Á bay tum gus maaga naa mo fer ɗig ti ti fẽẽre maaga naa hay had ra go mo wa. Amaa, se mbe gus maaga naa ɗig ti ti fẽẽre maaga Yeso had naa de ɓaara ngaɓa, wer maaga á joŋ joŋre de fẽẽre maaga nen naa de ko rage. Ndo mbo de kããge maa ferge ɗig ti ti ɓaara wer fẽẽre maaga á hay ngaɓ ra de ɓe mono. Doo sen no lay, ndo mbo de kããge maa ferge ɗiggi ti fẽn maaga ndo hay frug nen ɓe de ngaɓge ɓe de deeseŋ mono. De ɗeŋ maa hõnlà? De de deeseŋ de maaga ndo frug nen wããre Baa mono.

Jar maaga de wo deeseŋ fẽẽre maaga saara had ra defay wo de kããge maa ɗaw fẽẽre maaga saara had ra ti ɗawa. Dege deeseŋ fẽẽren kay ra maa laa wer ne wããren tawa ga, amaa maa laa wer ne fẽn maaga á da wããge ɓe mo lay. Deeseŋ ɓaaran bay wo diŋ maaga jar mo ko wo woore ɓe tawa wa, amaa ngaɓ fẽẽre maaga saara ɗaw ti mono. Lan, dege deeseŋ kay debaŋ diŋ jar maa de garge wo maa ferge ɗig ti ti fẽẽre maaga saara had ra mono.

Maapo ga ti fruggi nen wããre ɓo maa peel mono, ndo mbo de kããge maa de deeseŋ fẽn maaga ndo hadn mono. Maapo ga á ngel mo yaŋ ti maaga ndo fer ɗiggi ti fẽn maaga ndo hadn mono, see deeseŋ maaga ndo de ne mono!