1. Wer mayse ga jar debaŋ ɗig wo ga naa joŋ tenen ti’ tum ga là?

 JAR debaŋ ko wo nen ti fẽẽre maaga saara re ra, joŋ wo ‘sport’ maaga saara mo hay tum holaŋ. Amaa, á wo de koge ga rege maa de woore wo de joŋge ‘sport’ kay saara maa maŋ jag tããbe wo de húulí go ne saara see ga. Á go tinoo tu á ɗig wo ga á de gayri maaga à joŋ tenen ti’ tum. Amaa ɓil Jaŋ 3:16 lan 5:​24, Yeso wãã ga jar téebeere joŋ ge mbaara yaŋ “tenen [ti’] tum”.

2. Jaŋ maa kluuri 6 wãã ti tenen maa tum ga hãylà? (Jaŋ 6:​39, 40)

² Ti wur po, Yeso joŋ fẽn mbuɗgi de hoole pẽẽ wo de cẽẽ maa hã rege ne jar ndar puri. a Sen hay ngel jar debaŋ, amaa fẽn maaga á joŋn toŋ ɓe fer ngel jar de peel ni debaŋ pa. Ngaɓan hay maŋ wo blam ɓe hãã wo Kapernam, ti jeŋ maarog maa Galile, ga wo ni se raw wããge ne hara ga jar téebeere mbaara de kããge maa ferge le go ciŋ, lan maa joŋge tenen ti’ tum. (Jaŋ Jaŋ 6:​39, 40.) Diŋ wersen ga naa mo ɗig ti bar naa wo de jar maa ɓi feele naa ga wo go de húulí mono. Wããre maa ni Yeson ngaɓ go ga yoo ngaɓa jar maaga huu wo go mono, jar po debaŋ fer ge wo le go ciŋ tenene. Day nday fruy yaŋ de jar maaga hay huu wo go ti paradis maa tum. Amaa, jar po wo debaŋ laa wo laa wer ne wããre maaga Yeso wãã ɓil Jaŋ maa kluuri 6 gus ga. Yeso hay wãã ga hãylà?

3. Yeso wãã ɓil Jaŋ 6:51 ga hãylà?

 ³ Blam maaga Yeso joŋ fẽn mbuɗgi maa hã rege ne ngaɓan mono, saara raw ɗiggi ti man maaga Jeofa hay hã ne jar Israyel wo ti puuli mono. Amaa, Bible ɗe man sen ga “hoole pẽẽ ma ciŋ.” (Siŋ. 105:40; Jaŋ 6:31) Yeso raw maŋ saɓlaŋ man maaga ngaɓan hay wo go de koge ɓe de woore maa had rage de wããre po ga daŋgo. Koh de maaga mann hay diŋ fẽn mbuɗgi maaga Jeofa joŋ ne mo laybla no, jar maaga ren wo huɗ wo go. (Jaŋ 6:49) Sara de sen mono, Yeso ɗe see ɓe ga “rege maga a le ciŋ cwãy,” “rege maga Baa hã ne,” lan “hoole ma kol jar tenen.” (Jaŋ 6:​32, 33, 35) Yeso ngaɓ sara maa ti holaŋ hoole man, lan de see ɓe. Á wãã ga: “Ndi diŋ hoole ma kol jar tenen maga a le ciŋ, je maga re hoole sen mokay we joŋ yaŋ tenen caw tum.” (Jaŋ Jaŋ 6:51.) Jiili jar Jwif sõõ wo wer wããre sen debaŋ. Á hay bay wo laa wer ne wããre maaga Yeso wãã ga se diŋ “pẽẽ” maga a le ciŋ, day ga pẽẽ sen de daŋ man maaga Baa hay hã ne mõõre ɓaara wo mo wa. Blam sen Yeso wãã ga “Hoole se maga ndi hãn ge […], hoole sen diŋ ndi de see ɓi tuu.” Wããre sen hay da wããge na ga hãylà? Á de el maaga naa mo laa wer ne wããre se no, werga yiŋgi jag ti wiigi jag ngaɓ ga naa de jar maa see naa maŋ wo, naa da’ tenen maa tum yaŋ cwãy. Naa ko maaga Yeso hay da wããge ti ɓe mo ɗa.

HOOLE MAA KOL JAR GO TENENE LAN HÕÕGE SEE ƁE

4. Wer mayse ga Wããre maaga Yeso wãã ne ce jar maa po wo debaŋ là?

⁴ Á ce jar maa po wo yoo jar maaga hay wo co’ sug Yeso debaŋ, de maaga á wãã ne hara ga se hã ge hoogesee se go “maga jar maa ti tamsirn mo kol wo tenene” mono. Maapo ga á hay ɗig wo ga Yeso de sãy maaga saara mo re hoogesee se ti cwãy. (Jaŋ 6:52) Day Yeso wãã wããre po, wããre sen ya’ wer ce rage de peel ni debaŋ pa. Á wãã ga: “Kidolgi ndi riŋ nday, hayga nday re hõõgese Wel je táabayn we gà nday jo cíi ɓe we gà no, ni nday kol ge tenen gà hase.”—Jaŋ 6:53.

5. Wer mayse ga naa mo hay go de bawge jag jiili naa ga Yeso hay bay da wããge ga jar mo jo cíi se maa cwãyn wa là?

⁵ Ti wur maa ni Nowen le, Baa maŋ jag jar téebeere wo go ga á mo re wo cíi wa. (Tĩĩ. 9:​3, 4) Blam sen Jeofa fer dog jag liŋgi sen ne jar Israyel wo pa. Á wãã ne hara ga wosela ɓuy maaga re cíi we no, “à yee ge nen ɓe go yoo jar ɓen wo”. (Lef. 7:​27, Ko ngeel naa wer maa gesiŋ ɓil TMN.) Yeso wãã ne jar Jwif wo ga á mo hoo wo sug ti jag liŋgi maaga Baa hay go de hã rage ne hara wo mo ɓuy. (Mat. 5:​17-19) Wer sen, á hay bay wii rage ga á mo re wo hõõgesee se maa cwãy, noga mo jo wo cíi se maa cwãyn wa hase. Amaa, Yeso wãã wããre sen maa ngaɓge ne hara diŋ ɗeŋ maaga á da’ wo “tenen ma tum” da’ge la mono. —Jaŋ 6:54.

6. Wer mayse ga naa mbe maa wããge ga wããre maaga Yeso wãã go ti rege hõõgesee ɓe wo de cíi ɓe hay diŋ jag jõõ là?

⁶ Yeso hay da wããge diŋ ga hãylà? Sen go tinoo tu ga Yeso hay wãã wããre sen diŋ ɓil jag jõõ, doo maaga á wãã ne wãy jar Samari taŋgu ga: “Wosela maga jo bii maga ndi hãn ge ne hẽn we no, jwaale kaŋ ge je sen gà so hase, werga bii maga ndi hãn ge ne hẽn, kol ge ɓil ɓe diŋ kããge bii ma kol jar tenen tum” nono. (Jaŋ 4:​7, 14) b Yeso hay bay  wããge diŋ ga wãy jar Samarin da’ tenen maa tum mbe tu, wer maaga á jo bii po na wa. Doo sen no lay, á hay bay wããge ne ngaɓa maaga se hay ti wããre ne hara Kapernam diŋ ga á joŋ ge wo tenen maa tum, hayga á re wo hõõgesee se we, noga jo wo cíi se maa cwãyn we no wa.

WUR MAA TIGRIŊ GA YESO JOŊ JOŊRE DE WÃÃRE MAA DE MAŊ SEN PA

7. Jar maa po wãã wo mayse ti wããre maaga Yeso wãã ɓil Jaŋ 6:53 là?

⁷ Jar maa po wãã wo ga ɓil Jaŋ 6:53 mono, Yeso hay da naage diŋ wer fẽn maaga à de hay joŋ wur maŋge Hoole Waŋ mono; Werga wur sen, á wãã wããre po wo de maŋ tee wããre sen pa. (Mat. 26:​26-28) Á wãã wo ga wosela ɓuy maaga a ti wur maŋge Hoole Waŋn, re hoole lan jo yíi maaga à hres de ɓe ne jar do mono. Sen mbe ti ngeel ɓe yawlà? Á de el maaga naa mo da’ yiŋgi jag ti wããre se no; werga tum nen kiŋgi, jar milyoŋ pur ti tamsir leŋ leŋ ɓuy tay wo de naa wur se no. Naa ko sara maa ti holaŋ wããre maaga de wããge ɓil Jaŋ 6:​53, lan wããre maaga Yeso wãã wur Hoole Waŋ mo ɗa.

8. Wããre maaga Yeso wãã ɓil Jaŋ 6:53 sar de wããre maaga á wãã ne de law wur Hoole Waŋ ti may là? (Ko foton wo lay.)

⁸ Maa taŋgu no, Yeso wãã wããre maa ɓil Jaŋ 6: 53-56 na hunlà, lan la genlà? Á wãã wããre sen wo nen kiŋgi maa 32 N.W.N. ɓi sir Galile. Á wããn go kiŋgi boŋ taŋgu maaga á  caa jag maŋge Hoole Waŋ de law Jerusalem mono. Maa de ɓog no, á wãã wããre sen wo diŋ ne wose wo là? Á wãã ra diŋ ne jar maaga hay wo de kaŋ ɗiggi ti rege maaga Yeso hã ne hara de daŋ co’ge sug wããre maa ni Jeofan wo de Twaywaŋ maa ɓen mono. (Jaŋ 6:26) Day de maaga Yeso wãã fẽn maaga laa laa wer ne hara gus ga mokay, saara men hã ɓil go ti ɓe deparday tu. Koh jar maa wer ɓe maa po laa wo maŋ blam ɓe ga so. (Jaŋ 6:​14, 36, 42, 60, 64, 66) Ngaɓ wee ba fẽn maaga hres ti wur sen, de maaga hres kiŋgi 1 blam nen kiŋ maa 33 N.W.N. ɗa. Ti wur sen apotre Yeso maa 11 hay wo see ɓe, koh de maaga á hay bay mbaara go laa wer ne fẽn maaga á hay had rage de ɓe wa mono. Sara de jar maaga hay wo Galile mono, apotre Yeson hay wo go de bawge jag jiili ɓaara ga Yeso hay diŋ mbarga Baa maaga a le ciŋ. (Mat. 16:16) Á kee ra ga: “Nday yaŋ tayge de ɓi tum nen bon ɓi no.” (Lug 22:28) Fẽẽre se sar sar ɓogn ngaɓ wo go ga ɓil Jaŋ 6:53 Yeso hay bay wããge diŋ fẽn maaga à hay joŋ ne de law wur Hoole Waŋ mo wa. Amaa, wur se ɓogn wo mo lag sar ti holaŋ ɓaara debaŋ.

WÃÃRE MAAGA YESO WÃÃ RA DA WO WÃÃGE NE NDO GA HÃYLÀ

9. Wããre maaga Yeso wãã de law wur maŋge Hoole Waŋn wãã diŋ ne wose wo là?

⁹ De law de maaga á maŋ Hoole Waŋ mono, Yeso hã pẽẽ maa bay defõõre ne apotre ɓen wo, day wii ra ga, mokay ngaɓ diŋ hõõgesee ɓi. Blam sen á raw maŋ wehãn de yíi ɓili, day wii ra ga “mo kay [ngaɓ] diŋ cíi ɓi ma kaŋ nen jar ti barge maga Baa fer bagge ɓe de jar téebeere wo mono.” (Mark 14:​22-25; Lug 22:20; 1 Kor. 11:24) Fẽn maaga á wãã ti barge sen daŋgo. Werga barge sen de baage diŋ de “jar Israyel [ma ti nenterse]” ga joŋ ge wo yaŋ ti ‘Twaywaŋ ma ni Baa’ mono. (Heb. 8:​6, 10; 9:15) Apotre ɓen laa wo laa wer ne wããre sen ti wur sen ni ga, blam sen maŋ tu, Baa sreŋ ra de nenterse ɓe maa bay ɗag no, saara laa ɓil tayge jag maa de fay, ga á joŋ ge wo yaŋ wo ciŋ ti jeŋ Yeso mono.—Jaŋ 14:​2, 3.

10. Sara ti holaŋ wããre maaga Yeso wãã ne jar le Galile de maaga á wããn de law wur Hoole Waŋ diŋ maylà? (Ko foton lay.)

¹⁰ Wããre maaga Yeso wãã de law wur maŋge Hoole Waŋn wãã diŋ ne “horog ma mbag” wo no. Apotre ɓe maa de deele, ga hay wo ti jeŋ ɓe, wo diŋ jar maaga tõõ wo wer de ɓe taŋgu ti tayge jag de jar maa mbagn wo no. (Lug 12:32) Á wo diŋ jar maaga Yeso ɓo’ faage ne hara maa re hoole, lan maa jo yíin ti wur sen de law mono. Jar maaga kol ge wo blam yoo jar se mbagn mo hay re wo hoole, day jo wo yíi wur ɗiggi ti húulí Yeso lay. Á wo diŋ jar maaga wo ge wo yaŋ lagge ciŋ ti jeŋ Yeso mono. Wããre maaga Yeso wãã ne jar peele ɓen wo wur sen sara de maaga á wãã ne ngaɓan le Galile mono. Wããre maaga á wãã de law wur Hoole Waŋn wãã diŋ ne jar po wo mbag koɗe. Amaa maaga á wãã sen le Galile wãã diŋ ne jar ɓuy.

11. Yeso wãã may le Galile ga hay bay wããge diŋ ne jar po mbag ta’ wa là?

¹¹ De maaga Yeso hay Galile nen kiŋgi maa 32 N.W.N. mono, á hay wããge debaŋ diŋ ne jar Jwif maaga hay wo gorge do ɓe diŋ rege tawa mono. Amaa, á fuŋ sug ɓaara diŋ ti fẽn maaga de el de daŋ rege maa jage. Á wãã ne hara ti rege maaga kaŋ wer ɓaara yaŋ da’ tenen maa tum mono. Day Yeso wãã ga jar maaga wo go de húulí fer ge wo le go birgi, lan joŋ wo yaŋ tenen maa tum ti sir maa  de fay no. Doo maaga á wãã ge go blam wur Hoole Waŋ de law no mono, á hay bay wããge diŋ ti jar po wo ta’ wa. Amaa le Galile se wãã debaŋ diŋ ti bosa’ maaga jar ɓuy da’ge wo ne mono. Wer sen se raw wããge ga: “Je maga re Hoole sen mokay we, joŋ ge yaŋ tenen caw tum; . . . Hoole maga ndi hãn ge ne hẽn, hoole sen diŋ ndi de see ɓi tuu. Ndi hãn ge maga jar ma ti tamsirn mo kol wo go tenene.”—Jaŋ 6:51. c

12. Naa joŋ joŋge maa da’ tenen maa tum là?

¹² Yeso hay da wããge diŋ ga jee maaga hay joŋ we tenen caw ɓuy da’ ge mbe tenen maa tum koɗ yawlà? Baywa, say diŋ jar maaga ‘re wo hoole sen we’, kaŋ nen ga jar maaga hã wo ɓil we ti Yeso no. Jar wara debaŋ wãã wo ga saara hã ɓil ti Yeso, day ɗen wo ga jee yãã saara go. (Jaŋ 6:29) Amaa, jar maaga hay tõõ wo hã ɓil ti Yeso Galile, men wo hã ɓil go ti ɓe blam. Wer mayse ga á joŋ wo doo sen ne là?

13. Naa mo hay joŋ mayse maa kolge go jar maa wer Yeso cwãy là?

¹³ Daŋge jar yoo ngaɓa maaga Yeso hã rege ne hara hay wo go de fruygi maa maŋ blam Yeso de maaga á yaŋ hã fẽn maaga ɓil ɓaara dan ne hara no. Á hay wo de sãy maaga Yeso mo pẽẽ saara go ti, mo hã rege ne saara, mo had saara de fẽn maaga saara de sãy laage ɓe ti. Amaa, Yeso ngaɓ go cwãy tu ga se a ti tamsir bay maa hã fẽn maaga á wo de sãy ɓe ti ne hara wa. Amaa se a diŋ maa had rage de fẽn maaga á wo nen joŋge ɓe maa kolge ko jar maa wer se cwãy mono. Á hay wo de sãy ‘age le see ɓe’ ti, de co’ sug  ɓe, lan de hoo sug ti fẽn maaga á hay hadge ɓe mono.—Jaŋ 5:40; 6:44.

14. Naa de hay joŋ mayse maa da’ge wer hoogesee Yeso wo de cíi ɓe là?

¹⁴ Yeso had ra ga wer hoogesee se wo de cíi se maaga se hãn ge go mono, faage joŋ yaŋ go de bulgi ne hara maa da’ tenen maa tum. Á hay wo nen hã ɓil ti ɓe. Hãge ɓil sen hay de el maa jar Jwif wo le, day se de el maa naa wara lay. (Jaŋ 6:40) Mo maaga Yeso wãã ɓil Jaŋ 6:​53, da wããge ne naa ga, naa mo hay hã ɓil ti poɗge maaga Yeso poɗn go de hã see ɓe go huugi mono.—Efe. 1:7.

15-16. Jaŋ maa kluuri 6 had mayse maa de woore wo ne naa là?

¹⁵ Ɓil Jaŋ maa kluuri 6, naa had fẽẽre po wo ni debaŋ ga daŋ wo go, lan jor wo glog naa ɓuy. Naa da’ ni ga Yeso ko de el jar debaŋ. De maaga Yeso hay le Galile mono, á pẽẽ cege wo go, had jar ti Twaywaŋ maa ni Baa no, hã rege ne ngaɓan de maaga á hay wo de sãy rege ti mono. (Lug 9:11; Jaŋ 6:​2, 11, 12) Mo maaga daŋgo diŋ ga á had ra ga se diŋ “hoole ma kol jar go tenen.”—Jaŋ 6:​35, 48.

¹⁶ Cwãy tu, jar maaga Yeso ɗe ra ga “sããre ma tigriŋ” re wo Hoole noga jo wo yíin wur Hoole Waŋn de law ga. (Jaŋ 10:16) De sen ɓuy saara da’ mbe wer hõõgesee Yeso wo de cíi ɓe debaŋ. Á joŋ wo sen diŋ de hã ɓil ɓaara ti poɗge maaga Yeso poɗn de fẽẽre maaga á bul faage ɓaara mono. (Jaŋ 6:53) Jar maaga re wo hoolen, day jo wo yíin ngaɓ wo go ga saara de ɗege ti tayge jag maa de fay no, day saara de kaŋ ɗiggi ga saara lag ge waŋre ti Twaywaŋ maa ni Baa no. Wer sen, naa mo hay ba yoo jar maaga nenterse Baa de sreŋ rage, noga yoo sããre maa lan wo yaw, wããre maa ɓil Jaŋ maa kluuri 6 de el maa naa ɓuy. Á wãã debaŋ diŋ ti de el hãge ɓil naa maa da’ tenen maa tum.