Wããre maaga ɗuu “puspus” a le see ɓe ɓil Traduction du monde nouveau ngaɓ diŋ ti wer puspus maa hõnlà ɓuy. (Joŋre 8:​28, 29, 38) Amaa, maapo ga puspus maa ni jee Etiyopin hay kluu de daŋ puspus maa durgi noga maa woge ti ɗee wo. Ko wer mayse ga á wãã doo sen ne là ɗa.

Jee Etiyopin hay diŋ jee wùu maa kluu ga hay seege jag de pããge debaŋ. Á hay diŋ “ jee kluu maa wãã re horogre maa ni wãy maaga diŋ waŋ jar Etiyopi wo mono.” (Joŋre 8:27) Sudaŋ wo de ɓaŋ ni wãyban Ejipte maa patalan hay wo ɓil Etiyopi maa ɓaa no. Koh maaga blo sen hay joŋ mbe joŋre de puspus sen boŋ ga laybla’ mono, á de hay joŋ mbe raŋge se jag de pããgen de fẽẽre do ngaɓa ane. Puspus maaga à hay joŋ joŋre de ɓaara ti wur maa ni apotren wo maa hoo fẽẽre hay diŋ puspus maa ɓaale naa naa wo. “Puspus maa de maŋ sen hay kluu maa hoo fẽẽre pur ɗawa, joŋ ga raŋgen mo joŋ de woore, lan maapo ga se joŋ raŋge maa jag depããge go gus lay,” doo maaga naa da’ ɓil kefder Acts—An Exegetical Commentary nono.

Jee Etiyopin hay jaŋge de maaga Filip ya’ le jeŋ ɓe mono. Bible wãã ga: “Filip raw ur ɗee deparday wo see puspus no, wo laa sug jee Etiyopin de jaŋ kefder maa ni Esay, jee ndar nen wããre Baa go yern mono.” (Joŋre 8:30) Puspus raŋgen hay bay wo de joŋge wur sen maa joŋ raŋge deparday wa. Werga puspus sen hay ɗeege see ta’ see ta’ so mono, sen hay kay jee Etiyopin maa jaŋ wããre Baa, lan hay kay Filip maa da’ puspusn de ɓaale lay.

Jee Etiyopin “raw ɗe Filip ga á mo ɗii le hayge see se ɓi puspus no.” (Joŋre 8:31) Ɓil puspus maa ɗee wo mono, jar ɗee lag wo ɓil ɓe deele. Amaa, ɓil puspus maa joŋ raŋgen lay mono, ngeel maa lag jee Etiyopin wo de Filip hay ni.

Doo maaga naa da’ ɓil Joŋre 8, lan ɓil mbaa wo no lay mono, kefder naa wo ngaɓa hay ngaɓ wo foto jee Etiyopin de hayle ɓil puspus kluu de daŋ puspus maa woge ti durgi noga maa ɗee wo no.