Bible wãã go pah tu ga Jeofa de kããge maa wããge ti fẽẽre maaga hres ge wo ti naw maa peeln go peel bole. (Esa. 45:21) Á bay go naa wer ɓe debaŋ wa, noga wur maaga á joŋ fẽẽren wo wa, noga mo maaga á joŋ ne mo wa. Naa bay de kããge maa wããge ti wiigi jag sen wo ga á doo sen nono wa. Naa ko fẽẽre po wo see ɓe mbag mo ti’ la ga ɓo’ wo nen go ga naa mbe de kããge maa ko sen mo ɗa.

Jeofa de kããge maa joŋ fẽẽren ɓuy, amaa day maapo se maŋ ga se joŋ fẽẽre maa po wo ga diŋ se. Jeofa de kããge maa joŋ joŋre de ẽgre ɓe maa bay taw tin maa wãã fẽẽre maaga hres ge wo yaŋ wo peel mono. (Rom. 11:33) Werga á de kããge maa ɗaw see ɓe so mono, á de kããge maaga se maŋ ga se ko mo po ti naw maa peeln ga.— Esayi 42:14.

Jeofa bag ge jag ɗiggi ɓen go. Wããre sen tab wo de ẽgre ɓe maaga de kããge maa wãã fẽn maa ti naw maa peeln na tabge ne? Esayi 46:10 naa wer ɓe ga: “Ndi wãã le go ti mopo maga joŋ ge yaŋ wo pel go ti tĩĩgi wer hãã, ndi wãã go ti fẽn maga joŋ gà ɗa le go taŋgu pel bole. Ndi wãã ga mo ɓi maga ndi de kaŋge ɓe pel ɓi ma joŋge joŋge yaŋ day ndi joŋ ge fẽn maaga ndi ɗig joŋge ɓe ge go ɓuy.”

Re maaga Jeofa de kããge maa wããge ti fẽẽre maa peeln wo diŋ ga á de kããge ti fẽeren ɓuy. Á bay de sãy ɗeege go de fẽẽren wo deparday ti maa ko fẽn maaga à de gorge ɓe ti naw maa peeln ti wa. Maa nen ɓen doo ga fẽẽre maaga hres yaŋ wo wo peel de ɗeŋ maaga á hres wo mo ɓuy, se go de ko rage, day se fleg nen ɓaara go peel bol nono.—Laa. 9:​5, 6; Mat. 24:36; Joŋre 17:31.

Wersen, naa da’ wããre maa doo “bagge jag see,” “joŋge,” lan “ɗiggi” maa ngaɓ ɗeŋ fẽẽre maa po wo ga Jeofa joŋ ge ra yaŋ wo ti naw maa peeln mono. (2 Waŋ. 19:25; ko ngeel naa wer maa gesiŋ ɓil NWT; Esa. 46:11) Wããre sen wo de ferge diŋ de jag maaga à tĩĩ wer yer wããren le diŋ de ɓe ga da wããge ga “jee booge.” (Jer. 18:4) Doo maaga jee booge maa de ko booge waŋ nen pãy maa boo mopo maa de woore no lay mono, Jeofa de kããge maa joŋ joŋre de fẽẽre po wo maa bag jag ɗiggi ɓe go.—Efe. 1:11.

Jeofa hoo sug ti geti’ maaga á hã ne naa maaga naa mo joŋ ɗiggi naa mono. Á bay go ngaɓge ga naw wosela ɓuy see ge seege la peel bol wa. Á bay jor glog jar maaga á mo see wo diŋ ti faage maa woge taw rage go wa pa. Á men wosela ɓuy maa maŋ faage ɓe de see ɓe, lan se jor glog wosela ɓuy maaga á mo maŋ diŋ faage maa de woore pa.

Naa ko saɓlaŋ po wo 2 la ɗa. Saɓlaŋ maa taŋgun wãã diŋ ti jar Ninif wo. Jeofa wãã ne hara ga se taw ge sir ɓaaran go wer ɓlagge ɓaara no. Amaa, de maaga jar Ninif ko wo ga saara hay joŋ ɓlagge, lan men wo joŋge ɓe mokay, “Jiili Baa raw wooge ti ɓlagge maga se hay ɗig ga se joŋ ra de ɓe mono, se joŋ ra de ɓe ga so.” (Jonas 3:​1-10) Jeofa kal coo ɗiggi ɓe ti fẽn maaga se hay ɗig ga se joŋ jar Ninif wo de ɓe mono, werga jar Ninif coo wo ɗiggi ɓaara de maaga á laa wo wããre maaga kal le go jag Jeofa ti ɓaara mono.

Saɓlaŋ maa de ɓogn wãã diŋ ti Sirus, jee yãd sir wo, ga pog ge jar Jwif wo yaŋ le go jag gebee, lan fer yaŋ hã faage booge tiŋ-Baan mono. (Esa. 44:26–45:4) Sirus, waŋ maa Persen bag jag profesi sen go. (Esdras 1:​1-4) Sirus hay bay goŋ Baa maa cwãyn wa. Amaa Jeofa, joŋ joŋre de ɓe maa bag jag profesi ɓen go de menge ɓe joŋ joŋre de ɗiggi ɓe maaga á mo maŋ jee maaga se goŋ ne diŋ se de see ɓe.—Jõõ. 21:1.

Sen mokay la diŋ fẽẽre po wo mbag ga Jeofa joŋ joŋre de ɓaara maa wããge ti naw maa peeln mono. Sen diŋ cwãy, jee táabay po boŋ dra’ bay de kããge maa ko ɗiggi Jeofa noga fẽẽre maaga á joŋ ra mo ɓuy wa. (Esa. 55:​8, 9) Day fẽẽre maaga Jeofa wãã ra go ne naa peel bol ya’ wo wer hãge ɓil naa ti ɓe ciŋ ni, maa koge ga fẽẽre maaga á joŋ ra ɓuy wo de woore—ba doo wããge ti naw maa peeln mono.