1. Naa joŋ joŋge maa fruy ɓil Jeofa là?

 KO BA ɗa, ndo hã kado maa de woore ne jobo maaga ndo da ne. Amaa, ndo da’ ga se ɓo’n wo go de waale ti’i, bay de sãy ɓe ti wa! Ɓil ɓo joŋ go de fruygi doo maaga á de hay joŋ joŋre de kado sen de woore, lan se co jag ɓe lay mo ga. Saɓlaŋ sen da wããge ga hãylà? Jeofa hã Weel ɓen go huugi ti re naa. Jeofa joŋ go de fruygi debaŋ de maaga naa joŋ suse’ ne hẽn ti kado se maa de woore no, ti dage ɓe maaga jor glog ɓe maa coo naa le mono!—Jaŋ 3:16; Rom. 5:​7, 8.

 2. Ɓil artikle sen la, naa ndal ge yaŋ diŋ ti maylà?

² Amaa, hayga naa yõõ ti we go ti raŋsoŋn no, sen doo ga naa ɓo’ kado se maa de wooren wo go de waale ti ngeel maaga nen naa bay koge ɓe wa so, lan naa bay ɗiggi ti ɓe wa so lay ne no. Maaga sen mo joŋ wa mono, naa mo hay ɗiggi ti fẽn maaga Baa wo de Yeso joŋ wo see naa mono. Naa ndal yaŋ ti mo maaga naa da’ wer raŋsoŋ patala, lan ti maaga naa da’n peel mo lay no. Naa ko yaŋ pa diŋ ɗeŋ maaga naa ngaɓ go ga naa joŋ suse’ ne Jeofa ti dage maaga á joŋ see naa, debaŋ ɓe taŋgu ɗiggi ti húulí Yeso, lan blam ɓe mono.

NAA DA’ MAY PATALA LÀ

 3. De ɗeŋ maa hõn boŋ ga naa go de da’ge wer raŋsoŋ patala ɓaa là?

³ Naa go de da’ge wer húulí Yeso patala yaw. Ba doo maaga, Jeofa fug ɓil go ne naa ti ɓlagge naan wo diŋ wer húulí Yeso. Á bay diŋ doole se ɓe maa fug ɓil ne naa ti wa. Amaa, á de sãy  fug ɓil go ne naa ti. Jee ‘waa siŋ po joŋ suse’ ne Jeofa ti maaga á fug ɓil go ne se ti ga: “Werga ndo [Jeofa] ndo fug ɓil go ne jar ti.”—Siŋ. 86:5; 103:​3, 10-13.

 4. Jeofa hã Weel ɓen le go huugi diŋ wer wose wo là? (Lug 5:32; 1 Timote 1:15)

⁴ Jar maa po ɗig wo ga saara bay go halla maaga Jeofa fug ɓil go ne saara ti wa. Naa ɓuy naa bay de kããge maaga Baa fug ɓil go ne naa ti wa. Apotre Pol hay de koge ga se “bay de kããge maaga jobo ɗe [se] jee peele Yeso lay wa.” Wer sen se raw wããge ga: “wer ɓil de el ma ni Baan ndi raw kolge go wara diŋ jobo.” (1 Kor. 15:​9, 10) De maaga naa mbiɗ faale we ne ɓlagge naan wo, Jeofa fug ɓil go ne naa ti ɓaara. Wer may ne? Bay werga naa de kããge maa da’ge ɓe wa, amaa werga á da naa. Hayga ɗiggi naa yaŋ gijig naa ga naa bay go halla wa no, naa mo ɗig ga Jeofa hã Weel ɓen le go huugi bay wer jar maaga bay wo joŋ ɓlagge wa na wa, amaa wer jar maaga mbiɗ wo faale ne ɓlagge ɓaaran mono.—Jaŋ Lug 5:32; 1 Timote 1:15.

 5. Jobo yoo naa de ɗig ga se de kããge maaga Jeofa fug ɓil go ne se ti ɓlagge sen wo, werga se joŋ joŋre ne hẽn yawlà? Naa wer ɓe.

⁵ Jobo mo hay ɗig yoo naa ga Jeofa fug ɓil go ne se ti ɓlagge sen wo, werga se go de iggi goŋ Jeofa kiŋgi go pur na wa. Cwãy tu, Jeofa yõõ ti joŋre maaga naa joŋ ra ne hẽn mo go ga. (Heb. 6:10) Á hã Weel ɓen le ne naa de koɗ koɗ, bay maa poɗ naa ti joŋre maaga naa joŋ ne hẽn mo wa. Á bay ti ngeel ɓe maaga naa mo ɗig ga Jeofa fug ɓil go ne naa ti diŋ ga naa joŋ joŋre ne hẽn debaŋ na wa. Hayga naa yaŋ ɗiggi doo sen nono, ni naa de ɗiggi ga Kris huu go de koɗ koɗe.—Tab ne de Galad wo 2:21.

 6. Wer may ga Pol hã see ɓe go ti joŋre ne Jeofa debaŋ là?

⁶ Pol hay de koge ga Jeofa fug ɓil go ne see ti bay diŋ wer joŋre maaga se joŋ mo wa. Day wer may ga á hã see ɓe go joŋ joŋre ne Jeofa debaŋ yaw là? Á joŋ sen diŋ maa joŋ suse’ ne Jeofa ti koge decoo wo de ɓil de el maaga á joŋn see ɓe mono. (Efe. 3:7) Doo Pol no lay, naa ya’ wer joŋ joŋre ne Jeofa de baa wuu bay maaga á mo ko decoo naa naŋ wa, amaa maa joŋ suse’ ne hẽne.

 7. De ɗeŋ maa hõn pa ga naa da’ wer húulí Yeso patala là? (Rom wo 5:1; Jag 2:23)

⁷ Ɗeŋ maa tigriŋ ga naa da’ wer húulí Yeso pa diŋ ga, barge naa de Jeofa kwũy. a Doo maaga naa hay ko le go ti hadge maa blam le no mono, de maaga naa biŋ le naa hay bay bar Baa wa ɗa. Amaa wer húulí Yeso, naa de kããge maaga naa joŋ “jam de Baa”, lan maa ya’ge see ɓe.—Jaŋ Rom wo 5:1; Jag 2:23.

 8. Wer mayse ga naa joŋ suse’ ne Jeofa ti maaga á joŋ ga naa mo tos se mo là?

⁸ Tosge diŋ fẽn maaga daŋgo, ga naa mbe de kããge maa joŋge ɓe wer barge naa de Jeofa. Jeofa laa bay diŋ tosge maaga naa de tayge ti kẽẽ ɓuy mo tawa wa, amaa tosge maaga wosela ɓuy tos boŋ ɓe mo lay. Tosge woo jiili naa, lan hã jam maa jag jiili ne naa, amaa naa da’ wer ɓe bay diŋ sen tawa wa. Á ya’ wer barge naa de ɓe wo ciŋ ni. (Siŋ. 65:2; Jag 4:8; 1 Jaŋ 5:14) De maaga Yeso hay gesiŋ la, á hay tos Pan ɓe tum werga á de koge ga Jeofa co’ sug tosge sen wo; lan werga se hay de sãy ɗaw barge ɓaara kwũy de Pan ɓe mono. (Lug 5:16) Wer húulí Yeso, naa de kããge maa baa barge de Jeofa, wãã ɗiggi naa ne hẽn nen tosge. Wer sen naa joŋ suse’ ne Jeofa debaŋ!

 WER HÚULÍ YESO NAA DE KÃÃGE MAA DA’ NGEEL MAA DE WOORE MAA PEEL NO

 9. Jar goŋ Baa maa de deelen da’ ge wo mayse wer húulí Yeso wo nen naw maa peeln là?

⁹ Jar goŋ Jeofa maa de deelen da’ ge wo mayse wer húulí Yeso wo peel là? Jeofa hã ge tenen maa tum yaŋ ne hara. Jar debaŋ ɗig ga á joŋ ge ga werga kiŋgi wara miliyoŋ pur jar de huugi. Amaa ɗiggi Jeofa maa taŋgun le diŋ ga jar téebeere mo joŋ wo tenen ti’ tum. Adam hay joŋ ɓlagge we ga no, jobo de hay ɗig ga tenen maa tum hay joŋ ga ga. Mbe de sen ɓuy, á de gaali maaga naa ɗig ga naa joŋ tenen ti’ tum matala. Amaa naa mbe maa hã ɓil ti ɓe, werga Jeofa poɗ poɗge maaga daŋgo de Weel ɓen, nen maaga naa mo kaŋ ɗiggi gorge ɓe.—Rom. 8:32.

10. Jar maaga nenterse Baa de sreŋ rage de sããre maa lan wo, wo de gor poɗge maa hõn wo là?

¹⁰ Koh de maaga naa da’ ge mbe tenen maa tumn wo diŋ nen naw maa peeln mo laybla’, Jeofa da ga naa mo hay ɗiggi ti ɓe matala ɓaa. Jar maaga nenterse Baa de sreŋ rage wo de gor poɗge ɓaara maaga saara wo lagge ciŋ de Kris maa wãã re tamsir mono. (Naa. 20:6) Sããre maa lan wo de gor tenen maa tum ti tamsir la, ga ndumgi wo de gayri joŋ wo ni ga so mono. (Naa. 21:​3, 4) Ndo diŋ yoo sããre maaga joŋ wo tenen maa ɓaaran diŋ gesiŋ la mo yawlà? Poɗge jar maaga raw wo ɓaaran diŋ ciŋ bay de daŋ maa ni naan wa! Baa hay joŋ jar téebeere wo maaga á mo hay wo fruygi tenen ti’ ti tamsir la maa tum.

11-12. Á diŋ bosa’ maa hõn ga naa de gorge ɓe ti paradis maa peeln mo là? (Ko foton wo lay.)

¹¹ Ɗig ba mbo ti naw ɓo maaga ndo joŋ ge ti paradis mo ɗa. Ndo bay maa joŋ hẽẽne do cege wo de húulí wa so. (Esa. 25:8; 33:24) Jeofa hã ge fẽẽre maaga ndo de sãy ɓaara ti ɓuy yaŋ wo ne ndo. Ndo de sãy: had fẽẽre ti yaw? da’ wer ne horog wo ti yaw? had ma’ jõõ ti yaw? mbala de sãy had boo fẽẽre noga ceɗ rage ti yawlà? Sen cwãy tu ga à joŋ de sãy jar baa tiŋ wo, jar boo tiŋ wo, lan jar jeege wo ti.  Sen go tinoo tu ga à joŋ ge de sãy jar joŋre wo de jar ɗaw fẽẽre joŋre wo ti; doo jar joŋ rege wo, jar tooge wo, lan de jar peɗ pay sugnee wo ti. (Esa. 35:1; 65:21) De maaga ndo joŋ tenen maa tum mono, ndo joŋ ge fẽẽre maaga ndo de sãy joŋ rage ti mo ɓuy.

¹² Ɗig ba mbo fruygi maaga naa joŋ ge ne de maaga naa yãã waare jar naa maaga bir gi wo le go mo ɗa! (Joŋre 24:15) Ɗig ba mbo ti fruygi maaga naa da’n ge de maaga naa had ko Jeofa wer fẽẽre maaga á joŋ ra ne naa mo ɗa? (Siŋ. 104:24; Esa. 11:9) De daŋ sen ɓuy pa mono, ndo joŋ ge fẽn maa de ɓlagge ti boŋ nen maaga ndo wii fuggi ɓil do Jeofa ga so, ndo joŋ ge yaŋ tum goŋge ɓe. Ndo men bosa’ sen wo mo deŋ ɓuy go diŋ wer maaga ndo joŋ “ɓil [ . . . ] go feh diŋ ti joŋre ɓlagge naw rab koɗ” mo yawlà? (Heb. 11:25) Baywa! Naa nen durgi go ti fẽẽren ɓuy maa da’ bosa’ se no. Ɗig ndo ga paradis joŋ ge tum diŋ fẽn maaga naa joŋ ge gorge ɓe ga. Á joŋ ge diŋ ngeel maaga naa joŋ ge ni tum nen naw maa peel no. Jeofa hay hã Weel ɓen we go huugi ti re naa ga no, fẽẽre sen wo mo deŋ ɓuy hay joŋ wo diŋ lwa’ge de koɗ koɗe!

NGAƁ GO GA NDO JOŊ SUSE’ NE JEOFA TI DAGE ƁE MAAGA Á JOŊ SEE ƁO MONO

13. Naa joŋ joŋge maa joŋ suse’ ne Jeofa ti dage ɓe maaga á joŋ see naa mo là? (2 Korente wo 6:1)

¹³ Naa joŋ joŋge maa joŋ suse’ ne Jeofa ti maaga á coo naa le mo là? De ɓo’ joŋre maa ɓen go peel fẽẽren ɓuy nen naw naa. (Mat. 6:33) De daŋ sen ɓuy, Yeso huu go “nen maga jar maga wo tenen mo hay wo diŋ ma ɓaara de see ɓaara wa so, á mo hay wo diŋ ma je maga huu go, day fer le go ciŋ tenen wer ɓaara mono.” (2 Kor. 5:15) Jeofa joŋ yaŋ see naa debaŋ, fug ɓil go ne naa ti ɓlagge naan wo no. Naa yaŋ joŋ fẽẽre maaga naa kãã maa joŋge ɓe ɓuy maa joŋ joŋre ne hẽn no, ni naa go de ngaɓge ne hẽn ga naa de fruygi ti fẽẽre maaga á joŋ ra ne naa mo deŋ ɓuy, lan ga naa de joŋ suse’ ne hẽne.—Jaŋ 2 Korente wo 6:1.

14. Naa joŋ joŋge maa seege wer jag liŋgi maa ni Jeofan là?

¹⁴ Naa joŋ suse’ ne hẽn diŋ de kaŋ ɗiggi ti ɓe, lan de seege wer jag liŋgi ɓen wo no . De ɗeŋ maa hõnlà? De maaga naa le’ maŋ ɗiggi we ti ɓaŋ joŋge lakol debaŋ, lan ti ɓaŋ joŋre no, naa kiɗ ɗiggi Jeofa go ti ɓe ɗa. (1 Kor. 10:31; 2 Kor. 5:7) Hayga yaŋ srog glog naa far ɗiggi diŋ hãge ɓil naa ti Jeofa no, kaŋge ɗiggi naa ti ɓe, lan barge naa de ɓe ya’ ciŋ ni kwũy. Kaŋge ɗiggi naa ti tenen maa tumn kol ge nen naa diŋ cwãy.—Rom. 5:​3-5; Jag 2:​21, 22.

15. Naa joŋ joŋge maa ɓo’ nen go ga naa joŋ suse’ ne Jeofa wo de Yeso wur Ɗiggi ti húulí Yeso là?

¹⁵ Ɗeŋ maa tigriŋ ga naa joŋ suse’ ne Jeofa ti dage ɓe maaga á da naa yaŋ pa. Taŋgu ɗiggi ti húulí Yeso, lan blam ɓe naa mo ngaɓ go ga naa joŋ suse’ ne hẽn debaŋ wer húulí Weel ɓe no. Ni pa mono, naa mo bag jag see naa go see wur ɗiggi ti húulí Yeso, lan naa mo ɗe jar maa  tigriŋ wo le lay (1 Tim. 2:4) Ngaɓ fẽn maaga hres ge wur sen ne jar maaga ndo ɗe ra le mono. Á joŋ yaŋ de el maaga ndo mo kaŋ videyo Yeso huu go wer maylà?, lan videyo, Ɗig we ti húuli Yeso ne hara ɓil jw.org. Jar maa peel tayge mbaara de kããge maa ɗe jar maaga wo go de men age ti taygeti le, maa age ti Ɗiggi ti húulí Yeso. Ɗig ba ti fruygi maaga joŋ ge le ciŋ, lan gesiŋ la de maaga mbarga Baa maaga hay yee go fer we le yoo tayge maa ɓen mo ɗa (Lug 15:​4-7) Wur Ɗiggi ti húulí Yeso mono, naa dur maa hee jag bay ne kããra ti holaŋ naa tawa wa, amaa, debaŋ ɓe ne jar maaga a wo defay, noga jar maaga ig wo go debaŋ bay age ti taygeti mono. Naa joŋ nen maaga á mo ko wo see ɓaara de fruygi yoo naa!—Rom. 12:13.

16. Wer mayse ga naa joŋ ga naa ya’ wer siigi wããre Baa naan ciŋ ni, taŋgu ɗiggi ti húulí Yeso lan blam ɓe là?

¹⁶ Ndo kãã yaŋ maa ya’ wer sii wããre ɓon ciŋ taŋgu wur Ɗiggi ti húulí Yeso, lan blam ɓe yawlà? Á diŋ ɗeŋ maaga naa naa nen joŋge suse’ go ne Baa wo de Yeso, ti fẽẽre maaga á joŋ wo see naa mono. Naa yaŋ ya’ wer joŋ joŋre ne Jeofa de peel no, se ya’ wer kay naa, lan hãge ɓil naa ti ɓe ya’ ciŋ ni lay. (1 Kor. 3:9) Joŋ nen maaga ndo mo hay tum jaŋ verse maa ti program jaŋge Bible maa ɓil Examinons les écritures chaque jour noga maa ɓil Kefder taygeti Seele wo de siigi wããre Baa no. Ndo mbo de kããge maa joŋ joŋre de verse sen wo maaga ndo frug nen wããre Baa ti ɓaara.

17. Co jag Jeofa diŋ maylà? (Ko ngeel maa de gaɗge “ De ɗeŋ maa hõn ga naa ngaɓ go ga naa joŋ suse’ ne Jeofa là?”)

¹⁷ Wer re maaga ndo nen ɓe, maapo ga se joŋ ne ndo de gayri maa ya’ wer joŋ joŋre maa ni Jeofan de peel ni. Kaŋ go ti ɓo ga, Jeofa bay ngaɓ fẽẽre maaga ndo joŋn de maaga jar lan joŋ wo mo wa. Á de ko dage maaga ndo de ɓe see ɓe mono. Á co jag ɓe de maaga ndo ko woore kado ɓe maaga daŋgo, ga diŋ raŋsoŋ mono.—1 Sam. 16:7; Mark 12:​41-44.

18. Wer may ga naa joŋ suse’ ne Jeofa Baa wo de Yeso Kris là?

¹⁸ Diŋ wer húulí Yeso tawa tu ga naa da’ fuggi ɓil ti ɓlagge naan wo no, naa joŋ barge de Jeofa, lan naa joŋ tenen ti’ maa tum. Da ga naa mo hay tum naa nen joŋge suse’ go ti dage maa ni Jeofan maaga á mo kaŋ bosa’ sen wo ne naa ti. (1 Jaŋ 4:19) Da ga naa mo naa nen joŋge suse’ go ne Yeso jee maaga da naa debaŋ, hã tenen ɓe go wer naa mo lay!—Jaŋ 15:13.