1. Wer mayse ga á de el maaga naa mo hay woge ti ɗiggi ti húulí Yeso tum nen kiŋgi là?

 JEOFA hã kado maaga daŋgo ne naa de maaga á ɓo’ Weel ɓe maa boŋn le go huugi ti re naa mono! (2 Kor. 9:15) Werga Yeso sii jag go de tenen ɓe so mono, ndo mbo de kããge maa baa barge de Jeofa de woore. Ndo mbo de kããge maa kaŋ ɗiggi ti tenen maa tum maa peeln pa. Naa joŋ suse’ ne Jeofa ti fẽẽre wo ngaɓa, taŋgu ti maaga á coo naa le de húulí Weel ɓen, lan wer maaga á da naa debaŋ mono. (Rom. 5:8) Maa kay naa maaga naa mo hay tum joŋ suse’ ne Jeofa, lan maaga naa mo yõõ ti go ti fẽn maaga á joŋn wo see naa de Yeso wa mono, Yeso hã jag liŋgi ne naa maaga naa mo hay ɗig ti ti húulí ɓe tum nen kiŋgi.—Lug 22:​19, 20.

 2. Naa ndal ge yaŋ ɓil hadge sen la diŋ ti maylà?

² Ɗiggi ti húulí Yeso maa taglan joŋ ge diŋ wur Ɓesge, ti naw maa 12 nen Few Ɓurgi, 2025. Sen go tinoo tu ga wosela ɓuy go de grag see ɓe maa woge ni wur seno. De maaga wur Ɗiggi ti húulí Yeso a mono, á de el maaga naa mo maŋ wur maa ɗig a  ti ti fẽn maaga Jeofa wo de Weel ɓe Yeso joŋ wo see naa mono. Doo sen nokay naa da’ yaŋ wer ɓe debaŋ. Ti hadge sen la, naa ndal ge yaŋ ti fẽn maaga húulí Yeso had naa ti Jeofa wo de Weel ɓe Yeso mono. Hadge maa peeln kay naa yaŋ maa ko fẽn maaga naa joŋn maa da’ge wer húulí Yeso, lan ɗeŋ maaga naa ngaɓ go ga naa joŋ suse’ ne Jeofa wo de Yeso mono.

HÚULÍ YESO HAD MAYSE NE NAA TI JEOFA LÀ?

 3. De ɗeŋ maa hõn ga húulí jobo maa de deele boŋ pog jar go ngaɓa là? (Ko foton lay.)

³ Húulí Yeso had naa ti de deele maa ni Jeofa no. (Dog. 32:4) De ɗeŋ maa hõnlà? Ɗig ɗa: Adam yãã jag Baa ga, wer sen ɓlagge ya’ naa, lan se a de húulí ne naa ti. (Rom. 5:12) Maa pog naa go jag ɓlagge wo de húulí mono, Jeofa joŋ ga Yeso mo coo naa le. Day sen joŋ ge joŋ ge ga húulí jobo maa de deele boŋ pog jar go ngaɓa là? Apotre Pol naa wer ɓe ga: “Doo maga debay yããge jag ma boŋn [kaŋ nen ga Adam] raw kol jar go de ɓlagge debaŋ nono, yããge jag ma jobo boŋ [kaŋ nen ga Yeso] kol ge jar debaŋ yaŋ go de deele nen Baa doosen no lay.” (Rom. 5:19; 1 Tim. 2:6) Pol da wããge ti ngeel sen la diŋ ga wer jobo boŋ ga yãã jag Baa ga, jar téebeere wo ɓuy kol wo go de ɓlagge, lan huɗ wo. Day diŋ wer yããge jag jobo maa deele po boŋ lay ga pog jar le go ɓuy.

 4. Wer mayse ga Jeofa men ga weere maa ni Adam maaga hoo ge wo sug ti ɓe mo joŋ wo tenen tum tu ga là?

⁴ Jeofa ɓo’ mbe Yeso le na maa huugi go ti re naa cwãy yawlà? Wer mayse ga Jeofa men ga weere maa ni Adam maaga hoo ge wo sug ti ɓe mo joŋ wo tenen tum tu ga là? Maapo naa ɗig ga sen de hay joŋ diŋ ɗeŋ maa de woore maa kne’ re no. Naa ɗig doo sen werga naa bay kaŋ ti ti de deele cagge re maa ni Jeofan wa. Werga Jeofa keɗed so mono, á de hay hres go ti debay yããge jag Adam ga.

 5. Mayse hã bawge go ne naa jiili ga Jeofa joŋ ge yaŋ tum diŋ fẽn maa ti ngeel ɓe là?

⁵ Hayga Jeofa hay joŋ we ga weere maa ni Adam maa de ɓlaggen mo hay joŋ mbaara tenen ti’ tum, hay ɓo’ Yeso we le ga no, mayse de hres là? Jar de hay wii jag see ɓaara ga Jeofa mo hã’ na bay men re maa de bay ngar hresge ti ngeel maa po wo wa yawlà. Ko ba ɗa, jar hay le’ mbrawge ga Jeofa mbe na go de bag jag fẽẽre maaga á wãã ra go ɓuy yawlà? Amaa, naa bay maa ɗiggi ti sen wa. Werga Jeofa yãã ga Weel dage ɓen mo huu go ti re naa so mono, sen hã bawge go ne naa ga á joŋ ge tum diŋ fẽn maaga de deele mono.

 6. Joŋre maa de woore maa hõn jor glog Jeofa ɓo’ Weel ɓen le là? (1 Jaŋ 4:​9, 10)

⁶ Mo maaga joŋ ga Jeofa mo ɓo’ Weel ɓen  le go huugi ti re naa diŋ dage maaga á de ɓe see naa . (Jaŋ 3:16; Jaŋ 1 Jaŋ 4:​9, 10.) Hadge maa ti húulí Yeson ngaɓ ga Jeofa da bay diŋ ga naa mo hay tenen ti’ tum tawa wa, amaa, á da ga naa mo hay ɓi feele maa sen lay. Ko ba ɗa: De maaga Adam joŋ ɓlagge go mono, Jeofa niin wo go ɓi feele ɓe no. Ɓo’ge ti ɓen so diŋ ga, de maaga naa biŋ le mono, naa hay bay ɓi feele maa ni Jeofan wa. Amaa wer húulí Yeso, Jeofa fug ɓil go ne naa ti ɓlagge naan wo ɓuy, se yãã ge jar maaga yãã wo wããre Yeson, lan hoo wo sug ti ɓe we ɓuy le ɓi feele maa ɓe no. Koh patala, Jeofa fug ɓil go ne naa ti ɓlagge naan wo, day holaŋ naa de ɓe, lan de hẽẽre naa joŋ wo de woore. Jeofa da naa cwãy!—Rom. 5:​10, 11.

 7. Yeso jo bon debaŋ maa coo naa le. Sen had naa ti dage Jeofa see naa ga hãylà?

⁷ Naa ko dage Jeofa maa debaŋn go see naa say naa ko cege maaga á ce Jeofa de maaga á ko Weel ɓen ti bon mono. Manhúulí wãã ga jobo yaŋ ti bon no, á oo de deele peel Jeofa ti boŋ ga. Maa ɓo’ wer gete’ Manhúulín go mono, Jeofa ɓo’ faage ga Yeso mo jo bon taŋgu húulí ɓe. (Job 2:​1-5; 1 Pi. 2:21) Jeofa hay ko jar mbuɗ foo Yeso, jwagge ɓe, lan ɓalge ɓe go ciŋ ti koo. Blam sen Jeofa ko Weel dage ɓen huugi jag bon debaŋ pa. (Mat. 27:​28-31, 39) Jeofa hay de kããge maa maŋ jag fẽẽre maaga hay hres wo mo ɓuy go. Ba doo maaga jar hee ɓen wãɗ wo ga: “Wùr ko ne ɗa so, ti ga Baa yaŋ dage ga se yãã ne yaŋ go patala laybla’ no,” Se diŋ fẽn maaga Jeofa de hay joŋ mo lay. (Mat. 27:​42, 43) Day Jeofa hay yãã Yeso we go jag re sen no, naa hay bay gor mopo peel wa so. Wer sen Jeofa joŋ ga Weel ɓen mo soɗ bon hãã jag húulí.

 8. Á hay ce Jeofa de maaga á hay ko Weel ɓen jo bon mo yawlà? Naa wer ɓe. (Ko foton lay.)

⁸ Naa mo hay ɗig ga werga Jeofa kluu debaŋ, bon maaga Weel ɓen hay jon hay cen ga na wa! Jeofa joŋ jar téebeere wo de jiili nen maaga á mo law wo noga mo fruy wo. Wer sen á ti ngeel ɓe maaga naa ɗig ga fẽẽre maaga Jeofa ko ra hã wo lawge ne hẽn noga fruy wo ne lay. Bible ngaɓ ga á “sõõ jiili” noga “car jiili” go. (Siŋ. 78:​40, 41) Naa ɗig ti re maaga hay da’ Abraham wo de Isag mo ɗa. Ɗig ndo ga Jeofa hay wãã ne Abraham ga á mo sii jag go de Weel ɓe maa boŋ no. (Tĩĩ. 22:​9-12; Heb. 11:​17-19) Naa ɗig ba ti maaga á ce Abraham de maaga á hay rawge go ĩĩ weel ɓe Isag diŋ se de see ɓe tu mo ɗa. Ɗig ba ti bon maaga Jeofa joŋ de maaga á hay ko jar joŋ bon Weel ɓen, lan ‘warge ɓe go mo ɗa!—Ko videyo Hã wee ɓil doo saara no lay—Abraham, Maa de ɓog no, ɓil jw.org.

 9. Rom wo 8:​32, 38, 39 had mayse ne ndo ti dage Jeofa see naa là?

⁹ Húulí Yeso ngaɓ ga jobo da naa de daŋ  Jeofa ga—koh hayba jar maa see naa wo noga bar naa maa ti nen naa wo. (Jaŋ Rom wo 8:​32, 38, 39.) Sen go tinoo tu ga Jeofa da naa de daŋ maaga naa da see naa mono. Ndo da ga ndo mo hay tenen caw tum yawlà? Jeofa de sãy sen ti de daŋ ndo. Ndo de sãy maaga fug ɓil go ne ndo ti ɓlagge ɓon wo ti yawlà? Jeofa de sãy sen ti de daŋ ndo pa. Fẽn maaga á gor do naa diŋ ga naa mo yãã kado maaga se hã ne naa de hã ɓili, lan de yãã jag se tawa tu. Húulí Yeso diŋ fẽn maaga ngaɓ kluu dage Jeofa go see naa mono. Ti sir maa defayn mono, naa had ge fẽẽre yaŋ ti dage maaga Jeofa da naa de peel ni debaŋ pa.—Ekl. 3:11.

HÚULÍ YESO HAD MAYSE NE NAA TI YESO LÀ

10. (a) Wer mayse ga Yeso hay caa jiili go debaŋ ti ɗeŋ maaga à ĩĩn go de ɓe mo là? (b) Day á ɓo’ nen go ga Jeofa diŋ jee maa keɗed na ɓo’ge là? (Ko ngeel maa de gaɗge “ Húulí Yeso ɓo’ nen go ga Jeofa de deele.”)

¹⁰ Yeso ɗig debaŋ ti fẽn maaga jar ɗig ti Pan ɓe mono. (Jaŋ 14:31) Yeso hay go de caa jiili debaŋ ti maaga jar ɗig de baywoore ti Pan ɓe, wer maaga à hay ĩĩ ne go doo jobo maaga ɗar ɗuu Baa ne mono. Wer sen á tos ga: “Baba, hayga á joŋ yaŋ no, ya’ joŋge bon maa kay wo go see ɓi hãã ɗa la.” (Mat. 26:39) Amaa, werga Yeso oo de deele peel Jeofa hãã jag húulí so mono, se ngaɓ go poɗag ga fẽn maaga Manhúulí hay wããn ti Jeofa bay cwãy wa.

11. Yeso ngaɓ go ga se da jar na ngaɓge là? (Jaŋ 13:1)

¹¹ Húulí Yeso had naa ga Yeso ko decoo jar téebeere wo debaŋ, debaŋ ɓe jar maaga maŋ wo blam ɓe mono. (Jõõ. 8:31; Jaŋ Jaŋ 13:1.) Ba doo maaga fẽẽre po maaga á de hay joŋ ra ti tamsir la de hay joŋ wo de gayri see ɓe, debaŋ ɓe de maaga á hay húu go jag bon mono. Yeso joŋ fẽẽre se maa de gayrin wo mo  deŋ ɓuy bay diŋ werga Jeofa hay wãã ne hẽn ga á mo joŋ doo sen no wa, amaa, werga á hay da jar debaŋ. Yeso naa nen dage ɓe maa kwũyn go see jar de sii wããre Baa ne hara, de had rage, lan de kay rage. Koh wur húulí ɓe, Yeso maŋ wur maa yog ɓaale ne jar peele ɓen wo, lan wãã wããre maa coɓ rage, maa joŋ gwa’ so ne hara. (Jaŋ 13:​12-15) De maaga á hay ciŋ ti koo maa ɓal jarn mono, Yeso maŋ wur mẽ’ ma fer wããre ne jee ĩɗ húulí maaga hay de ɓalge de ngar ɓe ga á joŋ ge yaŋ ti paradisi, lan wãã ne Jaŋ ga á mo ɗaw man se do. (Lug 23:​42, 43; Jaŋ 19:​26, 27) Yeso ngaɓ dage ɓe maa kwũy see jar téebeere wo bay diŋ de húulí ɓe tawa wa, amaa á hay joŋ rage de dage, lan hay de yaŋ see ɓaara lay.

12. Yeso de joŋ mayse ne naa matala là?

¹² Á mbe cwãy ga Yeso huu go maa “hãã tum ɓuy,” amaa, á joŋ fẽẽre debaŋ wer naa. (Rom. 6:10) Á joŋ mayse wo wer naa là? Á hãã patala de ya’ wer joŋ joŋre maa hã fẽẽre po wo ne naa debaŋ ga naa da’ ra say diŋ wer húulí ɓe. Naa ko fẽn maaga á de hã see ɓe jag ɓe joŋge mo ɗa. Á joŋ joŋre doo Waŋ naa, jee siɗ jag maa kluu, lan waŋ taygen wo. (1 Kor. 15:25; Efe. 5:23; Heb. 2:17) Joŋre taygeti jar maaga nenterse Baa de sreŋ rage wo de ngaɓa maa debaŋ debaŋn de hãge nen hẽn do. Joŋre sen taw go taŋgu bon maa de hãã no. b (Mat. 25:32; Mark 13:27) Á kay weejõõ maa de deele, de ti lay maaga á mo hay tum hã rege maaga naa de sãy ɓe ti ne naa nen maaga naa mo hay de deele ti joŋre maa ni Jeofa no. (Mat. 24:45) Ti kiŋgi maa 1000 maaga Yeso joŋ ge yaŋ diŋ Waŋ mono, á joŋ ge yaŋ joŋ fẽẽre sen wo tum ne naa. Jeofa hã Weel ɓen le go diŋ wer naa cwãy!

HAY TUM HAD FẼẼRE MAA DEFÃY WO DE PEEL NI

13. Ndo ya’ wer had fẽẽre ti dage maaga Baa wo de Yeso Kris joŋ wo see naa na ya’ge là?

¹³ Ndo ya’ wer had fẽẽre ti dage maaga Baa wo de Yeso Kris joŋ wo see naa diŋ ga ndo yaŋ tum ɗiggi ti ɓe no. Maapo ga taŋgu wur ɗiggi ti húulí Yeso lan blam ɓe, ndo maŋ wur po maa de woore maa jaŋ Wããre maa de cõõre po boŋ noga de daŋ se no. Ɗig diŋ ga ndo mo jaŋ ‘chapitre’ go pur jag boŋ tu wa. Nen maaga ndo mo hay ɗee de jaŋgen deparday mono, jaŋ ne see ta’ see ta’ maaga ndo mo laa wer ne fẽẽre maaga ndo nen da Jeofa wo de  Yeso wer ɓaara mono. De daŋ sen ɓuy, sii fẽẽre maaga ndo had ra go ne jare.

14. Kiɗgi wer ne fẽẽre kay naa maa had fẽẽre ti húulí Yeso wo de hadge maa tigriŋ wo na kayge là (Siŋ wora 119:97)? (Ko foton lay.)

¹⁴ Hayga ndo yaŋ go de joŋ batem kiŋgi pur no, maapo ndo wii jag see ɓo ga fẽẽre maa tigriŋ ga ndo nen had rage ti de deele maa ni Jeofa no, ti dage ɓe, lan ti húulí Yeso yaŋ mbaara ɗa pa yawlà. Patala, naa joŋ ge mbe tum had fẽẽre maa tigriŋ wo ti ɓaara ɗa. Day ndo joŋ joŋge so là? Frug nen fẽẽre maa de woore maa ɓil Bible ga kefder naa wãã wo ti ɓaara mono. Hayga ndo yiŋ we de maa po ga bay go laa wer ne ndo de woore wa no, kiɗ wer ɓe. Nen siili ɓon, ɗig ti ti fẽn maaga ndo da’ ti fruggi nen wããre ɓo no, ti maaga á had mo ti Jeofa, ti Weel ɓe no, lan ti dage maaga á da wo ndo mono.—Jaŋ Siŋ wora 119:​97, lan ngeel naa wer maa gesiŋ ɓil TMN.

15. Wer mayse ndo mo hay tum kiɗ wer ne fẽẽre maa tigriŋ wo ɓil Bible là?

¹⁵ Hayga ndo da’ hadge maa defay we ti jaŋge ɓon noga ti kiɗgi wer fẽẽre ɓil kefder naa wo ga no, woo do go wa. Ko see ɓo doo jobo maaga de kiɗ boo biŋni nono. Seɓaa, maaga jobo mo da’ boo biŋni nokay mẽ’, se wii wur do ɓe debaŋ, noga naw debaŋ. Amaa, se ya’ wer kiɗgi ɓe de peel ni, werga á mo da’ ba nen boo biŋni nokay mẽ’ se diŋ mopo maa de el debaŋ nen ɓe. Fẽn maaga naa da’ defay ɓil Bible de daŋ boo biŋgi go hãã tu! (Siŋ. 119:127; Jõõ. 8:10) Wer sen hay tum jaŋ Wããre Baa, lan hay tum kiɗ wer ne fẽẽre maa tigriŋ maa da’ wer ne hara.—Siŋ. 1:2.

16. Naa bir jag Jeofa wo de Yeso na birgi là?

¹⁶ De maaga ndo jaŋ Wããre Baa mono, ɗig ti ɗeŋ maaga ndo joŋ joŋre de ɓe nen naw ɓo mono. Maapo, ndo bir jag Jeofa de joŋ jar ti ɓaŋ ga. Maŋ saɓlaŋ Yeso ti dage maaga á da Paŋ ɓe wo de jar lan wo, de hã see ɓo go joŋ fẽn maaga Jeofa dan de kay jar lan wo, koh á mo hay ba ɓo’ gayri mo ti. Maŋ saɓlaŋ Yeso de sii wããre go ne hara nen maaga á mo da’ wo nen maa yãã kado maaga daŋgo, bay maa ngaɓge wa, ga Jeofa hã ne naa mono.

17. Naa ko ge yaŋ wo ɓil hadge maa peeln diŋ maylà?

¹⁷ Hayga naa yaŋ ko de el húulí Yeso no, naa ya’ ge wer da Jeofa wo de Weel ɓen yaŋ de peel ni. Werga naa da ra debaŋ so mono, saara ya’ wer da naa yaŋ de peel ni debaŋ lay. (Jaŋ 14:21; Jag. 4:8) Naa mo hay joŋ joŋre de fẽẽre maaga Jeofa had naa de ɓaara maa da’ wer ne húulí Yeso. Ti hadge maa peeln naa ko yaŋ ga de ɗeŋ maa hõn ga naa da’ wer húulí Yeso là, day de ɗeŋ maa hõn ga naa joŋ suse’ ne Jeofa ti dage ɓe maaga á da naa mo là.