Pol: Wùr hay de fruygi debaŋ! Nen Few Duugi nen kiŋgi maa 1985 mono, wùr hay go ɓil afiyoŋ maa woge ti ngeel maa taŋgu ga à laa wùr wo misiyoner ni mono—Liberia, ɓil ‘Afrique de l’Ouest’. Afioŋ oo de wùr Senegal. Anne wãã ga: “Boo gwa’ boŋ, naa joŋ go Liberia!” Blam sen mesaje a wùr le: “Jar maaga wo de rawge ‘Liberia’ wo ɓuy, ɗii wo go gesiŋ. Jar hay joŋ waŋ Liberia ni maa coo ngomna no; wersen wùr hay bay de kããge maa woge ni wa.” Naw maa 10 blamn, wùr joŋn de misiyoner po wo Senegal. Wùr hay laage ga à hay wo ‘war jar Liberia ni debaŋ; lan ga ngomna maŋ jag jar go laage siigi; werga à hay go ‘war jar maaga laa wo go siigi mono.

Anne: Wùr hay go de ɗeŋ debaŋ. Hãã le ti klee ɓi tu, à hay ɗe mege ga Anxious Annie (kaŋ nen ga Anne maaga caa jiili debaŋ). Koh maa caa nen faage go mono, hẽẽne joŋ me! Amaa, wùr hay go de maŋ ɗiggi maa rawge Liberia, koh de maaga á bay mbe gus wa mono.

Pol: Wùr de Anne ɓog ɓuy wùr biŋ ti prog po boŋ, nen wur bolaw ɓi sir Angleterre. Blam maaga wùr taw ‘lycée’ go mono, wùr ɓog ɓuy wùr kol piyoniyẽ. Pããre ɓi wo de man Anne hay wo tum jor glog wùr maa kol piyoniyẽ. Á hay wo de fruygi debaŋ ti maaga wùr hay de sãy hã see wùr go sag sag ti joŋre maa ni Jeofan mono. De maaga kiŋgi ɓi hay 19 mono, à ɗe me wo ti Betele, lan Anne baa blam ɓi wo ni nen kiŋgi maa 1982, blam maaga wùr da kããra go mono.

Anne: Wùr hay da Betel debaŋ, amaa wùr hay tum de sãy joŋ joŋre ti ngeel maaga à hay de sãy jar ti ni debaŋ maa sii wããren go mono. Wùr joŋ joŋre ti jeŋ hẽẽrebe maa ti Betel ga hay wo diŋ misiyoner mono, lan sablaŋ ɓaara maa de wooren joŋ ga wùr mo hay de sãy kol misiyoner ti lay. Tum tum de suŋ wùr hay tosge ti re sen hãã nen kiŋgi 3. Wersen, wùr hay go de fruygi debaŋ de maaga à hay ɗe wùr ti klasse maa 79 ti lakol Galaad, nen kiŋgi maa 1985 mono! À laa wùr wo Liberia, ɓil Afrique de l’Ouest.

Pol: Blam maaga wùr gor nen naw mbag Senegal mono, wùr maŋ Afiyoŋ maa taŋgu ga à ɓo’ faage ɓe maa woge Liberia mono. Hẽẽne hay joŋ jar debaŋ, day à hay bay mbe tum hã faage ne jar maa laage go siigi de suŋ wa ɗa. De maaga à laa roo ‘moteur’ mooda po le ngar jag debaŋ ti ngeel lumo mono, wosela ɓuy hay daŋge de ɗee. Maaga ɗiggi wùr mo hay de suuli mono,  wùr hay jaŋ kefder Siŋ wora de wãy ɓi tum de suŋ. Amaa, wùr hay da ngeel joŋre sen debaŋ. Anne hay sii wããre Baa tum. Day ndi hay joŋ joŋre ti Betel ti jeŋ hẽn naa Jaŋ Charuk a. Ndi had fẽẽre see ɓe pur debaŋ, werga á hay wo go de iggi Liberia ni debaŋ, day se hay de ko re maa see hẽẽrebe wo de woore.

Anne: Wer mayse ga wùr le’ da Liberia deparday tu là? Wer hẽẽrebe wo. Á hay wo naa nen dage go see wùr debaŋ, lan hay wo de deele. Wùr sa’ holaŋ wùr de ɓaara de woore, lan á kol wo diŋ jar maa ɓi feele wùr no. Á hay wo baa yaŋ maa de woore ne wùri, lan hay wo jor glog wùri. Siigi wããre hay wo ni de cõõre debaŋ. Jar maaga wùr hay sii wããre ne hara hay bay wo dage ga wùr mo raw deparday tu wa! Jar hay wããge ti Bible go ti ngeel ɓuy. Á hay go gus ne wùr maaga wùr mo hay ndal de ɓaara. Jar maaga wùr had Bible ne hara hay wo ngaɓa debaŋ, hãã nen maaga wur hay bay do wùr debaŋ maa had rage go ɓuy wa. Sen hay diŋ gayri maaga hã fruygi!

Pol: Nen kiŋgi 4, durgi maa ɓi sir sen ham jag gesiŋ ɗawa. Amaa, nen kiŋgi maa 1989 mono, fẽẽren coo wo go ɓuy, lan durgi maa de hãã tĩĩ were. Nen naw maa de 2 nen Few Gumugi, nen kiŋgi maa 1989 mono, soode maaga hay wo dur ngomna yãã wo ngeel maaga Betel hay ni mo ɓuy. Wùr hay bay de kããge maa wãã wããre ne jobo ga hay bay Liberia wa wa. Hay ba jar maa ɓi feele wùr wo, noga jar maa ti ngeel kluu Sedeewa Jeofa wo. Jar hay joŋ girgir wo de hãy hãy go ti ngeel ɓuy, rege hay bay debaŋ wa, lan à hay suɗgi de naare wo de waŋ debaŋ. Sir Liberia joŋ bon wer re sen nen kiŋgi 14.

Anne: Jar maa ti wer maa po hay wo dur wer maa tigriŋ, lan saara hay ‘war kããra lay. Soode hay wo go ti faage wo ɓuy, wuu hay do ɓaara debaŋ, gragge ɓaara hay yug yugi; lan saara hay laage liŋ ni jare, hoo wo fẽẽre maaga saara da’ liŋ ni ɓuy. Nen jar maa po wo, ĩĩgi jar hay diŋ doo “nga’ge kagre wo” nono. Jar durgin hay wo dig jar ti faage maa yãɗ fẽẽre maa do ɓaara no. Saara ĩɗ jar maa po wo go, lan sre’ wo húulín wo ciŋ ti kẽẽ ciŋ ti kẽẽ. Fẽẽre sen joŋ wo na de ngar Betel maŋ tu. Á ĩĩ wo hẽẽre naa wo go yoo ɓaara ni, misiyoner hay wo ni ɓog lay.

Hẽẽre naa maa po hay le’ wo bas tenen ɓaara go, werga á yoŋ wo hẽẽrebe maa ti wer maaga à hay kiɗ rage maa ĩĩgi go mono. Misiyoner maaga hay wo ni wo de jar maa ti Betel joŋ wo doo sen no lay. Hẽẽrebe maaga ɗee wo go do durgin a wo ti Betele. Tee ɓaara hay wo nage wer gesiŋ, tee jar lan ciŋ. Wùr hay nage tiŋma de jar maa tigriŋ wo ni 9.

Pol: Soode hay wo mbaara le laage wer wùr tum maa koge ga wùr yoŋ hẽẽre wùr po wo yawla. Ɗeŋ po hay nen wùr diŋ ga wùr hoo jar po wo 4 maa ngor ti ngeele: ɓog hay wo lagge nen fenetre, ɓog jag tiŋ lay.  De maaga jar maa jag tiŋn laa wo do we peel ɓaara no, sen da wããge ga re po baywa. Amaa, hayga á grag wo do ɓaara we go nen faale no, kaŋ nen ga jar durgin wo go de tĩĩgi. Hẽẽrebe maaga hay wo gorge ti fenetren, mo hay ɗee wo deparday maa yoŋ jar lan wo go.

Anne: Ti wur po, jar durgi maa po laa wo ti Betel de waŋ. Wùr daŋ yoŋge ti tuu mbiiri de mãygemanbe po. ‘Armoire’ hay wo ni, ngeel yoŋge hay wo ɓil ɓe ni mẽ’ẽ. Mãygemanben yoŋ ɓil ɓe. Jar durgin raw wo ciŋ, wuu wo do ɓaara. Á ma’ wo jag tiŋn de sõõ ɓili. Pol wii ne hara ga: “Wãy ɓi wo ɓi tuu mbiiri ni.” Á wãã sen diŋ maa maŋ jag ɓaara go maaga á mo laa wo ni wa. De maaga ndi ma’ jag ngeel maaga mãygemanben hay yoŋ ni mono, jag ‘armoire’ raa. Blam ɓe, ndi raw fer fẽẽre maaga hay wo ɓil ‘étagères’ ni, amaa se yãã wur do ɓi debaŋ. Wersen, see ɓi le’ daɗ mege go ɓuy. Ndi hay bul jag tiŋ na ɓulgi so là? Werga ndi hay go de caa jiili so mono, á de hay ko wo ga re po yaŋ. Ndi raw tos Jeofa le ɓil ɓi maaga á mo kay me. Ndi raw bul jag tiŋn go, lan hee jag ne hara bay joŋ hẽẽne. Jobo yoo ɓaara srog me go ti jeŋ, raw kalge ɓi tuu mbiiri no, wo la dus fẽẽre maaga wo ti ‘étagères’ wo go ɓuy. Sen ngel ne debaŋ de maaga á da’ jobo ni ga mono. Á dus mbaara wo kiɗ ɓil tiŋman wo so, go hãã ɓil ‘plafond’. Amaa saara da’ mopo ga de sen ɓuy.

Pol: Nen few puri, rege hay bay kãã wùr wa. Amaa rege maa ti nenterse hay kay wùr debaŋ. Hadge wããre Baa maa de toŋ hay diŋ hoole tãy wùri, day á hay hã ẽgre ne wùr maaga jiili wùr mo hay de suuli.

Wùr hay go de koge ga hayga wùr laa we go maa kiɗ rege noga bii no, wùr joŋ nen gor ti hẽẽrebe maaga hay wo de yoŋre ga so. Maapo ga jar durgin de hay ĩɗ wo ra go lay. Daŋgen so diŋ ga, ɗeŋ maaga Jeofa hay hã fẽẽre maaga wùr de sãy ɓaara ti, ti wur ɓe ne wùr, ngel wùr debaŋ! Jeofa ko nen ti wùri, lan kay wùr maa naa blum hẽẽne wùr no.

De maaga durgin de jo bon jar de peel de peel ni mono, cwãy maa ɓil Biblen hay kay wùr tum, lan hã ẽgre ne wùri. Ɓaale puri, hẽẽrebe daŋ wo go maa yãã tenen ɓaara go. Hẽẽrebe maa po hay wo wããge ga soɗge gayri durgi sen kay saara maa “soɗ bon maa kluu maaga a ge le” mono. Jar maa peel tayge po wo de hẽẽrebe maa jõõre dur wo go de ẽgre ɓaara ɓuy maa kay hẽẽrebe maa lan wo no. Hẽẽrebe maaga hay ɗee wo go ti sir maa tigriŋ, hay wo kay kããra ti holaŋ kããra, lan le’ wo sii wããre go ɓil sir sen wo. Á hay wo joŋ joŋre de fẽẽre maaga saara da’ wo yoo way, maa baa tiŋ taygeti wo, maaga à mo tay maa had Bible de kããra. Ti wur se maa de gayrin mono, taygeti wo de siigi wããre Baa, coɓ wo nen hẽẽrebe wo, lan kay ra maaga á mo laa wo do go wa. De maaga wùr de ɓrew rege wo de fẽẽre maaga jar de sãy ɓaara ti mono, hẽẽrebe ma po wii wo ɓaaran diŋ ‘sacs’ maa sii wããre Baa, ciŋ ti õõbe wo. Sen du’ jiili wùr debaŋ! Jar maaga hay wo ko decoo do bon maaga de hresge, hay wo co’ sug wããre maa de cõõre no. Sen ngel ra de maaga á ko wo ga Sedeewa Jeofa hay wo de fruygi, doo poɗag maaga de lerge nen suŋgu no mono! (Mat. 5:​14-16) Wer baage wuu hẽẽrebe wo ti siigi wããre Baan, jar durgi maa de hãã po kol wo go diŋ Sedeewa Jeofa wo.

Pol: De ngar ngeel maa po wùr hay men Liberia go. Wùr dog men sir sen go ɓaale 3 maa naw mbag koɗe. Ɓaale ɓoge, wùr hay men go nen kiŋgi boŋ de ti. Misiyoner po naa wer ɗiggi maaga a wùr de maaga wùr go de men Liberia mono: “Le Galaad, à hay had wùr ga wùr mo da hẽẽre wùr wo go de jiili wùr ɓuy, ti ngeel maaga wùr wo ni mo ɓuy. Wùr de hay joŋ na doo sen nono. Wersen, de maaga wùr hay men hẽẽrebe wo nen durgi mono, sen hay hã lawge ne wùr debaŋ!” De eln so diŋ ga, wùr hay kay hẽẽre wùr maa Liberia wo no, koh de maaga wùr hay le go ɓil sir maa tigriŋ ti jeŋ laybla mono.

Anne: Nen Few Kabge maa nen kiŋgi maa 1996 mono, wùr de war ɓi lan jar tigriŋ wo ɓog lay, hay go men sir no. Wùr hay ti mooda maa Betele, lan hay de ɗerewal joŋre maa ti Betel wo do. Wùr hay de sãy rawge ti ngeel maaga waŋ bay ni debaŋ wa, nen klewmeder 16, ti ngeel maa tigriŋ ɓil ‘ville’ no. De sen ni tu, jar durgin le’ wo ɓi leege wùr no. Á ma’ wo wuu wo ciŋ, dig wo mooda wùr no, lan laa wo jar le go siigi yoo wùr 3. Blam sen, saara raw de mooda wùr no, war ɓi hay wo ɓil ni. Man hẽẽne wùr yo’ go. Blam sen nokay tu, wùr ko Pol le de seege ti jeŋ wùri, cíi de ɗeege peel ɓe. Wùr hay ɗig ga à ma’ ne de wuu. Blam sen wùr ko ga á hay bay ne wa, werga á hay seege! Jee durgi po hay ma’ ne de maaga á hay srogge ɓe go ɓil moodan mono. Amaa wããge ɓen hay bay kluu wa.

Kamiyoŋ militer hay wo ti jeŋ ni maŋ go de baage de jare, jar sen hay wo go de caa jiili, go maŋ maa rawge. Wùr raw mbe ɗiigi ɓil kamiyoŋn so, koh de maaga ngeel hay bay mbe wo ɓil ni wa laybla mono, wùr raw mbe wo tõɗge ti jeŋ ni so, ngeel ɗaw do hay bay ba ni wa ɓuy yaw. Jee ya’ moodan ur de wùr gug gug, wùr hay day laage go. Wùr kem ne ga á mo oo, amaa, hẽẽne hay joŋge ɓe maa co’ sug wùri. Wùr wo ge mbe go so, amaa de maaga kamiyoŋn oo mokay, wùr hay go de gayri debaŋ wer maaga wùr ɗaw kamiyoŋn mono, see wùr hay daɗge lad lad do hẽẽne.

Pol: De maaga wùr ko õõbe maa see wùrn wo go de ɗage, lan de gragge mokay, sen ngel wùr ti maaga wùr mbe tenen ɗa pa mono. Wùr na ɓil pay po ti jeŋ ‘hélicoptère’ po ga weere wuu hay go de bagge ɓe ngaɓa, day se hay koge doo ga se go de ɓlagge nono. Toŋ ɓe, á raw de wùr Sierra Leone. De maaga wùr wo go Sierra Leone mono, wùr hay go de fruygi debaŋ ti maaga wùr hay tenen mono, amaa, wùr hay ɗiggi ti hẽẽre wùr maa Liberia wo debaŋ.

Anne: De maaga wùr wo go ti Betel maa Freetown ɓil Sierra Leone mono, wùr hay go de yããge, lan hẽẽrebe ko wo nen ti wùr de woore. Ndi fer ɗiggi ti fẽẽre maaga hay hres wo de ɓlagge Liberia mono. Ndi hay tum go de caa jiili ga fẽn maa de baywoore po hres yawla, lan ndi hay bay ɗiggi de woore wa. Fẽẽre maaga hay wo hresge ti jeŋ ɓi mo ɓuy hay bay wo ko mege diŋ cwãy wa. Day maa po de suŋ ndi pũy go, da’ see ɓi daɗge de ɗiggi ga fẽn po maa de baywoore hrese. Ndi hay ɓoɗ ẽgre de gayri. Pol ɗaw ndi, lan tos de ɓi. Wùr ‘waa siŋ maa ti twaywaŋ wo, hãã nen maaga ndi men daɗge go do hẽẽne. Ndi hay ɗiggi doo ga ndi go de loɗge nono, lan ga joŋre misiyonern joŋ do ɓi ga so lay.

Ti ɓi yõõ go ti fẽn maaga hres blam sen ti boŋ ga hase. Nen naw maa se renamn tu seŋ wur da’ kefder po wo ɓoge. Maa po boŋ yoo ɓaara hay diŋ ‘Réveillez-vous’ maa 08, Few Mbiiriwaygara maa nen kiŋgi 1996 no. Artikle po hay we ɓil ɓe ni, kluu ɓen ga “Comment venir à bout des crises de panique?” Ndi de hay da’ wer go ga wer mayse ga ndi hay tum daɗge do hẽẽne la go de se no. Maa de ɓogn hay diŋ Ngeel Gor ti Jare maa naw 15 Few Kabge, 1996, kluu artikle po hay ɓil ɓe ni ga “Où puisent-ils leur force?” Ɓil Ngeel Gor ti Jare sen, foto gibirgibir po ga graŋ ɓe go de caage see boŋ hay ɓil ɓe ni. Artikle sen naa wer ɓe ga doo maaga gibirgibir ya’ wer pudgi, lan rege, koh de maaga tãy ɓe mbe go de hragge laybla mono; doosen no lay, koh naa mo hay ba ko see naa go de hugli wer fẽẽre maaga naa yiŋ de ɓaara mo laybla, Jeofa mbe de kããge maa hã ẽgre ne naa tum maa kay jar maa tigriŋ wo. De artikle sen, Jeofa hã ẽgre maaga ndi hay de sãy ɓe ti ne ndi ti wur ɓe. (Mat. 24:45) Ndi kiɗ artikle maa tigriŋ ga hay wo de maŋ sen, lan ndi tay ti ɓaara ɓil ‘dossier’ po. Saara kay me debaŋ. Blam kiŋgi puri, ndi hay bay joŋ bon ɗiggi do ɗiggi maaga ndi hay ɗiggi taŋgu ne wa so.

Pol: Wùr hay de fruygi tum de maaga wùr fer le liŋ ni wùr Liberia mono. Go ti tawgeti kiŋgi maa 2004 mono, wùr hay go ti joŋre de daŋ kiŋgi 20. Durgin hay go de tawge. À hay de sãy boo Filiyale ti. Amaa, deparday tu, à ga wùr mo ya’ ti joŋre maa tigriŋ.

 Á hay diŋ joŋre maa de gayri nen wùr debaŋ. Wùr hay da hẽẽre wùr maa Liberia wo debaŋ. Á hay kol wo go doo jar maa ɓi feele wùr wo nono, lan wùr hay bay de sãy men rage go ti wa. Amaa wùr hay go de ko maaga Jeofa kaŋ bosa’ ne wùr ti, lan kay wùr de maaga wùr men jar maa ɓi feele wùr wo le go maa woge ti lakol Galaad mono. Wùr yãã joŋre se maa defay no. Joŋre sen raw de wùr Ghana, ti jeŋ ni.

Anne: Wùr raa go mberbe de maaga wùr men Liberia le go mono. Á hay ngel wùr debaŋ de maaga hẽn wùr maa de ko re lan de garge ga à ɗen ga Fraŋ wãã ne wùr ga: “Yõõ we ti go ti wùri!” Blam sen se naa wer ɓe ne wùr ga: “Wùr go de koge ga nday yõõ ti wùr go ti boŋ ga hase; nday de hay kaŋ ti ɓay go ɓuy diŋ ti joŋre ɓay maa defay no. Hã joŋre sen ne nday diŋ Jeofa, kaŋ wee ɗiggi ɓay diŋ ti hẽẽre ɓay maaga nday da’ ra wo ni mono.” Fẽn maaga hẽn wùrn wãã ne, jor glog wùr debaŋ maa baa barge de hẽẽrebe maaga wùr da’ ra wo ɓi sir se maa defay, ga wùr hay bay de ko jobo wo ni wa ɗa mono.

Pol: Amaa, hẽẽre wùr maa Ghana kol wo go diŋ jar maa ɓi feele wùr maa defay deparday tu pa. Sedeewa Jeofa hay wo wo ni debaŋ! Wùr had fẽẽre see de deele wo de hãge ɓil hẽẽre wùr maa defay sen wo debaŋ. Day blam maaga wùr joŋ joŋre wo Ghana kiŋgi 13 mono, à hoo nen wùr do de joŋre maa tigriŋ pa. À ga wùr mo see joŋ joŋre ti filiyale maa ‘Afrique de l’Est’ wo Kenya. Koh de maaga sãy hẽẽre wùr maa Ghana wo de Liberia hay mbaara baa wùr debaŋ laybla, amaa wùr baa barge de hẽẽre wùr maa tigriŋ wo wo ni pa. Lan doo maaga le Ghana wo de Liberia no lay mono, joŋre siigi wããre Baa hay wo Kenya ni debaŋ lay.

Anne: Ndi yiŋ de re maa de gayri wo nen naw ɓin debaŋ, lan de ngar ngeel maa po ndi hay go de caa jiili debaŋ. Re maa hã lawge wo mbaara de kããge maa gay naa ti hõõge see lan nen ɗiggi. Naa mo gor maaga Jeofa mo joŋ fẽn mbuɗgi maa yãã naa go jag fẽẽre sen wo wa. De maaga ndi le’ laa roo wuu wo we mbarge no, ndi ko see ɓi doo ga mopo bay ti manhoŋ ɓi wa so, lan doo ga do bay ti ɓi wa nono. Amaa, ndi had kaŋ ɗiggi ɓi ti kayge maaga Jeofa hãn ne wùr ɓuy maa coɓ wùr, de kayge maaga a le see hẽẽre wùr wo mo ɓuy no. Lan ndi ko ga de maaga naa yaŋ ya’ wer fruggi nen wããre Baa, tosge, woge ti taygeti, lan ti siigi wããre Baa lay no, Jeofa kay naa maa lagge ti ngeel joŋre naa no.

Pol: Jar maa po wii wo jag wùr ga: “Nday mbay de da joŋre maa do ɓayn yawlà?” Sir joŋ wo mbaara de woore, amaa maapo kol wo mbaara go de baywoore, lan de ɓlagge lay. Day, naa da ge de daŋ ngeel maaga à laa naa wo ni diŋ maylà? Diŋ hẽẽre naa maaga daŋ wo go, ga kol wo go diŋ jar maa ɓi feele naa wo mono. Koh de maaga wùr a mbe le ɓi feele sar sare, sir sar sar laybla mono, wùr da Jeofa ɓuy, lan ɗiggi wùr ti ɓe diŋ sen boŋ. Wùr hay ɗig ga à laa wùr wo maa jor glog ɓaara, amaa cwãyn so diŋ ga á coɓ wo wùr debaŋ.

Hẽẽrebe maaga wo go ti tamsir ɓuy diŋ fẽn mbuɗgi maaga Jeofa joŋ ne! Hẽẽre naa wo go ti ngeel ɓuy! De maaga naa yaŋ ti tayge maa ni Jeofan no, naa ko see naa go liŋ ni naa, lan ko see naa go de yããge. Naa go de bawge jag jiili ga naa ya’ wer kaŋ ɗiggi we ti Jeofa no, á hã ge ẽgre maaga naa de sãy ɓe ti ne naa.— Flp. 4: 13.