1. Jeofa gor do naa diŋ maylà?

 MOPO bay go hã fruygi ne wãy wo de war doo maaga á biŋ wo mbarga le defay mo wa. Amaa, koh de maaga á da mbaara mbargan debaŋ laybla mono, á bay wo de dage ga á mo hay tum klee wa. Jiili ɓaara car go debaŋ hayga mbargan bay we gẽẽge wa no. Doo sen no lay, ɓil Jeofa joŋ go feh debaŋ de maaga naa tõõ wer maŋ blam Yeso mono. Amaa, á bay dage ga naa mo hay tum diŋ weere kleere ti ɓaŋ nenterse wa. (1 Kor. 3:1) Ba yaw mono, á wii naa ga: “lag we go doo jar kluuri wo nono”.—1 Kor. 14:20.

2. Naa ko yaŋ ti hadge sen la diŋ maylà?

² Kolge go kretiyẽ maa de ruggi da wããge ga hãylà? Naa kol kretiyẽ maa de ruggi na kolge là? Hoole maa kiŋ kiŋn kay naa maa kolge go kretiyẽ maa de ruggi na kayge là? Wer mayse ga naa mo ɗig ga naa yaŋ go de ruggi, naa bay de sãy ya’ holaŋ naa de Jeofa ciŋ ni wa so na wa là? Naa yiŋ ge jag yaŋ ti wiigi jag sen wo ɓil hadge sen la.

KOLGE GO KRETIYẼ MAA DE RUGGI DA WÃÃGE GA HÃYLÀ?

3. Kolge go kretiyẽ maa de ruggi da wããge ga hãylà?

³ Wããre maa jag greg ga à koln go ga “ruggi” da wããge ga “jaŋre,” “keɗede,” “go de baa jage.” a (1 Kor. 2:6) Doo maaga naa klee ya’ naa gẽẽ go no lay mono, naa mo hay tum ya’ holaŋ naa de Jeofa ciŋ ni lay. Diŋ doo sen ne kay ga naa kol go kretiyẽ maa de ruggi mono. Sen diŋ cwãy tu ga koh naa mo hay ba go de ruggi laybla mono, naa de hay mbe tum gẽẽge ti nenterse de peel ni. (1 Tim. 4:15) Naa ɓuy, koh weere maa kleere maa ti tayge wo, mbaara de kããge maa kolge kretiyẽ maa de ruggi lay. Day naa ko koge ga naa diŋ kretiyẽ maa de ruggi so là?

4. À ko ga kretiyẽ go de ruggi diŋ see maylà?

 ⁴ Kretiyẽ maa de ruggi diŋ jee maaga hoo sug ti jag liŋgi maa ni Jeofan wo ɓuy; á maŋ ga se hoo sug ti maa po wo, men maa po wo go ga. Á mbe cwãy ga á de mnaysee, á joŋ ge mbe re maaga bay wo ni naŋ wa. Amaa á joŋ tum noga ɗig tum doo maaga Baa da ne no. Á go de laa joŋre maa defayn ti ɓe, day se dur debaŋ maa ɗiggi doo Jeofa ne lay. (Efe. 4:​22-24) Á go seɓaa joŋ joŋre de jag liŋgi wo de ‘principes’ maa ni Jeofan wo maa far ɗiggi maa de woore wo, wersen, á bay maaga se mo hay ko jag liŋgi wo go pur ɗa maa koge ga se mo joŋ joŋge la wa. De maaga á maŋ ɗiggi ti mopo mono, á dur debaŋ maa bag jag fẽn maaga se ɗign mo go.—1 Kor. 9:​26, 27.

5. Kretiyẽ maaga bay wo go de ruggi wa yiŋ wo de re ma hõn wo là? (Efes wo 4:​14, 15)

⁵ Ti ɓaŋ maa po pa mono, kretiyẽ maaga bay go de ruggi wa go gus maaga se le’ go nen re maa doo “liwgi” lan “ɗiggi jar bag bii jarn wo” lan hã ɓil ti wããre jar maaga dus wo wããre maa bag bii jar wo, ti gete’ wo de mbaa maaga à wãɗ ra ti (radio, tele,interned. . . ) ga bay wo diŋ cwãy wa mono, lan se men see ɓe bag bii ne aposta wo pa. b (Jaŋ Efes wo 4:​14, 15.) Á joŋ de hũni, ngaɓ jag de jare, jiili ɓe sõõ go gus noga fẽn po joŋ we mẽ’ ɗa se ma’ ɓaale go gus tu.—1 Kor. 3:3.

6. Wer mayse ga naa ngaɓ ruggi go ti nenterse de gẽẽge mbarga là? (Ko foton lay.)

⁶ Doo maaga naa wãã le go la no mono, Bible ngaɓ ruggi maa ti nentersen de gẽẽre maaga jobo gẽẽ, kol go kluu mono. Fẽẽre yaŋ wo ngaɓa ga joŋ wo do mbarga maa klee ga, wersen se joŋ de sãy maaga jee kluu mo kay se ti maa koɗge ɓe. Ba doo maaga mããbe wii mãy ɓe maa klee ga á mo ɗaw do se de maaga saara le’ caa nen faage we no. Day de maaga mãyn gẽẽ go mono, man ɓe le’ menge ɓe maaga á mo caa nen faage de see ɓe boŋ ɓe tu, amaa, se wãã mbe ne hẽn an ga á le’ caa nen faage we no, á mo ko nen go de woore ti ga mooda po de hresge yawlà. De maaga á gẽẽ go mono, se joŋ go de ko ɗeŋ maa koɗ see ɓe jag re maa de maŋ sen wo de see ɓe tu. Doo maaga weere maa kleere wo de sãy kayge jee kluu ti maa hresge go ne re maa po wo ti no lay mono, kretiyẽ maaga bay wo go de ruggi ti nenterse wa ɗa wo de sãy kayge kretiyẽ maaga wo go de ruggi ti maa ɗeege go see fẽẽre maaga ɓlag wo holaŋ ɓaara de Jeofa, lan maa far ɗiggi maa de woore wo lay. Ti ɓaŋ maa po pa mono, kretiyẽ maaga go de ruggi le’ maŋ ɗiggi we ti fẽn po no, á frug nen ‘principes’ maa ɓil  Biɓle wo go de woore maa ko ɗiggi Jeofa ti fẽn sen ɗa, blam maaga se maŋ ɗiggi kay.

7. Kretiyẽ maaga wo go de ruggi joŋ mbaara de sãy kayge jar maa tigriŋ wo ti lay yawlà?

⁷ Day sen da wããge ga kretiyẽ maaga go de ruggi bay nen yãã kayge jobo wa so, go de kãã see ɓe yaw? Baywa. Jar maaga wo go de ruggi debaŋ ti wããre Baa wo de sãy kayge ti de ngar ngeel maa po wo lay. Amaa, maapo ga jee maaga de gẽẽge ti nenterse ɗa gor mbe ga jar lan mo wãã wo ne se ti fẽn maaga se de joŋ ne, noga ti ɗiggi maaga se de maŋ mono. Sara ɓen so diŋ ga, jee maa de ruggin de maaga á wii kayge do jar maaga wo go de ruggi ti wããre Baa debaŋ ga wo go de ko wer ne fẽẽre po wo debaŋ mono, se go de koge ɗa ga se de kããge maa maŋ ɗiggi de see se, lan ga se oo ge jag re maaga a le wer ɓe diŋ se.”—Gal. 6:5.

8. Ti ɓaŋ maa hõn ga kretiyẽ maaga go de ruggi joŋ sara là?

⁸ Doo maaga à ko sara jar kluuri wo diŋ see sug sug ɓaara no lay mono, joŋre jar maaga wo go de ruggi ti wããre Baa joŋ wo sar sar lay, ba doo maaga jar maa po joŋ wo de koge re debaŋ, maa po coɓ wo jag re debaŋ. Maa po wo de yaŋ debaŋ, maa po ko wo decoo jar debaŋ pa. Ni pa mono, de maaga kretiyẽ maa de ruggi ti wããre Baa po wo ɓog da’ wo see ɓaara we nen re po boŋ no, á far wo ɗiggi sar sare, amaa, ti ɓo’ge ti ɓen diŋ ga ɗiggi ɓaara sen joŋ wo de woore nen Baa ɓog ɓuy. Sen diŋ see maaga ɗiggi wosela ɓuy wãã ne hẽn mono. Amaa, wosela ɓuy yoo ɓaara caa kiida kããra ti ɗiggi maaga saara farn sar sar mo ga. Amaa, á dur wo maaga jag saara mo hay de laage.—Rom. 14:10; 1 Kor. 1:10.

NAA KOL KRETIYẼ MAA DE RUGGI NA KOLGE LÀ?

9. Gẽẽre maa ti nentersen joŋ de see ɓe tu yawlà? Naa wer ɓe.

⁹ Mbarga gẽẽ, mẽ’ mẽ’ kol go kluu de see ɓe, amaa, jobo kãã maa ruggi go ti nenterse ti ngeel ɓe keɗed de see ɓe ga. Sen diŋ saɓlaŋ hẽẽrebe maa Korente wo ga yãã wo wããre maa de cõõre no, joŋ wo batem go, da’ wo ẽgre nenterse maa bay ɗag no, lan da’ wo wer wããre maaga apotre Pol sii ne hara mono. (Joŋre 18:​8-11) Amaa kiŋgi wo joŋge blam sen mbag mono, jar maa po wo yoo ɓaara ngaɓa hay bay wo go de ruggi ti wããre Baa wa ɗa. (1 Kor. 3:2) Naa joŋ joŋge maaga tee re sen mo a naa wa là?

10. Naa mo hay joŋ diŋ mãyse maa kolge go de ruggi ti nenterse là? (Jud 20)

¹⁰ Maaga naa mo hay kol go kretiyẽ maa de ruggi mono, nen da ga naa mo hay de sãy kolge go jee maa de ruggi ti ɗa. “Jar bay ti” maaga bay wo dage ga saara mo gẽẽ go ti nenterse wa, joŋ wo go de ruggi ti boŋ ga. (Jõõ. 1:22) Naa bay de sãy maaga naa mo hay joŋ doo jobo maaga go kluu, amaa kaŋ ɗiggi diŋ ti pããre ɓe wo maa maŋ ɗiggi mo wa. Amaa naa diŋ de sãy joŋge doo jar maaga wo de kããge maa far ɗiggi, lan dur wo maaga holaŋ saara de Jeofa mo gẽẽ ciŋ mono. (Jaŋ Jud 20.) Hayga ndo yaŋ joŋ joŋre maa bag jag ɗiggi sen go no, tos Jeofa maaga á mo hã “ɗiggi wo de ẽgre maa joŋge” ɓe ne ndo.—Flp. 2:​13, NWT.

11. Jeofa hã mayse ne naa maa kay naa maa ruggi go ti nenterse là? (Efes wo 4:​11-13)

¹¹ Jeofa bay gorge ga naa mo kol go jar maa de ruggi ti nenterse de ẽgre naa wa. Á hã jar koɗ naa wo de jar had naa ti tayge maa kay naa maaga naa mo kol go kretiyẽ maa de ruggi ti nenterse, hãã nen maaga “Naa wo yaŋ go ɓod jag kluuri go ti ngel ɓe keɗed de ngar Krisi.” (Jaŋ Efes wo 4:​11-13.) Jeofa hã nenterse ɓen ne naa maaga naa mo hay de “ɗiggi mani Kris ɓil naa.” (1 Kor. 2:​14-16) Ni pa mono, Baa hay srog glog jar yer Wããre maa de cõõre (Evangiles) maa 4 wo no ,maaga naa mo ko ɗeŋ ɗiggi Yeso, wããre ɓe, de joŋre ɓe de maaga á hay ti tamsir la mono. Hayga ndo yaŋ ɗiggi  doo Yeso, lan yaŋ joŋ joŋre doo se ne lay no, ndo kol yaŋ go diŋ jee maa de ruggi ti nenterse.

HOOLE MAA KIŊ KIŊN KAY NAA MAA KOLGE GO KRETIYẼ MAA DE RUGGI NA KAYGE LÀ?

12. “Hadge maa taŋgu maaga coo ga ti krisn” diŋ maylà?

¹² Maaga naa mo kol go kretiyẽ maa de ruggi mono, naa mo hay ko fẽẽre go debaŋ de daŋ maaga à had ne naa taŋgu ti Yeso mẽ’ mẽ’ mono. Yoo hadge se maa mẽ’ mẽ’n wo mono, naa da’ hadge ti fẽẽre wo ngaɓa: mbuɗgi faale ne ɓlagge, hãge ɓili, batem, lan birgi jar le go ni. (Heb. 6:​1, 2) Fẽẽre sen wo mo deŋ diŋ hadge maa mẽ’ mẽ’ wo ga kretiyẽ mo hay hã wo ɓil ti ɓaara mono. Se diŋ wersen so ga, apotre Piyer had ti fẽẽre sen wo de maaga á sii wããre Baa ne ngaɓa wur Few Paŋtekot mono. (Joŋre 2:​32-35, 38) Naa mo hay yãã wããre sen wo maa kolge go jar maa wer Yeso. Sen diŋ tee maaga Pol ɓo’ sug naa ga jee maaga yãã hadge maa ti birgi húulí we ga no, jee sen bay diŋ jee maa wer Yeso maa ti ngeel ɓe wa. (1 Kor. 15:​12-14) Amaa, naa mo hay ko fẽẽre de daŋ hadge sen wo maaga naa mo kol go jar maa de ruggi ti nenterse.

13. Naa joŋ joŋge maa da’ge wer hoole maa kiŋ kiŋ ga naa da’n ɓil Hebre wo 5:14 mo là? (Ko foton lay.)

¹³ Hoole maa kiŋ kiŋn sara de hadge maa mẽ’ mẽ’ maa ɓil Bible wo. Hoole sen diŋ jag liŋgi maa ni Jeofan wo de ‘principes’ maaga kay wo naa maa ko ɗiggi ɓe mono. Maaga hoole se maa ti nentersen mo kay naa mono, naa mo hay frug nen wããre Baa, ɗig ti ɓe, lan naa mo joŋ joŋre de ɓe. Hayga naa joŋ sen we no, ni naa de hadge diŋ ɗeŋ maŋge ɗiggi maaga co jag Jeofa. c—Jaŋ Hebre wo 5:14.

14. Pol joŋ joŋge maa kay kretiyẽ maa Korente wo maaga á mo rug wo go ti nenterse là?

¹⁴ Day de ngar ngeel maa po á bay gus see kretiyẽ maaga bay wo go de ruggi ti nenterse wa maa far ɗiggi ti fẽn maaga wããre Baa bay go de wããge ti ɓe de woore ta’ wa mo wa. Hayga jag liŋgi po bay we go de wããge ti ɓe ta’ wa no, jar maa po ɗig wo ga saara mbe de kããge maa joŋ ɗiggi saara. Jar maa po wii wo maaga à joŋ joŋge la mono, amaa ni faage ɓe bay go de ɓo’ge ti’ wa lay. Ba doo maaga kretiyẽ maa Korente wii wo Pol ti jag liŋgi maaga de ɓo’ge ti rege maaga à hay le go de sii jag de ɓe ne sõõre wo, maa koge ga saara re rege sen yaw, baywa  yawla. Nen maaga Pol mo hay wãã ne hara ga á mo hay joŋ wo joŋge la mono, se wãã ne hara ga wosela ɓuy “de kããge maa maŋ ɗiggi” ga se nen rege ɓe noga baywa diŋ se de see ɓe. Á ndal de ɓaara ti ‘principes’ po maa ɓil Bible wo maa kay rage nen maaga ɗiggi ɓaara mo caa kiida ɓaara wa, lan á mo hay ma’ wo ɓaale kããra wa lay. (1 Kor. 8:​4, 7-9) Pol kay kretiyẽ maa Korente wo maaga á mo gẽẽ wo go ti nenterse, nen maaga á mo joŋ wo joŋre de ɗiggi ɓaara maa far fíí fẽẽre, de daŋ maaga á mo hay see wo diŋ de ɗiggi kããra, noga kiɗ jag liŋgi maaga de ɓo’ faage ti fẽẽre wo mono.

15. Pol joŋ joŋge maa kay kretiyẽ maa Hebre wo maaga á mo gẽẽ wo go ciŋ ti nenterse là?

¹⁵ Naa da’ hadge maa de woore ɓil leder maaga Pol yer ne kretiyẽ maa Hebre wo mono. Jar Hebre maa po hay men wo gẽẽge go ciŋ ti nenterse; Á wãã ne hara ga “ nen maaga [saara] de hay rege go diŋ hoole so, day [saara] yaŋ hãã patala joge diŋ pãã ɗa le la”. (Heb. 5:12) Á laa wo yãã fẽẽre maa defay maaga Jeofa hay hadge ɓe ne hara ti taygen mo ga. (Jõõ. 4:18) Ko ba ɗa, de maaga Yeso húu go mono, Jeofa hay bay dage ga hoo sug ti jag liŋgi maa ni Moyisn wa so. Amaa kiŋgi go blam 30, jar jwif maa po mbaara ga à de hay hoo sug ti ɓe ɗa. (Rom. 10:4; Tid 1:10) Kiŋgi se 30 hay mbe de kããge maaga jar jwif hay laa mbaara wer ne wããre maaga à bay hoo sug ti jag liŋgi sen wa so mono! Jee maaga yaŋ de jaŋ kefder maaga Pol ɓo’ wo ne jar Hebre wo ko mbe tu ga ɓil ɓe diŋ rege maa ti nenterse maa kiŋ kiŋ. Kefder sen hay kay rage maa koge ga ɗeŋ goŋge Baa maaga á hay wo goŋge ɓe wer Yeso de daŋ maa ni Moyis no. Á hã coɓge ne hara maa ya’ wer sii wããre Baa, koh de maaga jar jwif hay mbaara kaŋge ne hara nen mono.—Heb. 10:​19-23.

HAY KAŊ ƊIGGI TI SEE ƁO WA

16. Blam maaga naa gẽẽ we go ciŋ ti nenterse no, naa joŋ mayse pa là?

¹⁶ Naa mo dur bay diŋ maa kolge go kretiyẽ maa de ruggi tawa wa, amaa maaga naa mo lag tum diŋ kretiyẽ maa de ruggi. Diŋ wersen so ga naa mo hay kaŋ ɗiggi ti see naa debaŋ wa mono. (1 Kor. 10:12) Naa mo hay wee tum “lam [see naa] maa koge ga naa mbe de gẽẽge ciŋ ti nenterse yawla.—2 Kor. 13:5.

17. Leder maaga Pol ɓo’ ne jar kolos wo ngaɓ de el lagge de ruggi na de ɗeŋ maa hõnlà?

¹⁷ Ɓil kefder ɓe maaga á yer wo ne jar kolos wo mono, Pol fer wããge ti woore lagge tum de  ruggin pa. Koh de maaga kretiyẽ maa Kolos hay wo mbaara go de ruggi ti nenterse laybla mono, Pol wãã ne hara ga á mo men wo see ɓaara baa bii ne jar maa ti tamsir wo wa. (Kol. 2:​6-10) Day Epafras maaga hay go de ko taygen de woore, hay tum tosge maaga kretiyẽ sen wo mo “hay go de bag jag ti ngel ɓe keɗed”, kaŋ nen ga á mo kol wo go de ruggi. (Kol. 4:12) Sen had naa de maylà? Pol wo de Epafras da’ wo ga maaga naa mo lag de ruggi mono, á wiii durgi do naa debaŋ, lan á wii kayge maa ni Baan lay. Á hay wo dage ga kretiyẽ maa Kolos mo lag wo go de ruggi tum, koh jag re maa hõnla la ɓuy.

18. Maa po re mayse da’ kretiyẽ maaga go de ruggi là? (Ko foton lay.)

¹⁸ Pol wãã ne jar Hebre wo ga maa po ga Jeofa men mbe kretiyẽ maa de ruggi go maa tum lay, hayga á bay we joŋ hayya ne see ɓe wa no. Hayga á bay we yãã jag liŋgi Jeofa wa no, maapo ga se ya’ go see Jeofa hãã nen maaga se joŋ ge gus ne hẽn maa mbiɗ faale ne ɓlagge ɓen wo ga so, lan da’ fuggi ɓil maa ni Baan ga so lay. Fẽn maa de wooren so diŋ ga kretiyẽ maa Hebre hay bay wo go de a ge ti ngeel sen wa ɗa. (Heb. 6:​4-9) Day naa wãã ti jar maaga hay bay wo sii wããre Baa wa so, noga jar maaga à hay sa’ ra ti tayge, day saara fer mbe mbiɗ faale ne ɓlagge ɓaaran wo blam na ga hãy lay là? Mbiɗgi faale ɓaara ne ɓlagge de fer ti gesiŋn ngaɓ ga á wo sara de jar maaga Pol wãã ti ɓaara mono. Sen go tinoo tu ga jar sen joŋ wo de sãy kayge Jeofa ti de maaga á fer wo we le see ɓe no. (Ese. 34:​15, 16) Maapo ga jar maa peel tayge mbaara de kããge maa wii mãygemanbe noga weegemanbe maaga go de ruggi ti nenterse, maa kay jee ɓen maaga á mo fer sa’ holaŋ ɓe de Jeofa.

19. Naa de maŋ ɗiggi maa joŋ mayse là?

¹⁹ Hayga ndo yaŋ de sãy kolge go kretiyẽ maa de ruggi ti no, ndo bag mbo jag ɗiggi ɓo sen yaŋ go! Ya’ wer had cwãy maa kuɗum kuɗum maa ɓil Biblen wo de peel ni, lan dur maaga ndo mo hay ɗiggi doo Jeofa de peel ni. Lan hayga ndo yaŋ diŋ kretiyẽ maa de ruggi patala no, dur maaga ndo mo hay doo sen ne maa tum.