1. Paradis maa ti nentersen diŋ maylà, day naa mo hay baa wer see naa go maa joŋ mayse là?

 Paradis maa po yaŋ ti tamsir wara ga jar ngaɓa wo de joŋ fẽẽre maa de woore wo ɓil ɓe ni. Jar miliyoŋ pur wo de da’ jam maa ti ngeel ɓen ɓil paradis se no. Jar maaga wo go ɓil paradis sen wo go de baa wer see ɓaara maaga saara men go ti boŋ ga hase. Day saara de sãy maaga jar maa ti tamsir kruɓ ɓuy mo da’ wo paradis se ga tee ɓe baywa mo lay. Á diŋ paradis ma ẽlà? Paradis maa ti nenterse! a

2. Mayse ngel naa debaŋ ti paradis maa ti nentersen là?

² Sen ngel naa debaŋ ti maaga Jeofa joŋ ngeel po maa de woore yoo tamsir maa ni Manhúulí ga á koln go diŋ ngeel maaga jar de baycõõre, jar hee lan jar maa de hãã wo ni mono! (1 Jaŋ 5:19; Naa. 12:12) Jeofa Baa dage naa ko ga tamsir sen joŋ bon jar debaŋ; se diŋ wersen so ga se joŋ ngeel maa de woore maa kay jar maa wer ɓen wo, maaga á mo goŋ wo se nen jam. Bible ngaɓ paradis se maa ti nentersen doo “ngel yoŋre” lan “pay sugnee maga à kag bii wer ɓe nono.” (Esa. 4:6; 58:11). Bosa’ maa ni Jeofan kay jar maa ɓil paradis sen wo maaga á mo soɗ wo re gayri maa ti wur se maa blam taw de gaali wara no—Esa. 54:14; 2 Tim. 3:1.

3. Profesi maa ɓil Esay 65 hay bag jag go taŋgu na bagge là?

³ Jeofa hã nenterse ɓe ne profed Esay maaga á mo ngaɓ maaga naw jar maa ɓil paradis sen joŋ ge wo joŋge la mono. Ndo da’ ge ɗeŋ se maaga á ngaɓ ne ɓil Esay 65, ga hay bag jag go  taŋgu nen kiŋgi maa 537 T.W.N. Nen kiŋgi sen, à pog jar Jwif maaga hay mbuɗ wo faale ne ɓlagge ɓaaran go jag gebee ɓaara no, lan saara fer le Jerusalem. Jeofa ɓo’ bosa’ ne jar maa ɓen wo ti, lan kay ra maa ferge ‘wũy Jerusalem maaga hay go de ɓlagge mono, lan maa fer goŋge Baa maa ti ngeel ɓen le Israyel tigriŋ.—Esa. 51:11; Sak. 8:3.

4. Profesi maa ɓil Esay 65 go de bag jag wara na bagge là?

⁴ Bagge jag profesi se maa de ɓogn tĩĩ nen kiŋgi maa 1919 N.W.N., de maaga jar maa ni Jeofa maa waran yãã wo le go jag Babilon maa kluun mono. Blam sen, paradis maa ti nentersen tĩĩ wer gẽẽge go mẽ’ mẽ’ ti tamsir la ɓuy. Jar maa de baa wuu jag siigi wããren caa wo tayge wo debaŋ, lan naa wo nen joŋre maa ti nentersen go nen joŋre ɓaara wo. Werpiiri wo de naare maaga joŋre ɓaara hay wo taŋgu diŋ dage waŋ doo horogre wo, lan joŋge figliw, “laa [wo] joŋre ma defay ti [ɓaara], joŋre ma cwãy maga Baa kneʼ de faage ma keɗed bay ɗag mono.” (Efe. 4:24) Cwãy tu, debaŋ bosa’ maaga Esay wãɗ ti ɓaara bag ge wo jag yaŋ go ti ngeel ɓe diŋ ɓil paradis maaga joŋ yaŋ wo peel mono. Amaa, koh patala, fẽẽre maa de woore maaga naa da’ wer paradis maa ti nenterse mbaara ngaɓa deŋe. Naa ko maaga paradis maa ti nenterse sen kay naa kayge là, day wer mayse ga naa mo hay men go ti boŋ wa hase la ɗa.

Fẽẽre maaga á ko see jar maa ti paradis maa ti nenterse wo mono

5. Doo maaga Esay 65 wãã ne mono, naa da’ mayse de woore ɓil paradis maa ti nentersen là?

⁵ De wuuri lan bay jwaale. Profesi maa ni Esay ngaɓ sar sar maa ti holaŋ naw jar maaga wo ɓil paradis maa ti nentersen wo de naw jar maaga bay wo ɓil ɓe wa mono. (Jaŋ Esay 65:13.) Jeofa hã fẽẽre maaga jar maa ɓen wo de sãy ɓaara ti mo ɓuy ne hara maaga á mo ya’ wo see ɓaara see se. Á hã nenterse ɓe maa bay ɗagn ne naa, Bible wo de kefder maaga naa wo wer Bible maaga naa mo “re, . . . jo, . . . [lan] fruy.” (Tab ne de Naage nene 22:17.) Amaa, jar maaga bay wo ɓil paradis maa ti nentersen wa wo “Koŋne. . . , jwaale. . . , [lan] wo nen sõõre.” Saara bay de ko Baa wa—Amos 8:​11, NWT.

6. Jowel 2:​21-24 wãã ti kado maa ti nenterse ga Jeofa hã ra ne naa na ga hãylà, day naa da’ wer ɓaara na da’ge là?

⁶ Ɓil kefder maaga á yern mono, profed Jowel joŋ joŋre de fẽẽre maaga naa de sãy ɓaara ti, doo coore, yii, de noo olif maa ngaɓge ga Jeofa hã fẽẽre maaga daŋ go debaŋ wo ɓuy ne naa maaga hãge ɓil naa mo ya’ ciŋ. Yoo fẽẽre sen wo, naa da’ rege maa ti nenterse ni. (Jowel 2:​21-24) Ko ba ɗa, Jeofa hã Bible ne naa wo de kefder maaga naa wo wer ɓe go de woore, sid interned naa no, taygeti wo, taygeti maa kleere wo de taygeti maa kluuri wo lay. Hayga naa joŋ joŋre we de fẽẽre sen wo tum no, ni naa joŋ yaŋ jam, lan naa wùu yaŋ go de rege maa ti nenterse.

7. Mayse hã fruygi ne naa là? (Esay 65:​14, NWT)

⁷ De fruygi lan go de kããge. Jar maa ni Baan “ ’wad ge wo war yaŋ de fruygi” werga bosa’ maaga Jeofa hã ne hara co jag ɓaara debaŋ. (Jaŋ Esay 65:14.) Jar maa ni Jeofan joŋ wo de fruygi go de ‘ ‘ɓil ɓaara ɓuy” wer hadge maaga coɓ nen ɓaara, fẽẽre maaga Baa wãã ɓil Bible ga se joŋ ge ra wo mono, lan fẽẽre maaga naa de gor rage de hãge ɓil werga Yeso hã tenen ɓe go wer naa mono. De maaga naa ndal we ti fẽẽre sen wo de hẽẽre naa maa ti nenterse wo no, sen joŋ ga ɓil naa mo hay go feh debaŋ!—Siŋ. 34:9; 133:​1-3.

8. Fẽẽre maa kluuri ɓog ga ngaɓ paradis maa ti nentersen diŋ mayse wo là?

⁸ Dage wo de tayge jag maa ti holaŋ naa wo  diŋ fẽẽre maa kluuri ɓog ga naa da’ ti paradis maa ti nenterse mono. “Tayge jag sen go ti ngeel ɓe keɗed boŋ” ngaɓ wo ne naa diŋ fẽẽre maaga hres ge wo ti paradis, ti ngeel maaga jar maa ni Jeofan fruy wo de dage, lan de tayge jag boŋ maa de daŋ maa wara no. (Kol. 3:14) Mãygeman naa po wãã ti fẽn maaga se ko wur maaga se yiŋ de sedeewa Jeofa wo taŋgu mono ga: “Ndi hay bay de ko maaga à joŋ ɓil go feh joŋge la wa, koh liŋ dra’a. Ndi tõõ koge taŋgu tu ga dage yaŋ diŋ ni sedeewa Jeofa wo.” Wosela ɓuy maaga da we ga se mo hay de fruygi lan jam lay no, mo a le ɓil paradis maa ti nenterse maa ni naa no. Koh jar maa ti tamsir mo ɗig ba wo ti naa de baywoore ɗiggi laybla’ no, naa fruy wer togoɗge noga wer ɗuu naa maa bay ɗarge no.—Esa. 65:15.

9. Esay 65:​16,17 wãã mayse ti ɓaŋ bon maaga naa yiŋ de ɓaara patala mo là?

⁹ Jiili de suuli lan go de yõõ ti. Esay 65:14 wãã ga jar maaga yãã wo ɓaaran ga saara lag go faale paradis maa ti nentersen “raage wo yaŋ doo bon le ɓil ɓaara tem day saara law ge yaŋ go de hee ti gesiŋ”. Day naa wãã ti fẽẽre maaga ɓo’ wo bon jar maa ni Baan wo na ga hãy lay là? Bible wii ga Baa “yõõ ge ti re maga hay caa wo jar le ɓaan go” (Jaŋ Esay 65:​16, 17.) Jeofa caa ge wer ren yaŋ wo go ɓuy, hãã nen maaga naa ɗig ti bon maaga naa hay yiŋ de ɓaara taŋgu mo ga so.

10. Ndo ɗig ga tayge de hẽẽre naa maa ti nenterse wo diŋ bosa’ wer maylà (Ko foton lay.)

¹⁰ Koh patala, ti naa woo de maaga naa wo ti taygeti, ngeel maaga naa yõõ ti go ni, lan naa nii ɗiggi fẽẽre maa de ɓlagge maa ti tamsir wo go see naa hãã lay mono. Naa kay hẽẽre naa maa ti nenterse wo de maaga naa naa nen joŋre maa doo dage, jam, de el, desãy, joŋre maaga wo yoo le’ge maa ti nenterse go see ɓaara mono. (Gal. 5:​22, 23) Naa joŋ suse’ ne Jeofa debaŋ wer maaga naa ti tayge ɓen mono! Jar maaga lag wo ɓil paradis maa ti nentersen ko wo bagge jag profesi maaga Baa wãã ga se joŋ ge “ngel ma ciŋ wo de sir ma defay” yaŋ.

11. Doo maaga naa da’ ɓil Esay 65:​18,19 ne mono, paradis maa ti nenterse ga Jeofa joŋ ne mo hay joŋ see ne naa na joŋge là?

¹¹ Ɓil go feh feh maa joŋ suse’e. Esay naa wer ga wer mayse ga naa mo “hay de fruygi lan ɓil naa mo hay go fehfeh” ɓil paradis maa ti nentersen la. Ngeel sen diŋ fẽn maaga Jeofa joŋ ne. (Jaŋ Esay 65:​18, 19.) Á ngel naa ga de maaga naa ko ga á joŋ joŋre de naa maa kay jare, maaga á mo ɗee wo go see jag-baa maaga bay wo ti ngeel ɓe wa, lan mo a wo le ɓil paradis se de wooren lay mono! Naa  fruy debaŋ ti bosa’ maaga naa da’ wer maaga naa diŋ sedeewa Jeofa mono, day se jor glog naa maa wããge ɓe ne jar lan wo lay—Jer. 31:12.

12. Á joŋ see ne ndo na jonge de maaga ndo jaŋ fẽẽre maaga Jeofa joŋ ge ra wo ɓil Esay 65:​20-24 là, day wer maylà?

¹² Naa de fruygi lan joŋ suse’ ne Jeofa pa wer maaga holaŋ naa de ɓe de woore mono. Ɗig ti fẽẽre maaga naa joŋ ge ra, lan ko ge ra ɓil sir maa defayn mo ɗa! Bible wãã ga: “Wel ma ti pãã maga nà mbag day huu go tuu joŋ ge ni gà hase, je tããbe maga baa jag naw ɓen go gà joŋ ge ni gà lay”. Naa ‘bor ge tiŋ wo yaŋ day naa lag ge yaŋ ɓil ɓaara. Naa peɗ ge koore yaŋ day naa re ge leʼge ɓaara yaŋ.’ Naa “joŋ ge coo de koɗ koɗ ga so” werga “Jeofa de kaŋ bosa’ ne naa ti’. Jeofa wii ga se hã ge naw maa de fruygi debaŋ wo de joŋre maaga co jag naa debaŋ yaŋ ne naa pa. “Taŋgu maaga [naa] ɗe ne” mono, Jeofa ko ge fẽẽre maaga wosela boŋ boŋ ɓuy desãy ɓaara ti, lan “kãã maysela maga Tenen ɓuy go doo ga ɓil [ɓaara] da.”—Esa. 65:​20-24; Siŋ. 145:16.

13. Esay 65:25 wãã ti cooge seele jar de maaga á tĩĩ wo wer goŋ Jeofa na wããge là?

¹³ Jam lan go de yããge. Jar maaga joŋre ɓaara hay taŋgu doo horog wo hay coo wo seele ɓaara de woore wer kayge nenterse maa ni Baa no. (Jaŋ Esay 65:25.) Saara hay dur debaŋ maa men joŋre ɓaara maa de baywooren wo go. (Rom. 12:2; Efe. 4:​22-24) Cwãy tu, naa jar maa ni Baa, naa de ɓlagge see ɗa day naa joŋ ge mbe tum joŋ fẽẽre maaga bay wo ti ngeel ɓaara wa. Amaa, Jeofa tay jag “jar téeberen wo go”, jar maaga da wo ne, lan da wo kããra lay mono; se diŋ wersen so ga jar sen wo nen jam wo de tayge jag maa ti ngeel ɓen mono. (Tid 2:11) Á diŋ fẽn mbuɗgi maaga de kããge maa joŋge ɓe diŋ Baa pantway boŋ tawa tu!

14. Esay 65:25 bag jag go nen naw hẽnbe po na bagge là?

¹⁴ Jar mbe de kããge maa coo seele ɓaaran cwãy yawlà? Ko saɓlaŋ po ɗa. Wee jõõ po ga hay joŋ daŋgay ɓaale pur debaŋ de maaga se hay kiŋgi 20, lan se hay da waŋ debaŋ, lan hay joŋ figliw debaŋ pa. Á hay joŋ daŋgay wer joŋge freŋ, hragge jag tiŋ lan le’ge tiŋ, lan wer fẽẽre maa de baywoore maa tigriŋ wo. Á hay go tum gorge maa joŋ waŋ de wosela ɓuy. De maaga á laa cwãy maa ɓil Bible, lan tĩĩ wer a ge ti taygeti sedeewa Jeofa wo mono, sen bawn go jag jiili ga se da’ go diŋ fẽn maaga daŋgo debaŋ—paradis maa ti nenterse. Blam maaga se joŋ batem go mono, se ɗig ti ɗeŋ maaga profesi maa ɓil Esay 65:25 bag jag go ti se mono. Á coo seele ɓe maa doo mingir maa de hãã (kaŋ nen ga jee táabay maa de hãã) go doo weesam maa desãy (kaŋ nen ga jee maaga kiɗ jam tum) nono.

15. Wer mayse ga naa de sãy ɗe jar maaga á mo a wo le ɓil paradis maa ti nentersen lay là, day naa joŋ sen na de ɗeŋ maa hõn là?

¹⁵ Esay 65:13 wãã ga: “Diŋ wersen Waŋkluu Jeofa wãã ga.” Verse maa 25 wãã pa ga: “Jeofa wãã nono.” Wããre ɓen bag jag go tum ti ngeel ɓe. (Esa. 55:​10, 11) Paradis maa ti nenterse yaŋ wara cwãy. Jeofa joŋ ɓi feele po maaga go de tay jag boŋ. Yoo tayge maa ɓen, naa da’ jam wo de ti desãy ti tamsir se maa de hãã no. (Siŋ. 72:7) Wersen, naa de sãy kay jar ngaɓa debaŋ maaga á mo kol wo go hẽẽre naa maa ti nenterse wo. Naa joŋ sen diŋ de durgi maa kay jar maaga á mo kol wo go jar maa wer Yeso.—Mat. 28:​19, 20.

NAA KAY JAR MAA A GE ƁIL PARADIS MAA TI NENTERSEN NA KAYGE LÀ?

16. Mayse kay jar maaga á mo a wo le ɓil paradis maa ti nentersen là?

¹⁶ Wosela boŋ boŋ ɓuy yoo naa mo hay joŋ joŋre maaga paradis maa ti nentersen mo  hay joŋ de cõõre jag jar lan wo lay. Naa joŋ doo sen ne no diŋ de joŋ fẽẽren doo maaga Jeofa joŋ nono. Baa bay doole jar maaga á mo kol wo jar maa ti tayge maa sen wa. Amaa, á “jãã” jar le ni de desãy. (Jaŋ 6:44; Jer. 31:3) Jar maaga jiili ɓaara de woore ga da’ wo ga Jeofa diŋ jobo maa de dage, ya’ wo le se ɓe de see ɓaara tu. Naa jãã jar le ti paradis maa ti nentersen de seele naa, lan de joŋre naa maa de wooren wo na jããge lay là?

17. Naa jãã jar le ɓil paradis maa ti nentersen de joŋ mayse là?

¹⁷ Ɗeŋ po boŋ maaga naa jãã jar le ti paradis maa ti nentersen diŋ de naa nen dage wo de de el go see hẽẽre naa maa ti taygen wo. De maaga waare a wo we ti taygeti naa no, naa da ga á mo ko wo see ɓaara doo waare maaga a wo ti taygeti yoo jar Korente maa ɓaan wo nono. Á kol wo go wããge ga: “Baa yaŋ yoo ɓay cwãy.” (1 Kor. 14:​24, 25; Sak. 8:23) Se diŋ wersen so ga naa mo hoo sug ti jag liŋgi maaga wãã wo ga naa mo “lag. . . ti yoo kããra jam” mono.—1 Tes. 5:13.

18. Jãã jar le ti tayge maa ni Jeofan diŋ maylà?

¹⁸ Naa mo hay we tum durgi maa ko hẽẽre naa maa ti tayge wo doo maaga Jeofa ko ra nono. Naa joŋ doo sen ne no diŋ de kaŋ ɗiggi naa ti joŋre ɓaara maa de wooren wo no, amaa bay diŋ ti ɓlagge maa see ɓaara ga taw ge go mo wa. Hayga re naa we ti holaŋ naa no, naa kne’ ne de dage de maaga naa yaŋ tum “joŋ kããra de ele, de woore, de koge decoo kããra, lan de fug ɓil go ne kããra ti” lay. (Efe. 4:​32, NWT). Diŋ de sen so ga paradis maa ti nentersen jãã ge jar maaga da wo ga joŋ saara de el doo sen no lay le. b

 HAY TI PARADIS MAA TI NENTERSE NO

19. (a) Doo maaga naa da’ ɓil ngeel maa de gaɗge ga kluu ɓen ga “ Á men wo faagen go day saara fer le” mono, hẽẽre naa maa po wãã wo mayse de woore blam maaga á fer wo le ɓil paradis maa ti nentersen là? (b) Naa mo hay go de baa wer maa joŋ may lay là? (Ko foton lay.)

¹⁹ Paradis maa ti nentersen co jag naa debaŋ! Á diŋ ngeel maa de woore patala de daŋ maa ɓaa ɓuy, lan togoɗge Jeofa ni debaŋ de daŋ maa ɓaa ɓuy pa. Da ga naa mo hay wee tum joŋ suse’ ne Jeofa ti paradis maaga á joŋ ne naa mono. Wosela ɓuy maaga da ga se mo hay bay jwaale, de kããge, de jiili de suuli lan de yããge go lay mo hay ti paradis maa ti nenterse no! Amaa, da ga naa mo joŋ hayya ne see naa, werga Manhúulí dur go de ẽgre ɓe ɓuy maaga naa mo ɗee go see ngeel se de woore no. (1 Pi. 5:8; Naa. 12:9) Naa mo hã faage ne hẽn ti boŋ wa hase. Da ga naa mo dur go de ẽgre naa ɓuy maaga paradis maa ti nentersen mo hay de woore, go de fããge, lan go nen jam tum lay.