HADGE 44
SIŊ 33 Men re maa põõ mogen wo ne Jeofa do
Ndo mbo de kããge maa ooge jag joŋge de gur yawlà?
“Men ɓlagge raw egre ɓo wa, ama raw egre ɓlaggen de joŋ de ele.”—ROM. 12:21.
FẼN MAA KLUU ƁIL HADGE SEN LA
Fẽn maaga ndo joŋ de magga jobo joŋ mo we de gur no.
1-2. De ɗeŋ maa hõn wo ga à joŋ naa de gur là?
Yeso hay wãã jag jõõ ti wãy dwur po ga wii kayge do jee caa kiida wer maaga à hay joŋ ne ti ngeel ɓe ga mono. Jar maa wer Yeson hay wo de kããge maa ko re maaga wãy se ɓil jag jõõn hay nen ɓe mono, werga ti wur sen à hay joŋ jar de gur debaŋ. (Lug 18:1-5) Naa mbe de kããge wara maa ko re maaga wãyn hay nen ɓe mo lay, werga wosela ɓuy de da’ see ɓe nen joŋge de gurn lay.
2 Jar wara ngaɓa ti tamsir ɗig wo ti jar sar sare, wo de hãã, lan lig wo koŋne ɓili. Se diŋ wersen so ga, á de ngel naa de maaga à joŋ naa we de gur no ga. (Ekl. 5:8) Amaa, á gay naa debaŋ hayga joŋ naa we de hãã diŋ hẽn naa noga mãygeman naa po no. Wersen, hẽẽre naa bay wo de sãy joŋ naa de gur ti doo jar maaga joŋ wo bon naa, lan kaŋ wo ne naa nen mo wa. Ren diŋ ga, á wo ɓuy de ɓlagge ti hõõgese koɗe. Naa mbe de kããge maa had fẽẽre debaŋ see Yeso ti maaga á hay oo de deele jag joŋge de gur maaga jar hee ɓen hay wo joŋge ɓe mono. Hayga naa joŋ we desãy see jar hee naa maaga joŋ wo naa de gur no, naa hay joŋ see hẽẽre naa wo de daŋ sen yaw! Á joŋ see ne Jeofa na joŋge de maaga jar maa ti tayge noga jar maaga bay wo Sedeewa Jeofa wa joŋ wo naa we de gur là? Day á mbe de ɗiggi ti naa de sen yawlà?
3. Jeofa mbe na de ɗig ti ti naa ti maaga naa de jo bon do joŋge de gurn mo yawlà, day wer maylà?
3 Jeofa da ga à mo hay joŋ naa de woore, day nen ɓe de koge de maaga jar joŋ naa de baywoore mono. “[Jeofa] da diŋ joŋre ma de deele.” (Siŋ. 37:28) Yeso hã bawge go ne naa jiili ga Jeofa “blaw ge re . . . go deparday” de maaga wúr ɓe a we no. (Lug 18:7, 8) Day iggi la mẽ’, á caa ge wer bon maaga naa de joge ɓe wara, lan caa ge wer joŋge de gur maa hõnla ɓuy go.—Siŋ. 72:1, 2.
4. Kayge maa hõn ga Jeofa kay naa wara là?
4 De maaga naa de gor wur maaga Jeofa caa ge wer joŋge jar de gurn go mono, á kay naa maa ooge de deele jag ɓe. (2 Pi. 3:13) Á had naa de ɗeŋ maaga naa mo joŋ fẽn maa de baywoore wa, de maaga à joŋ naa we de gur no. De saɓlaŋ weel ɓe no, Jeofa ngaɓ ɗeŋ maaga naa mo ɗig de woore de maaga à joŋ naa we de gur no. Day á baa yaŋ ne naa de woore ɓil Bible maaga naa mo joŋ joŋre de ɓe, de maaga à joŋ naa we de gur no pa.
JOŊ HAYYA NE SEE ƁO TI ƊEŊ MAAGA NDO ƊIG DE MAAGA À JOŊ MO WE DE GUR NO
5. Wer mayse ga naa mo joŋ hayya ne see naa ti ɗeŋ maaga naa ɗig de maaga à joŋ naa we de gur là?
5 Maapo ga á ma’ ɓil naa debaŋ, lan ma’ nen ti naa go de maaga à joŋ naa we de gur no. (Ekl. 7:7) Jar goŋ Baa maa de deele doo Job wo de Habakug, hay wo ɗiggi de maŋ sen lay. (Job 6:2, 3; Hab. 1:1-3) Á ti ngeel ɓe de maaga naa ɗig doo sen nono, amaa naa mo joŋ hayya ne see naa nen maaga naa mo joŋ fẽn maa de baywoore wa.
6. Saɓlaŋ Absalom had mayse ne naa là? (Ko foton lay.)
6 De maaga jobo joŋ naa noga joŋ jobo maaga naa dan we ti ngeel ɓe ga no, maapo ga naa ɗig ga naa joŋ jee ɓen de maŋ sen lay. Naa joŋ we de maŋ sen no, maapo se ya’ wer ren ciŋ ni yaw. Naa ngaɓ wee ne ba de saɓlaŋ Absalom, weel maa ni Waŋ Dafidn ɗa. Ɓil ɓe hay sõõ debaŋ de maaga hẽn ɓe, weel maa ni wãy pan ɓe Amnon, suu de mãygeman ɓe Tamar de waŋ mono. Doo maaga jag liŋgi maa ni Moyisn hay wããge ne mono, Amnon hay go maa ‘warge wer fẽn maaga á joŋn mono. (Lev. 20:17) Koh de maaga á hay mbe ti ngeel ɓe ga ɓil Absalom sõõ laybla mono, amaa se hay diŋ ɓlagge ti maaga á ‘war Amnon go mono.—2 Sam. 13:20-23, 28, 29.
De maaga à suu de mãygeman ɓe Tamar de waŋ mono, Absalom ɗaw see ɓe jag sõõge ɓiln ga (Ko paragraf 6)
7. Jee yer siŋ ɗig ɗiggi taŋgu de maaga á ko joŋge jar de gurn là?
7 De maaga naa ko doo ga à bay liŋ jar maaga joŋ wo jar de gur wa mono, maapo ga naa kal ɗiggi ga da’ge bay wer joŋge fẽẽre maa ti ngeel ɓe wa. Naa ko saɓlaŋ jee yer siŋ maaga hay ɗiggi ga jar joŋ ɓlagge wo de da’ see ɓaara mo ɗa. Á wãã ga: “Jar debaycõõre wo nà doo kay no so no: wo mbaara tum jag ɓaara ɗemes lage”. (Siŋ. 73:12) De maaga á hay ko joŋge jar de gur debaŋ mono, se hay go de hãyge debaŋ. Se kal ɗiggi so ga goŋge Baa bay kayge wa. Á wãã ga: “Ndi kal ɗiggi maa laa wer ne sen mo hã’ no, se kal koge nen ɓi de põõre.” (Siŋ. 73:14, 16) Diŋ wersen so ga á wãã ga: “Ma ɓin mono, gwa’ me’ koɗ ga ɓaale ɓi de cel go celge sen kãã ma joŋ mopo see ɓi gà has ɓuy tuu, ɓaale ɓi naa ndarɗa seŋ gà.” (Siŋ. 73:2) Re maa de maŋ sen hay da’ hẽnbe po maaga á ɗen ga Alberto lay.
8. Joŋge de gur hãy hẽn naa po na hãyge là?
8 Hẽẽrebe po caa wo re ne Alberto see ga á hoo suŋgu maa ti tayge go freŋ. Ɓo’ge ti ɓen so, á bas joŋre maa doo ɓe ti taygen go, lan hẽẽrebe maaga hay laa wo wããre sen ɓuy, kol bay wo hoo sug ti ɓe wa. Á wãã ga: “Jiili ɓi hay sõõ debaŋ, lan ndi hay ko see ɓi go de mbiɗgi doo debaŋ”. Á men woge go ti taygeti wo, lan se men sii wããre Baa go nen kiŋgi dwee. Saɓlaŋ sen la ngaɓ fẽn maaga hres hayga naa ɗaw see naa we jag sõõge ɓiln ga, de maaga à joŋ naa we de gur no.
MAŊ SAƁLAŊ ƊEŊ MAAGA YESO SOƊ JOŊGE DE GUR MONO
9. Joŋge de gur maa hõn wo ga Yeso soɗ ra là? (Ko foton lay.)
9 Yeso diŋ saɓlaŋ maa ti ngeel ɓe ti ɓaŋ soɗge joŋge jar de guri. Jar debaŋ hay joŋ Yeso de guri, koh jar maa liŋ ni ɓaara wo. Jar maa see ɓe maŋ hay wo wããge ga á go de loɗge, jar maa peel ti tiŋ-Baa hay wo wããge ga ẽgre ɓen a le diŋ see sõõre wo. Lan soode maa Rom mbiɗ wo foo ɓe, joŋ wo bon ɓe, lan ‘war wo ne go. (Mark 3:21, 22; 14:55; 15:16-20, 35-37) Amaa, Yeso soɗ bon sen wo mo deŋ ɓuy bay sa’ bole. Naa had mayse see saɓlaŋ ɓe là?
Yeso diŋ saɓlaŋ maa de woore ti maaga à oo jag joŋge de gur ooge la mono (Ko paragraf 9-10)
10. Yeso hay soɗ joŋge de gurn na soɗge là? (1 Piyer 2:21-23)
10 Jaŋ 1 Piyer 2:21-23. a Yeso men saɓlaŋ maaga daŋgo ne naa maaga naa mo see ni, de maaga à joŋ naa we de gur no. Á hay de ko wur maaga à hay ba’a, lan wur maaga à wãã wããre. (Mat. 26:62-64) Re maaga à caa ra ne hẽn see mo deŋ ɓuy, á fer go ti maa po ni boŋ ga. (Mat. 11:19) Á hay bay ɗar jar joŋ bon ɓen, noga joŋ ra de ɓlagge de maaga á le’ wããre we no wa. Yeso hay ɗaw see ɓe werga á “raw men ren ɓuy ne Baa maga cag re de deele mono”. Yeso hay de koge ga Jeofa de ko maaga à joŋ see de gur mono. Á hay de kaŋ ɗiggi ga Jeofa de ko joŋge de gur no, lan caa wer ɓe yaŋ go ti wur ɓe.
11. De ɗeŋ maa hõn wo ga naa koɗ jag naa là? (Ko foton lay.)
11 Naa maŋ saɓlaŋ Yeso de joŋ hayya ne wããre naa, de maaga à joŋ naa wee de gur no. De wur maa po wo, á bay maaga naa wãã mopo noga joŋ mopo wa, werga ɓlagge maaga à joŋ naa de ɓe bay kwũy wa. Maapo naa maŋ ga naa wãã mopo ga, werga naa wãã mopo we no, se ya’ wer ren ciŋ ni yaw. (Ekl. 3:7; Jag. 1:19, 20) Wur maa po naa mbe maa wãã wããre de maaga naa ko mopo maaga joŋ ti ngeel ɓe ga, noga naa yaŋ de sãy wããge go ti hãge ɓil naa ti no. (Joŋre 6:1, 2) Hayga á yaŋ maaga naa wãã wããre no, naa mo dur go de ẽgre naa ɓuy maa wããge ɓe desãy, lan de hooge sugi.—1 Pi. 3:15. b
Maaga à joŋ naa we de gur no, naa mbe de kããge maa maŋ saɓlaŋ Yeso de maŋ ɗiggi maa wãã wããre ti wur ɓe, lan de ɗeŋ maa ti ngeel ɓe lay (Ko paragraf 11-12)
12. Naa joŋ joŋge maa kaŋ ɗiggi naa go ti “Baa maga cag re de deelen” là?
12 Naa maŋ mbe blam Yeso pa de kaŋ ɗiggi naa ti “Baa maga cag re de deelen mono.” De maaga à caa kiida naa we ti ngeel ɓe ga, noga à joŋ naa we de baywoore no, naa kaŋ wee ɗiggi ga Jeofa de ko fẽn maaga hres mono. Kaŋge ɗiggi sen kay naa maa soɗ joŋge de gur no, werga naa de koge ga á kne’ ge ren yaŋ wo ɓuy ti ngeel ɓe. Hayga naa kaŋ ɗiggi we ti Jeofa, lan gor we maaga á mo ‘wũy ren ɓuy no, naa lag de sõõ ɓil, noga hee de jar lan ga. Maapo ga joŋge tum de sõõ ɓil ne jar lan ti kaŋ wer naa joŋ fẽn maa de baywoore, noga joŋ ga naa mo hay de fruygi wa, noga ɓlag holaŋ naa de Jeofa.—Siŋ. 37:8.
13. Mayse kay naa maa soɗ joŋge de gurn desãy là?
13 Cwãy tu ga naa bay de kããge maa maŋ saɓlaŋ Yeso ti ngeel ɓe keɗed wa. Wur maa po wo, maapo ga naa joŋ, noga wãã mopo maaga fer hã lawge ne naa blam. (Jag 3:2) Day maa po, ɗeŋ maaga jar lan joŋ wo naa de baywoore, maapo hã lawge ne naa debaŋ, lan joŋ ga naa mo hay go de caa jiili tum nen naw naa. Hayga ndo yaŋ nen tee re sen lay no, hay go de bawge jag jiili ɓo ga Jeofa de ko re maaga ndo nen ɓe mono. Ni pa mono, Yeso maaga hay joŋ bon do joŋge de gur de ko fẽn maaga de gay moge mono. (Heb. 4:15, 16) Ciŋ ti saɓlaŋ Yeso maaga á hã ne naa, Jeofa baa yaŋ maa kay naa de maaga à joŋ naa we de gur no. Ko wee verse po wo ɓil kefder Rom wo ɓog ga kay wo naa ɗa pa.
“MEN WE BAA JOŊ RE SEN DIŊ SE”
14. Wããre maaga wãã ga “Men we Baa joŋ re sen diŋ se” da wããge ga hãylà? (Rom wo 12:19)
14 Jaŋ Rom wo 12:19. De maaga apotre Pol jor glog hẽẽrebe wo ga “men we Baa joŋ re sen diŋ se” mono, á hay wããge diŋ ti re maa hõnlà? Doo maaga naa da’ ɓil verse maa ciŋn la no mono, ‘re’ sen diŋ sõõge ɓil maa ni Jeofa no. Naa men re sen diŋ ne Jeofa de gor wur maaga á ‘wũy ren, lan de ɗeŋ maaga á ‘wũy ne mono. Blam maaga à joŋ hẽn naa Jaŋ de gur mono, á wãã ga: “Ndi dur debaŋ maaga ndi mo kne’ ren de ɗeŋ maa nen ɓi wa. Rom wo 12:19 kay me maa gor Jeofa.”
15. Wer mayse ga ɗawa diŋ ga naa mo men Jeofa ‘wũy ren diŋ se là?
15 De maaga naa gor ga Baa mo ‘wũy ren mono, naa da’ wer ɓe debaŋ. Hayga naa maŋ we ga naa ‘wũy ren diŋ naa no, naa yiŋ de caage jiili wo de lawge debaŋ. Amaa, hayga naa men Jeofa we ‘wũy ren diŋ se lay no, naa yãã go jag ɓaara. Jeofa yãã ga se kay naa. Sen doo ga á de wããge ne naa ga ‘men joŋge de gurn me ti coo do; ndi da’ faage ɓe yaŋ nono.’ Hayga naa yãã wããre maaga Jeofa wãã ga “Ndi poɗ ge wosela ɓuy diŋ ndi” we no, naa men ren go, de kaŋ ɗiggi ga Jeofa ‘wũy yaŋ de ɗeŋ maa ti ngeel ɓe no. Sen diŋ fẽn maaga kay Jaŋ maaga naa hay wãã le go ti ɓe ciŋ la mono. Á hay ɗig ɓil ɓe ga: “Hayga ndi gor Jeofa we no, á ‘wũyn yaŋ de woore ɗawa dedaŋ ndi’.”
“RAW EGRE ƁLAGGEN DE JOŊGE DE ELE.”
16-17. Tosge kay naa maa “raw egre ɓlaggen de joŋge de ele” na kayge là? (Rom wo 12:21)
16 Jaŋ Rom wo 12:21. Pol jor glog Kretiyẽ wo pa ga á mo “raw [wo] egre ɓlaggen de joŋge de ele.” Yeso wãã nen wããre ɓe maaga á sii ciŋ ti húulì ga: “Da we jar hee ɓay wo, tos we ti jar maga joŋ wo bon ɓay mono.” (Mat. 5:44) Se diŋ fẽn maaga á hay joŋn taw taw tu. Maapo naa ɗig ti bon maaga Yeso joŋ ne de maaga soode maa Rom hay ɓal wo ne go ciŋ ti koo mono. À hay joŋ bon Yeso debaŋ, lan se hay soɗ re maa de gaali wo debaŋ pa. Naa kãã maa da’ wer go ne bon maaga á joŋn mo ga.
17 Yeso had da Jeofa, lan oo de deele peel ɓe, koh de maaga á hay jo mbe bon debaŋ mono. Nen maaga á hay tos ga joŋ bon sooden wo mono, se raw wããge ga: “Baba, jar maga joŋ wo ndi de ɓlaggen mo deŋ men ɗig re ɓlagge ɓaaran go ne hara ti, werga á bay wo de ko re maga á joŋ wo mo deŋ wa.” (Lug 23:34) De maaga naa tos we ga, Jeofa mo kay jar maaga joŋ wo naa de baywoore no, se joŋ ga jiili naa mo hay de wooge, lan ga ɓil naa mo sõõ debaŋ wa. Se kay naa maa coo ɗiggi naa ti jar sen wo no.
18. Tosge kay Alberto wo de Jaŋ maa ooge jag joŋge de gur na kayge là?
18 Tosge hay kay hẽẽrebe maa ɓog wo ga naa hay wãã le ti ɓaara ciŋ ɓil hadge sen la, maa soɗ joŋge de gur maaga à hay joŋ ra mono. Alberto wãã ga: “Ndi tos ti hẽẽrebe maaga hay joŋ wo ndi ti ngeel ɓe ga mono. Ndi tos Jeofa ɓaale ngaɓa maaga á mo kay me maa men sõõ ɓil go ti re maaga hay da’ me mono.” De fruygi, Alberto fer go goŋ Jeofa de deele pa. Jaŋ wãã ga: “ɓaale ngaɓa, ndi tos ti hẽnbe maaga hay ma’ ɓil ɓi mono; de wii Jeofa ga á mo kay me maa fug ɓil go ne hẽn ti. Tosge maa de maŋ sen kay me maa kaŋ ɗiggi ti ɓe de woore, bay caa kiida ɓe. Tosge sen hã wo jam maa jag jiili me lay.”
19. Naa hay joŋ mayse hãã go ti tawge tamsir sen la là? (1 Piyer 3:8, 9)
19 Maaga naa ti tamsir se maa de ɓlaggen la ɗa mono, maapo à joŋ mbe tum joŋ naa de guri. Koh á mo a ba age laybla, naa mo men wii kayge go do Jeofa ti boŋ wa hase. Naa hay maŋ saɓlaŋ Yeso ti maaga á hay ɗiggi de maaga jar hay joŋ bon ɓe ɗiggi la mono. Day naa hay tum joŋ joŋre de yaŋ maaga Jeofa baa ne naa ɓil Wããre ɓen mono. Hayga naa joŋ sen we no, naa joŋ ge go de bawge jag jiili ga Jeofa kaŋ bosa’ yaŋ ne naa ti.—Jaŋ 1 Piyer 3:8, 9.
SIŊ 38 Jeofa kol ge ndo yaŋ de ẽgre
a Ɓil Piyer maa taŋgu maa kluuri ɓe 2 lan 3, Piyer wãã ti re maaga Kretiyẽ hay wo joŋ bon do patroŋ maa de hãã, noga do war maaga bay wo hã ɓil ti Baa wa.—1 Pi. 2:18-20; 3:1-6, 8, 9.
