1. Jar maa 144000 raw ge wo go ciŋ ɓuy na hunlà?

 KIŊGI maa blam wo le la, sedeewa Jeofa hay wii wo jag see ɓaara ga: ‘Jar maa glog ga nenterse Baa de sreŋ rage raw wo ciŋ hunlà? Taŋgu sedeewa Jeofa hay wo ɗiggi ga maapo blam waŋ Armagedoŋ mono, jar maaga nenterse Baa de sreŋ rage ig wo gesiŋ la me’ taŋgu maaga saara raw ciŋ. Amaa, naa da’ ɓil Ngeel Gor ti Jare 15 Few Gumugi 2013 ga tee jar maa 144000 ga wo gesiŋ la ɗa raw wo ciŋ taŋgu durgi Armagedoŋ.—Mat. 24:31.

2. Wiigi jag maa hõn ga jar maa po wii wo jag see ɓaara là? Day naa ko mayse yaŋ ɓil hadgen la là?

² Amaa, jar maa po wo yoo naa wii wo jag see ɓaara ga: Mayse da’ “sããre maa tigriŋ” wo ga joŋ wo joŋre ne Jeofa de woore ti tamsir la ti wur “bon maa de hãã “ là? (Jaŋ 10:16; Mat. 24:21) Jar maa po wo wara ɗig wo ga saara ko ge see saara go de yeege de maaga jar maa 144000 raw ge wo ciŋ mono. Naa ko wee verse po wo ɓog ga a ne hara ti ɗa. Blam, ni naa ko wee wer mayse wo ga naa bay maa caa jiili go wa la.

RE MAYSE DA’GE SÃÃRE MAA TIGRIŊ WO GA LÀ?

3-4. Maapo ga jar maa po wii wo jag see ɓaara ga hãy ne, day wer maylà?

³ Maapo ga jar maa po wii wo jag see ɓaara ga sããre maa tigriŋn men ge wo Jeofa go de maaga tayge maa peel sedeewa Jeofa bay wo we ɓo’ faage fẽẽren ne hara wa so no. Á ɗig wo sen diŋ wer maaga á jaŋ wo wããre ti jar maa de maŋ sen wo ɓil Bible mono. Naa ko wee saɓlaŋ po wo ɓog ɗa. Maa taŋgun wãã diŋ ti Yehoyada, jee sid jag maa kluu no. Á hay diŋ jee maa de deele ti joŋre maa ni Baa no. Á wo de wãy ɓe Jehosabead, hay yãã wo weel po ga à ɗen Jowas go jag húulí. Saara kay ne maaga á mo kol waŋ maa de el, lan de deele. De maaga Yehoyada  hay tenen ɗa mono, Jowas hay joŋ joŋre ne Jeofa de woore, lan hay joŋ fẽẽre maa de woore wo lay. Amaa blam húulí Jehoyada mono, Jowas tõõ wer joŋ fẽẽre maa de baywoore wo. Á ya’ laa jag weere maa ni waŋre maa de ɓlagge wo, lan men goŋ Jeofa go.—2 Kro. 24:​2, 15-19.

⁴ Saɓlaŋ maa de ɓogn wãã diŋ ti kretiyẽ maa blam apotre wo. Jee peele Yeso maaga húu go glog hay diŋ Jaŋ. De maaga á hay tenen ɗa mono, á hay kay kretiyẽ wo debaŋ maa lagge de deele. (3 Jaŋ 4) Doo maaga jar peele Yeso lan hay wo joŋge ne lay mono, Jaŋ hay kay tayge maa ni Baan maa ooge de deele jag joŋre aposta wo. (1 Jaŋ 2:18; ko notes d’études ti 2 Tes. 2:7 ɓil NWT) Amaa blam maaga Jaŋ húu go mono, jar debaŋ ti taygen maŋ wo blam hadge jar aposta wo. Blam kiŋgi po ta’, jar aposta le’ wo had ɗiggi maa de baywoore, lan le’ wo men joŋre maa de baywoore wo hresge ti taygen wo ɓuy.

5. À bay go de wããge ti verse se ɓog ɓil Biblen tu ga hãy wa là?

⁵ Verse se ɓogn ngaɓ wo ga blam maaga jar maa 144000 raw wo ciŋ mono, sããre maa lan tĩĩ wo wer joŋ fẽẽre maa de baywoore wo doo Jowas, noga kol wo go aposta doo jar maa po wo ngaɓa blam húulí jar peele Yeson wo yaw? Yiŋgi jag ɓen go tu ga baywa hase ɓuy tu! Naa hay wee go de bawge jag jiili naa ga de maaga jar maa 144000 raw wo ciŋ mono, sããre maa lan joŋ wo ɓaara tum goŋ Jeofa ti faage ɓe, lan ɗaw wo see ɓaara de woore lay. Wer mayse ga naa mo kaŋ ɗiggi ti wããre sen là?

JAR MAA NI JEOFAN JOŊ WO MBAARA TUM GOŊGE ƁE TI FAAGE ƁE

6. Wur maa swa’ maa hõn wo ga naa wãã yaŋ ti ɓaara là ne?

⁶ Wer mayse ga naa mo hay go de bawge jag jiili naa ga goŋge Baa maa ti ngeel ɓen kol ge go de glubgi ti boŋ ga, koh nen ngeel maa de gayri maaga de gor naa wo peel mo là? Wer fẽẽre maaga naa had ra ɓil Bible ti wur maaga naa nen ɓe wara mono. Wur maaga naa nen ɓe patala sar debaŋ de wur maa ni jar Israyel maa ɓaan wo, lan de wur maa ni kretiyẽ maa blam húulí jar peele Yeson wo no. Naa kiɗ wee wer go ne wur se swa’n wo go de woore ɗa: (1) Wur maa ni jar Israyel maa ɓaa wo no, (2) Wur maa ni kretiyẽ maa blam húulí jar peele Yeson wo no, lan (3)  wur maaga “fẽẽren mo fer wo go joŋ ge defay ɓuy ɗa pa.”—Joŋre 3:21.

7. Wer mayse ga le Israyel maa ɓaan jar maa goŋ Baa de deelen laa wo do go gesiŋ de maaga waŋre po wo ngaɓa de jar maa tigriŋ le’ wo joŋ fẽẽre maa de baywoore nen Jeofa ga là?

⁷ Wur maa ni jar Israyel maa ɓaa wo no. Go me’ blam húulí ɓe mono, Moyis wãã ne jar Israyel wo ga: “Ndi go de ko ge ti ɓi paɗ paɗ ga blam húulí ɓi mono, nday glub gi see ɓay go, . . . day nday maŋge ɓil go see faage maga ndi hay ɓo’n we mono.” (Dog. 31:29) Moyis ɓo’ sug pa ga hayga jar Israyel ɓiɗ wo faale we ne Baa no, à raw de ɓaara ti gebee ti sir maa tigriŋ. (Dog. 28:​35, 36) Wããre sen hay bag mbe jag we go yaw? Á bag jag go kidolgi. Nen kiŋgi se maa kisn mono, waŋre po wo ngaɓa le’ wo joŋ fẽẽre maa de baywoore nen Jeofa, lan jar maa ni Baan maŋ wo glog ɓaara ti goŋge Baa maaga bay ti ngeel ɓen wa lay. Diŋ wersen so ga Jeofa nii jar goŋge ɓe maa de ɓlaggen wo go see ɓe, lan caa wer waŋre maa ti jar Israyel wo go. (Esek. 21:​25-27) Day, jar Israyel maa de deelen da’ wo coɓge de maaga á ko wo ga wããre Baa hay bag jag go ti ngeel ɓe mono.—Esa. 55:​10, 11.

8. Á de hay ngel naa ti maaga tayge kretiyẽ maa ti siyekle maa de ɓogn glub go mono yaw? Naa wer ɓe ɗa.

⁸ Wur maa ni kretiyẽ maa blam húulí jar peele Yeson wo no. Sen de ngel naa ti maaga naa ko ga tayge maa ti wur maa ni kretiyẽ maa  blam húulí jar peele Yeson hay glub wo go mo yawlà? Baywa hase. Yeso wãã go peel bol ga aposta joŋ wo yaŋ debaŋ. (Mat. 7:​21-23; 13:​24-30, 36-43) Jar peele Yeso Pol, Piyer, lan Jaŋ wãã wo ga profesi maa ni Yeson hay tõõ bag jag le go ti wur maa ni ɓaara no. (2 Tes. 2:​3, 7; 2 Pi. 2:1; 1 Jaŋ 2:18) Go me’ blam húulí jee peele Yeso maa blamn mono, kretiyẽ apostan kol wo go yoo Babilon maa kluu no. Ni pa mono, fẽẽre maaga Yeso hay wãã ra bag wo jag go ɓuy tu.

9. Ti ɓaŋ maa hõn ga wur maaga naa nen ɓe wara sar de wur maa ni jar Israyel maa ɓaan wo le, lan de wur maa ni kretiyẽ maa blam húulí jar peele Yeson wo là?

⁹ Wur maaga “fẽẽren mo fer wo go joŋ ge defay ɓuy ɗa pa” no. Wur maa ni naan sar de wur maa ni jar Israyel maa ɓaa no, lan sar de wur maaga aposta hay joŋ wo debaŋ, ti siyekle maa 2 ti wur maa ni naa no. À ɗe wur maa ni naa la ga hãylà? Naa mbe maa ɗege ɓe ga “naw maa blam taw” ti tamsir maa de ɓlagge no. (2 Tim. 3:1) Amaa Bible ngaɓ ga wur maa kluun wo de wur maa de pããgen tĩĩ wo wer jag do kẽẽ boŋ. Wur sen joŋ ge hãã ti wur maaga twaywaŋ maa ni Mesin kol jar téebeere wo go keɗed bay ɓlagge see, lan kol tamsir go diŋ paradis mono. À ɗe wur sen ga wur maaga “fẽẽren mo fer wo go joŋ ge defay ɓuy ɗa pa.” (Joŋre 3:21) Wur sen tĩĩ wer nen kiŋgi 1914 N.W.N. Blam sen mayse hay fer go defay tu ne? À hay Yeso ti waŋ le ciŋ. Jeofa da’ jee maa hayge ti waŋ wãã wããre jar ti tu Ɓe, ga a le ti wer maa ni Dafid, waŋ maa de deele no. Amaa, fẽẽre maaga Jeofa kol ra go defay bay diŋ hayge waŋn tawa wa. Go blam me’, goŋge Baa maa ti ngeel ɓen tĩĩ wer kne’ge! (Esa. 2:​2-4; Esek. 11:​17-20) Day, á fer ge go glubgi pa yaw?

10. (a) Bible hay wãã mayse go ti goŋge Baa maa ti ngeel ɓe maa ti wur maa ni naa la là? (Esay 54:17) (b) Wer mayse ga profesi maa de maŋ sen hã wo bawge go ne naa jag jiili là?

¹⁰ Jaŋ Esay 54:17. Ɗig ti profesi sen ɗa: “Fẽn durgi maga à too see ɓo mo ɓuy joŋ ge diŋ mopo ga”! Wããre sen wo ɓil Bible wo go de bag jag wara. Wããre maa coɓ see maa blam mo ti’ la go ti joŋre ti wur maa ni naan la lay. “Weere ɓon wo ɓuy joŋ ge wo yaŋ diŋ weere lakol [Jeofa], day jar ni ɓon nges wo yaŋ go ngesge de horoge. Ndo joŋ ge yaŋ de coɓge wer joŋge fẽẽre ti ngeel ɓe no. . . . Fẽn maaga ndo joŋ ge hẽẽne ɓe bay ge wa so, mo maa ndar jiili ɓo joŋ ge ga lay, werga mopo du’ ge ndo me’ ga hase.” (Esa. 54:​13, 14) Koh “baa ma ti tamsir lan,” Manhúulí ti see ɓe bay de ẽgre maa baa ti joŋre hadge maaga jar maa ni  Jeofan bag wo jag ɓe go mo wa. (2 Kor. 4:4) Goŋge Baa maa ti ngeel ɓen hay fer go ti ngeel ɓe, day se fer go glubgi ga so lay. Á joŋ ge diŋ maa tum. Fẽn durgi maga à too see ɓo mo ɓuy joŋ ge diŋ mopo ga!

MAYSE JOŊ GE BLAM LÀ?

11. Mayse hã bawge go ne naa jag jiili ga ngaɓa maa debaŋ debaŋ joŋ wo go de tobge blam maaga jar maa 144000 raw wo go ciŋ mo ga là?

¹¹ Mayse hres ge blam maaga jar maa 144000 raw wo we go ciŋ ɓuy là? Fer ɗiggi ga Yeso diŋ jee koɗ naa. À diŋ waŋ tayge jar maa ni Baa no. Yeso wãã go de woore ga: “Waŋ ɓay yaŋ boŋ, diŋ Mesi.” (Mat. 23:10) Yeso maaga le de wãã re jar ciŋ joŋ ge mbe tum koɗ jar maa wer ɓen wo no. Mopo joŋ hẽẽne ne jar maa wer Yeso maa gesiŋ la wo ga so, werga Weel maa ni Baa ti see ɓe de koɗ rage. Á mbe cwãy ga naa bay go de ko ɗeŋ maaga Yeso koɗ ge jar maa ɓen ti wur sen go de woore wa. Naa ko wee saɓlaŋ maa ɓil Bible ga hã wo bawge go ne naa jag jiili ɗa.

12. Jeofa hay ɗaw jar maa ɓen wo do na ɗawge (a) blam húulí Moyis là? (b) blam maaga Baa hã joŋre maa tigriŋ ne Eli do là? (Ko foton lay)

¹² Taŋgu maaga jar Israyel laa wo ɓil sir maaga Baa hay hã ne hara mono, Moyis húu go. Mayse hay hres blam sen là? Blam húulí blo se de deelen mono, Jeofa hay men kay jar maa ni ɓen wo go yawlà? Baywa. De maaga á hay wo lagge de deele mono, Jeofa hay hã fẽẽre maaga á hay wo de sãy ɓaara ti ne hara. Taŋgu húulí Moyis mono, Jeofa wii Moyis ga á mo ɓo’ Josuwe koɗ jar maa ɓen wo no. Moyis had Josuwe nen kiŋgi pur debaŋ. (Laa. 33:11; Dog. 34:9) Ni pa mono, jar maa tigriŋ hay mbaara de kããge ni ngaɓa maa seege de ɓaara—Waŋ jar ndare, waŋ jar kisi, waŋ jar do dwee, lan koh waŋ jar hwale. (Dog. 1:15) Jar maa ni Baan hay wo de ɗawge de woore. Eli hay diŋ saɓlaŋ maa de maŋ sen pa. Á joŋ joŋre de gayri kiŋgi pur maa kay jar Israyel wo maa goŋ Jeofa. Amaa wur po mono, Jeofa hã joŋre maa tigriŋ ne hẽn, ga á mo joŋ joŋre doo profed ɓi sir Juda. (2 Waŋ. 2:1; 2 Kron. 21:12) Sen da wããge ga Jeofa hay men jar maa ɓe maaga hay wo ti sir Samari go yawlà? Baywa. Eli had Elise nen kiŋgi pur debaŋ. “Weere profed” maaga hay wo ni hay da’ wo hadge. (2 Waŋ. 2:7) Jar maa de deele maa tigriŋ hay mbaara ngaɓa deŋ maa kay jar maa ni Baa wo no. Jeofa mbe tum bag jag ɗiggi ɓe go, lan koɗ jar maa ɓen wo no.

13. Jeofa wãã go ne naa de woore ɓil Hebre wo 13:5b ga hãylà?(Ko foton lay)

¹³ Hayga ndo ɗig we ti saɓlaŋ sen wo no, ndo  ɗig ga mayse hres ge de maaga jar maa 144000 raw wo we go ciŋ ɓuy là? Naa joŋ ge de sãy wii jag see naa ti sen ga. Bible wãã cwãy po go ti ɓe gus ga hã bawge go ne naa ga: Jeofa tob ge jar maa ɓe maa ti tamsir la wo go ti ɓoŋ ga. (Jaŋ Hebre wo 13:5b.) Doo Moyis wo de Eli no lay, tayge jar maa peel sedeewa Jeofa wo de koge ga á de woore maaga saara had jare. Kiŋgi go wara puri, saara tum had hẽẽrebe maaga wo yoo sããre maa lan wo, maaga á mo koɗ wo jar maa ni Jeofan wo no. Ko ɓa da, tayge jar maa peel sedeewa Jeofa hay caa wo lakol pur maa had jar maa peel tayge wo, jar maa raŋ tayge wo, jar maa peel ti filiyal wo, jar maa peel ti Betel wo, lan jar maa tigriŋ wo lay. Tayge jar maa peel sedeewa Jeofan had wo jar maa kay rage ti ngeel kluu sedeewa Jeofa de see ɓaara tu. Hẽẽrebe se de deelen wo patala de joŋre do ngaɓa debaŋ ti tayge maa ni Jeofa no. Á wo go de bag jag see ɓaara maaga saara mo hay tum kay sããre maa ni Yeson wo no.

14. Kluu wããre maaga naa de wããge ɓe la diŋ maa hõnlà?

¹⁴ Ta’ la diŋ kluu wããre maaga naa de wããge ɓe mo so no:Taŋgu tawgeti bon maa de hãã, de maaga jar maaga raw wo ciŋ blam taw yoo jar maa 144000 raw wo we ciŋ no, jar maa ni Baa maa ti tamsir la joŋ wo mbaara tum goŋ Jeofa de deele. Wer koɗge maa ni Yeson, jar maa ni Baan joŋ mbaara tum goŋ Jeofa de deele. Cwãy, ti wur sen tayge jar maaga Bible ɗe ra ga Gog ɓi sir Magoge le’ ge jar maa ni Baa wo no. (Esek. 38:​18-20) Amaa, saara kal ti go ga; maŋ wo jag jar maa ni Baan go goŋ Jeofa ga lay. Á yãã ra go cwãy tu! Nen naage nene, jee peele Yeso Jaŋ ko “ngaɓa debaŋ debaŋ” yoo sããre maa ni kris maa lan wo no. À wãã ne Jaŋ ga “ngaɓa [maa] debaŋ debaŋ” sen hay hee wo le “nen bon maa de hãã” no. (Naa. 7:​9, 14) Naa go de koge de woore ga Jeofa yãã ge ra go!

15-16. Doo maaga naa da’ ɓil Naage nene 17:14 ne mono, jar maa 144000 joŋ ge wo may ti wur waŋ Armagedoŋ là, day wer mayse ga sen jor glog naa là?

¹⁵ Maapo ga jar maapo wii wo jag see ɓaara ga: Day jar maa 144000 joŋ ge wo mayse blam maaga á wo wo go ciŋ mo là? Bible yiŋ jag ti wiigi jag se no. Á ngaɓ ga ngomna maa ti tamsir  wo la “durgi wo de Wesam” no. Sen go tinoo tu ga Yeso naa blum ɓaara. Naa jaŋ ga: “Wesam raw daŋ rage egre.” Day wose kay ge ne là? Versen yiŋ jag ti ɓe. Jar ɓe maaga à hay “ɗe rage le go mono,” “jar ɓe maga à hoo ra le gom,” lan “jar ɓe maga bay wo ndar gog wa no.” (Jaŋ Naage nene 17:14.) Á diŋ wose wo ne? Jar maa 144000 ga wo go de birgi mono! De maaga jar maa 144000 raw wo we go ciŋ ɓuy ti tawge ti wur bon maa de hãã no, joŋre ɓaara maa taŋgu yoo maa lan wo diŋ durgi. Sen diŋ joŋre mayse de woore mo hã ne! Jar maa po wo yoo jar maa 144000 hay wo go diŋ jar durgi taŋgu maaga á kol wo go Sedeewa Jeofa mono. Jar maa po wo yoo ɓaara hay wo joŋ joŋre ti soode ti tamsir la. Amaa blam, saara kol go diŋ kretiyẽ maa ti ngeel ɓe, lan saara da’ faage maa hã jam no. (Gal. 5:22; 2 Tes. 3:16) Á men wo durgi go ɓuy tu. Amaa, blam maaga jar maa 144000 raw wo ciŋ mono, á joŋ wo joŋre ti jeŋ Kris wo de jar peele ɓe maa de fããgen wo maa dur jar hee Baan wo ti waŋ maa ti tawgeti no.

¹⁶ Ɗig ti wããre maa ta’ la no: ti tamsir wara, jar maa po wo yoo jar maa 144 000 wo go de tããbe, noga de gayri. Amaa de maaga á bir wo go maa rawge ciŋ mono, saara kol go diŋ nenterse maa de ẽgre daŋgo ɓuy. Day joŋre ɓaara joŋge diŋ durgi ti jeŋ Yeso Kris, Waŋ durgi ɓaara no. Blam waŋ Armagedoŋ mono, á joŋ wo joŋre ti jeŋ Yeso maa kay jar téebeere wo maaga á mo kol wo go keɗed bay ɓlagge see. Á joŋ wo fẽẽre maa de el ne hẽẽre ɓaara maa gesiŋ wo la de maaga a wo le ciŋ, de daŋ maaga á hay lag wo gesiŋ la doo jar téebere ne mono!

17. Naa ko koge ga sedeewa Jeofa wo ɓuy joŋ wo go nen jam ti wur waŋ Armagedoŋ là?

¹⁷ Ndo yoo sããre maa tigriŋ wo yaw? De maaga durgi Armagedoŋ maa de woore tõõ wer we, ndo joŋ ge mayse doole là? Diŋ fẽn maa gus mo kay la tawa tu: Kaŋ ɗiggi ti Jeofa, lan co’ sug ɓe de woore. Kaŋge ɗiggi ti Jeofa wo de co’ge sug ɓe da wããge ga hãylà? Bible wãã ne de woore ga: “Wo we laage ɓil tiŋ naw ɓay wo, nday jar maa ni ɓi no, tẽg we jag tiŋn wo ti ɓay,yoŋ we go ni semagga ɗa nen maga bagge põõn mo taw go ɗa.” (Esa. 26:20) Jeofa koɗ jar joŋre ɓe maa ciŋ wo de maa gesiŋ wo la ɓuy ti wur se no. Doo jee peele Baa Pol no lay, naa go de koge cwãy ga “mopo kãã maa blaw ɓil naa go de dage maga Baa da naa mo ga hase. . . , hayba jar wãã re jar wo, hayba naw maaga naa nen ɓe patala noga maa wurpon wo” no. (Rom. 8:​38, 39) Hay tum ɗiggi ga: Jeofa da ndo, lan se tob mo go ga has lay!