Amaa, Jeofa gor do naa diŋ ga naa mo gor mbe desãy de kaŋ ɗiggi ta’ ga se ur yaŋ ciŋ ti wur ɓe. Wer may ga á gor sen do naa là? Day mayse kay naa maa lagge de fruygi de maaga naa de gorge mo là?

WER MAYSE GA JEOFA DA GA NAA MO GOR DESÃY LÀ?

Bible wãã ga: “[Jeofa] de gorge ma ferge ko decoo ɓay, á ur gi yaŋ ciŋ ma joŋ ɓil de el ti ɓay werga [Jeofa] diŋ Baa ma keɗede: Woore ti jar maga gor wo doo ɓe mo ɓuy no.” (Esa. 30:18) Wããre se ni Esayn hay de wããge diŋ ne jar Jwif maa ti graŋn wo. (Esa. 30:1) Amaa, jar maa de deele hay wo yoo jar Juif wo ni lay, day, wããre sen hay hã coɓge ne hara ti naw maa peel no. Wããre sen hã teŋge nen ne jar maa goŋ Baa maa de deelen wo wara lay.

Naa nen gorge desãy werga Jeofa gor desãy lay mono. Á go de maŋ wur maa taw fẽẽre maa de ɓlaggen wo go, day se de gorge diŋ ga wur sen mo a go tawa tu. (Mat. 24:36) Ti wur sen, naa ko yaŋ go so ga wããre maaga Manhúuli hay wãã ne Jeofa de jar goŋge Ɓen wo see diŋ gete’e. Á caa ge wer Manhúuli yaŋ go de jar maa wer ɓen ɓuy, day se “ko ge decoo naa yaŋ.”

Á mbe cwãy ga Jeofa maŋ jag ren wo go ne naa see patala tu ga. Amaa, á wãã go ne naa de hã bawge ne naa jag jiili ga naa mbe nen lagge de fruygi de maaga naa yaŋ gorge desãy no. Doo maaga Esay wããn go ne mono, naa mbe de kããge maa lagge de fruygi koh de maaga naa mbe de gorge ga ngeel mo coo mbe mo laybla no. (Esa. 30:18) a Naa da’ fruygi sen da’ge so là? Diŋ de joŋge fẽẽre po wo naa.

NAA GOR DE FRUYGI NA GORGE LA

Ɗig diŋ ti fẽẽre maaga a wo ndo de woore nen naw ɓo mono. Waŋ Dafid hay ko fẽẽre maa de ɓlagge wo nen naw ɓen ɓuy. (Siŋ wora 37:35) Ni se hay yer go yaw ga: “ hay go peel [Jeofa] ba’a, day ni ndo gor diŋ doo ɓe. Joŋ nen sõõ jiili ne je maga joŋre ɓen seɗ ne hẽn wer ti wa.” (Siŋ. 37:7) Dafid hay de kaŋ ɗiggi ɓe gorge diŋ bosa’ maa ni Jeofa no. (Siŋ. 40:6) Hayga naa yaŋ kaŋ  ɗiggi naa diŋ ti fẽẽre maa de woore wo, ga naa bay kaŋ ɗiggi diŋ ti maa de ɓlaggen wo wa no, naa da’ yaŋ ga á go gus maa gor Jeofa.

Hay tum ti joŋre maa togoɗ Baa. Jee yer Siŋ wora 71, ga diŋ Dafid wãã ne Baa ga: “Day maa ɓin mono, ndi joŋ ge yaŋ tum de kaŋ ɗiggi ɓi ti ɓo.” (Siŋ. 71:14; NWT) Á hay togoɗ Jeofa na togoɗge là? De wããge go ti Jeofa ne jare, lan de togoɗge ɓe. (Siŋ. 71:​16, 23) Doo Dafid no lay, naa da’ fruygi diŋ de gor Jeofa desãy. Naa togoɗ ne diŋ de siigi wããren go ne jare, de wããge ti ɓe ne bar naa wo, de jar maa liŋ ni naa wo, lan de ‘waage siŋ. Ndo le’ ‘waa siŋ we no, ndo bay baa maaga ndo ɗig ti wããre maa nen ɓen go de woore maa koge ga á kay mo na kayge la wa?

Men see ɓo jor glog ne hẽẽrebe maa twerpiiri wo de maa tnaare wo. De maaga Dafid yaŋ nen gayri no, se wãã ne Jeofa ga: “Ndi kaŋ ɗiggi ɓi diŋ ti ɗuu ɓo, de maaga ndi yaŋ peel jar ɓo maa de deelen wo no.” (Siŋ. 52:​9, NWT) Naa lay, naa da’ mbe see naa de jor glog de maaga naa yaŋ see hẽẽre naa wo no. Bay diŋ ti taygeti wo, lan ti siigi wããre Baa tawa wa, amaa, de maaga naa laa go ti’ iggi mo lay.—Rom. 1:​11, 12.

Ya’ wer kaŋ ɗiggi ɓo ti naw maa peeln ciŋ ni. Siŋ wora 62:5 wãã ga: “Tenen ɓin joŋ go ba’ pel Baa! Werga ɗiggi ɓi maga de kaŋge ta’ nduu le diŋ ɓiŋ ɓe.” Á de woore debaŋ maaga naa mo ya’ wer kaŋ ɗiggi ti naw maa peel ciŋ ni, debaŋ ɓe de maaga tawge tamsirn bay we a ge gus doo maaga naa ɗig ne wa no. Naa mo hay go de bawge jag jiili naa ga fẽẽre maaga Baa de ngaɓ rage joŋ wo yaŋ cwãy, koh naa mo ig ba gor rage gemay la. Naa ya’ wer kaŋ ɗiggi naa ti naw maa peeln de fruggi nen wããre Baa, de ɗiggi ti fẽẽre maaga Bible hay wãã ra go, ga bag wo jag ɓuy mono, ti maaga ɗiggi jar yer kefdern wo ɓuy tu wo boŋ mono, lan ti fẽn maaga Jeofa wãã ti see ɓe mono. (Siŋ. 1:​2, 3) Naa ya’ wee wer “tos [ge] de egre nenterse ma bay ɗage” maa ɗaw holaŋ naa maa de woore de Jeofan de maaga naa de gor bagge jag wããre maaga Jeofa wãã ga se hã tenen maa tum yaŋ ne naa mono.—Jud 20, 21.

Doo waŋ Dafid no lay, naa mo hay de kaŋ ɗiggi ga Jeofa de kaŋ nen ti jar maaga gor wo ne, lan ga naa wo nen ɓil de el ɓaaran go see ɓe mono. (Siŋ. 33:​18, 22) Hay tum gor Jeofa desãy de kaŋ ɗiggi diŋ ti fẽẽre maaga a wo ndo de woore nen naw ɓon mono, de togoɗge ɓe, de coɓ kããra, lan de ɗaw kaŋge ɗiggi naa ti naw maa peeln de woore.