1. Jar maa po ɗig wo ti woge see jar sii wããre ne hara na ɗiggi là? (Ko foton lay)

 NAA sedeewa Jeofa, naa sii wããre Baa ne jar diŋ werga naa da Pan naa maa ciŋ no, lan werga naa de sãy kay jar maa koge ɓe ti lay. Sedeewa Jeofa wo ngaɓa de fruygi ti joŋre siigi wããre Baa. Amaa, se bay gus see jar maa po wo maa da’ fruygi ti siigi wããre wa. Wer maylà? Maapo jar maa po wo depãy debaŋ, lan saara ɗig ga saara bay de ko sii wããre Baa wa. Jar maa po woge ni jar joŋ see ne hara de baywoore de maaga à bay we de ɗe rage wo wa no. Jar maa po ɗig wo ga à yãã saara ga. Jar maa po ɗig wo ga saara bay de sãy le’ kããra de jar ti wa. Koh de maaga hẽẽre naa sen mbaara de da Jeofa mo ɓuy laybla no, se joŋ mbe ra de gayri maa sii wããre Baa go ne jar maaga á ko wo ra ti boŋ ga lay. Amaa de sen ɓuy saara mbe de ko de el siigi wããre Baa no, lan saara mbe tum jag ɓe siigi. Fruygi mayse ga Jeofa de ɓe wer ɓaara mo hã’ ne!

2. Hayga á bay we gus ne ndo maa da’ fruygi ti siigi wããre wa no, wer mayse ga ndo mo woo do go wa là?

² Á see ɓo seɓaa de gayri maa da’ fruygi ti siigi wããre wer ɗiggi sen wo no yaw? Hayga á yaŋ doo sen ne no, ni ndo laa do go wa. De bay kaŋ ɗiggi ti see ɓon ngaɓ ga ndo de fer ti see ɓo gesiŋ, lan ga wii ga ndo wa. Se ngaɓ pa ga ndo bay de sãy ngar jag de jar wa. Day jobo bay de sãy maaga nii se wo go wa, debaŋ ɓe de maaga á kiɗ ga se joŋ de el see jar mono. Pan ɓo maa ciŋn de ko gayri maaga ndo nen ɓe mono, day se de sãy hã  kayge maaga ndo de sãy ɓe ti ne ndo. (Esa. 41:13) Ɓil hadge sen la, naa ko ɗeŋ po yaŋ wo 5 maaga kay wo naa maa ooge jag ɗiggi sen, lan maa da’ fruygi ti siigi wããre Baa.

MEN WÃÃRE BAA HÃ ẼGRE MO

3. Mayse hay kay profed Jermi maa sii wããren go ne jar là?

³ Le ɓaa hãã wara, wããre maa ni Baan hã ẽgre ne jar maa ɓen wo de maaga joŋre maa de gayri yaŋ do ɓaara maa bag jag no. Naa ko wee saɓlaŋ profed Jermi ɗa. De maaga Jeofa hã joŋre siigi wããre ɓen ne hẽn do mono, á hay caa jiili go debaŋ. Jermi wãã ga: “Ndi bay de ko wããre wa werga ndi diŋ wel maa klee.” (Jer. 1:6) Mayse kayn maa da’ coɓge maa sii wããren go là? Wããre maaga Jeofa wãã ne hẽn hã ẽgre ne hẽne. Á wãã ga: “a le ɓil ɓi doo wùu maga de roɗge nen hm ɓi wo nono. Ndi gay ga ndi ɓeg jag ti ɓe amaa ndi kãã gà.” (Jer. 20:​8, 9) Koh de maaga sir maaga Jermi hay sii wããre ni hay mbe de gayri laybla mono, wããre maaga hay de hãge ne hẽn maa siigi hã ẽgre maaga á hay de sãy ɓe ti maa bag jag joŋren go ne hẽne.

4. Mayse joŋ de maaga naa jaŋ wããre Baa lan ɗig ti ɓe mo là? (Kolos wo 1:​9, 10)

⁴ Kretiyẽ da’ wo ẽgre maaga á wo de sãy ɓe ti diŋ ɓil wããre Baa. De maaga Pol ɓo’ leder wo ne kretiyẽ maa Kolos wo mono, apotre Pol wãã ni ga da’ge koge re maa cwãyn jor ge glog hẽẽrebe maa sen yaŋ wo, ga “Seele [ɓaara] mo hay doo mani jar mani Waŋkluun wo nono” nen maaga á mo hay wo tum “Leɗ [ . . . ] mbèere go ti wer joŋre ma de el ma honla ɓuy.” (Jaŋ Kolos wo 1:​9, 10.) Siigi wããre maa de cõõren yoo joŋre se maa de eln wo ni lay. Doo sen ne kay, de maaga naa jaŋ wããre Baa, lan ɗig ti ɓe lay mono, hãge ɓil naa ti Jeofa ya’ ciŋ ni, lan naa ko go ga á de el maaga naa mo sii wããre maa ti twaywaŋn go lay.

5. Naa joŋ joŋge maa da’ fẽẽre maa de woore wo nen jaŋge wo de fruggi nen wããre Baa naan là?

⁵ Maaga naa mo da’ wer wããre Baa mono, nen da ga naa mo hay ɗee deparday de maaga naa le’ jaŋge ɓe, frug nen ɓe, lan ɗiggi ti ɓe we no wa. Maŋ wur go see ɓe de woore. Hayga ndo yaŋ jaŋ wããre Baa ga ndo yiŋ we de verse po ga bay we laa wer do ɓo wa no, cegaɗ ne wa. Joŋ joŋre de Index des publications des Témoins de Jéhovah, noga Guide de recherche pour les Témoins de Jéhovah maa da’ wer ne verse se no. Hayga naa yaŋ far wur maa frug nen wããre Baa de woore no, naa joŋ yaŋ go de bawge jag jiili naa ga fẽn maaga Bible  wãã ra ɓuy diŋ cwãy. (1 Tes. 5:21) Ndo yaŋ go de bawge jag jiili ɓo no, sãy maaga ndo mo sii fẽn maaga ndo had ra go ne jar joŋ yaŋ ti ɓo.

BAG JAG SEE ƁO GO SEE SIIGI WÃÃREN DE WOORE

6. Wer mayse ga naa mo bag jag see naa go de woore see siigi wããren là?

⁶ Hayga ndo yaŋ go bag jag see ɓo see siigi wããren de woore no, ndo ko see ɓo yaŋ go de caa see debaŋ de maaga ndo le’ sii wããre we ne jar no. Yeso hay kay jar maa wer ɓen wo maaga á mo bag wo jag see ɓaara go peel bol taŋgu maaga se laa ra sii wããre mono. (Lug 10:​1-11) Werga á hay wo joŋ joŋre de fẽn maaga Yeso hay had rage de ɓe so mono, saara da’ fruygi debaŋ ti joŋre ɓaara maaga saara bag jag ɓe go mono.—Lug 10:17.

7. Naa bag jag see naa go see siigi wããren na bagge là? (Ko foton lay.)

⁷ Naa joŋ joŋge maa bag jag see naa go see siigi wããren là? Naa mo ɗig go ti fẽn maaga naa wãã ge ne go de woore de ɗeŋ wããre naa maaga naa wãã seɓaa mono. Á de el pa maaga naa mo ɗig go ti ɗeŋ wããre maaga jar fer ne naa ti sir sen go de woore, lan ni naa ɗig ti wããre maaga naa fer ge ne hara ti ɓaara go de woore lay. Blam ɓe de maaga naa le’ sii wããre ne jar mono, naa mo joŋ go de caa see, jag ti fege, lan naa mo joŋ see naa doo bar ɓaara nono.

8. Ti ɓaŋ maa hõn ga kretiyẽ wo doo loone pãy nen saɓlaŋ maaga Pol maŋn mo là?

⁸ Apotre Pol wãã ne hẽẽre ɓe kretiyẽ wo ti joŋre ɓaara ti siigi wããren ga: “Horog sen ɓil [saara] doo loone nono.” (2 Kor. 4:7) Loone pãy sen diŋ maylà? Á wãã diŋ ti jar joŋ joŋre ne Baa wo, jar maaga sii wo wããre maa de cõõre maa ni Baan go ne jar mono. (2 Kor. 4:1) Ti kal maa ni Poln le mono, jar trere hay wo joŋ joŋre de pãy wo maa hoor fẽẽre maaga daŋ wo go doo : rege wo, yíi wo, lan suŋgu. Doo sen no lay, Jeofa hã joŋre siigi wããre maa de cõõre maaga daŋ go ne naa. De kayge maa ɓen, naa da’ ẽgre maa sii wããren go de deele.

TOS MAA DA’ COƁGE

9. Naa naa blum hẽẽne jar noga maaga à yãã wããre naan ga na naage là? (Ko foton lay.)

⁹ De ngar ngeel maa po naa joŋ hẽẽne do jare noga ga dayla à yãã wããre naan ga. Naa naa blum hẽẽne sen na naage là? Ko tosge maaga apotre tos wo de maaga à maŋ jag ɓaara go sii wããre mo ɗa. Á joŋ wo hẽẽne ga,  amaa saara wii Jeofa ga, hã ẽgre ne weere jõõre ɓon wo nen maaga “Á mo sii wo wããre ɓon go bay hẽẽne.” Jeofa yiŋ jag ti tosge ɓaaran deparday tu. (Joŋre 4:​18, 29, 31) Hayga de ngar ngeel maa po naa yaŋ joŋ hẽẽne do jar téebeere wo no, naa mo tos Jeofa maa wii kayge lay. Wii kayge do Jeofa maaga dage ɓo see jar mo ya’ ciŋ ni nen maaga hẽẽne mo joŋ mo maa sii wããren go wa.

10. Jeofa kay naa maa sii wããren go na de ɗeŋ maa hõn wo là? (Esay 43:​10-12)

¹⁰ Jeofa hoo naa doo sedeewa ɓe wo nono, lan se wãã ne naa ga se kay naa yaŋ maaga naa mo hay de coɓge. (Jaŋ Esay 43:​10-12.) Naa ko ɗeŋ po wo 4 maaga á kay naa mo ɗa. Maa taŋgu no, Yeso see naa tum de maaga naa yaŋ sii wããre maa de cõõren no. (Mat. 28:​18-20) Maa de ɓog no, Jeofa de hoo jar peele ɓe wo maa kay naa. (Naa. 14:6) Maa de swa’ no, Jeofa hã nenterse ɓe maa bay ɗagn ne naa, maa ferge ɗig ti fẽẽre maaga naa hay had ra wo ne naa. (Jaŋ 14:​25,26) Maa de naa no, Jeofa hã hẽẽrebe wo ne naa maa kay naa nen joŋre siigi wããre no. Wer kayge maa ni Jeofan wo de hẽẽre naa maa ti nenterse wo mono, naa mbe nen da’ coɓge maa sii wããren go tum.

COOR ƊIGGI ƁO DE RE MAA SEE JAR NO, LAN HAY ƊIGGI DE WOORE

11. Naa da’ jar maaga naa sii wããre ne hara debaŋ na da’ge là? (Ko foton lay.)

¹¹ Ndo ko see ɓo go de woo do de maaga ndo wo sii wããre, ndo da’ jar liŋ ngaɓa ga mo yaw? Wii jag see ɓo ga: ‘Jar maa ɓi leege sen wo gen de ngar ngeel sen mo ka’ la là’? (Joŋre 16:13) Á wo le ti joŋre yaw noga ti lumo yawlà?’ Hayga á yaŋ ne no, maapo ga ndo da’ jar yaŋ debaŋ ti faage maaga ndo sii wããre yaw? Hẽn naa po à ɗen ga Josuwe wãã ga: “Ndi da’ jar maaga ndi sii wããre ne hara diŋ ti ngeel lumo wo, lan ti ngeel maaga jar joŋ ni ngaɓa debaŋ mono.” Josuwe wo de wãy ɓe Brijid da’ wo pa ga saara da’ jar maa sii wããre ne hara diŋ de ɗe rage ti telefon de maaga wur ɗeger hres go me’ mono, lan Wur Iggi de maaga wur jwa’ soole we go no.—Efe. 5:​15, 16.

12. Naa joŋ joŋge maa ko fẽẽre maaga jar hã ɓil ti ɓaara noga fẽẽre maaga co jag ɓaara debaŋ là?

¹² Hayga jar yaŋ bay de sãy co’ sug wããre maaga ndo siin ti debaŋ wa no, dur maa ko fẽẽre maaga de hãy rage mono noga fẽẽre maaga á hã wo ɓil ti ɓaara mono. Josuwe wo de Brijid joŋ wo joŋre de wiigi jag maaga à da’  ɓili, lan nen faale tract maa tĩĩ wer ndalge de jare. Ba doo maaga á joŋ wo joŋre de tract maaga kluu ɓen ga: Ndo ɗig ti wããre Baa na ga hãylà : Á wãã wo ga: “Jar po ɗig wo ga Bible diŋ Wããre Baa, maa po ɗig wo ga baywa. Ndo ɗig na ga hãy lay?” Wiigi jag sen jor glog jar maa ndalge de ɓaara.

13. Wer mayse ga siigi wããre naan diŋ fẽn maaga daŋ go koh jar mo hay ba mbe laa wããre naan wa là? (Jag Jõõ wo 27:11)

¹³ Koh de maaga jar mo hay ba wo co’ sug naa wa laybla no, naa go de bag jag joŋre maa do naa no. Wer mayse ne? Werga naa de joŋge diŋ fẽn maaga Jeofa wo de Yeso wo de sãy maaga naa mo joŋ ne ti mono—kaŋ nen ta’ ga naa go de joŋ sedeewa. (Joŋre 10:42) Koh naa mo da’ ba jar maaga naa sii wããre ne hara wa, noga á mo laa ba wo wããre naan wa laybla no, naa joŋ de fruygi werga joŋre naan co jag Jeofa.—Jaŋ Jag Jõõ wo 27:11.

14. Wer mayse ga naa mo fruy de maaga jee tigriŋ da’ jobo maaga de sãy had Bible ti we là?

¹⁴ Naa da’ fruygi pa de maaga hẽnbe po da’ jobo maaga de sãy co’ sug wããre maa de cõõren we ti mono. Kefder Ngeel Gor ti Jare ngaɓ joŋre siigi wããre maaga naa siin de kiɗgi mbarga maa klee ga yee go. Jar ngaɓa deɓaŋ dus wo go ɓi leege wo wer sar sar maa kiɗgi ɓe. De maaga à da’ mbargan we no, wosela ɓuy joŋ de fruygi; bay diŋ jee maaga da’ ne mo —tawa wa. Doo sen ne lay, siigi wããre diŋ joŋre maaga jar ngaɓa deɓaŋ de joŋge ɓe. Sedeewa Jeofa wo ɓuy wo de durgi maa sii wããren go ti ngeel ɓuy. Day wosela ɓuy joŋ de fruygi de maaga jobo tĩĩ wer a ge we ti taygeti no.

KAŊ ƊIGGI ƁO ƊIŊ TI DAGE ƁO SEE JEOFA LAN SEE JAR LAN WO NO

15. Joŋge joŋre de wããre maa ɓil Matiye 22:​37-39 kay naa maa ya’ fruygi naa ti siigi wããre Baa de peel ni na kayge là? (Ko foto maa nen lay.)

¹⁵ Naa mbe de kããge maa da’ fruygi ti siigi wããre de kaŋ ɗiggi naa ti dage naa see Jeofa, lan see jare. (Jaŋ Matiye 22:​37-39.) Ɗig ɓo ti maaga ɓil Jeofa joŋ go feh de maaga á ko naa joŋ joŋre se no, lan ti fruygi maaga jar da’ de maaga á tĩĩ wo wer had Bible mo ɗa! Ɗig pa ga jar maaga laa wo wããre maaga naa sii ne, lan ga far wo ɗiggi maa goŋ Jeofa da’ wo tenen maa tum yaŋ.—Jaŋ 6:40; 1 Tim. 4:16.

16. Naa joŋ joŋge maa da’ fruygi de maaga naa yaŋ de caa nen liŋ là? Hã saɓlaŋ po wo ɗa.

¹⁶ Re po maŋ jag ɓo go maa kalge go caw caw  yawlà? Hayga á yaŋ ne no, kaŋ ɗiggi ɓo diŋ ti fẽn maaga ndo de kããge maa ɓo’ nen go ne Jeofa wo de hẽẽre ɓon wo ga ndo da ra mono. De maaga cege Korona Virus le’ mono, Samuyel wo de Daniya hay wo de caa nen liŋ. Nen ngeel se de gaali ga á hay wo nen ɓe mono, saara hay sii wããre ti telefone, yer leder ne jare, lan hay wo had wããre Baa ne jar ti Zoom. Koh de maaga á mbe de cege kaŋser mo laybla no, Samiyel hay sii wããre ne jar maaga se hay yiŋgi de ɓaara mo ɓuy de maaga se hay ti dogda mono. Á wãã ga: “Wùr gay go nen ɗiggi, ti hõõgesee, lan ti nenterse do ren wo debaŋ. Wùr hay de sãy da’ fruygi wùrn diŋ see Jeofa.” Nen re sen ɓuy pa mono, Daniya le’ cege, lan à dig ne ti dogda nen few swa’a. Blam sen, se hay seege diŋ ti Felew grum nen few hiira’ pa. Á wãã ga : “Nen ren wo ɓuy ndi dur go de ngar ẽgre ɓi ɓuy, ndi sii wããre ne eŋfirmiyẽr maaga hay a ge ko ndi mono, lan ne jar maaga hay wo a ge laa fẽẽre wo liŋ mono. Wùr hay ndalge de woore ti telefon de wãy po maaga hay joŋ joŋre ne société médicale pa.” Koh de maaga Samiyel wo de Daniya hay bay mbaara go joŋge doo maa ɓaan ne wa so laybla mono, á joŋ wo fẽn maaga ẽgre ɓaara kãã mono, day saara da’ fruygi wer ɓe ni lay.

17. Ndo joŋ joŋge maa da’ge wer ɗeŋ maaga wo de ngaɓge ɓil hadge sen la là?

¹⁷ Ɗeŋ maaga à ngaɓ ra ɓil hadge sen la wo de woore ɓuy, hayga à joŋ joŋre we de ɓaara jag kẽẽ ɓuy no. Yaŋ maa hõnla ɓuy diŋ doo fẽn maa nen rege po ne no. De maaga à tay fẽẽre maa nen regen wo we ɓuy maa joŋge ɓe no, se joŋ de cõõre debaŋ. Maaga naa joŋ joŋre we de ɗeŋ sen wo no, se joŋ go ne naa gus maa nii ɗiggi maa de bay ngar wo go, lan naa joŋ de fruygi ti siigi wããre naan lay.