1-2. Re maa hõn wo ga sedeewa wo maa yiŋgi de ɓe là?

 DE MAAGA re maa de gayri caa wo naa we no, maa po naw naan coo deparday tu, day se fer doo ga á hay ne ga so. Sen diŋ saɓlaŋ Luis, a hẽn naa po de deele ga à hay da’ cege kaŋser maa de gayri see ɓe. Dokda wãã ne hẽn ga few gwa’n ne hẽn mẽ’ koɗe maaga á joŋ tenene. Monika wo de war ɓe hay hã wo see ɓaara ti joŋre maa ni Jeofa no. Wur po, se wo laage ga war se maaga diŋ jee maa peel tayge, hay go joŋ figliw nen kiŋgi ngaɓa. Oliviya, hẽnbe po hay bay de da war wa ɗa hay men tiŋ ɓe go werga leege maa de ẽgre hay le age. De maaga á fer le liŋ mokay, se da’ leege go de ɓlag tiŋ ɓen ɓuy. Deparday tu seŋ naw Luis, Monika wo de Oliviya coo wo. Re maaga da’ wo ra mbe de wãã mopo ne ndo lay yawlà? Re po maaga coo naw ɓo go deparday tu da’ ndo we go ti boŋ yawlà?

² Koh naa mo hay ba joŋ joŋre ne Jeofa de deele, naa yiŋ de re maa de gayri wo, lan naa le’ cege doo jar maa ɓuy no lay. Maapo ga naa yiŋ de re maaga jar hee Baa kaŋ wo ne naa ti. Koh Jeofa bay mbe go maŋ jag re sen wo wa laybla mono, á de wããge ga se kay naa yaŋ. (Esa. 41:10) Wer kayge maa ni Jeofan, naa mbe de kããge maa lagge de fruygi, maa far ɗiggi maa de woore, lan maa lagge de deele koh jag re maa de gayri wo. Ɓil hadge sen la, naa wãã yaŋ ti fẽẽre 4 ga Jeofa kay naa de ɓaara ti wur maa de gayri wo no. Naa wãã yaŋ ti fẽẽre maaga naa joŋ ra maa da’ kayge maa ni Jeofan wo pa.

 JEOFA ƊAW MO YAŊ DO ƁE

3. De maaga naa yiŋ we de re maa de gayri no, mayse kol see naa de gayri là?

³ Re maa de gayri. De maaga re maa de gayri da’ naa we no, á joŋ de gayri see naa maaga naa ɗig de woore, lan maa far ɗiggi maa de woore wo. Wer mayse ne? Werga jiili naa caa go debaŋ. Maapo ga ɗiggi naa joŋ nen lawge debaŋ . Maapo ga naa joŋ go de yeege, ɗeŋ maaga naa mo ngiɗ ni no kay joŋ nen naa ga. Ko ba ɗiggi maaga mãyregemaare naa maa ɓogn ɗig wo de maaga á hay wo nen re mo ɗa. Oliviya wãã ga: “Blam maaga leege hay ɓlag tiŋn go mono, ndi hay ko see ɓi go de yeege, ɗeŋ maaga ndi mo joŋ hay bay nen ɓi wa.” De maaga Monika hay ko ga war se hay bag bii se mo kay, á wãã ga: “á hay ɓo’ me go nen lawge debaŋ. Sen doo ga à hay ɓẽ’ me de mbeg nono. Koh joŋre maaga ndi hay joŋ rage tum kol wo joŋ ndi de gayri debaŋ. Ndi hay bay de ɗiggi ga sen de a ndi ti boŋ wa.” Jeofa wãã ga se joŋ mayse yaŋ ne naa de maaga naa nen re maa de maŋ sen wo mo là?

4. Doo maaga naa da’ ɓil Filip wo 4:​6, 7 ne mono, Jeofa wãã ga se joŋ mayse yaŋ ne naa là?

⁴ Fẽn maaga Jeofa joŋ ge ne. Á wãã ga se hã fẽn maaga Bible ɗen ga “jam mani Baa” ne naa. (Jaŋ Filip wo 4:​6, 7.) Jam sen diŋ jam maaga naa da’ ne de maaga naa joŋ bar ɓe mono. Jam sen daŋ wer “deŋ ma hõnla go ɓuy”; sen da wããge ga jam sen de daŋ jam maaga naa ɗig mono. Á ngel mo we go ti boŋ de maaga ndo jam blam maaga ndo hay tos Jeofa go de jiili ɓo ɓuy mo yaw? Ɗiggi sen mokay diŋ “jam mani Baa[n]” so.

5. Jam maa ni Baan ɗaw ɗiggi naa wo de jiili naa na ɗawge là?

⁵ Ferse sen wãã pa ga jam maa ni Baan “ɗawge jiili,” noga ɗaw ge “ɗiggi ɓay wo yaŋ de tayge de Yeso Krisi.” Wããre maaga “ɗawge” a le see ɓe hay diŋ wããre maaga a le jag soode wo. Á hay wo joŋ joŋre de ɓe maa ngaɓ soode maaga gor wo ti prog wo, lan yãã wo jar go jag durgi wo mono. Jar maa ɓil prog sen ga à hay gor ti ɓaara hay wo laa naa go de yõõ ti, de kaŋ ɗiggi ga soode wo de gor ti saara. Doo sen no lay, de maaga jam maa ni Baan ɗaw jiili naa we, lan ɗiggi naa we no, jiili naa suu de kaŋ ɗiggi ta’ ga re po da’ naa ga so. (Siŋ. 4:9) Doo Ana no lay, koh ngeel mo coo ba ne naa peel deparday wa, jiili naa joŋ mbe de suuli. (1 Sam. 1:​16-18) Lan de maaga jiili naa yaŋ de suuli no, naa ɗig de woore, lan far ɗiggi maa de ko re lay.

6. Naa joŋ mayse maa da’ jam maa ni Baan là? (Ko foton lay)

⁶ Fẽn maaga ndo nen joŋge ɓe mono. Doo maaga jar maa ti prog ɗe wo soode wo le gor ti ɓaara no lay mono, naa ɗe we Jeofa le gor ti naa lay. De ɗeŋ maa hõnlà? Tos hãã nen  maaga ndo mo da’ jam maa ni Baan go ɗa. (Lug 11:9; 1 Tes. 5:17) Luis, jee se ga naa wãã le ti ɓe ciŋ la, ngaɓ fẽn maaga saara joŋ de wãy se Ana de maaga saara laa ga á gwan ne se few me’ ga se joŋ tenen mono. Á wãã ga: “Nen ngeel maa de maŋ sen wo mokay, á de gayri debaŋ maa maŋ ɗiggi ti ɓaŋ joŋge dogda lan ti re maa tigriŋ wo. Amaa de ngar ngeel sen, fẽn maaga hay hã jam ne wùr hay diŋ tosge boŋ tu.” Luis wo de wãy ɓe wãã wo ga saara hay tosge debaŋ, lan ɓaale ngaɓa, saara wii Jeofa ga á mo hã jam maa nen ɗiggi, jiili maa de suuli, lan koge re maa maŋ ɗiggi maa de woore ne saara. Day á ko wo do Jeofa ti ngeel sen la ni cwãy lay. Hayga ndo yaŋ nen re maa de gayri lay no, hay tosge debaŋ. Doo sen no kay, ndo ko jam maa ni Jeofan yaŋ ɗaw jiili ɓo lan ɗiggi ɓo lay.—Rom. 12:12.

JEOFA JOŊ GE NEN MAAGA NDO MO SEE GO DE YÕÕ TI NEN NAW ƁON WO

7. Naa ko see naa ese de maaga naa yaŋ nen re maa de gayri wo là?

⁷ Re maa de gayri. De maaga naa yaŋ nen re maa de gayri no, joŋre naa wo de ɗiggi naa joŋ wo de woore doo maa seɓaa ne ga so. Naa da’ see naa go de brumgi nen ren wo debaŋ. Ana, maaga naa wãã le go ti ɓe ciŋ la, ngaɓ re maaga se yiŋ de ɓaara blam húulí war se mono. Á wãã ga: “De maaga ndi le’ ko see ɓi nen lawge debaŋ mono, ndi kol go ko decoo nen see ɓi. Ɓil ɓi sõõ werga á húu go mono.” De daŋ sen ɓuy pa, Ana hay go ko see ɓe boŋ debaŋ, lan ẽgre ɓe hay bay kããge maa maŋ ɗiggi ti fẽẽre maaga war ɓe hay joŋ rage mo wa. Day maapo, se ko see ɓe go doo ga se nen leege ɓil maarog nono. Jeofa kay naa na kayge de maaga ɗiggi sen mo deŋ le’ wo hãy naa we là?

8. Doo maaga naa da’ ɓil Esay 33:6 ne mono, Jeofa hã bawge go ne naa jag jiili ti maylà?

⁸ Fẽn maaga Jeofa joŋ ge ne. Á hã bawge go ne naa ga se joŋ ge nen maaga naa mo see go de yõõ ti nen naw naan wo no. (Jaŋ Esay 33:6.) De maaga daage yiŋ we de leege no, maapo se le’ fiɗgi. Maaga á mo fiɗ wa mono, fẽẽre po yaŋ wo ngaɓa ti daagen ni ga à coŋ ra nen bii. Fẽẽre sen joŋ wo ga daagen mo fiɗ debaŋ wa, nen maaga jar raŋgen mo ko wo see ɓaara go de yããge ti raŋge no. Amaa, fẽẽre sen joŋ wo joŋre de woore de maaga daagen de seege de peel mono. De maŋ sen lay, Jeofa joŋ ga naa mo see go de yõõ ti nen naw naa hayga naa yaŋ seege de deele ti wur re wo no.

9. Fẽẽre maa kiɗ wer fẽẽre doo jw.library kay wo naa maaga naa mo lag de woore na kayge ne? (Ko foton lay)

⁹ Fẽn maaga ndo nen joŋge ɓe mono. De maaga mopo yaŋ hãy ɗiggi ɓo no, dur de ngar ẽgre see ɓo maa tosge, maa woge ti taygeti, lan maa sii wããre Baa. Go tinoo tu ga ndo joŋ ra go doo maa seɓaa ne ga, amaa hay de kaŋge ti ɓo ga Jeofa bay gorge ga naa mo joŋ fẽẽre  de daŋ maaga ẽgre naa kãã maa joŋge ɓe mo wa. (Tabn de Lug 21:​1-4.) Ciŋ ti tosge, woge ti taygeti, lan siigi wããre Baa mono, maŋ wur go ka’ maa frug nen wããre Baa boŋ ɓo, lan maa ɗiggi ti ɓe. Wer may ne? De tayge maa ɓen, Jeofa hã kefder maa de woore wo de videyo ne naa maaga kay wo naa maa ɗaw ɗiggi naa nen wur maa de gayri wo. Maa kiɗ fẽn maaga ndo de sãy ɓe ti mono, ndo mbo de joŋ joŋre de fẽẽre kiɗgi maa de jag ɓo wo doo JW Library^®, Index des publications des Témoins de Jéhovah; lan Guide de recherche pour les Témoins de Jéhovah yaw. Monika, maaga naa hay wãã le go ti ɓe ciŋ la wãã ga se joŋ joŋre de fẽẽre kiɗgi sen wo mo deŋ ɓuy maa da’ kayge de maaga se da’ see se we nen lawge lan de maaga ɓil se yaŋ de sõõge no. Ko ba ɗa, á kiɗ wer wããre maa doo “sõõge ɓili”. Wur maa po á kiɗ wer wããre “kaŋge taw” noga “de deele”. Blam se jaŋ hãã nen maaga se ko see ɓe go de woore. Á wãã ga: “Ndi hay bay jam wa de maaga ndi tõõ wer jaŋge mono. Amaa de maaga ndi de jaŋge mo kay, sen doo ga Jeofa de ɗaw mege do ɓe nono. Nen jaŋge ɓin, ndi da’ ga Jeofa de ko ɗiggi ɓi wo, lan se de kay ndi.” Kayge maa ni Jeofan kay ndo maa ɗaw jiili ɓo nen maaga ndo joŋ go jam de woore lay.—Siŋ. 119:​143, 144.

JEOFA KAY GE MO YAŊ

10. Blam re maa de gayri mono, naa ko see naa na koge là?

¹⁰ Re maa de gayri. Blam re maa de gayri debaŋ mono, maapo ga naa ko see naa go de gayri ti hõõgesee, lan nen ɗiggi. Maapo ga naa ko see naa go doo jee ɗee maaga hay ɗeege debaŋ, ga kol go seege de graw wer maaga se le’ nono. Maapo fẽẽre maaga naa hay joŋ rage go gus taŋgu kol wo go nen naa de gayri, noga naa joŋ de sãy joŋ fẽẽre maaga naa hay joŋ rage ti ga so ɓuy yaw. Doo Eli no lay, urgi go ciŋ joŋ naa de gayri debaŋ. Naa joŋ diŋ de sãy le’ naa ti ɓoŋ tu. (1 Waŋ. 19:​5-7) Jeofa wãã ga se joŋ mayse yaŋ ne naa de maaga naa ko see naa go de gayri mo là?

11. De deŋ maa hõn pa ga Jeofa kay na là? (Siŋ wora 94:18)

¹¹ Fẽn maaga Jeofa joŋ ge ne. Á wãã ga se kay naa yaŋ. (Siŋ wora 94:18.) Doo jee ɗee maaga le’ ga de sãy kayge ti maa seege ti ne mono, naa de sãy kayge ti maaga naa mo hay tum ti joŋre maa ni Jeofa no. De ngar ngeel sen, Jeofa hã bawge go ne naa ga: “Werga ndi, [Jeofa] Baa ɓo maaga ɗaw do ɓo go ciŋ day wii mo ga: ‘Joŋ hẽẽne wa, ndi le de caa war ɓo mono.” (Esa. 41:13) Waŋ Dafid hay ko da’ kayge se no. De maaga á yaŋ nen re, lan peel  jar hee ɓe wo mono, á wãã ne Jeofa ga: “Ɓaŋ war ɓon de ɗaw me ge.” (Siŋ. 18:35) Day Jeofa kay naa na kayge so là?

12. Jeofa joŋ joŋre de wose wo maa kay naa de maaga naa yaŋ go de gayri là?

¹² Jeofa teŋ nen naa de jor glog jar tigriŋ wo maaga á mo kay wo naa. Ko ba ɗa, wur po de maaga Dafid hay ko see ɓe go de gayri mono, bar ɓe Jonataŋ hay a coɓge ɓe lan jor glog ɓe. (1 Sam. 23:​16, 17) De maŋ sen lay, Jeofa joŋ joŋre de Elise maa kay Eli. (1 Waŋ. 19:​16, 21; 2 Waŋ. 2:2) Wara doo sen ne lay, Jeofa joŋ joŋre de jar maa liŋ ni naa wo, bar naa wo, noga jar maa peel tayge wo maa kay naa. Amaa de maaga naa yaŋ de re maaga hãy wo ɗiggi naa no, maapo ga naa ɗig ga naa mo hay go boŋe. Joŋ ti naa diŋ sãy maaga naa mo hay go boŋ tawa tu. Á joŋ mbe neno. Day naa joŋ mayse maaga naa mo da’ kayge maa ni Jeofan so là?

13. Naa de joŋ mayse maa da’ kayge maa ni Jeofan là? (Ko foton lay)

¹³ Fẽn maaga ndo nen joŋge ɓe mono. Dur maaga ndo mo hay go boŋ wa. De maaga naa yaŋ go boŋ no, naa ɗig de woore ga so, lan naa le’ ɗiggi go diŋ ti see naa tawa, lan ti re maa see naan wo tawa lay. Joŋge doo sen ne kay kaŋ wer naa maa maŋ ɗiggi maa debaywoore. (Jõõ. 18:1) Á mbe cwãy ga de ngar ngeel maa po naa joŋ desãy maaga naa mo hay go boŋ ti; debaŋ ɓe ti wur maaga naa yaŋ nen re maa de gayri no. Amaa, hayga ndo ig we go de caa nen ni boŋ no, ndo bas go ti kayge maaga Jeofa desãy kay moge ti mono. Koh á mo hay ba de gayri gemãy laybla’, yãã kayge jar maa ɓi feele ɓo wo, bar ɓo wo de jar maa peel tayge wo. Kon doo ɗeŋ maaga Jeofa joŋ joŋre de ɓe maa kay moge nono.—Jõõ. 17:17; Esa. 32:​1, 2.

JEOFA COƁ MO GE YAŊ

14. Re maa joŋ hẽẽne maa hõn wo ga naa yiŋ de ɓaara là?

¹⁴ Re maa de gayri. Maapo ga naa da’ see naa nen ngeel maaga joŋ hẽẽne debaŋ. Ɓil Bible mono, Jar maa ni Baa maa de deele po wo ngaɓa wãã wo ga saara hay da’ see saara nen ngeel maa de gayri debaŋ wo. Lan ga hẽẽne hay joŋ saara do jar hee saara wo noga do re maa tigriŋ wo. (Siŋ. 18:5; 55:​2, 6) Doo sen no lay, naa yiŋ de re maa de gayri wo ti lakol, ti ngeel joŋre, liŋ ni naa noga maaga a le see ngomna. Maapo ga hẽẽne húulí joŋ naa de maaga naa de cege. Nen ngeel maa doo sen wo mo deŋ, naa ko see naa go de hoo ẽgre doo weeklee nono. Day, Jeofa kay naa jag re maa de maŋ sen wo mo hõ’ na kayge là?

15. Siŋ wora 94:19 hã bawge maa hõn go ne naa jiili là?

 ¹⁵ Fẽn maaga Jeofa joŋ ge ne. Á coɓ naa lan woo jiili naa. (Jaŋ Siŋ wora 94:19.) Ferse sen kaŋ wer naa ɗiggi ti mãy maa klee maaga le’ naa ga do hẽẽne raage bii noga fiɗgi leege maa de baywoore mono. Naa ɗig wee ba doo ga pan ɓe a le, raw jeŋ ɓe, maŋn do ɓe hãã nen maaga á mo le’ naa go ɗa mo ɗa. Mbe cwãy ga leege maa de ẽgre joŋ hẽẽne, maŋge maaga pan mãyn maŋ do joŋ ga á mo ko see ɓe go de yããge. De maaga naa da’ see naa we nen re maa joŋ hẽẽne no, naa joŋ de sãy maaga Baa mo ɗaw naa do doo blo sen no lay, hãã nen maaga re sen mo hres go ɗa. Naa joŋ joŋge maa da’ coɓge maaga a le ni Jeofa mo là?

16. Naa mo joŋ mayse maa da’ kayge maa ni Jeofan là? (Ko foton lay)

¹⁶ Fẽn maaga ndo nen joŋge ɓe mono. Hay tum iggi jeŋ Jeofa—de tosge ɓe, lan de jaŋ wããre ɓe no. (Siŋ. 77:​2, 13-15) Blam de maaga ndo yaŋ go de caa jiili no, maapo ga ɗiggi maaga a ne ndo ti taŋgu diŋ ga ndo mo mbiɗ nen ne Jeofa ti. Sii fẽẽre maaga joŋ wo hẽẽne ne ndo ne Jeofa. Men wãã wããre ne ndo, lan coɓ moge de jaŋ wããre ɓe no. (Siŋ. 119:28) Maapo ndo da’ yaŋ ga wããre maa po wo ɓil Bible coɓ wo ndo diŋ de maaga hẽẽne yaŋ joŋ ndo no. Ko ba ɗa, maapo ndo da’ coɓge ɓil kefder maa ni Job, ɓil Siŋ wora, ɓil Jag jõõ, lan ɓil wããre Yeso maaga naa da’ ɓil Matiye 6 mono. De maaga naa tos Jeofa, lan jaŋ wããre ɓen we no, naa ko kayge maaga á kay naa yaŋ.

17. Kaŋge ɗiggi maa hõn ga naa joŋ de ɓe là?

¹⁷ Naa hay wee de kaŋ ɗiggi ga Jeofa caa war naa yaŋ de maaga naa yaŋ nen wur maa de gayri no. Doo sen no kay, naa joŋ ge go boŋ ti boŋ ga hase. (Siŋ. 23:4; 94:14) Jeofa wãã ga se ɗaw naa yaŋ do ɓe, ga se joŋ ge yaŋ nen maaga naa mo see go de yõõ ti nen naw naa, kay naa yaŋ, lan se coɓ naa yaŋ. Esay 26:3 wãã ga: “Ndo hã jam ne je maga bay ndar gog ti ɗiggi ɓe wa mono, wer maaga a de kaŋ ɗiggi ɓe ti ɓo” Doo sen ne kay, hay de kaŋ ɗiggi ti Jeofa, lan dur go de ẽgre ɓo ɓuy maaga á mo kay ndo. Hayga ndo joŋ we doo sen ne no, ni ndo da’ ẽgre yaŋ ti wur maa de gayrin wo no.