Ndo hay kon ɓo we?
Wer mayse ga jar maaga bay wo diŋ jar Israyel wa hay wo joŋ joŋre yoo soode maa ni Dafidn wo lay là?
TAŊGU tu ɗa, soode maaga hay wo waare yoo soode maa ni Dafidn wo diŋ Seleg jee amonid, Uri jee hitid, lan Yitma jee Mohab no. a (1 Kron. 11:39, 41, 46) “Jar Keretiyẽẽn, Peletiyẽẽn lan jar Gad” hay wo yoo soode maa ni Dafidn wo ni lay. (2 Sam. 15:18) À hay ko jar Keretiyẽẽ wo de jar Peletiyẽẽn wo diŋ jar po ga wo de sa’ge see jar Filistẽẽ wo debaŋ. (Ese. 25:16) Maapo ga jar Gad hay wo diŋ jar maaga a wo le Gad ɓi sir Filistẽẽ daŋge.—Jos. 13:2, 3; 1 Sam. 6:17, 18.
Wer mayse ga Dafid de hay hoo mbe waare wo le ti soode yoo maa ɓen wo ni lay là? Á hay de koge ga á wo diŋ jar maa de deele see se, lan debaŋ ɓe peel Jeofa. Ba doo maaga kefder The New Interpreter’s Dictionary of the Bible wãã ti jar Keretiyẽẽ wo de jar Peletiyẽẽ wo ga: ‘ ‘Á lag wo de deele see waŋ Dafid nen re maa de gaali maaga á hay yiŋ de ɓaara ti waŋ ɓen mo ɓuy.” Á joŋ wo doo sen ne na joŋge ne? De maaga “jar Israyel wo ɓuy” maŋ [wo] wer see ɓaara go see waŋ Dafid lan raw wo tay see ɓaara go see “Seba je ma bay ngar po” mono, jar Keretiyẽẽ wo de jar Peletiyẽẽ lag wo de deele see Dafidi, lan kay wo ne maa giŋ Seba. (2 Sam. 20:1, 2, 7) Wur po pa, Adoniya weel maa Dafid hay le’ ga see yãã waŋ go doo Dafidi. Amaa jar Keretiyẽẽ wo de jar Peletiyẽẽ lag wo de deele see Dafidi, lan kay wo ne maa hay Salomoŋ jee maaga Baa hay go de baage ɓe maa hayge ti waŋ mono.—1 Waŋ. 1:24-27, 38, 39.
Waare maa tigriŋ ga hay oo de deele debaŋ see Dafid pa diŋ Itay maa Gad. Itay wo de jar durgi maa wer ɓe 600 kay wo Dafid de maaga weel ɓe Absaloŋ hay mbiɗ wer see ɓe maaga see kol waŋ mono. Taŋgu ɗa Dafid wãã ne Itay ga á mo joŋ waŋ sen wa werga á hay diŋ waare mono. Amaa Itay fer ne hẽn ni ga: “[Jeofa] yaŋ mbe tenene day waŋ je wãã re ɓin yaŋ mbe tenen lay. Riŋga waŋ je wãã re ɓin wo ti ngel ma hon ne, huu go yaw, tenen yaw wejõõ ɓon joŋ ge nà ni lay!”—2 Sam. 15:6, 18-21.
![[Foto maa ti paaje 31]](https://assetsnffrgf-a.akamaihd.net/assets/m/2024367/univ/wpub/2024367_univ_cnt_1_xs.jpg)
Itay hay de deele see Dafidi, Waŋ maaga Jeofa baa ne mono
Koh de maaga jar Keretiyẽẽ, jar Peletiyẽẽ wo de jar Gad hay wo mbaara diŋ waare mo laybla’ no, saara hay de koge ga Jeofa diŋ Baa maa cwãy no, lan saara hay de koge pa ga Dafid diŋ waŋ maaga Jeofa baa ne. Á hay co jag Dafid debaŋ de maaga jar se wo de deelen hay lag wo see ɓe mono!
a Jag liŋgi maaga naa da’ ɓil Dogge jag liŋgi 23:3-6 wãã ga jar Amorid wo de jar maa Mohab wo ge wo ti tayge maa ni Israyel wo ga. Amaa, maapo jag liŋgi sen hay bay da wããge ga á mo kol wo go doo jar Israyel wo ti fẽẽren ɓuy wa; day á hay bay maŋ jag ɓaara go maaga á mo tay wo de jar Israyel wo wa na wa lay, noga ga saara bay de kããge maa lagge yoo jar Israyel wo wa na wa pa. Ko Etude Perspicace des Ecritures, Volume 1, p. 100.
