1. Jeofa joŋ dage kããran diŋ maa maylà?

 JEOFA diŋ “Baa maa de fruygi,” day se da ga naa mo hay de fruygi lay. (1 Tim. 1:11) Á hã kado wo ne naa debaŋ, ga kay wo naa maaga naa mo hay de fruygi nen naw naa. (Jag. 1:17) Dage kããra yoo kado sen wo ni lay. De maaga jee twar wo de wãy da wo kããra mono, á ha’ wo go ga saara joŋ yaŋ tum da kããra, lan hoo sug ti kããra. De maaga jee twar wo de wãy yaŋ wo ɗaw dage maa ti holaŋ ɓaaran kwũy no, á da’ wo fruygi debaŋ.—Jõõ. 5:18.

 2. De ɗeŋ maa hõn ga werpiiri wo wara ngaɓa joŋ wo naare ɓaara wo de baywoore là?

² Ɓlaggen so diŋ ga werpiiri wo de naare wo wara debaŋ yõõ wo ti go ti ha’ge maaga saara ha’ wur dage kããra ɓaaran mono. Ɓo’ge ti ɓen so, saara joŋ de fruygi ga. La maŋ, jar maa ti OMS wãã wo ga wepiiri wo ngaɓa ma’ wo naare ɓaara wo, wãɗ wo wããre maa de ɓlagge ne hara, lan joŋ wo bon ɓaara de ɗeŋ maa tigriŋ wo. Werpiiri maa po joŋ wo naare ɓaara wo de hooge sug nen jare, amaa saara joŋ bon ɓaara liŋ. Werpiiri maa po wo debaŋ ko wo pornografi, sen joŋ ga naare ɓaaran ko wo see ɓaara de dage ga, lan bay de fruygi wa.

 3. Wer mayse ga werpiiri maa po joŋ wo bon naare ɓaara wo là?

³ Mayse joŋ ga werpiiri maa po joŋ wo naare ɓaara wo ni naŋ ga là? Maapo ga, pããre ɓaara hay wo le joŋ maare ɓaara wo debaywoore, day saara ɗig ga joŋge naare saara wo doo sen bay din ɓlagge wa. Maa po joŋ wo bon naare ɓaara wo werga daŋge jar maa ti wer ɓaara joŋ wo doo sen nono. Saara joŋ de hãã see naare ɓaara wo maaga á mo ko wo go ga wãã wããre tiŋn diŋ saara. Jar maa po bay wo de ko ɗaw see ɓaara jag sõõge ɓil wa. Jar  maa po ko wo pornografi tum tum, wer sen saara kol ko naare wo go diŋ fẽn joŋ hrage. Ni pa mono, jar maa de ko wer fẽẽre da’ wo ga ti kal cege ‘Covid-19’ mono, jar maa po ya’ wo wer joŋ naare ɓaara wo de baywoore de peel ni. Fẽẽre sen wo mo deŋ ɓuy maa po bay go ngaɓge ni boŋ ga á joŋ wo ni wa.

 4. Werpiiri maaga wo diŋ Kretiyẽ mo hay joŋ wo mayse ga là, day wer maylà?

⁴ Werpiiri maaga wo diŋ Kretiyẽ mo hay dur wo go ɓuy maa kaŋ do go ne ɗiggi maa debaywoore ti naare wo no. a Wer maylà? Werga ɗiggi sen kaŋ wer ɓaara joŋ fẽẽre maaga wo debaywoore. Apotre Pol ɓo’ sug Kretiyẽ maa de sreŋge de nenterse maa Rom wo ga: “joŋ we se ɓay doo jar téebeere maa ti tamsir maa debalan wo no” wa. (Rom. 12:​1, 2) De maaga Pol yer wããre sen wo ne jar Rom wo mono, sen go tinoo tu ga taygen hay go de caage kiŋgi puri. Nen wããre Poln naa da’ ni ga jar maa po hay wo men see ɓaara hãyge ne fẽẽre maa ti wer ɓaara, lan ne ɗiggi maa ti tamsir wo. Se diŋ wersen so ga á jor glog ɓaara maaga á mo coo wo seele ɓaara wo de ɗeŋ ɗiggi ɓaara wo mono. Sen go tinoo tu ga yaŋ sen de baage ne werpiiri maaga wo diŋ Kretiyẽ wara lay. Ɓlaggen so diŋ ga, Kretiyẽ maa po men wo see ɓaara hãyge ne ɗiggi maa ti tamsiri, hãã saara joŋ bon naare ɓaara wo. b Jeofa gor ga werpiiri mo joŋ wo naare ɓaara wo joŋge là? Naa da’ yiŋgi jag ɓen ɓil verse maaga à naa kluu hadgen le ɓil ɓe mono.

 5. Doo maaga 1 Piyer 3:7 wãã ne mono, jee twar de hay joŋ wãy ɓe joŋge là?

⁵ Jaŋ 1 Piyer 3:7. Jeofa hã jag liŋgi ne werpiiri wo ga á mo hoo wo sug ti naare ɓaara wo. Jee twar maaga hoo sug ti wãy ɓe joŋ ne de ele, lan de dage. Ɓil hadge sen la, naa ko yaŋ diŋ ɗeŋ maaga jee twar naa nen hooge sug go see wãy ɓe mono. Amaa, taŋgu ɗa, naa ko wee fẽn maaga ngaɓ go ga jee twar bay da wãy ɓe wa, lan bay hoo sug ti ɓe wa mono.

JOŊ MOPO MAAGA MA’ ƁIL WÃY ƁO WA

 6. Jeofa ɗig ti werpiiri maaga wo gir gir see naare ɓaara wo na ɗiggi là? (Kolos wo 3:19)

⁶ Jee twar mo hay joŋ gir gir see wãy ɓe wa. Jeofa caa hee de wosela ɓuy maaga gir gir mono. (Siŋ. 11:5) Á bay de sãy werpiiri maaga joŋ wo bon naare ɓaara wo ti wa. (Mal. 2:16; Jaŋ Kolos wo 3:19.) Doo maaga verse kluu hadge naan,1 Piyer 3:7 wãã ne mono, hayga jee twar bay we joŋ wãy ɓe de woore wa no, holaŋ ɓaara de Jeofa joŋ de woore ga lay. Maapo Jeofa laa ba tosge ɓe wo ga ɓuy yaw.

 7. Doo maaga Efes wo 4:​31, 32 wãã no mono, jee twar mo hay kaŋ do go ne wããre maa hõn wo là?(Ko “Wããre maaga go de naa were” lay.)

⁷ Jee twar mo hay ngar jag ne wãy ɓe ti noga mo hay wãɗ fẽẽre maa debaywoore wo ne hẽn wa. Werpiiri maa po wãɗ wo wããre maa sõõ ɓil naare ɓaara wo, lan maa ce rage. Amaa Jeofa bay de sãy “ɗawge kããra ɓili, sõɗge ɓili, wããre dekwãy lan lagge cogob ne kããra ti wa.” c (Jaŋ Efes 4:​31, 32.) Á laa wããre maaga naa wãã ra mo ɓuy. Jeofa kaŋ ti ti ɗeŋ wããre maaga jee twar wãã ne wãy ɓe mono, koh jobo mo hay ba ti jeŋ ɓaara ni wa. Jee twar maaga wãã wããre ne wãy ɓe see kwũy kwũy ɓlag go bay diŋ holaŋ ɓaara de wãy ɓe tawa wa, amaa, holaŋ ɓaara de Baa lay.—Jag 1:26.

 8. Jeofa ɗig ti pornografi na ɗiggi là, day wer mayse là?

⁸ Jee twar mo hay ko pornografi wa. Jeofa  ɗig ti pornografi na ɗiggi là? Á hee de ɓe. Jee twar maaga ko foto maa de myeeɗe wo ɓlag holaŋ ɓaara go de Jeofa, lan se fer wãy ɓe go gloge. d Jeofa bay gorge do jee twar diŋ ga á mo hay de deele see wãy ɓe nen joŋre ɓe tawa wa, amaa nen ɗiggi ɓe lay. Yeso wãã ga jee twar maaga ko wãy maa tigriŋ we, day ɗig we ɓil ɓe ga se mo hay suu de ɓe no, “go de lengãɗge de ɓe tuu yaw.” e—Mat. 5:​28, 29.

 9. Wer mayse ga Jeofa hee de war maaga suu de wãy ɓe de waŋ, nen maaga á ko see ɓe bay de dage wa là?

⁹ Jee twar mo joŋ doole wãy ɓe joŋ fẽn maaga á bay de sãy joŋge ɓe ti wa wa, hayga ɗiggi ɓe yaŋ hãyge ɓe de maaga á suu wo de kããra no. Werpiiri maa po joŋ wo doole naare ɓaara wo maa suugi de ɓaara, nen maaga naaren ko wo see ɓaara bay de dage wa, amaa ti bone. Jeofa caa hee de joŋre jee maaga bay ɗiggi wa mono. Á gor do jee twar diŋ ga á mo da wãy ɓe, mo sna’ ne, lan mo hoo sug ti ɗiggi ɓe. (Efe. 5:​28, 29) Hayga war maaga diŋ Kretiyẽ yaŋ joŋ doole wãy ɓe joŋ fẽẽre maaga á bay de sãy ɓe ti wa, lan yaŋ ko pornografi no, mayse hres là? Á joŋ joŋge maa coo ɗiggi ɓe wo de joŋre ɓe wo là?

JEE TWAR JOŊ JOŊGE MAA MEN JOŊRE ƁE MAA DEBAYWOORE SEE WÃY ƁE WO GO LÀ

10. Saɓlaŋ Yeso kay werpiiri wo na kayge là?

¹⁰ Mayse kay jee twar maa ɗiigi go ne joŋre ɓe maaga joŋ wo ga wãy ɓe ko see ɓe go halla ga ti là? Koh de maaga Yeso hay da mbe wãy ti boŋ ga laybla mono, ɗeŋ maaga á hay joŋ jar maa wer ɓen wo de ɓe diŋ saɓlaŋ maaga jee twar mo hay joŋ see wãy ɓe. (Efe. 5:25) Naa ɗig ba ti fẽn maaga werpiiri had wo see ɗeŋ maaga Yeso hay joŋge see jar peele ɓen wo, lan ɗeŋ maaga á hay wãã wããre ne hara mo ɗa.

11. Yeso hay joŋ jar peele ɓen wo joŋge là?

¹¹ Yeso hay joŋ jar peele ɓen wo de dage, lan de hoo sugi. Á hay bay go graŋ see ɓaara wa, lan hay bay joŋ rage de ɓlagge wa lay. Koh de maaga Yeso hay mbe de daŋ rage ẽgre laybla mono, á hay bay joŋ joŋre de kluu ɓen maa ngaɓge ga á bay wo go halla wa wa, noga ga á mo joŋ wo hẽẽne do se wa. Nen maaga á mo hay joŋ doo sen no mono, se hay joŋ peele ne hara de fer ti gesiŋ. (Jaŋ 13:​12-17) Á wãã ne jar maa wer ɓen wo ga: “Had we re see ɓi, werga ndi desãy, ndi joŋ bon ɓay gà nday lag yaŋ iggi eŋ lag cwãy.” (Mat. 11:​28-30) Ɗaw ti ɓo ga Yeso hay diŋ jobo maa desãy debaŋ. Desãy bay diŋ hugli wa, amaa á diŋ ẽgre maaga jee ɓen naa nen ɗawge see ɓe go de ɓe mono. De maaga à le’n we no, se hay mbe eŋ, lan ɗaw see ɓe.

12. Yeso hay wãã wããre ne jar na wããge là?

¹² Yeso hay joŋ joŋre de wããre maa jag ɓe wo maa coɓ jar, lan maa jor glog jare. Á hay bay wãã wããre ne hara de põõ wa. (Lug 8:​47, 48) De maaga jar hee ɓen hay wo ɗarge ɓe, lan hay wo le’ge ɓe mono, “se fer wããre ne hara de ɗar ge gà.” (1 Pi. 2:​21-23) Day maa po, Yeso maŋ ga se mo hay ba’ ti maaga se mo hay fer wããre de põõ mono. (Mat. 27:​12-14) Sen diŋ saɓlaŋ maa de woore ne werpiiri maaga wo diŋ Kretiyẽ mono!

13. Doo maaga Matiye 19:​4-6 wãã ne mono, jee twar joŋ de “tõõge see wãy ɓe” na joŋge là? (Ko foton lay.)

¹³ Yeso hã jag liŋgi ne werpiiri wo ga á mo lag wo de deele see naare ɓaara wo. Á fer dog wããre maaga Pan ɓe wãã ga jee twar mo hay raw “tõõge go diŋ see wãy ɓe” tigriŋ. (Jaŋ Matiye 19:​4-6.) Wããre maa jag Greg ga à joŋ joŋre de ɓe maa wãã “tõõge see” da wããge ga “neege.” Diŋ wer sen so ga barge maa ti holaŋ wãy wo de war mo hay joŋ kwũy doo ga á wo de neege see kããra de kããy nono. Hayga jobo  yoo ɓaara joŋ fẽn maa debaywoore we no, saara ɓog ɓuy jo wo bone. Jee twar maaga de sa’ge see wãy ɓe de maŋ sen, ko wer pornografi wo ga fãd ɓuy. Deparday tu, á “cel nen ɓe go maga á mo ko fẽẽre ma de koɗ wo wa.” (Siŋ. 119:37) Doo Job no lay, á joŋ go de baa wer maaga nen se mo slag ti wãy maa tigriŋ wa.—Job 31:1.

14. Jee twar maaga gir gir mo hay joŋ diŋ fẽẽre maa hõn wo maa kne’ holaŋ ɓaara de Jeofa, lan de wãy ɓe là?

¹⁴ Jee twar maaga mbar wãy ɓe noga wãɗ wããre ne hẽn debaywoore de hay joŋ fẽẽre ngaɓa maa ‘wũy holaŋ ɓaara de Jeofa, lan de wãy ɓe. Á mo hay joŋ diŋ maylà? Taŋgu, á mo hay ko ga á diŋ re maa kwũy. Jeofa ko fẽn maaga á wãã noga joŋ ra mo ɓuy. (Siŋ. 44:21; Ekl. 12:14; Heb. 4:13) Maa de ɓog no, á men joŋ bon wãy ɓe go, lan coo joŋre ɓe. (Jõõ. 28:13) Maa de swa’ no, á mo wii wãy ɓe wo de Jeofa ga se ko ga, lan mo wii fuggi ɓil do ɓaara. (Joŋre 3:19) Á mo kem Jeofa maaga á mo kay se, maa coo ɗiggi ɓe, lan maaga se mo hay de kããge maa ɗiggi de woore doo ga Jeofa da nono. (Siŋ. 51:​10-12; 2 Kor. 10:5; Fil. 2:13) Maa de naa no, á coo seele ɓe de maŋ tosge ɓen wo, caa hee go de fẽẽre gir gir wo de ɗarge wo. (Siŋ. 97:10) Maa de dwee no, á mo wo da’ jar maa peel tayge wo deparday tu, ni saara kay ne yaŋ. (Jag. 5:​14-16) Maa de hiira’ no, á mo yer fẽẽre maaga kay wo ne yaŋ maa men joŋre se maa de hããn wo go mono. War maaga ko pornografi mo hay joŋ de maŋ sen lay. Jeofa kay ge ne yaŋ maa coo seele ɓe. (Siŋ. 37:5) Fẽẽre se maaga á men ra go mo deŋ kãã wo maaga á mo coo joŋre ɓe maa debaywooren wo ga. Diŋ wer sen, á mo had sna’ wãy ɓe. Á joŋ sen na joŋge là?

NDO JOŊ JOŊGE MAA SNA’ WÃY ƁO LÀ?

15. Jee twar naa nen dage ɓe go see wãy ɓe na naage là?

¹⁵ Ngaɓ go ne hẽn ga ndo da ne. Hẽẽre naa maa de naare ga wo de fruygi joŋ wo fẽn po tum maa naa nen go ne naare ɓaaran wo ga saara da ra. (1 Jaŋ 3:18) Jee twar ngaɓ go ga se da wãy se de fẽẽre maa mẽ’ mẽ’ wo, maapo se ɗaw do ɓe, noga klew ne. Maapo á yer mesaje ne hẽn maa wããge ga “sãy ɓo baa me go debaŋ”  noga ga “ndo sii go elà?” Naw naa we mẽ’ no, maapo se yer wããre maa de cõõre ne hẽn maa naa nen dage ɓe go ne hẽne. Á yaŋ joŋge doo sen ne no, á sna’ wãy ɓe, lan dage ɓaara see kããra ya’ ciŋ ni.

16. Wer mayse ga war mo hay kee wãy ɓe là?

¹⁶ Wãã ne hẽn ga á daŋgo nen ɓo. War maaga da wãy ɓe ɓo’ nen go ne hẽn ga wer mayse ga se dan là, lan joŋ ga á mo hay de fruygi nen naw ɓe. Ɗeŋ maa joŋge ɓe diŋ ga á mo fer ɗiggi maa joŋ suse’ ne hẽn ti fẽẽre maa de woore maaga wãyn joŋ ra maa kayge ɓe mono. (Kol. 3:15) De maaga jee twar yaŋ kee wãy ɓe diŋ ti cwãy ɓe no, se fruy ɓil ɓe. De maaga jee twar yaŋ wãã fẽn maaga wãy ɓe joŋn ga co jag ɓe ne hẽn no, á ko see ɓe nen jam, de dage, lan ko see ɓe de raa ɗuu.—Jõõ. 31:28.

17. War naa nen hooge sug ɓe go see wãy ɓe na naage là?

¹⁷ Hay go gofa’a lan hoo sug ti jare. War maaga sena’ wãy ɓe, kee ne lan da ne. Á kon doo kado maaga Jeofa hã ne hẽn nono. (Jõõ. 18:22; 31:10) Wer sen, á soɗ ne de ele, lan de hooge sugi, koh mo hay ba ti ɓaŋ suugi de kããra. Á joŋ doole wãy ɓe joŋ mopo maaga co jag ɓe ga ga, ga á ko see ɓe ti bone, noga gay ne nen ɗiggi de maaga á le’ wo we suugi de kããra mo ga. f War mo dur pa maaga ɗiggi ɓe mo hay go de fããge peel Jeofa.—Joŋre 24:16.

18. Werpiiri mo hay joŋ wo go de bawge jag jiili ɓaara ga hãylà? (Ko ngeel maa de gaɗge “ Ɗeŋ po wo naa maaga ndo mo hay diŋ war maa hoo sugi” lay.)

¹⁸ Werpiiri wo, hay wee go de bawge jag jiili ɓay ga Jeofa de ko durgi ɓay maaga nday dur maa kee naare ɓay wo, lan maa da rage ti fẽẽren ɓuy nen naw ɓay mono. Hay wee go de baa wer maa kee rage, maaga nday mo joŋ mopo maa ma’ ɓil ɓaara wa, lan maaga nday mo hay sena’ rage, hoo sug ti ɓaara. Sen diŋ de ɗeŋ maa kay la so ga nday ngaɓ go ga nday da ra, lan kee ra jag lay. Da wee naare ɓay wo, ni nday ɗaw ge holaŋ ɓay maaga daŋgo yaŋ—holaŋ ɓay de Jeofa.—Siŋ. 25:14.