1. Wer mayse ga naa de sãy maaga Jeofa mo koɗ naa ti là? Hã saɓlaŋ po boŋ ɗa.

 ƊIG ba doo ga ndo yee go yoo way no ɗa. Fẽẽre maa de hãã wo go de kii ti ɓo ɓuy: nayre maa koore wo, gogo maaga kaŋ wo cege ne jar see, koore maa de nee waa wo, ngeel maa de hùuli. Ɓil naa joŋ yaŋ go de fruygi debaŋ ti maaga naa de koge ga jee wãã wããre naan de ko re debaŋ, lan de ko fẽẽre maaga a wo de re ne naa ti, day se de ko deŋ maaga naa ɗee go see ɓaara na ɗeege la mono! Tamsir de ngaɓge doo yoo way sen nono. Á go de baage de fẽẽre maa de ɓlagge ga hãy wo barge naa de Jeofa. Amaa, jee koɗ naan diŋ jobo maaga bay de ɓlagge see wa—Jeofa. Á ya’ naa wo go see fẽẽre maa de ɓlaggen wo hãã, day, se koɗ naa ti faage tenen maa tum no.

2. Jeofa koɗ naa na de ɗeŋ maa hõnlà?

² Jeofa koɗ naa na de ɗeŋ maa hõnlà? Taŋgu tu ɗa diŋ de hã wããre ɓe maa ɓil Biblen ne naa. Day pa, á lag jar maa koɗ naa wo ne naa peele. Ba doo maaga á hay “wejõõ maaga de deele, de ti lay” maa hã rege maa ti nenterse ne naa peel maa kay naa maa far ɗiggi maa de woore wo mono. (Mat. 24:45) Jeofa joŋ joŋre de werpiiri maa de kããge wo maa koɗ naa. Doo jar raŋ tayge wo, jar maa peel tayge wo maa jor glog naa, lan maa ɓod faage fẽẽre ne naa nen wur maa de gayri wo. Ɓil naa go de fruygi debaŋ ti maaga Jeofa koɗ naa de woore ti wur se maa glog tew de gayrin la mono! Sen kay naa maaga naa mo hay de cõõre jag Jeofa, lan maaga naa mo hay tum ti faage tenen no.

3. Naa ko mayse yaŋ ɓil hadge sen la là?

³ Day maapo, yããge yaŋ maa ni Jeofan ko de gayri, debaŋ ɓe de maaga wããn we ne naa diŋ jar téebeere maa de ɓlagge see  wo no. Wer mayse là? Day maapo yaŋn tap wo de fẽẽre maaga co wo jag naa ga noga de fẽẽre maaga naa bay de sãy ɓaara ti wa mono. Noga maapo naa kal ɗiggi ga yaŋ maaga à baa ne naa bay de el wa, lan naa ɓo’ ti ɓe go tu ga á mo hay a le bay jag Jeofa wa. De ngar maa doo kay wo mono, naa de hay joŋ de sãy kaŋ ɗiggi ga Jeofa diŋ jee maaga see de tayge maa ɓen, lan ga seege wer yaŋ maa ɓen a de bosa’ ne naa ti debaŋ. Maa kay naa maa ya’ kaŋge ɗiggi naa ti Jeofa ciŋ ni mono, hadge sen la kay naa yaŋ maa laa wer fẽẽre po wo ngaɓa: (1) Jeofa hay koɗ jar ɓe maa taŋgu ɓaa wo le na koɗge là, (2) Á koɗ naa wara na koɗge lay là, lan (3) Naa da’ mayse de maaga naa yaŋ tum seege wer yaŋ maa ɓen là.

JEOFA HAY KAY JAR ISRAYEL WO LE NA KAYGE LÀ

4-5. Jeofa joŋ joŋge maa ɓo’ nen ga se baa Moyis maa koɗ jar Israyel wo là? (Ko foto maa nen faalen lay.)

⁴ Jeofa hay baa Moyis maaga á mo kal go de jar Israyel maaga hay wo ti gebeere Ejipte mono. Lan Se hay ngaɓ go ne hara de woore ga se joŋ joŋre de Moyis maa koɗ rage. Ko ba ɗa, Á hay kaŋ swaare ne hara ciŋ de cege, lan caa wùu ne hara peel de suŋ lay. (Laa. 13:21) Moyis hoo sug ti jag liŋgi maaga Jeofa hã ne hẽn mono. Se kay ra de jar Israyel wo maa seege ɓil Maarog maa de sẽẽ no. Jar Israyel daɗ wo do hẽẽne ga saara go de baage ti rew ti holaŋ maarog wo de jar Ejipte maaga hay wo nii rage mono. Á kal wo wããge ga Moyis ɗig de woore ga de maaga á maŋ de saara ɓil maarog maa de sẽẽ mono. Amaa se hay bay doo sen ne wa. Jeofa joŋ joŋre de Moyis maa seege de ɓaara ni re’e. (Laa. 14:2) Blam sen Baa yãã ra go de ɗeŋ maaga ngel jar debaŋe.—Laa. 14:​26-28.

⁵ Nen kiŋgi maa 40 ga hres blam sen mono, Moyis hay mbe tum joŋ joŋre de swaaren maa koɗ jar maa ni Baa wo ti puuli. a De ngar ngeel po ta’ mokay, Jeofa kaŋ swaaren ciŋ ti mburyug maa ni Moyis no, nen maaga nen jar Israyel mo hay kon wo ɓuy. (Laa. 33:​7, 9, 10) Ɓil jag liŋgi ɓen, Jeofa wãã ne Moyis ga á mo fer wããre maaga se wãã ne hẽn ne jar maa ni sen wo no. (Siŋ. 99:7) Jeofa hay joŋ fẽẽre po wo go ngaɓa debaŋ maa baw jar Israyel wo jag jiili ga Se hay joŋ joŋre de Moyis maa koɗ rage.

6. Weere Israyel ɗig wo ti jag liŋgi maaga a le jag Jeofa na ɗiggi là? (Keege jar Israyel wo 14:​2, 10, 11)

⁶ Ren so diŋ ga, daŋge jar Israyel laa wo kaŋ ti ti fẽẽre maaga Jeofa hay ɓod nen ɓaara go ti ɓaara ga Moyis joŋ joŋre diŋ ti jag Se ga. (Jaŋ Keege jar Israyel wo 14:​2, 10, 11.) Ɓaale ngaɓa debaŋ, á laa wo yããge ga Jeofa de joŋ joŋre de Moyis maa koɗ rage ga. Wer sen so, Jeofa laa men faage ne hara maa laage ti sir maa defayn ga.—Kee. 14:30.

7. Ngaɓ saɓlaŋ jar po maaga see wo ti jag liŋgi maa ni Jeofan mo ɗa. (Keege jar Israyel wo 14:24) (Ko foton lay.)

⁷ Amaa, jar Israyel maapo joŋ wo mbaara joŋre de yaŋ maa ni Jeofa no. Ko ba ɗa, Jeofa wãã ga: “Kaleb . . . See ti faage ɓin keɗed ɓuy mono.” (Jaŋ Keege jar Israyel wo 14:24.) Baa poɗ Kaleb, hã sir Kana maaga co jag ɓe ne hẽne. (Josuwe 14:​12-14) Jar Israyel maaga a ge wo le blam ni hã wo saɓlaŋ maa de woore ti ɓaŋ hooge sug ti jag liŋgi maa ni Jeofa no pa. De maaga Josuwe coo Moyis doo jobo maa peel jar Isayel wo mono, “saara hoo sug ti ɓe nen naw maaga se tenen mo ɓuy no.” (Josuwe 4:14) Ɓo’ge ti ɓen so, Jeofa kaŋ bosa’ ne hara ti de a ge de ɓaara ɓi sir maaga se hay hãn ne pããre ɓaara wo mono.—Josuwe 21:​43, 44.

8. Naa wer maaga Jeofa hay koɗ jar maa ɓen wo le ti wur maa ni waŋre maa Israyel wo mo ɗa. (Ko foton lay.)

 ⁸ Kiŋgi go blam ngaɓa, Jeofa hoo jar caa kiida wo maa koɗ jar maa ɓen wo no. Ti wur maa ni waŋren wo blam mono, Jeofa hoo profed wo maa koɗ jar maa ɓen wo no. Waŋre maa de deelen hay wo co’ sug yaŋ maa ni profed wo no. Ko ba ɗa, Waŋ Dafid hay yãã jag liŋgi maa ni profed Nataŋn de ferti gesiŋ. (2 Sam. 12:​7, 13; 1 Kron. 17:​3, 4) Waŋ Josafad hay yãã yaŋ maa ni profed Yahasiyel maa kayge ɓe, lan maa jor glog jar Juda wo maaga á mo “kaŋ wo ɗiggi ɓay [ɓaara] ti jar ndar nen wããre maa jag Baa gon wo no.” (2 Kron. 20:​14, 15, 20) De maaga á hay go de caa jiili mono, Waŋ Esekiyas wii kayge do profed Esay. (Esay 37:​1-6) Tum de maaga Waŋren yaŋ wo hoo sug ti jag liŋgi maa ni Jeofan no, á hay wo de bosa’ ti, lan sir ɓaaran hay go de yãã waŋ lay. (2 Kron. 20:​29, 30; 32:22) Wosela ɓuy yoo ɓaara de hay ko go de woore ga Jeofa hay joŋ joŋre de profed ɓen wo maa koɗ jar maa ɓe no. Amaa, daŋge waŋren wo de jar Israyel laa wo yãã jag profed maa ni Jeofan wo ga.—Jer. 35:​12-15.

JEOFA HAY KOƊ KRETIYẼ MAA TAŊGUN WO LE NA KOƊGE LÀ

9. Jeofa hay joŋ joŋre de wose wo maa koɗ jar maa ɓen wo ti wur maa ni kretiyẽ maa taŋgun wo là? (Ko foton lay.)

⁹ Ti paŋtekod 33 N.W.N, blam birgi Yeso mono, Jeofa caa tayge maa ɓe maa taŋgu no. Á hay koɗ kretiyẽ maa taŋgun wo na koɗge là? Á hay Yeso waŋ tayge jar maa wer ɓe no. (Efe. 5:23) Amaa, Yeso hay bay koɗ jar maa wer ɓen wo go boŋ boŋ ɓuy wa. Á hay joŋ joŋre de jar peele ɓen wo de jar kluuri maa Jerusalem wo maa lagge peel jar maa ni ɓen wo no. (Joŋre 15:​1, 2) Ni pa mono, á hay hoo jar maa peel tayge wo maa seege de tayge maa ɓe no.—1 Tes. 5:12; Tid 1:5.

10. (a) Daŋge kretiyẽ maa taŋgun hay ɗig wo ti jag liŋgi maaga à hay hãge ɓe ne hara na ɗiggi là? (Joŋre 15:​30, 31) (b) Wer mayse ga kretiyẽ maa po hay bay wo yãã jar maaga Baa lag ra peel ɓaara wo wa là? (Ko ngeel maa de gaɗge “ Wer mayse ga jar maa po hay bay wo yããge ga Jeofa de joŋ joŋre de jar téebeere wo maa koɗ tayge maa ɓen wa là.”)

¹⁰ Kretiyẽ maa taŋgun hay mbaara hoo sug ti jag liŋgin wo yawlà? Daŋge ɓaaran hay wo yãã jag liŋgin de fruygi debaŋ. Day, “ɓil ɓaara raw joŋge go feh debaŋ ti coɓge nen” maaga á coɓ wo nen ɓaara mono. (Jaŋ Joŋre 15:​30, 31.)  Day, Jeofa koɗ jar maa ɓe maa waran wo na koɗge lay so là?

JEOFA KOƊ JAR MAA ƁE MAA WARAN WO NA KOƊGE LÀ

11. Hã saɓlaŋ po maaga ɓo’ nen go ga Jeofa de koɗ jar maaga á de lag rage peel ti wur maa waran wo mo ɗa.

¹¹ Jeofa mbe tum koɗ jar maa ɓen wo hãã wara. Á koɗ ra de wããre maa ɓen, lan de Yeso, waŋ tayge jar maa wer ɓe no. Naa mbe de ko fẽẽre maaga ngaɓ wo go ga Jeofa hãã wara de joŋ joŋre de jar téebeere wo maa koɗ tayge maa ɓen yawlà? Sen bay faare. Naa ɗig ba ti fẽn maaga hres blam kiŋgi maa 1870 mo ɗa. Charles Taze Russell wo de bar ɓen tõõ wo koge ga kiŋgi maa 1914 diŋ kiŋgi po ga daŋgo ti hayge Twaywaŋ maa ni Baa no. (Dan. 4:​25, 26) Á da’ wo ga diŋ wer maaga saara kiɗ wer fẽẽre ɓil Bible, lan kaŋ ɗiggi ti ɓe, saara wo koge so ga profesi wo go de bag jage. Jeofa hay mbe we koɗ rage ti kiɗgi wer ne Bible ɓaaran yawlà? Á hay koɗ rage cwãy tu. Mayse hres ti tamsir la nen kiŋgi maa 1914 ga ngaɓ ga Twaywaŋ maa ni Baan tĩĩ wer joŋre là. Durgi maa kluu maa taŋgun le’e, see wer kẽẽ de cege maa de hãã, daɗge siri, lan koŋne wo. (Lug 21:​10, 11) Jeofa joŋ joŋre de kretiyẽ maa de deele wo maa kay jar maa ɓe no.

12-13. Jar maa peel tayge sedeewa Jeofa hay joŋ wo mayse ti wur durgi maa kluu maa de ɓog maa ya’ siigi wããre Baa wo de hadge ɓe ciŋ ni là?

¹² Naa ko fẽẽre maaga hres ti durgi maa kluu maa de ɓogn ɗa lay. Blam fruggi nen Naage nene 17:8 mono, jar maa peel tayge sedeewa Jeofan ko wo ga durgi maa kluu maa de ɓogn bay maa woge ti Armagedoŋ wa ɗa, amaa ti jam maa naw po mbag koɗ maa ɓo’ faage siigi wããre maa ni Baan go. Koh de maaga ɗiggi caage lakol hay bay mbe koge de maŋ ɗiggi maa de ko re wa laybla’ mono, tayge maa ni Jeofan caa lakol Galad maa had misiyoner wo, lan laa ra wo ti tamsir ɓuy maa sii wããre Baa wo de hadge ɓe. Koh mbe nen durgin ɓuy, à hay laa misiyoner wo wo ɓi sir wo. Ni pa, Weejõõ maa de deele, de ti layn tĩĩ wer lakol maa had jar maa ti taygen ɓuy maaga á mo kol wo jar sii wããre lan jar had wããre Baa maa ti ngeel ɓe wo. b De ɗeŋ maa sen jar maa ni Baan hay wo go de bag jag maa sii wããre Baa.

 ¹³ Naa ɗig we le ti naw maa blam le no, naa ko go pah tu ga Jeofa hay koɗ jar maa ɓen wo le nen wur maa de gayri. Hãã le ti wur durgi maa kluu maa de ɓogn mono, jar maa ni Jeofa maa ti wer sir ngaɓa hay wo go de pogge maa bag jag siigi wããre Baa ɓaaran go de fruygi, lan nen jam lay. Day, siigi wããre ɓaaran see ne hara wer debaŋ.

14. Wer mayse ga naa mo kaŋ ɗiggi ti jag liŋgi maaga a le jag tayge maa ni Jeofan, lan maaga a le jag jar maa peel taygen là? (Naage nene 2:1) (Ko foton lay.)

¹⁴ Wara, tayge jar maa peel sedeewa Jeofa men wo see ɓaara ne Kris do maaga á mo kod saara. Á wo de sãy maaga jag lingi maaga saara hãn ne hẽẽre ɓaaran mo hay diŋ maaga a le jag Baa. Jar raŋ taygen wo de jar maa peel taygen wo ti see ɓaara lay, fer wo jag lingi sen wo ne taygen wo lay. c Jar maa peel tayge wo ti “do ɓaŋ war” Krisi. (Jaŋ Naage nene 2:1.) Day, jar maa peel taygen wo ɓuy mbaara de ɓlagge see lay, lan joŋ wo mbaara fẽẽre maaga bay wo ti ngeel ɓe wa lay. De ngar ngeel maapo Moyis wo de Josuwe hay bay wo mbaara joŋ fẽẽre maaga bay wo ti ngeel ɓe wa doo apotre wo no lay. (Kee. 20:12; Jos. 9:​14, 15; Rom. 3:23) Amaa, naa ko go de woore ga Yeso diŋ jee koɗ weejõõ maa deele ga de ti lay wo de jar maa peel tayge wo no. Yeso joŋ ge ti joŋre sen de ɓaara “hãã go ti wur tawge tamsir no.” (Mat. 28:20) Fẽẽre po wo ngaɓa ga ɓo’ wo nen go ga naa mbe nen hã ɓil ti yaŋ maaga á hã ra ne naa de joŋ joŋre de jar maaga à lag ra de ẽgre nenterse peel naa maa koɗ naa mono

NAA DA’ FẼẼRE DEBAŊ DE MAAGA NAA YAŊ HOO SUG TI YAŊ MAA NI JEOFAN NO

15-16. Ndo da’ hadge mayse see jar maaga hoo wo sug ti jag liŋgi maa ni Jeofan là?

¹⁵ De maaga naa yaŋ hoo sug ti yaŋ maa ni Jeofan no, naa fruy patala wer bosa’ maaga naa da’ wer ɓe mono. Sen diŋ saɓlaŋ Andi wo de Robi, ga joŋ wo joŋre de yaŋ maa ni weejõõ maa de deele, de ti lay maa kol naw ɓaaran go gus mono. Ɓo’ge ti ɓen so, á hã wo see ɓaara go de see ɓaara ti joŋre booge tiŋ-Baa sedeewa Jeofa wo. Robi wãã ga: “Wùr hay lag ɓil tiŋ po mẽ’ tu, bargiŋ bay ni dra’ wa. Day ndi raw yee fẽẽre joŋre ɓi maa ti ɓaŋ fotogarafi wo go ngaɓa, fẽẽre hrag maaga ndi hay da rage debaŋe. Ndi raa debaŋ de maaga ndi go de yee rage mono. Amaa doo Sara, wãy Abraham no lay no, ndi hay go de baa wer maa kaŋ ɗiggi ɓi ti naw maa peel no, amaa bay ti naw maa glogn wo wa.” (Heb. 11:15) Blo sen wo de wãy  ɓe da’ wo mayse wer joŋre ɓaara sen là? Robi wãã ga: “Wùr de fruygi ti maaga wùr ko ga wùr go de hã fẽẽre maaga wùr de ɓe ɓuy ne Jeofa mono. De maaga wùr de war ɓi wùr joŋ joŋre maaga Jeofa hã ne wùr do go mokay, wùr ko go ga naw maa ɓil sir maa defayn joŋ ge na joŋge la go de woore.” Andi yããn, de wããge ga: “Wùr da’ fruygi ti maaga wùr hã see wùr go ɓuy ti joŋre maa ti twaywaŋ maa ni Baan mono.

¹⁶ Naa da’ mayse maa tigriŋ pa hayga naa yaŋ tum men see naa koɗge ne Jeofa là? Blam maaga Marsiya taw go de ‘lycée’ mono, se maŋ ga se joŋ joŋre diŋ de yaŋ maaga piyoniyẽ hay baa wo ne se mono. (Mat. 6:33; Rom. 12:11) Á wãã ga: “À hay hã faage ne ndi maa joŋ lakol de koɗ nen kiŋgi naa. Amaa, ndi hay de sãy joŋ joŋre ne Jeofa ti debaŋ ɗa. Ndi maŋ ga ndi mo hay had joŋre po ga kay me yaŋ ti joŋre siigi wããre Baa ɓi no. Á hay diŋ ɗiggi maaga daŋgo nen ɓi ga ndi maŋ tee ɓe ti boŋ ga so. Ndi patala de fruygi ti joŋre pioniyẽ no, werga ndi de kããge maaga ndi maŋ ga ndi ig ti joŋre gemãyla, sen kay me maa kayge ti betel, lan maa joŋ wer joŋre maa tigriŋ wo ngaɓa ne Jeofa pa.”

17. Bosa’ maa hõn ga naa da’ de maaga naa yaŋ tum hoo sug ti jag liŋgi maa ni Jeofan pa là? (Esay 48:​17, 18)

¹⁷ Day maa po, à baa yaŋ maaga ɗaw naa do fẽẽre maa doo kiɗgi horoge, lan do joŋre maaga maŋ wo jag naa go hoo sug ti jag liŋgi maa ni Jeofa no. Hayga naa hoo sug we ti jag liŋgi maa ni Jeofan ti fẽẽre sen wo no, naa da’ yaŋ wer ɓaara ni debaŋ. Ɗiggi naa joŋ yaŋ de suuli de woore, lan naa yãã yaŋ go jag re maa de gayri wo. (1 Tim. 6:​9, 10) Ɓo’ge ti ɓen so diŋ ga, naa goŋ Jeofa go de jiili naa ɓuy. Fẽn po hã fruygi wo de jam ne naa de daŋ sen ga so..—Jaŋ Esay 48:​17, 18.

18. Wer mayse ga ndo go de baa wer ga ndo hoo sug diŋ ti jag liŋgi maa ni Jeofan là?

¹⁸ Cwãy tu, Jeofa joŋ joŋre de jar téebere wo tum maa ngaɓ faage maa ti ngeel ɓen ne naa ti wur bon maa de hãã no, lan hãã nen kiŋgi maa ndar no. (Siŋ. 45:16) Koh naa mo hay ba de sãy joŋge ti diŋ fẽn tigriŋ laybla no, naa hoo mbe sug yaŋ ti jag liŋgi sen yawlà? Á joŋ yaŋ go ne naa gus maa joŋge hayga naa yaŋ hoo sug ti jag liŋgi ɓen patala ɓaa no. Wersen, naa hoo wee sug ti jag liŋgi maa ni Jeofan wo de maa ni jar maaga á lag ra ne naa peel maa koɗ naa hãn wo ne naa mo ɓuy. (Esa. 32:​1, 2; Heb. 13:17) Hayga naa joŋ we doo sen nono, ni naa de hoo sug ti Jeofa, jee koɗ naa no, ga yãã naa yaŋ go jag fẽẽre maaga hãy wo naa ti ɓaŋ nenterse, lan kaŋ naa da’ tenen maa tum ti sir maa defayn mono.