mo joŋ wo mayse ne ngaɓan là? (Ko foto maa nen faalen lay.)

³ Yeso raw fer wããre ga: “Á raw wo we doosen no kay bay de el wa, hã we rege ne hara diŋ nday mbay.” (Mat. 14:16) Á hay bay gus wa, werga werpiiri hay wo ni go de ngar 5000 nokay. À de hay kee naare wo de weere wo we ni no, maapo ga á de hay  kos wo 15000 go. (Mat. 14:21) Andre wãã ga: “Weklee po yaŋ de hoole doo de beɗge la kemrem kemrem dwee, cẽẽ ti ɓe ni ɓog lay, de sen ɓuy á mokay kãã mbe jar maa ngaɓan wo mo deŋ mbaara gà pa”. (Jaŋ 6:9) Pẽẽ maa de joŋge de orje hay diŋ rege maaga jar hay rege ɓe tum, lan à hay laa manda ti weere cẽẽ maa kleere wo, blam à laa ra go higgi. Amaa, cẽẽ maaga hay do weeln hay bay de kããge maa re ngaɓan go ɓuy wa.

4. Naa had mayse see wããre maaga naa da’ ɓil Jaŋ 6:​11-13 là? (Ko foton wo lay.)

⁴ Yeso hay da ga se naa nen ɓil de el ɓen go see jare. Diŋ wersen so ga á wii ga á mo lag wo go ti fíi de car nen taɗ taɗe. (Mark 6:​39, 40; Jaŋ Jaŋ 6:​11-13.) Naa jaŋ ni ga Yeso joŋ suse’ ne Pan ɓe nen tosge ti pẽẽ wo de cẽẽ no. Yeso joŋ sen maa ngaɓge ga jee maaga de kããge maa hã rege ne jar diŋ Baa boŋ tu, lan se hay joŋ suse’ ne hẽn ti rege no. Á de el maaga naa mo maŋ saɓlaŋ Yeso de tosge taŋgu maaga naa le’ rege we no, koh naa mo hay ba de see naa tawa noga yoo jare. Blam sen Yeso raw riŋ jar peele ɓen wo ga á mo hã wo rege ne ngaɓa no, day ngaɓa maaga hay ti ngeel ni re wo go nen wuuri ɓaara. Wur sen rege hay gwan go gesiŋ ni debaŋ nen maaga ngaɓan hay bay de kããge maa rege ɓe go wa. Day Yeso wãã ne hara ga á mo laa wo ne wo go wa hase. Diŋ wersen so ga Yeso wãã ne jar maa wer ɓen wo ga á mo tay wo ti rege maaga gwa’ go ni mono, nen maaga á joŋ wo joŋre yaŋ de ɓe blam. Yeso hay bay ɓlag fẽẽre wa. Sen diŋ saɓlaŋ maa de woore ne naa. Hayga ndo yaŋ diŋ pããbe no, ndo mbo de kããge maa joŋ joŋre de wããre sen maa had weere ɓo wo ti de el tosge taŋgu rege; ti maaga á de el maaga á mo yãã wo waare jare, lan maaga do ɓaara mo hay  ma’ge ti fẽẽre maa do ɓaaran wo doo Yeso no lay.

5. Ngaɓan joŋ wo mayse de maaga á ko wo fẽẽre maaga Yeso joŋ wur sen mo là, day saara fer ne hẽn ti ɓe ga hãylà?

⁵ Wer maaga Yeso pẽẽ jar go de joŋ fẽẽre mbuɗgi, lan wer maaga á hay diŋ jee maa de ko hadge debaŋ mono, sen hay ngel jar debaŋ. Á hay wo de koge ga Moyis hay go de wããge ga Baa ɓo’ge profed yaŋ le ne hara, maapo ga á hay wii wo jag see ɓaara ga ‘jee sen joŋ ge yaŋ diŋ Yeso yawlà?’ (Dog. 18:​15-18) Á de hay we doo sen nono, á de joŋ ge diŋ waŋ maaga daŋgo, ga de hay joŋ de kããge maa hã rege ne jar Israyel wo ɓuy. Diŋ wersen so, ngaɓan hay da ga saara “baa [Yeso] hayge ti Waŋ.” (Jaŋ 6:​14, 15) Hayga Yeso de hay men see ɓe we hayge waŋ no, ni se hay kal see ɓe ti poltig jar Jwif maaga jar Rom hay wo wãã re ɓaara mono. Á joŋ mbe sen we yawlà? Baywa. Á hay joŋ mayse là? Bible wãã ga Yeso raw ferge ‘hayge wo go ti húulì fentray ɓe boŋ pa.’ Koh de maaga á hay mbaara baage ɓe de waŋ laybla mono, á laa dayge hee see ɓe nen poltig ga. Á diŋ saɓlaŋ mayse de woore ne naa mokay ne!

6. Naa maŋ saɓlaŋ Yeso na maŋge là? (Ko foton lay.)

⁶ Sen go tinoo tu ga, jar wii naa wara ga naa mo kol hoole pẽẽ puri, noga pẽẽ cege go de fẽn mbuɗgi ga. Day wii wo ga saara kol naa waŋ, noga jee wãã wããre sir ga lay. Amaa, á srog mbaara glog naa joŋ poltig de vodge, noga maŋge wer jobo maaga saara ɗig ga á joŋ ge yaŋ nen ɓaara diŋ waŋ maa ti ngeel ɓe  mono. Amaa, saɓlaŋ Yeso hay go ngaɓge ne naa de woore. Á hay bay hee see se nen wããre poltig wa. Blam sen se raw wããge ga: “Twaywaŋ ɓin bay diŋ ti tamsir sen la wa.” (Jaŋ 17:14; 18:36) Naa Kretiyẽ maa waran, naa de hay ɗig doo Yeso no lay, lan naa mo hay maŋ saɓlaŋ ɓe. Naa kay, hã sedeewa, lan tos ti Twaywaŋ se no. (Mat. 6:10) Naa fer wee ti fẽn mbuɗgi maaga Yeso joŋ maa kol pẽẽ pur ne jare, lan naa kiɗ hadge maaga naa da’ wer ɓe ni pa mo ɗa.

“PẼẼ WÃÃ WO DIŊ MAYLÀ”

7. Yeso hay joŋ mayse là, day jar peele ɓen hay joŋ wo may lay là? (Jaŋ 6:​16-20)

⁷ De maaga Yeso hã rege go ne jar maa ngaɓan mokay, á raw wii jar maa wer ɓen wo ga saara mo men ngeeln go maa ferge Kapernam ti daage. Day á raw ferge hayge wo go ti húulì fentray ɓe boŋ do maaga ngaɓan hay wo kiɗgi ga saara baa ne waŋ mono. (Jaŋ Jaŋ 6:​16-20.) De maaga jar peele ɓen hay wo ti daage nen bii mono, leege raw naage le de ẽgre ne hara ti. Blam sen, Yeso raw seege le ti bii de ɓaale ne jar maa wer ɓen wo ti ɗegere. Lan se wii jee peele ɓe Piyer ga á mo see le ti bii doo se no lay. (Mat. 14:​22-31) De maaga Yeso kal ɓi daagen mokay, leegen oo tu. Jar maa wer Yeso maa ɓi daagen raw wo ngelge, day wãã wo ga: “Ndo diŋ wel Baa cwãy.” a (Mat. 14:33) Amaa, á de woore ti maaga jar peele ɓen wãã wo sen blam maaga Yeso see ti bii mono, amaa bay blam maaga á hã rege ne jar de fẽn mbuɗgi mo wa. Naa ko wee fẽn maaga Mark wãã ti fẽn maaga hay hres le go mo ɗa: “[Jar peele Yeson] raw wo ngrisgi debaŋ. Á ngris wo werga á laa wo ɗig ti fen mbuɗgi maaga á joŋ de hoolen mo gà werga ti ɓaara hay bay go de bulgi laa wer wããre deparday wa ɗa.” (Mark 6:​50-52) Jar maa wer Yeson hay bay wo de koge ga Jeofa hay de hã ẽgre ne Yeso debaŋ debaŋ maa joŋ fẽẽre mbuɗgi wa. Go blam mẽ, Yeso fer wããge ti fẽn mbuɗgi pẽẽ ne jar tigriŋ pa, lan se had naa de hadge maa tigriŋ pa.

8-9. Wer mayse ga jar maa ngaɓan hay maŋ wo glog Yeso là? (Jaŋ 6:​26, 27)

⁸ Ngaɓa jar maaga Yeso hã rege ne hara hay wo de kaŋ ɗiggi diŋ ti fẽẽre maaga saara hay de sãy ɓaara ti mono. De ɗeŋ maa hõnlà? Toŋ ɓe mokay, á ko wo ga Yeso wo de jar peele ɓen raw wo. Daage maa po raw wo age le ɓi leege Tiberiyade. De sen mokay, á kal wo rawge Kapernam kiɗ Yeso. (Jaŋ 6:​22-24) Á joŋ mbaara mopo we maa ngaɓge ga saara de sãy da’ wer ne Twaywaŋ maa ni Baan de peel ti ni yawlà? Baywa. Á hay wo ɗiggi diŋ ti pẽẽ maa rege jag ɓaara tawa tu. Naa ko sen na de ɗeŋ maa hõn ne?

⁹ Naa ko fẽn maaga hres de maaga ngaɓan da’ Yeso wo de ngar Kapernam mo ɗa. Yeso wãã ne hara ga á a wo kiɗ se ge werga á wo de sãy rege ti tawa tu. Á wãã ne hara ga nday hay “re hoole, nday wuɗ lay” de “rege maga ɓlag ge go.” Á wãã ne hara ga á mo joŋ wo joŋre ti rege sen wa, amaa diŋ ti “maaga ig wolaŋ kol jar tenen tum ti’ lay mono.” (Jaŋ Jaŋ 6:​26, 27.) Yeso wãã ga hã ge rege sen diŋ Pan se. De maaga jar sen laa wo ga rege maa hã tenen maa tum ne saara yaŋ mono, maapo ga sen hay ngel ra! Rege maa hõn hã tenen maa tum là, day jar maa co’ sug Yeson da’ wo ne na da’ge là?

10. Jar Jwif mo hay joŋ wo mayse maa da’ tenen maa tumn là?

¹⁰ Jar Jwif sen hay wo de sãy ko fẽn maaga saara joŋn maa da’ rege se no. Maapo ga á hay wo ɗiggi ti fẽẽre maaga jag liŋgi maa ni Moyisn wii ga á mo joŋ wo mono. Amaa, Yeso fer wããre ne hara ga: “Joŋre maga Baa de gorge ɓe doo ɓay diŋ ga nday mo yãã wããre je  maga á ɓo’ ne le mono.” (Jaŋ 6:​28, 29) Á mo yãã wo wããre Yeso jee maaga Baa ɓo’ le maa ngaɓ hãge ɓil ɓaara. Sen kay ra maaga á mo da’ wo “tenen maa tum”. Yeso hay go de wããge ti sen peel bol ɗa pa. (Jaŋ 3:​16-18, 36) Yeso wãã ge go blam debaŋ ti ɗeŋ maaga naa da’ tenen maa tum da’ge la mono.—Jaŋ 17:3.

11. Jar Jwif hay joŋ wo mayse ga ngaɓ go ga á hay wo diŋ de sãy rege ti tawa tu là? (Siŋ wora 78:​24, 25)

¹¹ Jar Jwif sen hay bay wo yããge ga saara de hay hã ɓil ti Yeso wa. Á wii wo jag ɓe ga: “Ndo kãã ma kaŋ nen wùr ti fen mbuɗgi may maga wùr mo yãã wããre ɓo mo so ne?” (Jaŋ 6:30) Á wãã wo ga ti kal maa ni Moyisn mono, à hay hã Man le ne hara ciŋ de fẽn mbuɗgi. Hoole sen hay diŋ rege ɓaara maa tum. (Neh. 9:15; Jaŋ Siŋ wora 78:​24, 25.) Sen go tinoo tu ga, hay hãy rage diŋ ɗiggi rege maa ti hõõgesee tawa tu. De maaga Yeso wãã ne hara blam ti “rege maga a le ciŋ cwãy”, ga sar de Man, ga de hay hã tenen maa tum ne hara mono, á laa wo wii jag ɓe ti fẽn maaga á hay da wããge mo ga ɓuy. (Jaŋ 6:32) Á hay bay wo laa fẽn maaga Yeso hay kiɗgi ga se had ra ti ɗeŋ maa da’ tenen maa tum wa. Naa had mayse see wããre sen la là?

FẼN MAAGA DAŊGO NEN NAA DIŊ MAYSE LÀ

12. Yeso ngaɓ go ga mayse daŋgo là?

¹² Mokay diŋ hadge maa de woore ga naa da’ ɓil Jaŋ maa kluuri 6 mono. Yããge jag Baa, lan baage barge maa de woore de ɓe mo hay diŋ fẽn maaga daŋgo de woore nen naa. De maaga Manhúulí jãã Yeso mono, Yeso ngaɓ go ga yããge jag Jeofa diŋ fẽn maaga daŋgo de daŋ rege maa ti hõõgesee. (Mat. 4:​3, 4) Nen wããre ɓe maaga á sii ciŋ ti húulì mono, á had ga wer mayse ga á de woore debaŋ maaga naa mo baa barge de Baa la. (Mat. 5:3) Diŋ wersen so ga naa de hay wii jag see naa ga, ‘ɗeŋ maaga ndi joŋ naw ɓin mbe go de ngaɓge ga ndi mbi de ɗiggi ti holaŋ wùr de Jeofa de daŋ rege maa ti hõõgeseen yawlà?’

13. (a) Wer mayse ga fruygi ti rege bay diŋ ɓlagge wa là? (b) Naa mo hay joŋ hayya ne see naa ti maylà? (1 Korente wo 10:​6, 7, 11)

¹³ Á bay diŋ ɓlagge de maaga naa tos ti fẽẽre maaga naa de sãy ɓaara ti, lan naa fruy ti ɓaara mo wa. (Lug 11:3) Bible wãã ga maaga jobo joŋ joŋre maa da’ “rege wo de joge, day joŋ fruygi ti joŋre ɓe, sen de ele. “Sen diŋ fen maga nduu le ni Baa.” (Ekl. 2:24; 8:15; Jag. 1:17) Amaa, da ga naa mo men fẽẽre maa do naan wo go kolge diŋ fẽẽre maaga daŋ wo go nen naw naa wa. Apotre Pol wãã sen de maaga á hay yerge wo ne Kretiyẽ maa ti wur maaga tawge Jerusalem hay go de kosge mono. Á hay wãã fẽẽre maaga hay hres wo le Israyel ɓaa, de maaga hay hres wo le ti jeŋ húulì Sinay mo ɓuy. Á ɓo’ sug Kretiyẽ wo ga á mo hay wo “da re maa de ɓlagge doo ga á hay dan wo ne wa.” (Jaŋ 1 Korente wo 10:​6, 7, 11.) Jeofa hay hã rege ne jar Israyel sen wo de joŋ fẽn mbuɗgi. Amaa wer maaga jar Israyel sen hay wo da rege debaŋ so mono, á ko wo Man go diŋ “re ma de ɓlagge.” (Kee. 11:​4-6, 31-34) De maaga á hay wo goŋ day maa de yorgen mono, jar Israyel hay wo go ngaɓge ga saara de kaŋ ti debaŋ diŋ ti rege, joge, lan joŋge fruygi ti maaga saara yãã jag Jeofa mono. (Laa. 32:​4-6) Pol joŋ joŋre de saɓlaŋ sen maa ɓo’ sug Kretiyẽ maaga hay wo Jerusalem taŋgu ɓlagge tiŋ-Baan nen kiŋgi maa 70 N.W.N. Naa go wara de kos tawge tamsirn lay, naa mo hay joŋ hayya ne see naa ti ɓo’ge sug maa ni Poln lay, nen maaga naa mo le’ nen tee re maaga jar Israyel leɗ wo nen ɓe mo wa.

14. Bible wãã mayse ti rege wo ɓil sir maa defayn là?

¹⁴ De maaga Yeso wii ga naa mo tos ga Baa mo “hã rege ne [naa] ti naw tum” mono, á wãã ga naa mo tos ga “daga jar mo hay joŋ fen maaga ɓil [Baa] dan gesiŋ la doo maa ciŋ no  lay.” (Mat. 6:​9-11) Tamsir joŋ ge joŋge ti wur maaga wããre sen bag ge jag go mo là? Bible ngaɓ ga dage Baa maaga joŋ ge gesiŋ la, wãã ti rege maa de woore lay. Esay 25:​6-8 wãã ga rege maa de woore maa hã fruygi ne jar joŋ ge go ti ngeel ɓuy. Siŋ wora 72:16 wãã ga: “Coore ble joŋ ge mbe yaŋ ɓi sirn deŋe, ti pẽẽge ti húulì wo mono, á ndar ti ni doo ga á ti húulì maa Libaŋ nono.” Ndo gor ga wur sen mo a maaga ndo joŋ rege maaga ndo da sen debaŋ yaw, noga joŋ rege maaga ndo hay joŋ sen ti boŋ ga ɗa yawlà? Ndo mbo de gorge maa jee pay tlalum, lan maa fruygi de yii ɓe pa yawlà. (Esa. 65:​21, 22) Day wosela ɓuy ti tamsir la, fruy ge yaŋ de fẽẽre se de wooren wo no.

15. Jar maaga bir gi wo le go had ge wo mayse yaŋ là? (Jaŋ 6:35)

¹⁵ Jaŋ Jaŋ 6:35. Fer ɗiggi ti pẽẽ, lan cẽẽ maaga Yeso hay hã ne jar de joŋ fẽn mbuɗgi mo ɗa pa. Koh de maaga jar maa po wo yoo ɓaara hay hã mbaara ɓil ti Yeso ga laybla no, maapo ga ti sir maa defayn á bir gi wo le go; day maapo ga ndo yiŋ ge yaŋ de jar maa po wo yoo ɓaara. (Jaŋ 5:​28, 29) Amaa saara joŋ ge de sãy da’ wer ne wããre maaga Yeso wãã ga: “Ndi diŋ hoole ma kol jar tenen, je maga a we see ɓi no, koŋne cen ge gà so hase” ti. Á joŋ ge wo de sãy hã ɓil ga Yeso hã tenen ɓen go maa yãã rage go. Ti wur sen mono, jar maaga à bir ra le go lan weere maaga biŋ wo ɓil sir maa defayn, laa wo wer yaŋ ne cwãy ti Jeofa, lan ti fẽẽre maaga á da ga se joŋ ra mono. Á diŋ fruygi may ga naa da’ maa had rage de fẽẽre sen wo de woore mo hã’ ne! Joŋge doo sen hã ge fruygi mo de daŋ rege hoole pẽẽ no. Fẽn maaga daŋgo wo ni diŋ fẽẽre maa ti nenterse wo.

16. Naa had ge mayse yaŋ wo ti hadge maa peeln là?

¹⁶ Ti hadge sen la, naa hay ko wããre maa po wo see wããre maa ɓil Jaŋ maa kluuri 6 no. Amaa Yeso hay wãã fẽẽre ngaɓa maa had jar ti “tenen maa tum.” Jar Jwif maaga Yeso hay wãã wããre ne hara hay wo de sãy co’ sug ɗegede, naa mo hay joŋ doo sen no lay. Naa wãã ge yaŋ ti Jaŋ maa kluuri 6 ti hadge maa peeln pa.