DAY maapo jar yer Bible dog wo tee wããre maa po wo. Naa ko fẽẽre po wo 3 ga hay jor glog jar yer Bible wo joŋge ɓe mo ɗa:

Wur maaga à yern le ni mono. Le Israyel maa ɓaan mono, jar debaŋ hay bay wo de ‘copies’ jag liŋgin ga diŋ maa ɓaara ti see ɓaara wa. Á hay wo laa jag liŋgin diŋ de maaga saara wo ti taygeti ɓil tabernakle maa jaŋ jag liŋgin mo tawa tu. (Dog. 31:​10-12) De maaga à joŋ jaŋ jag liŋgin pa mono, ti jar hay bay wo kaŋge ni debaŋ wa werga á hay wo laa wããren diŋ deele, lan yoo ngaɓa nen boore pur pa mono. (Neh. 8:​2, 3, 7) Ti ngeel maa doo sen wo ne hã’ mono, dogge kluuri wããre maa po de hay kay jar maa ɗig ti go gus ti wããre no, lan maa joŋ joŋre de ɓe. Dogge wããre maapo wo de hay kay ra maa ɗig ti ti naage wer jag liŋgi maaga Jeofa hay hã ne hara mono.—Lef. 18:​4-22; Dog. 5:1.

Deŋ yerge no. Leder maa po wo ɓil Bible wo diŋ siŋ. Doo Siŋ wora, Siŋ ma de daŋ siŋn wo, lan Lawge mani Jermi wo no. Maapo, siŋn wo de yããge ɓaara maaga tay ra de siŋ ɓen ti see ɓe tu wer ni maa kay jar laa siŋn wo, maa ɗaw wããre maa ɓil ɓaaran wo ti. Naa ko ba doo Siŋ wora 115:​9-11 ga wãã ga: “[O] Israyel, kaŋ ɗiggi ɓo ti [Jeofa] —Á diŋ je kay rage no, gidigli ɓaara no.[ O] Tiŋ mani Aaron no, kaŋ ɗiggi ɓo ti [Jeofa]—Á diŋ je kay rage no, diŋ gidigli ɓaara. Nday maga nday joŋ hẽẽne [Jeofa] mono, kaŋ wee ɗiggi ɓay ti [Jeofa]— Á diŋ je kay rage no, diŋ gidigli ɓaara no.” Ndo mbo de ko maaga dogge wããre sen hay kay jar ‘wãã siŋn wo maa ferge pũy ɗiggi ɓaara go ti cwãyn mono?

De el ooge ti wiigi jag maaga kay wo. Jar yer Bible dog wo diŋ wããre maaga kay wo mono. Ko ba ɗa, de maaga Jeofa hã jag liŋgi ne weere Israyel wo ga á mo re wo cíi wa mono, á wii Moyis ga á mo dog ne ne hara ɓaale puri. Baa hay da ɓo’ sug ɓaara ga tenen jee táabay diŋ nen cíi ɓe, kaŋ nen ta’ ga cíi diŋ tenene. (Lef. 17:​11, 14) Go blam de maaga apotre Pol wo de jar maa peel tayge maa Jerusalem yer wo ti fẽẽre maaga kretiyẽ joŋn wo ga bay de cõõre jag Baa wa mono, saara fer wããge ti de el diggi see go see cíi pa.—Joŋre 15:​20, 29.

Jeofa hay bay de ɗiggi ga dogge wããre mo kol go diŋ fẽn maa joŋge tum wa. Ba doo maaga Yeso wãã ga: “nday le’ tosge we no, dog wee diŋ wããre sen tum wa.” (Mat. 6:​7, NWT) Blam ɓe, se wãã ne naa ti fẽẽre po wo de woore ga kay wo naa maaga tosge naan mo hay de tabge de ɗiggi Baa mo pa. (Mat. 6:​9-13) Koh de maaga naa bay mbe maa dog wããre sen mbe pa mbe pa nen tosge wa mo laybla no, naa mbe de kããge maa dog tosge ɓaale pur ti fẽn po boŋ.—Mat. 7:​7-11.

Wããre Baa dog tee wããre maa po wo diŋ ti re maa ti ngeel ɓe wo. Á diŋ ɗeŋ maa boŋn yoo maa tigriŋ wo ngaɓa ga jee had naa maa kluun had naa de ɓe maaga naa mo da’ hadge see maa ni naa ni de see naa tu.—Esa. 48:​17, 18.