1. Jar wara debaŋ kaŋ wo ɗiggi diŋ ti maylà?

 MAAPO, ndo yaŋ de koge ga jar wara debaŋ bay wo kaŋ ɗiggi ti re maa see jar lan wa, amaa diŋ ti maa see ɓaaran wo tawa tawa. Ko ba ɗa, jar maa po wo debaŋ joŋ wo joŋre de ‘réseaux sociaux’ maa far ti see ɓaara ciŋ, lan maa ngaɓ fẽẽre maaga saara joŋ ra mono. Amaa, jar maaga hã wo togoɗge ne Jeofa wara wo mẽ’ tu. Ɓil hadge sen la, naa ko yaŋ ga hãge togoɗge ne Jeofa da wããge ga hãyla, lan wer mayse ga naa joŋ sen la. Naa ko ge yaŋ pa ga de ɗeŋ maa hõn ga naa hã togoɗge maaga diŋ maa Baa cwãy ne hẽn la, lan de ɗeŋ maa hõn ga á togoɗ see ɓe yaŋ nen naw maa peeln la.

HÃGE TOGOƊGE NE JEOFA DA WÃÃGE GA HÃYLÀ?

 2. Jeofa naa nen togoɗge ɓen go ɓaale Húulì maa Sinay na naage là? (Ko foto maa nen lay.)

² Togoɗge diŋ maylà? Ɓil Bible mono, togoɗge ngaɓ diŋ mopo maaga joŋ ga jobo mo hay de raa ɗuu. Bible wãã ga Jeofa diŋ Baa maa kluu debaŋ. Naw mẽ’ blam maaga Jeofa laa jar Israyel wo le go Ejipte mono, á naa nen togoɗge ɓe ne hara. Ɗig ba ɗa: Jar Israyel wo miliyoŋ pur tay wo ɓaale Húulì Sinay maa laa fẽn maaga Baa hay maa wããge ɓe ne hara mono. Swaare sãã suŋgu go ne húulìn ti. Cug yãã ti húulìn go ɓuy. Deparday tu, sir le’ daɗge debaŋ, lan sagge baa ler ngeel go, bii caa põõ, lan cõõ raw raage le ciŋ. (Laa. 19:​16-18; 24:17; Siŋ. 68:9) De maaga Jeofa joŋ fẽẽre sen wo mono, jar Israyel ko wo ga á kluu debaŋ, day sen raw ngel rage debaŋ.

 3. Ferge togoɗge ne Jeofan da wããge ga hãylà?

 ³ Day jar téebeere fer wo togoɗge ne Jeofa na ferge lay là? Naa mbe de kããge maa fer togoɗge ne Jeofa cwãy yawlà? Naa mbe de kããge. Ɗeŋ maa boŋ ga naa fer togoɗge ne Jeofa diŋ wããge ne jar ti ẽgre ɓe maaga daŋgo, lan ti joŋre ɓe maa de wooren wo no. Naa fer togoɗge ne hẽn pa de maaga naa hã raage ɗuu fẽẽre maaga á kay naa maa joŋ rage ɓuy ne hẽn mono. (Esa. 26:12) Waŋ Dafid diŋ saɓlaŋ maaga daŋgo ti ɓaŋ ferge togoɗge ne Jeofa. Nen tosge ɓe maaga á tos peel tayge maa Israyel mono, Dafid wãã ne Baa ga: “Kluu no, egre no, domge no, togoɗge no, sena’ge no, wo diŋ maa ɓo [Jeofa]! Werga fen maga le ciŋ noga gesiŋ la wo diŋ ma ɓo.” Blam maaga Dafid ɓo’ ti tosge ɓen go mono, “jar ma ti taygen wo ɓuy kal wo joŋ suse’ ne [Jeofa].”—1 Kro. 29:​11, 20.

 4. Yeso hay togoɗ Jeofa na de ɗeŋ maa hõnlà?

⁴ De maaga Yeso hay gesiŋ la mono, á fer togoɗge ne Pan ɓe de wããge ne jar ga hã ẽgre maa joŋ fẽẽre mbuɗgi ne se diŋ Baa. (Mark 5:​18-20) Yeso togoɗ Jeofa pa de ɗeŋ maaga á hay wãã wããre ne jar ti Pan ɓe, lan de ɗeŋ maaga á hay joŋ jar mono. Ti wur po, Yeso hay hadge ɓi tiŋ tosge. Yoo jar maaga hay wo co’ sug wããre ɓe mono, wãy po hay we ni de sõõ ti go kiŋgi 18. Sõõn goŋ wãyn go ti kẽẽ nen maaga se bay naa ti go ciŋ dra’ wa. Yeso ko ga á hay cege ɓe debaŋ, lan se hay de sãy kayge ɓe ti. Wersen se ya’ le see ɓe, day wãã wããre ne hẽn desãy ga: “Wãy, ndo pog we go jag cege ɓo no.” Á raw kaŋ do ne hẽn ti, wãyn raw ɗobge go ni tu seŋ, “á raw tĩĩ wer togoɗ Baa.” Ɓil ɓe joŋ go de fruygi debaŋ ti maaga Jeofa pẽẽn go mono! (Lug 13:​10-13) Á ti ngeel ɓe ga wãy sen hã togoɗge ne Jeofa, lan naa de hay joŋ doo sen no lay.

WER MAYSE GA NAA TOGOƊ JEOFA LÀ?

 5. Naa hoo sug ti Jeofa wer fẽẽre maa hõn wo là?

⁵ Naa togoɗ Jeofa werga naa hoo sug ti ɓe debaŋ. Naa hoo sug ti ɓe wer fẽẽre wo ngaɓa. Jeofa de ẽgre maa joŋ fẽn maa hõnla ɓuy ga se da ne, day á gay ti boŋ ga hase. (Siŋ. 96:​4-7) Koge re ɓe maa debaŋn naa nen go nen fẽẽre maaga á joŋ ra mono. Á hã tenen ne naa, lan fẽẽre maaga naa de sãy ɓaara ti maaga naa mo hay tenen mo ɓuy. (Naa. 4:11) Á de deele. (Naa. 15:4) Fẽẽre maaga á joŋ ra mo ɓuy, ɓod wo jag go de woore, day se bag jag fẽẽre maaga se wãã ga se joŋ ra go ɓuy lay. (Jos. 23:14) Se diŋ wersen so ga profed Jermi wãã ti Jeofa ga: “Yoo jar ma de ko re ma ti wer jar wo ɓuy noga ti waŋre ɓaaran wo ɓuy jobo maa doo ndo nono baywa hase”! (Jer. 10:​6, 7) Cwãy tu, fẽẽre maaga naa hoo sug ti Pan naa maa ciŋn wer ɓaara wo ngaɓa. Amaa, naa bay tawge diŋ de hoo sug ti Jeofa tawa wa, naa dan lay.

 6. Wer mayse ga naa da Jeofa là?

⁶ Naa togoɗ Jeofa werga naa dan debaŋ. Naa da Jeofa wer joŋre ɓe maa de wooren wo no. Ɓil ɓe de el debaŋ, lan se ko decoo jar debaŋ lay. (Siŋ. 103:13; Esa. 49:15) De maaga naa ti bon mono, se ti bon lay. (Sak. 2:12) Á kay naa maaga naa mo ko se, lan naa mo kol bar se. (Siŋ. 25:14; Joŋre 17:27) Á fer ti see ɓe gesiŋ; “á jel ti ɓe gesiŋ ma ko ngel ma ciŋ wo de ma gesiŋ la. Le nen ɓurgi, á fer ɗob je ma de hugli no.” (Siŋ. 113:​6, 7) Wer fẽẽre sen wo mo deŋ ɓuy, naa de sãy togoɗ Baa naan ti.—Siŋ. 86:12.

 7. Naa mbe de kããge maa joŋ maylà?

⁷ Naa togoɗ Jeofa werga naa da ga jar lan mo ko wo ne. Jar debaŋ bay wo de ko cwãy ti Jeofa wa. Wer maylà? Werga Manhúulí caa gete’ ne Jeofa see debaŋ, day jar hã ɓil ti  gete’ ɓen wo no. (2 Kor. 4:4) Manhúulí hã bawge go ne jar jag jiili ga Jeofa diŋ Baa maaga da sõõ ɓil debaŋ, bay ko nen ti naa wa, lan bon maa ti tamsir la ɓuy a le see ɓe. Amaa, maa naa, naa de ko cwãy ti Baa naa no! Naa kay jar maa koge ga Jeofa diŋ Baa maa ese cwãy la, lan maaga á mo togoɗ wo ne lay. (Esa. 43:10) Siŋ maa 96 wãã debaŋ diŋ ti ferge togoɗge ne Jeofa. Naa had ge ɓil siŋ sen la diŋ ɗeŋ maaga naa fer togoɗge maaga diŋ maa Jeofa ne hẽn mono.

NAA FER TOGOƊGE MAAGA DIŊ MAA JEOFA NE HẼN NA FERGE LÀ?

 8. Ɗeŋ maa boŋ ga naa togoɗ ɗuu Jeofa de ɓe diŋ de joŋge maylà? (Siŋ wora 96:​1-3)

⁸ Jaŋ Siŋ wora 96:​1-3. Naa togoɗ Jeofa de fẽn maaga naa wãã ti ɓe mono. Verse sen jor wo glog naa maa “‘waa siŋ ma defay ne [Jeofa]”, maa “togoɗ ɗuu ɓe,” ma “sii wããre ɓe ma de cõõre ma hã pẽẽgen” go, lan maa “bag blam wããre go ti togoɗge ɓen yoo wer sir wora.” Fẽẽre sen wo mo deŋ ɓuy wo diŋ maaga naa togoɗ Pan naa maa ciŋn de ɓaara mono. Jar goŋ Baa maa ɓaan hay wo go de baa wer maa wããge ne jar ga Jeofa diŋ wose cwãy la, lan ti fẽẽre maaga á hay joŋ ne hara mono. (Dan. 3:​16-18; Joŋre 4:29) Naa joŋ doo saara no lay na joŋge là?

9-10. Ndo had mayse see saɓlaŋ Aŋjelena là? (Ko foton lay.)

⁹ Naa ko wee saɓlaŋ mãygemanbe po wo ɓi sir Etats-Unis ga à ɗen ga Aŋjelena mo ɗa. a Á hay de coɓge lan se wãã go ti Jeofa ti ngeel joŋre ɓe. De maaga á tĩĩ wer joŋre ɓen nokay mono, à ɗen ti taygeti yoo jar maaga tõõ wo joŋre defay mono. Ti taygetin wosela ɓuy ɓo’ wer see ɓe go peel jar lan wo no. Aŋjelena bag jag see ɓe go de foto wo maa ngaɓ fruygi maaga se da’ ne wer maaga se diŋ Sedeewa Jeofa mono. Amaa, taŋgu maaga wããre á ti ɓe mokay, kan ɓe po maa ti ngeel joŋre ur ciŋ, ngaɓ see ɓe ga se gẽẽ ɓi feele maaga wo diŋ Sedeewa Jeofa. Á tĩĩ wãã fẽẽre maa de baywoore ti Sedeewa Jeofa wo, lan ti hãge ɓil ɓaara. Aŋjelena wãã ga: “Jiili ɓi hay doo ga se mun go nono. Amaa, ndi raw wããge ɓil ɓi ga: ‘ndi hay go ba’ ga, ndi wãã cwãy go ti Jeofa”

¹⁰ De maaga kan ɓen taw wããre go mono, Aŋjelena tos jag gesiŋ deparday. Á fer wããre ne hẽn desãy ga: “Ndi gẽẽ le ɓi feele Sedeewa  Jeofa wo doo ndo ne lay, day hãã patala ndi yaŋ diŋ Sedeewa Jeofa ɗa.” Koh de maaga ren hay mbe de gayri laybla, Aŋjelena ɗaw mbe see ɓe kay. Á raw kaŋ foto ɓe maaga saara de bar ɓe wo ti joŋre ne Jeofa de fruygi, ne kããre ɓe maaga saara ti joŋre de kããra mono. (1 Pi. 3:15) Ɓo’ge ti ɓen joŋ na joŋge là? De maaga Aŋjelena taw wããre go mokay, blo sen hay go ba’a. Á fer wããge yaw ga de maaga se hay klee, se hay de fruygi debaŋ de maaga se hay ti joŋre ne Jeofa mono. Aŋjelena wãã ga: “Á de woore maaga naa mo wãã cwãy go ti Jeofa. Á diŋ togoɗge maaga naa mo wãã go ti ɗuu ɓe.” Naa lay, naa mbe de kããge maa togoɗ ɗuu Jeofa de maaga jar lan bay wo hoo sug ti ɓe wa mono. Sen diŋ joŋre maaga daŋgo.

11. De ɗeŋ maa hõn ga jar goŋ Baa maa ti ngeel ɓe maa ɓaan hoo wo sug ti Siŋ wora 96:8 là?

¹¹ Read Psalm 96:8. Naa mbe de kããge maa togoɗ Jeofa de fẽẽre maa do naa wo no. Jar goŋ Jeofa maa ti ngeel ɓen togoɗ wo ne tum de fẽẽre maa do ɓaara wo. (Jõõ. 3:9) Jar Israyel hay wo hã suŋgu noga fẽẽre maa do ɓaara de woore wo maa kayge ti booge tiŋ-Baa, lan maa kne’ge ɓe. (2 Waŋ. 12:​4, 5; 1 Kron. 29:​3-9) Jar maa wer Yeso maa po hay hã wo “fẽẽre ma ɓaara wo de see ɓaara” maa kay Yeso wo de apotre ɓen wo ti siigi wããre no (Lug 8:​1-3) Lan Bible wãã ga de maaga hẽẽrebe yaŋ wo ti bon do koŋne no, hẽẽre ɓaara maa ti ngeel tigriŋ coŋ wo suŋgu le ne hara. (Joŋre 11:​27-29) Wara lay, naa togoɗ Jeofa de fẽẽre maaga naa hãn de dage naa mono.

12. De ɗeŋ maa hõn ga fẽẽre maaga naa hã ra ne hẽẽre naa togoɗ ɗuu Jeofa là? (Ko foton lay.)

¹² Ko saɓlaŋ po maaga ngaɓ ga hãge fẽẽre naan togoɗ wo ɗuu Jeofa mo ɗa. Nen kiŋgi maa 2020, bii raa ɓi sir maa Zimbabwe gus ga. Koŋne le’ jar miliyoŋ puri, mãygeman naa priska hay da’ see ɓe nen ngeel sen lay. Koh de koŋne sen mbe ɓuy, mãygeman naan hay mbe tum sii wããre go nen naw maaga se hay hoo ra go maa sii wããre mono (Wur Fuggi, lan Wur Jaw), koh de yaale. Jar leege ɓe hay wo tum fegge ti ɓe ti maaga á raw sii wããre, men pay ɓen go mono, de wããge ne hẽn ga: “Ndo huu gi go do koŋne.” Priska fer wããre ne hara de hã ɓil ga, “Jeofa tob jar goŋge ɓen wo go ti boŋ ga hase.” Blam sen maŋ tu, Priska raw da’ rege wo de fẽẽre maaga se hay de sãy ɓaara ti wo debaŋ wer hãge maaga naa hã ra mono. Jar leege Priska gris wo,  lan raw wo wiigi ɓe ga, “Baa tum de kay ndo, wer sen, wùr de sãy had fẽẽre ti ɓe debaŋ.” Jar leege ɓe wo renam le’ wo woge ti taygeti.

13. Seele naa togoɗ ɗuu Jeofa na togoɗge là? (Siŋ wora 96:9)

¹³ Jaŋ Siŋ wora 96:9. Naa togoɗ ɗuu Jeofa de seele naa. Jar sii jag mo hay yog wo ɓaale ɓaara go, lan hay joŋ wo go de fããge de maaga á yaŋ wo joŋ joŋre ti tiŋ-Baa no. (Laa. 40:​30-32) Naa mo hay go de fããge diŋ ti hõõgesee tawa wa, amaa nen seele naa lay. (Siŋ. 24:​3, 4; 1 Pi. 1:​15, 16) Naa mo hay dur debaŋ maa naa “joŋre maa de tããbe” go, lan naa mo laa “joŋre maa defay” ti naa. Sen da wããge ga naa mo hay ndar do go see joŋre wo de ɗiggi maaga co wo jag Jeofa ga mono. Day naa mo hay durgi maa joŋ joŋre de woore, lan maa ɗiggi de woore doo Jeofa nono. Naa mo hay koge see joŋre ɓe maa de wooren wo lay. (Kol. 3:​9, 10, TMN) Koh jar maaga hay joŋ mbaara fẽẽre maa de ɓlagge debaŋ coo wo mbaara lay, hayga á yãã wo kayge maa ni Jeofan we no.

14. Ndo had mayse see saɓlaŋ Jag là? (Ko foton lay.)

¹⁴ Naa ko wee saɓlaŋ Jag, blo po ga hay ngir ngir debaŋ, lan de hãã lay mo ɗa. À hay kol go kaŋ ɗuu ne hẽn ga “Sõõ”. Wer fẽẽre maa de ɓlagge maaga á joŋ ra wo mono, à baa ne ti dangay maa ‘warge ɓe go. Amaa de maaga á hay gor wur maaga à ‘war ge ne go mono, hẽnbe po ga hay wo sii wããre Baa ne dangay wo wãã ne hẽn ga se had Bible ne hẽne. Jag yãã hadge Bible no. Koh de maaga Jag hay joŋ fẽẽre maa debaywoore wo debaŋ mo laybla no, blam hadge Biblen, Jag coo, lan joŋ batem go, kol Sedeewa Jeofa go. Jag hay coo debaŋe, hãã nen maaga wur maaga à ‘ĩĩn yaŋ go mono, jar gor ti dangay raa wo, lan joŋ wo woso ne hẽne. Blo po maaga hay joŋ joŋre ti dangay wãã ga: “Jag hay diŋ jobo maaga daŋ go do debaycõõre ti ngeel la. Amaa, se kol diŋ jobo maaga daŋgo do de ele.” Naw mẽ’ blam maaga á ‘ĩĩ Jag go mono, hẽẽrebe a wo le ti dangay maa joŋ taygeti maa nen naw renam no. Jobo ga hay ti dangay ni tõõ age ti taygeti wur sen ni. Mayse hay jor glog ɓe maaga á mo a ti taygetin là? Cooge maaga Jag hay coo ngel ne debaŋ, day se hay de sãy had fẽn maaga se mo joŋ maa goŋ Jeofa ti lay. Cwãy tu, seele naa hã togoɗge ne Pan naa maa ciŋ no!—1 Pi. 2:12.

 JEOFA TOGOƊ GE ƊUU ƁE YAŊ NEN NAW MAA PEELN LA MAŊ NA TOGOƊGE LÀ?

15. Jeofa togoɗ ge ɗuu ɓe yaŋ nen naw maa peel la maŋ na togoɗge là? (Siŋ wora 96:​10-13)

¹⁵ Jaŋ Siŋ Wora 96:​10-13. Tawgeti verse sen ɓo’ nen go ga Jeofa diŋ Waŋ, lan jee caa kiida maa ti ngeel ɓe. Jeofa togoɗ ge ɗuu ɓe yaŋ nen naw maa peeln la maŋ na togoɗge là? De caa kiida jar ti ngeel ɓe. Ig la mẽ’ á taw Babilon maaga ndar ɗuu ɓe maa de fããge, lan caa gete’e ti ɓe yaŋ go. (Naa. 17:​5, 16; 19:​1, 2) Maapo ga jar maa po maaga ko wo tawge Babilon maŋ wo ɗiggi maa goŋ Jeofa de naa. Tawge ti ɓen mokay, nen durgi Harmagedoŋ, Jeofa taw fẽẽre maaga Manhúulí joŋ ra maa wãã re tamsir ɓuy wo go; á taw ge jar maaga caa wo hee de ɓe, lan ɗar wo ɗuu ɓe mo go; lan á yãã ge jar maaga da wo ne, hoo wo sug ti ɓe, lan ga wo go de fruygi maa hã togoɗge ne hẽn mo go. (Mark 8:38; 2 Tes. 1:​6-10) Blam liwgi maa blam taw, ga joŋ ge blam Wããge re jar maa ni Yeso maa kiŋgi ndarn mono, Jeofa fãã ge ɗuu ɓe yaŋ go ti tamsir la ɓuy. (Naa. 20:​7-10) Ti wur sen, “tamsir baa ge yaŋ go de koge mani [Jeofa] ma de togoɗgen doo bii maga yãã ɓil maarog go nono.”—Hab. 2:14.

16. Ndo go de baa wer maa joŋ maylà? (Ko foton lay.)

¹⁶ Á joŋ ge yaŋ de woore debaŋ de maaga wosela ɓuy ti tamsir la hã ge togoɗge maaga diŋ maa Jeofa ne hẽn mono! Taŋgu maaga wur sen a mono, naa mo hay dur de ngar ẽgre naa maa togoɗ ɗuu Jeofa tum de maaga naa kãã yaŋ maa joŋge ɓe no. Maa kay naa ferge ɗiggi ti joŋre se maa de wooren mono, Tayge jar maa peel Sedeewa Jeofa maŋ wo Siŋ wora 96:8 doo verse maa kluu maa nen kiŋgi maa 2025 nono: “Hã wee togoɗge maaga sen diŋ maa ɗuu Jeofa ne hẽne” [TMN].”