HADGE 4
SIŊ 30 Pan ɓi, Baa ɓi,
Jeofa de dage see ɓo debaŋ
“[Jeofa] diŋ jee maa de dage debaŋ, NWT”—JAG 5:11.
FẼN MAA KLUU ƁIL HADGE SEN LA
Dage maa ni Jeofan ya’ naa le see ɓe, joŋ ga naa mo ko see naa go de yããge, jam, lan go de woore.
1. Mayse a ne ndo ti de maaga ndo ɗig ti Jeofa mo là?
Ndo ɗig we go ti boŋ ti maaga Jeofa de maŋ maylà mo yaw? De maaga ndo tos ne mono, a ne ndo ti diŋ maylà? Á mbe cwãy ga nen naa bay ko Jeofa wa, amaa Bible naa nen ɓe ne naa de ɗeŋ ngaɓa. À ɗe Jeofa ga: “wuri lan gidigli” lan ga “wùu maa roɗ jare.” (Siŋ. 84:12; Heb. 12:29) Esekiyel ngaɓ ne nen lwa’ge doo húulì safir, doo boo maa sagge, lan doo sagge manyaabaa nono. (Ese. 1:26-28) Fẽẽre maaga à ngaɓ Jeofa de ɓaara maa po caa wo hẽẽne naa noga caa wo jag jiili naa go.
2. Mayse maŋ jag jar maa po wo go maa ya’ge see Jeofa là?
2 Wer maaga naa bay ko Jeofa wa mono, se joŋ de gaali maaga naa mo hã ɓil ga á da naa. Werga á joŋ wo bon nen naw ɓaara debaŋ mono, jar maa po ɗig wo ga Jeofa bay da saara ti boŋ wa. Maapo ga á hay da’ wo pããbe maa da rage ti boŋ ga. Jeofa de ko ɗiggi naa se no, lan se de koge wer mayse ga á de gayri maaga naa baa barge de se la pa. Maa kay naa mono, á naa nen joŋre ɓe maa de wooren wo ne naa ɓil Wããre ɓe no.
3. Wer mayse ga naa mo hay frug nen dage maa ni Jeofan go de woore là?
3 Mo maaga ngaɓ Jeofa de daŋ fẽẽren ɓuy diŋ dage. (1 Jaŋ 4:8) Bible wãã ga Baa diŋ dage. Dage ɓen naa nen go nen fẽẽre maaga á joŋ ra mo ɓuy. Dage Baa de tùu debaŋ, de ẽgre debaŋ lay, hãã nen maaga se naa nen ɓe go see jar ɓuy, koh see jar maaga bay wo dage ɓe wa mono. (Mat. 5:44, 45) Ɓil hadge sen la, naa ko ge Jeofa wo de dage ɓen yaŋ go de woore. Debaŋ ɓen de maaga naa da’ wer we go ne Baa de woore no, naa dan ge debaŋ lay.
JEOFA DA NAA DEBAŊ
4. Dage maa ni Jeofan joŋ see ne ndo na joŋge là? (ko foton lay)
4 “Jeofa de dage see naa debaŋ.” (Jag. 5:11, NWT) Ɓil Bible, á ngaɓ see ɓe doo maabe maa de dage nono. (Esa. 66:12, 13) Ɗig ba ti maabe maaga ko ngar mbarga ɓe de dage mo ɗa. Á ɓo’ ne ti mankũũni ɓe de woore, lan se wãã wããre ne hẽn de gẽẽge maa coɓge ɓe. De maaga á yaŋ raage noga ti bon no, á kiɗ fẽẽre maaga á de sãy ɓe ti ne hẽn ɓuy. De maaga naa yaŋ ti bon no, naa kaŋ ti diŋ ti dage maa ni Jeofa no. Jee yer siŋ hay yer ga: “De maaga ɗiggi ma ngaɓa nduu wo we jiili ɓi gijig mege no, Teŋge nen ɓon kal wo baa ɗiggi ɓi go de fruygi.”—Siŋ. 94:19.
“Doo maaga maabe coɓ mbarga ɓe ne mono, Ndi coɓ wee na doo sen no lay” (Ko paragraf maa 4 no)
5. Ɓil de el maa ni Jeofan wãã mayse ne ndo là?
5 Jeofa de el debaŋ. (Siŋ. 103:8) Á bay men naa go de maaga naa joŋ fẽn maa de baywoore we wa. Jar Israyel hay mbiɗ wo Jeofa do ɓaale ngaɓa debaŋ; amaa á naa nen dage ɓe maaga taw ti boŋ gan see ɓaara de wããge ga: “Ndo diŋ fen ma de ɗúu nen ɓi,.. fen ma de togoɗge nen ɓi, ndi da ndo.” (Esa. 43:4, 5) Dage maa ni Baan bay cooge wa. Naa mo hay tum kaŋ ɗiggi ti ɓe. Koh naa mo joŋ ba ɓlagge maa kwũy laybla no, Jeofa men naa go ga. Hayga naa ko we ga fẽn maaga naa joŋ diŋ ɓlagge, day naa fer we le see Jeofa lay no, naa ko yaŋ ga dage maa ni Baan mbe ti ngeel ɓe doo maa seɓaa ne no. Á wãã ga: “se bay gayge doo fug ɓil ne jar ti wa.” (Esa. 55:7) Bible ngaɓ ga fuggi ɓil sen diŋ doo “wur maa de woore . . . maa ni Jeofa de see ɓen tu” nono.—Joŋre 3:19, NWT.
6. Sakari 2:8 had mayse ne naa ti Jeofa là?
6 Jaŋ Sakari 2:8. Werga á da naa so mono, se ko re maa see naan wo deparday tu, lan se de sãy koɗ naa ti. Á ko see ɓe nen lawge de maaga naa yaŋ go de caa jiili no. Ɓo’ge ti ɓen so diŋ ga naa mo tos ga: “Koɗ me [doo] mbeere nen ɓo nono.” (Siŋ. 17:8) Nen diŋ ngeel maaga du’ go gus lan daŋgo yoo fẽẽre maa ti hõõgesee wo. Diŋ wersen so ga, Jeofa ngaɓ naa doo weere lakol nen ɓe wo nono, Sen doo ga á de wããge ga, ‘Jee maaga joŋ nday, jar maa ɓin we de ɓlagge no, ni se de joŋ ɓlagge diŋ see fẽn maaga daŋgo nen ɓi de woore.
7. Wer mayse ga naa de sãy ya’ wer kaŋ ɗiggi ti dage maa ni Jeofan ciŋ ti ni là?
7 Jeofa da ga naa mo hay go de bawge jag jiili naa ga se da wosela boŋ boŋ ɓuy yoo na. Amaa á de koge ga wer ngeel maaga naa hay hres le nen ɓaara mono, maapo naa wii jag see naa ga á mbe na de da naa yawlà. Noga maapo naa yiŋ de re de ngar ngeel sen ga hãy kaŋge ɗiggi naa ti dage maa ni Jeofa no. Mayse ya’ wer kaŋge ɗiggi naan ciŋ ni là? Ko ɗeŋ maaga Jeofa naa nen dage ɓen go see Yeso, see jar maaga á sreŋ ra de nenterse ɓen, lan see naa ɓuy mo ɗa.
JEOFA NAA NEN DAGE ƁEN GO NA NAAGE LÀ
8. Wer mayse ga Yeso hay go de bawge jag jiili ti dage maa ni Pan ɓen là?
8 Kiŋgi go ndar kis kis pur maaga kee ga, Jeofa wo de weel dage ɓen sa’ wo holaŋ ɓaara de dage maa kwũy. Barge maa ti holaŋ ɓaaran hay diŋ barge maaga tee ɓe bay wa. Doo maaga naa da’ ɓil Matiye 17:5 ne mono, Jeofa naa nen dage ɓen go see Yeso de woore. Jeofa hay wãã tu ga: ‘deŋ diŋ jee maaga ndi dan mono’ Amaa, á hay de sãy maaga ko ga se da Yeso gemãyla ti. Diŋ wersen so ga á ɗen ga: “wel dage ɓi.” Ɓil Jeofa hay de fruygi ne Yeso ti debaŋ lan ne fẽẽre maaga á hay joŋ ra mo pa. (Efe. 1:7) Lan Yeso hay bay mbrawge ti dage maaga Pan se da se mo wa. Dage maa ni Jeofan hay nen Yeso diŋ dage maa ti ngeel ɓe, ga hay du’ jiili ɓe go de woore tu. Á hay wãã go ɓaale ngaɓa de kaŋ ɗiggi ga Pan se da se.—Jaŋ 3:35; 10:17; 17:24.
9. Wããre maa hõn ngaɓ dage maaga Jeofa de ɓe see jar maaga á sreŋ ra de nenterse ɓen là? Naa wer ɓe. (Rom wo 5:5)
9 Jeofa naa nen dage ɓen go see jar maaga á sreŋ ra de nenterse ɓen wo mo lay. (Jaŋ Rom wo 5:5.) Ko wããre maaga wãã ga: “á hãn ne naa”. Kefder maa naa wer wããre maa ɓil Bible wãã ga wããre sen da wããge ga “a le ne wùr ti doo bii nono.” Sen diŋ ngaɓge dage mayse de ẽgre ga Jeofa de ɓe see jar maaga á sreŋ ra de nenterse ɓen mo hã’ ne! Jar maaga nenterse Baa de sreŋ rage wo de koge de woore ga “Baa da saara”. (Jud 1) Apotre Jaŋ wãã ti ɗiggi ɓaara go de maaga á yer ga: “Ko we dage maga Baa da naa de ɓe mo ɗa, hãã á kol ɗe naa weere” ɓe! (1 Jaŋ 3:1) Jeofa da diŋ jar maaga se sreŋ ra de nenterse ɓen tawa tu yaw? Baywa, Jeofa naa nen dage ɓen go see naa ɓuy.
10. Fẽn maaga ngaɓ dage Jeofa maa kluun go see naa diŋ maylà?
10 Fẽn maa kluu maa hõn ga naa nen dage Jeofan go ne? Diŋ raŋsoŋ— dage maaga tee ɓe joŋ ti boŋ ti tamsir la ga ɗa mono! (Jaŋ 3:16; Rom. 5:8) Jeofa men weel ɓe maaga daŋgo go húugi ti tu jar téebeere wo ɓuy, nen maaga naa mo da’ fuggi ɓil ti ɓlagge naan wo, lan maaga naa mo hay bar se. (1 Jaŋ 4:10) De maaga naa ya’ wer ɗiggi we ti poɗge maaga Jeofa poɗn wo de Yeso no, naa ko maaga á da wo wosela boŋ boŋ ɓuy yoo naa de woore yaŋ. (Gal. 2:20) Raŋsoŋ bay de poɗge diŋ werga deele maa ni Baa da ne koɗ wa. Amaa, á diŋ kado maa de hãge de dage. Jeofa naa nen dage ɓen go see naa diŋ de hã jobo maaga daŋgo nen ɓe—Yeso. Jeofa men Weel ɓen joŋ bone, lan hùugi go wer naa.
11. Jermi 31:3 had mayse ne naa là?
11 Doo maaga naa ko ne mono, Jeofa bay ɗiggi tawa ga se da naa wa, amaa á naa nen dage ɓen go de woore see naa debaŋ. (Jaŋ Jermi 31:3.) Jeofa ɗe naa le see ɓe diŋ werga se da naa. (Ngaɓ ne de Dogge jag liŋgi 7:7, 8.) Mopo noga jobo bay de kããge maa caa ɓil naa go de dage maa ni Baan wa. (Rom. 8:38, 39) Dage sen joŋ see ne ndo na joŋge là? Jaŋ Siŋ wora 23, lan ko maaga dage wo de sena’ge maa ni Jeofan joŋ see ne Dafid, lan ne naa lay na joŋge la mo ɗa.
DAGE MAA NI JEOFAN JOŊ SEE NE NAA NA JOŊGE LÀ?
12. Ndo wãã ti siŋ wora 23 go jag de dogray na ga hãylà?
12 Jaŋ Siŋ wora 23:1-6. Siŋ wora 23 diŋ siŋ maaga naa nen kaŋge ɗiggi de dage maa ni Jeofan go mono. Dafid, jee ‘waa siŋ sen ngaɓ barge maaga hay ti holaŋ ɓaara kwũy de Jeofa jee koɗge ɓen go. Dafid hay ko see ɓe go de yããge de maaga á hay men Jeofa ɓo’ faage fẽẽren ne hẽn mono, lan de maaga á hay men see ɓe ne hẽn mono. Dafid hay de koge ga Jeofa naa ge nen dage maa ni ɓen yaŋ go see se nen naw sen ɓuy. Mayse kayn maa kaŋ ɗiggi debaŋ ti Jeofa là?
13. Wer mayse ga Dafid hay go de bawge jag jiili ɓe ga Jeofa ɗaw se yaŋ do là?
13 “Mopo gwa’ ge go see ɓi ga so hase.” Dafid hay ko see ɓe go de da’ see ɓe debaŋ werga Jeofa hay tum hã fẽẽre maaga á de sãy ɓaara ti ne hẽn ɓuy. Dafid hay fruygi wer holaŋ ɓaara maaga hay de Jeofa, lan werga á hay de cõõre jag Jeofa mono. Diŋ wersen so ga á hay go de bawge jag jiili ɓe ga koh ngeel maa peeln mo kol ba wo de gayri kolge laybla, Jeofa joŋ ge yaŋ mbe tum hã fẽẽre maaga se de sãy ɓaara ti ne se. Dafid hay go de hã ɓil ga Jeofa da se, lan ga á ɗaw mbe se yaŋ do. Sen kay ne maaga á mo joŋ hẽẽne wa, amaa mo hay de fruygi, lan go ɓil feh.—Siŋ. 16:11.
14. Jeofa ɗaw naa do de dage na ɗawge là?
14 Jeofa ɗaw naa do de dage debaŋ, debaŋ ɓe de maaga naa yaŋ nen re maa de gayri wo no. Kler a maaga hay joŋ joŋre ti betel nen kiŋgi 20, hay ko see ɓe go de hoo ẽgre debaŋ de maaga jar maa liŋ ni ɓaara hay yiŋ wo de re maa de gayri wer kẽẽ ngaɓa mono. AVC hay laɓ pan ɓe go nen maaga se bay seege wa so, mãygeman ɓe maa po boŋ men goŋ Jeofa go, lan trere maaga á hay wo da’ suŋgu ni le’ go gesiŋ. Jeofa naa nen dage ɓen go see ɓaara na naage là? Kler wãã ga: “Jeofa joŋ ga jar maa liŋ ni wùr mo hay wo tum da’ fẽẽre maaga á wo de sãy ɓe ti mono. Ɓaale ngaɓa debaŋ, Jeofa hay hã fẽẽre ne wùr de daŋ maaga wùr hay de sãy ɓe ti mono! Ndi ɗig tum ti wur maaga ndi ko dage maa ni Jeofa, day dage sen hay bay yõõ ti ɓi go wa. Ɗiggi ti fẽẽre sen kay me debaŋ jag ngeel maa de gayri wo.”
15. Wer mayse ga Dafid ko jiili ɓe de wooge là? (ko foton lay)
15 “Á hã ẽgre ne tenen ɓi no.” De ngar ngeel maa po, Dafid ko see ɓe go de caa jiili wer re wo de gayri maaga á hay yiŋ de ɓaara mono. (Siŋ. 18:5-7) Amaa, dage maa ni Jeofan wo de ɗawge maaga á hay ɗawn do woo jiili ɓe. Jeofa koɗ bar ɓe maa de gayren [wo] ti “ngeel hõõ maa de laɓay” lan ti “jag bii ma desãy”. Ɓo’ge ti ɓen so, Dafid hay da’ coɓge, lan se ya’ wer joŋ joŋre ne hẽn de peel ni.—Siŋ. 18:29-33.
Koh ti wur maaga Dafid hay go ti ɗee caw mono, ɓil de el maa ni Jeofan hay woo jiili ɓe (Ko paragraf maa 15 no)
16. Dage maa ni Jeofan woo jiili naa na wooge là?
16 Wara doo sen no lay, “ɓil de el maa ni [Jeofan] bay go de tawge wa” de maaga naa jag gayri maa ti tamsir wo, re maa nen naw tum wo ɗa mono. (Law. 3:22; Kol. 1:11) Naa ko wee saɓlaŋ Rasel ɗa. Maa nen ɓe hay yeɗ nen ɓe go de maaga war ɓe men go, lan men goŋ Jeofa go ti wur cege Kovid-19 la pa mono. Jeofa joŋ na may maa kayge ɓe ne? Á wãã ga: “Jeofa joŋ nen maaga ndi mo hay ko see ɓi de dage. Á hã barge maaga ig wo jeŋ ɓi, a wo de rege ne ndi, yer wo message wo de ferse le me, feg wo de ɓi, lan ɓo’ wo sug ɓi tum ga Jeofa ɗaw me yaŋ do ɓe wo me. Ndi joŋ suse’ ne Jeofa tum ti maaga á hã ɓi feele maa kluu de dage me mono.”
17. Wer mayse ga Dafid hay bay “joŋ hẽẽne mopo [wa]’ ” là?
17 “Ndi joŋ hẽẽne mopo ga, werga ndo yaŋ de ɓi.” Naw Dafidn ɓuy hay nen re maa de gayri debaŋ, lan jar hee ɓen wo ɓuy hay wo de ẽgre pa. Amaa, dage maa ni Jeofan joŋ ga á mo hay nen jam go de yããge lay. Dafid hay ko see ɓe ti jeŋ Jeofa de maaga á yiŋ de re maa hõnla ɓuy. Day sen hay hã bawge go ne hẽn jiili debaŋ. De sen mokay, á kal ‘waa siŋ ga: “Á [Jeofa] yãã me go jag hẽẽne ɓin wo no.” (Siŋ. 34:4) Á mbe ti ngeel ɓe ga hẽẽne hay caa Dafid mbe de ngar ngeel po ta’a, amaa se naa blum werga á hay de koge ga Jeofa da se mono.
18. Naa ko koge ga Jeofa da naa, hã ẽgre ne naa de maaga naa yaŋ nen re maa joŋ hẽẽne là?
18 De maaga naa ko ga Jeofa da naa mono, sen hã ẽgre ne naa na hãge de maaga naa yaŋ nen re maa joŋ hẽẽne là? Piyoniyẽ po ga à ɗen ga Susi, ngaɓ ɗeŋ maaga á joŋ see ne saara de war se de maaga mbarga saara hay ‘war see ɓe go mono. Á wãã ga: “De maaga re maa de gayri caa ndo we no, se hoo ẽgre ɓo go, maa nen ɓo yeɗ nen ɓo go. Amaa dage maa ni Jeofan joŋ ga wùr mo ko see wùr go de yããge nen jam.” Rasel, maaga naa wãã le go ti ɓe ciŋ la, fer ɗiggi ga: “Wur po de suŋ, de maaga ndi hay go nen lawge debaŋ, lan ga hẽẽne hay joŋ ndi debaŋ lay mono, ndi ngar jag tos Jeofa gẽẽge kloŋ. De ngar ngeel sen tu, ndi ko ga á woo jiili ɓi, lan se hã coɓge me, doo maaga maabe joŋ see mbarga ɓe nono. Blam sen, ndi le’ naa tu. Ndi yõõ ge ti wur sen go ga hase.” Tasos, jee maa peel tayge po, joŋ daŋgay kiŋgi 4 werga á laa dayge woge ti soode ga. Á ko dage Jeofa ɗawge ɓe na koge là? Á wãã ga: “Jeofa hã fẽẽre maaga sãy ɓaara hay ti ɓi ɓuy me. Sen joŋ ga ndi mo ya’ wer kaŋ ɗiggi ti ɓe de peel ni. De daŋ sen ɓuy pa mono, de nenterse ɓen, Jeofa hã fruygi me, koh de maaga ndi hay bay ɓi ti ngeel maa de woore wa mono. Á hã bawge go me pa ga ndi joŋ joŋre we jeŋ se no, ndi ko ɓil de el sen yaŋ. De sen mokay, ndi tĩĩ wer joŋ joŋre wo ne Jeofa ti daŋgay ni doo piyoniyẽ maa tum nono.”
YA’ SEE ƁO LE SEE BAA DAGE ƁO NO
19. (a) Naa tos tosge de maaga naa ko ga á da naa mo là? (b) Ngaɓge dage maa hõn ga du’ jiili ɓo debaŋ là? (Ko ngeel maa de gaɗge ga wãã ga: “ Wããre maaga kay naa maa ko dage maa de tùu maa ni Jeofa no.”)
19 Fẽẽre maaga naa ko ra nen hadge sen la ngaɓ wo ga Jeofa, “Baa dage,” yaŋ de naa! (2 Kor. 13:11) Á ɗig ti ti naa boŋ boŋ ɓuy. Naa go de bawge jag jiili naa ga naa “go de yiŋ ti de ɓil de el mani ɓe no.” (Siŋ. 32:10) De maaga naa ya’ wer ɗiggi ti ɗeŋ maaga á naa nen dage ɓen go see naa mono, se kol go nen naa diŋ jobo maa cwãy. De sen mokay, naa ko see naa go see ɓe maŋ lay. Naa ya’ wee see ɓe bay joŋ hẽẽne, lan ngaɓ ne hẽn ga dage ɓen kay naa debaŋ. Naa mbe maa sii re maa see naan wo ne hẽẽne, de kaŋ ɗiggi ga á co’ sug naa, lan ga á de sãy kay naa ti.—Siŋ. 145:18, 19.
20. Dage maa ni Jeofan ya’ naa see ɓe na ya’ge là?
20 Doo maaga naa de sãy wùu ti wur maaga ceere yaŋ no mono, dage maa de tùu maa ni Jeofan co jag naa no lay. Á mbe ti ngeel ɓe ga dage maa ni Jeofan de ẽgre, day se de koge decoo lay. Hay de fruygi werga Jeofa da ndo. Lan blam, ni naa yiŋ we jag ne dage ɓen de wããge ga: “Ndi da [Jeofa]”!—Siŋ. 116:1.
NDO YIŊ JAG NA GA HÃYLÀ?
-
Ndo ngaɓ dage maa ni Jeofan na ngaɓge là?
-
Wer mayse ga ndo go de bawge jag jiili ɓo ga Jeofa da ndo debaŋ là?
-
Dage maa ni Jeofan joŋ see ne ndo na joŋge là?
SIŊ 108 L’amour fidèle de Dieu
a À coor ɗuu maa po wo.