HADGE 3
SIŊ 35 “Kiɗ we wer fẽẽre maaga daŋ wo go de el mono”
Far diŋ ɗiggi maaga co wo jag Jeofa
“Tĩĩgi wer koge re diŋ joŋge hẽẽne do Baa, koge jar ma bay ɗagn wo diŋ ti ɓaara no.”—Jõõ. 9:10.
FẼN MAA KLUU ƁIL HADGE SEN LA
Naa joŋ joŋre de koge re naa, de ti naa, lan de maŋge fíi fẽẽre naa maa far ɗiggi maa de woore wo na joŋge là.
1. Re maa de gayri maa hõn ga naa ɓuy naa yiŋ de ɓe là?
Nen naw tum naa far ɗiggi wo. Ɗiggi maa po wo go gus maa farge, doo wur maaga ndo wo suugi, noga fẽn maaga ndo re ne. Amaa ɗiggi maa po wo de gayri debaŋ maa farge. Maapo ga á hãy wo jam naa, fruygi naa, ɓi feele naa, noga holaŋ naa de Jeofa. Naa da ga ɗiggi maaga naa far mo kay wo naa, lan jar maa liŋ ni naa wo. Fẽn maaga daŋgo debaŋ diŋ ga ɗiggi maaga naa far ra mo co wo jag Jeofa .—Rom. 12:1, 2.
2. Ndo joŋ mayse wo maa far ɗiggi maa de woore wo là?
2 Ndo mbo de kããge maa far ɗiggi maa de woore wo, hayga(1) ndo kiɗ wer we go ne ren de woore (2) kiɗ ɗiggi Jeofa we ti ɓe, lan (3) kiɗ ɗeŋ maa ‘wũygi ɓe we no. Ɓil hadge sen la, naa wãã yaŋ ti fẽẽre maa swa’ wo ga naa mo hay joŋ ra mono. Artikle sen la kay ge naa yaŋ maa had ɗeŋ farge fíi fẽẽre wo pa.—Jõõ. 2:11.
KIƊ WER GO NE REN DEWOORE ƊA
3. Saɓlaŋ maa hõn kay naa maa koge ga á de woore maaga naa mo kiɗ wer go ne ren taŋgu maaga naa maŋ ɗiggi kway là?
3 Fẽn maa taŋgu maaga ndo mo hay joŋ maa maŋ ɗiggi maa de woore diŋ ga ndo mo kiɗ wer go ne ren de woore. Wer mayse ga sen de el là? Naa ɗig wee ba ti jee cege po ga raw see dogda wer maaga se de cege maa kwũy see mo ɗa. Dogdan yer mbe saŋgu yaŋ ne hẽn tu bay ko cege maa see ɓen, noga bay wii jag ɓe yawlà? Sen go tinoo tu ga baywa. Doo sen no lay, ndo far ɗiggi maa de woore wo say diŋ ga ndo kiɗ wer we go ne ren taŋgu de woore ɗa no. Ndo joŋ joŋge maa joŋ sen so là?
4. Do maaga naa da’ ɓil Jag Jõõ wo 18:13 ne mono, ndo joŋ mayse maa hã bawge go mo ga ndo go de da’ wer ne ren de woore là? (Ko foton lay.)
4 Ndo da’ wer go ne ren de woore diŋ de wiɗgi jag see ɓo. Ɗig ba doo ga à ɗe mo wo ti few po no ɗa. Ndo raw mbo yaŋ ti few sen tu bay ko jee ɗe mogen wo yawlà? Maapo ga ndo wiigi jag ɓe yaŋ ga: “Few sen joŋ la genlà? Day hũnlà? Jar joŋ wo ti few sen ni gãy là? Ko ge nen ti fẽẽre maaga hres wur sen diŋ wose là? A ge ti few sen diŋ wose wo là? À joŋ wo ni diŋ mayse wo là? Yii maa taɗ seege joŋ wo ni lay yawlà?” Hayga ndo da’ yiŋgi jag we go ti wiɗgi jag sen mo deŋ no, se kay ge ndo yaŋ maa maŋ ɗiggi maa de woore.—Jaŋ Jag Jõõ wo 18:13.
Kiɗ wer go ne ren dewoore de wiɗ jag see ɓo (Ko paragraf 4) a
5. Blam maaga ndo kiɗ wer we go ne ren de woore no, ndo joŋ mayse là?
5 Blam maaga ndo kiɗ wer we go ne ren de woore no, ɗig ti re maaga ndo yiŋ gi wo de ɓaara ni mo ɓuy. Ndo joŋ joŋge hayga ndo laa ga wo ti few sen diŋ jar maaga bay wo hoo sug ti jag liŋgi maa ni Jeofan wa; noga ndo laa ga à joo yii maa taɗ see wo ni, amaa jee maa ko nen ti ɓe baywa là? Ndo bay ba ɗiggi ga few sen kol go diŋ ngeel joŋ fẽẽre maa de baywoore wo wa yawlà? (1 Pi. 4:3) Ni pa mono, ndo joŋ joŋge hayga few sen le’ we go wur maaga ndo de taygeti noga wur siigi wããre ɓo là? Hayga ndo ɗig we go ti fẽẽre sen wo mo deŋ de woore ɓuy no, ndo maŋ ge ɗiggi maa de woore yaŋ. Amaa fẽn maa tigriŋ yaŋ maa joŋge pa. Patala ndo de ko fẽn maaga ndo ɗig ti re sen mono; day Jeofa ɗig ti ɓe na ɗiggi lay là?—Jõõ. 2:6.
KIƊ WER NE ƊIGGI JEOFA
6. Doo maaga naa da’ ɓil Jag 1:5 ne mono, wer mayse ga naa mo wii kay do Jeofa nen tosge là?
6 Wii Jeofa nen tosge maaga á mo kay mo maa laa wer ne ɗiggi ɓe ti re se no. Jeofa wãã ga se hã koge re maaga kay naa yaŋ ne naa, maa koge ga ɗiggi maaga naa far ra co wo jag se yaw baywa yawlà. Á hã koge re ne “jar ɓuy, hãn go ɓil fehe.”—Jaŋ Jag 1:5.
7. Ndo joŋ joŋge maa ko ɗiggi Jeofa ti mopo là? Hã saɓlaŋ po ɗa.
7 Blam maaga ndo tos Jeofa maaga á mo ɓo’ faage mopo ne ndo mono, kiɗ ɗeŋ maa ko maaga Jeofa yiŋ jag ne ndo ti ɓe mono. Naa ko ba doo ga ndo ti raŋge ndo yee go ɗa, ndo wii jobo maaga á mo kaŋ nen ɓo ti faage no. Day ndo raw yaŋ tu bay gor maaga jee ɓen ngaɓ faagen mo yawlà? Sen go tinoo tu ga baywa. Ndo co’ sug jee ɓen de woore laa wããre maaga á wãã ne ndo mono. Doo sen no lay, blam maaga ndo wii koge re do Jeofa mono, kiɗ ɗeŋ maaga Jeofa yiŋ jag ne ndo de kiɗ ‘principes’ maa ɓil Bible maaga wãã wo ti re sen mono. Ko ba ɗa, maa koge ga ndo wo ti few maaga naa wãã le go ciŋ la yaw baywa yawla mono, kiɗ fẽn maaga Bible wãã ti few maa debaywoore wo, ti tayge maa debaywoore wo, lan ti fẽn maga Bible wãã ti de el kaŋge twaywaŋ maa ni Baan go peel fẽẽre maaga naa da ra mono.—Mat. 6:33; Rom. 13:13; 1 Kor. 15:33.
8. Hayga ndo yaŋ de sãy laa wer ne mopo maaga ndo de kiɗ wer ɓe ti no, ndo joŋ joŋge? (Ko foton lay.)
8 Day maapo ndo joŋ de sãy kayge maa da’ wer ne fẽẽre maaga ndo de sãy kiɗ wer ɓaara ti mono. Maapo ndo da’ yaŋ jag hẽnbe po noga mãygemanbe po maaga go de yiŋgi de tee re sen wo no. Amaa ndo kiɗ wer we ne hẽn diŋ ndo no, se kay mbe ndo lay. Naa da’ fẽẽre maaga kay wo naa debaŋ ɓil fẽẽre joŋre naa maa doo Guide de récherche pour les Témoins de Jéhovah, lan ɓil Versets pour la vie Chrétienne. Fer ɗiggi ga fẽn maaga ndo de kaŋge ɓe peel diŋ ga: ndo mo maŋ ɗiggi maaga co ge jag Jeofa.
Kiɗ wer ne ɗiggi Jeofa (Ko paragraf 8) b
9. Naa joŋ go de bawge jag jiili naa ga ɗiggi maaga naa maŋ co ge jag Jeofa na joŋge? (Efes wo 5:17)
9 Naa joŋ go de bawge jag jiili naa ga ɗiggi maaga naa maŋn co ge jag Jeofa na joŋge là? Taŋgu ɗa naa mo hay kiɗ maa koge ɓe go de woore. Koge jee maa bay ɗagn ngaɓ ga ndo de ti. Bible wãã ga “tĩĩgi wer kore re diŋ joŋge hẽẽne doo Baa, koge je ma bay ɗagn diŋ ti ɓaara no”. (Jõõ. 9:10) Joŋge de ti maa cwãy a le diŋ see koge joŋre Jeofa maa de wooren wo no, fẽẽre maaga á de sãy joŋ rage ti, fẽẽre maaga á da ra, lan maaga á hee de ɓaara mono.—Jaŋ Efes wo 5:17.
10. Wer mayse ga principes maa ɓil Bible wo de el de daŋ jag liŋgi maa ti wer naa wo, noga maa ɓi feelen naa wo là?
10 Maaga naa mo co jag Jeofa mono, day maa po naa joŋ fẽẽre maaga co jag jar maa see naa maŋ wo ga. Maapo ga pããrebe maaga ɗig wo ga saara ɗig de woore, joŋ wo doole mãy ɓaara da jee maaga de horog do, noga jee maaga hã horog yaŋ ne saara ti mãyn de woore, koh á mo hay ba kaŋ ɗiggi ti wããre Baa wa. Á ti ngeel ɓe ga á wo de sãy maaga mãy saaran mo hay go liŋ ni ɓe de woore, amaa, mãy mo hay wii jag see ɓe ga: “Blo sen kay ge mbe ndi yaŋ maa sa’ holaŋ wur de Jeofa de peel ni yawlà”? Jeofa ɗig ti re sen na ɗiggi là? Naa da’ yiŋgi jag ɓen ɓil Matiye 6:33. Ɓil ɓe ni, Kretiyẽ wo de jor glog maa “kiɗ twaywaŋ ma ni Baan go taŋgu ɗa.” Koh de maaga naa mbe de sãy yãã jag pããre naa wo, lan de sãy hoo sug ti jar naa wo laybla mono, fẽn maaga daŋgo nen naa diŋ ga naa mo fruy ɓil Jeofa.
ƊIG GO DE WOORE TI FẼẼRE MAA TIGRIŊ WO
11. Joŋre maa de woore maa hõn ɓil Filip wo 1:9,10 ga kay mo yaŋ maa ɗiggi go ti ɗiggi maaga ndo de sãy far rage ti là?
11 Blam maaga ndo ko ‘principes’ maa ɓil Bible ga kay wo ndo yaŋ ti re sen mono, ɗig ti fẽẽre maa tigriŋ wo. (Jaŋ Filip wo 1:9, 10; Ko ngeel naa wer maaga wãã ga “full discernment”, ɓil TMN.) Farge fíi fẽẽre kay mo yaŋ maa ɗiggi go ti re maaga ndo da’ wer ɗiggi maaga ndo de sãy far rage ti mono. Farge ɗiggi maa po wo go gusi. Amaa, maa po wo de gayri. Hayga ndo yaŋ far fíi fẽẽre no, se kay mo yaŋ maaga ndo maŋ ɗiggi, koh ɗiggi maa de gayri wo.
12-13. Farge fíi fẽẽre kay mo maa maŋ ɗiggi maa de woore ti ɓaŋ joŋre na kayge là?
12 Naa maŋ ba saɓlaŋ po ɗa. Ndo de kiɗ joŋre maa re jar ni ɓo wo. À ngaɓ joŋre po wo ɓoge. Ndo ɗig ti fẽẽre ngaɓa doo joŋre ɓe no, seele ɓe no, wur maaga joŋren yãã do ɓo. Joŋre sen wo ɓog ɓuy, Bible bay de caa põõ ɓaara wa. Maapo ga ndo yãã mbo joŋre boŋ yoo ɓaara werga à poɗ ge mo ti ɓe de woore, noga werga ndo da joŋre se no. Amaa, ndo mo hay ɗig go ti fẽẽre maa tigriŋ wo ngaɓa taŋgu maaga ndo maŋ ɗiggi.
13 Ko ba ɗa, wur joŋre sen tab go de wur taygeti yaw? Mbala joŋre sen maŋ jag ɓo go maaga ndo mo kay jar ni ɓo wo nen maaga á mo hay wo de fruygi, mo ya’ wo see Jeofa mbaŋ yawlà? Wiigi jag ɓo ti fẽẽre sen kay wo ndo yaŋ maa maŋge diŋ “ɓaŋ fen maga sen de el daŋge”—kaŋ nen ga goŋge Baa wo de fẽẽre maaga ɓi feele ɓo de sãy ɓaara ti—taŋgu suŋgu. Blam sen, Jeofa kaŋ ɓosa’ yaŋ ti ɗiggi maaga ndo maŋ mono.
14. Farge fíi fẽẽre kay naa na kayge maa naa nen dage, lan maaga naa mo ma’ ɓaale jar wa là?
14 Farge fíi fẽẽre kay ge naa yaŋ maa koge ga ɗiggi maaga naa far ra hãy wo jar lan wo na hãyge là, maaga naa mo “ma’ ɓaale” jar lan wo wa. (Flp. 1:10, TMN) Á de el debaŋ maaga naa mo maŋ fíi fẽẽre de maaga naa le’ maŋ ɗiggi we ti ɓaŋ õõbe maaga naa hee see naa, noga caw naa. Ko ba ɗa, ɗeŋ heege õõbe, cẽẽge ti, noga deege ti po co jag naa debaŋ. Day naa joŋ joŋge hayga sen yaŋ ma’ ɓaale jar maa ti tayge naa wo, noga jar maa siigi wo là? Farge fíi fẽẽre kay wo naa maa hoo sug ti ɗiggi ɓaara. Dage kay ge naa maaga naa mo hay kiɗ fẽn maa de el “ne kan” naa; lan maaga naa mo hay hee õõbe de sõõre nene, de hooge sug lay. (1 Kor. 10:23, 24, 32; 1 Tim. 2:9, 10) Blam, naa far ge ɗiggi maaga ngaɓ go ga naa da jar lan wo, lan naa hoo sug ti ɓaara lay.
15. Ndo ɗig go ti mayse peel bol taŋgu maaga ndo bag jag ɗiggi maa de woore là?
15 Hayga ndo yaŋ maŋ ɗiggi ti fẽn po de woore no, ɗig ti fẽn maaga ndo joŋn maa bag jag ɓe go mono. Yeso hay had naa maa “kee fẽẽre maga [naa] joŋ joŋre tiŋ de ɓe go.” (Lug 14:28) Wersen ɗig ti wuri, ti fẽẽre, lan ti ẽgre maaga ndo de sãy ɓaara ti maa bag jag ɗiggi maaga ndo far ra mono. Day maapo, maapo ga ndo ndal de jar ni ɓo wo maa koge ga wosela ɓuy yoo ɓaara joŋ diŋ mayse maa kayge ti joŋre sen là. Wer mayse ga á de el maaga ndo mo joŋ doo sen ne là? Maapo sen ngaɓ ne ndo ga ɗiggi maaga ndo maŋn wii cooge po wo ni yaw, noga maa cooge ɓuy yawla. Day hayga nday ndal we ti ɓe de jar maa liŋ ni ɓo wo, lan ndo laa yaŋ ɓaara we lay no, ni sen jor glog ɓaara yaŋ kay moge maa bag jag ɗiggi ɓo sen go.—Jõõ. 15:22.
FAR ƊIGGI MAAGA BAG WO JAG GO
16. Fẽẽre maa hõn kay wo ndo maa maŋ ɗiggi maaga see yaŋ là? (Ko ngeel maa de gaɗge “ Ndo joŋ joŋge maa maŋ ɗiggi maa de woore là” lay .)
16 Hayga ndo joŋ joŋre we de yaŋ maaga à wãã le ti ɓaara ciŋ la ɓuy no, kaŋ nen ga ni ndo go de bag jag maa maŋ ɗiggi maa de ko re. Ndo tay fẽẽre see kẽẽ ngaɓa, lan ndo frug nen ‘principes’ maaga kay ge wo ndo maa far ɗiggi maaga co wo jag Jeofa. Patala, ndo mbo de kããge maa wiigi ɓe ga á mo kay mo maa maŋ ɗiggi maaga see yaŋ mono.
17. Ɗeŋ maa hõn kay wo ndo maa far ɗiggi maa de woore là?
17 Koh ndo mo hay far ba ɗiggi maa de woore wo le ɓaa laybla no, fer ɗiggi ga fẽn maaga kay see maa far ɗiggi maa de woore diŋ kaŋge ɗiggi ti koge re maa ni Jeofa no, amaa bay diŋ ti koge re ɓo wa; noga kaŋ ɗiggi diŋ ti re maaga ndo hay hres go ti ɓaara koɗ wa. Say Jeofa boŋ ga hã koge re maa ti ngeel ɓen, ti, lan farge fíi fẽẽre. Fẽẽre sen ngaɓ wo ga jobo de ko re. (Jõõ. 2:1-5) Jeofa de kããge maa kay moge far ɗiggi maaga co wo jag ɓe.—Siŋ. 23:2, 3.
SIŊ 28 Jeofa, joŋ bar ɓo diŋ jee ma ẽla?
