Mayse kay ndo maa frug nen wããre Baa tum là?
Á DE gayri see ɓo maa frug nen wããre Baa tum ti wur maaga ndo maŋ maa frug nen ɓe mo yawlà? De ngar ngeel maa po se joŋ see ne naa ɓuy doo sen nono. Amaa ɗig ti fẽẽre maaga ndo joŋ ra tum doo yogge mo ɗa. Yogge wii wur lan wii durgi debaŋ, amaa blam sen naa ko see naa de wooge de woore! Fruggi nen Bible joŋ mbe maaga naa mo ko see naa de woore lay.(Efe. 5:26) Naa ko yaŋ po wo maaga kay wo naa ɗa:
Maŋ wur po go de woore ka’a. Hadge Wããre Baa maaga ndo boŋ ɓo yoo fẽẽre “maga sen de el daŋge” ga Kretiyẽ mo hay joŋ wo foo de ɓe ga mono. (Flp. 1:10) Maa kay ndo maa hoo sug ti program fruggi nen Wããre Baa ɓon mono, á bay ba de woore maaga ndo ɓal program sen ti ngeel maaga nen ɓo joŋ tum koge ɓe wa yawlà? Noga ndo ɓo’ ‘alarme’ telfon ɓo nen maaga á mo ɓo’ sug ɓo ga wur fruggi nen Wããre Baa ɓon baa we go.
Kiɗ wur lan ɗeŋ fruggi nen Wããre Baa maaga kay mo debaŋ. Go gus nen ɓo diŋ maaga ndo ig frug nen Wããre Baa debaŋ mo yaw? Noga ig mẽ’ mẽ’ mo yawlà? De ko maaga kay mo diŋ ndo boŋ tu. Joŋ program fruggi nen Wããre Baa ɓon de tabge de ɗeŋ maaga go gus nen ɓo mono. Hayga wur fruggi nen Wããre Baa ɓon a we go, ga cwããge joŋ mo no, á bay ba maaga ndo frug nen Wããre Baa nen weere boore po 10 tu wa yawlà? Fruggi nen Wããre Baa nen weere boore 10 daŋ hase. Maapo ga blam weere boore maa 10, sãy ya’ wer ɓe de peel ni joŋ ti ɓo.—Flp. 2:13.
Kiɗ fẽn maaga ndo de sãy frug nen ɓe ti go peel bole. Hayga ndo ya’ we ɗig fẽn maaga ndo frug nen ɓe ti wur maaga ndo de maŋge ɓe no, ni ndo go de ‘yõɗ . . . ti see ɓo go ga caw.’ (Efe. 5:16) Yer fẽẽre maaga ndo frug nen Wããre Baa ti ɓaara wo go ti’i. Hayga wiigi jag po a wo we ne ndo ti no, yer ne maa kiɗ wer ɓe blam. Maapo ga ti tawgeti fruggi nen Wããre ɓon, ndo da’ fẽẽre maaga ndo frug nen Wããre Baa ti ɓaara ni pa.
Hayga fẽẽre po yaŋ wo maa cooge no, coo ra. Fẽn maa de eln diŋ ga ndo mo frug nen Wããre Baa tum nen naw renam. Wersen, coo wur maaga ndo ig ni, fẽn maaga ndo frug nen wããre Baa ti ɓe, lan naw ɓe no, hayga á yaŋ maa cooge no.
Hayga naa yaŋ frug nen Wããre Baa tum nen naw renam no, naa da’ yaŋ wer ɓe ni debaŋ. Holaŋ naa de Jeofa joŋ yaŋ de woore debaŋ, naa far yaŋ diŋ ɗiggi maa de woore wo, lan naa ko see naa yaŋ de coɓge lay.—Jos. 1:8.
