Pol yer wããre po ne Timote ga: “Ndi de wii moge peel Baa wo de Yeso Krisi; lan peel jar peele Baa maaga à hoo ra go mono, ga ndo mo ko jar de daŋ kããra wa.”—1 Tim. 5:​21, TMN.

Maaga naa mo ko ga jar peele Baa wo diŋ wose wo la mono, naa wãã taŋgu ɗa diŋ ti jar peele Baa maaga bay wo yoo ɓaara wa mono. Cwãy tu, jar maa 144 000 ga Jeofa sreŋ ra de nenterse ɓen bay wo yoo jar peele Baa wo wa. De maaga Pol yer leder sen ne Timote mono, birgi Kretiyẽ maaga wo de sreŋge de nenterse hay bay de tõõ wer wa ɗa. Apotre Yeson wo de Kretiyẽ maa tigriŋ maaga wo de sreŋge de nenterse Baa hay bay wo de kolge go jar peele Baa wo wa ɗa; wer sen á bay wo yoo “jar peele Baa maaga à hoo ra go mo” wa—1 Kor. 15:​50-54; 1 Tes. 4:​13-17; 1 Jaŋ 3:2.

Jar peele Baa maaga men wo Jeofa go, lan yãã wo jag ɓe ti kal maa ni Nowen ga, bay wo yoo jar peele Baa se maaga à hoo ra go mo wa pa. Á maŋ wo blam Satan, kol wo go diŋ sõõre wo, lan kol wo go jar hee Yeso lay. (Tĩĩ. 6:2; Lug 8:​30, 31; 2 Pi. 2:4) Ig’ la mẽ koɗ mono, Yeso laa ge ra ɓi tuu maa kuɗumn de Manhúulí, hãã nen maaga kiŋgi maa 1000 mo hres go ɗa. Blam sen, à caa wer ɓaara go ɓuy.—Jud 6; Naa. 20:​1-3, 10.

Wersen, maapo ga “jar peele Baa maaga à hoo ra go” wãã diŋ ti jar peele Baa maa de deele, ga joŋ wo joŋre de Jeofa wo de Yeso mono.

Jar peele Baa maa de deele wo ngaɓa debaŋ. (Heb. 12:​22, 23) Naa de koge ga joŋre ɓaara boŋ boŋ ɓuy sar sare. (Naa. 14:​17, 18) Ɗig ndo ga wur po boŋ tu, Jeofa hã joŋre ne jee peele Baa po maaga á mo ‘war soode Asiri wo 185 000. (2 Waŋ. 19:35) Maapo ga à hã joŋre ne jar peele Baa maa po wo maa “ndar jar maga kaŋ wo wer jar lan leɗ ge go joŋ ɓlagge, de jar maga joŋ wo ɓlagge mo ɓuy yaŋ wo go pel ɓe [ti Twaywaŋ maa ni Yeso no].” (Mat. 13:​39-41) Maapo ga jar peele Baa maa po, joŋ wo de joŋre maa “tay ti jar maga Baa hoo ra go ma ɓe” mono. (Mat. 24:31) Ni pa mono, Baa hã joŋre ne jar peele Baa wo maa ‘koɗ naa[ge] ti faage naa wo ɓuy.’ —Siŋ. 91:11; Mat. 18:10; tab ne de Matiye 4:11; Lug 22:43.

Wer sen, “jar peele Baa maaga à hoo ra go” ɓil 1 Timote 5:21 wãã diŋ ti jar peele Baa maaga à hã joŋre ne hara maa kay tayge maa ni Jeofan ti tamsir la mono. Ɓil ‘chapitre’ maa 5 mono, Pol baa yaŋ ne Kretiyẽ wo maaga á mo hoo wo sug ti jar maa peel taygen wo. Ni pa mono, Pol wãã ga jar maa peel taygen hay joŋ wo joŋre ɓaaran de woore, á mo hay wo “ko jar de daŋ kããra[…] wa”, lan mo hay wo “da jobo de daŋ kẽẽ ni wa” lay. Jar maa peel tayge mo hay maŋ wo ɗiggi, noga mo hay caa wo wo kiida jar deparday tu wa.” Wer mayse ga á mo joŋ wo hayya ne see ɓaara là? Werga á joŋ wo joŋre ɓaaran “peel Baa wo de Yeso Krisi, lan peel jar peele Baa maaga à hoo ra go mono.” Sen kay naa maa laa wer ɓe de woore ga jar peele Baa po wo de joŋ joŋre ti ɓaŋ tayge. Á kay wo taygen maa sii wããre Baa, á koɗ wo ne, lan á wãã wo ne Jeofa ti fẽẽre maaga á ko wo ti taygen mono.—Mat. 18:10; Naa. 14:6.