1. À hay seege de tayge maa ni Jeofan le ti wur maa ni Yeson naa seege là?

 TUM de maaga Jeofa hã joŋre we ne jar maa ɓen wo no, se gor ga á mo joŋ wo ne hãy hãy wa. (1 Kor. 14:33) Ko ba ɗa, á diŋ dage Baa ga wããre maa de cõõren joŋ go de siigi ti tamsir krub ɓuy mono. (Mat. 24:14) Jeofa hã faage ne Yeso maa ko nen ti ɓe. Day Yeso joŋ nen maaga à mo joŋ ne hãy hãy wa. Ti wur maa ni apotren wo le, de maaga tayge hay wo go de carge ti ngeel ngaɓa mono, à hay hoo jar maa peel tayge wo maa seege de joŋre maa ti taygen wo no, lan maa koɗ jar maa ti taygen wo no. (Joŋre 14:23) Wo Jerusalem, tayge ancien wo, ga à da’ apotre wo ni de jar maa de ruggi maa tigriŋ hay wo far ɗiggi wo lan ɓoɗ wo ra wo ne tayge wo, maaga á mo joŋ wo joŋre de ɓaara. (Joŋre 15:2; 16:4) Wer hooge sug ɓaara ti jag liŋgi maaga à ɓoɗ wo ne hara mono, “ngaɓa ɓaara yaɗ de pel ti naw tum.”—Joŋre 16:5.

2. Hãã le nen kiŋgi 1919, Jeofa koɗ jar maa ɓen wo, lan hã rege maa ti nenterse ne hara na hãge là?

² Hãã wara, Jeofa mbe de seege de jar maa ɓen wo ɗa. Hãã le nen kiŋgi maa 1919, Yeso joŋ joŋre de tayge jar maaga nenterse Baa de sreŋ rage po wo mẽ’ maa seege de joŋre siigi wããre Baa no, lan maa hã rege maa ti nenterse ne jar maa wer ɓen wo ɓuy. a (Lug 12:42) Sen go tinoo tu ga Jeofa de kaŋ bosa’ ne joŋre ɓaaran ti.—Esa. 60:22; 65:​13, 14.

3-4. (a) Hã saɓlaŋ po maaga ngaɓ maaga naa da’ wer tayge maa ni Jeofan mo ɗa. (b) Naa ko mayse wo nen hadgen la là?

 ³ Hayga siigi wããren de hay we hãy hãy no, naa de hay joŋ de kããge maa bag jag joŋre maaga Yeso hãn ne naa do mo go ga. (Mat. 28:​19, 20) Naa ngaɓ wee ne ba de saɓlaŋ po ɗa: hayga ɓi leege mo hay wo we go de carge ga no, wosela ɓuy hay sii wããre Baa mbe ti ngeel maaga se da tu. Ɓi leege maa po, hẽẽre naa wer sar sar de hay dog wo sii wããre Baa ni ɓaale ngaɓa, amaa ɓi leege maa po de hay gwan wo go bay siigi lay. Nday yaŋ ɗiggi ti ɗeŋ maa tigriŋ po wo sar ga de kay naa ti tayge maa ni Jeofan pa yawlà?

⁴ Doo maaga Yeso hay seege de tayge maa wer ɓen de maaga á hay gesiŋ la no mono, se de seege wara de jar maa ni Baan wo doo sen ne lay. Ɓil hadge sen la, naa ko saɓlaŋ maaga Yeso men ne naa yaŋ, lan ɗeŋ maaga tayge maa ni Jeofan wara de joŋ joŋre de ɓe yaŋ lay. Naa ko yaŋ pa diŋ ɗeŋ maaga naa ngaɓ go ga tayge maa ni Jeofan de cõõre jag naa mono.

TAYGE MAA NI JEOFAN JOŊ JOŊRE DE SAƁLAŊ MAAGA YESO MEN MONO

5. De ɗeŋ maa hõn ga naa maŋ blam Yeso là? (Jaŋ 8:28)

⁵ Yeso had fẽn maaga se joŋn lan maaga se wããn see Pan ɓe maa ciŋ no. Tayge maa ni Jeofan maŋ saɓlaŋ Yeso de joŋ joŋre de wããre Baa maa kay naa maa caa ɓil fẽn maa de el wo de maa de ɓlagge, lan maa ɓo’ faage fẽẽre maaga naa joŋ nen naw naa ne naa. (Jaŋ Jaŋ 8:28; 2 Tim. 3:​16, 17) Tum naa da’ ɓoge sug maa jaŋge, lan maa kay naa maa joŋ joŋre de Wããre Baa. Naa da’ fẽẽre maa de woore maa hõn wo wer yaŋ sen là?

6. Fẽn maa de woore debaŋ ga naa da’ ti hadge Biblen diŋ maylà?

⁶ Naa da’ fẽẽre debaŋ wer maaga naa frug nen wããre Baa de jaŋ kefder naan wo mono. Ko ba ɗa, naa mbe nen tab hadge maa ɓil Biblen wo de ɓo’ge faage fẽẽre maaga tayge maa ni Jeofan ɓo’ ne naa mono. De maaga naa ko ga yaŋ maaga á baa ne naa a le ɓil Bible mono, kaŋge ɗiggi naa ti tayge maa ni Jeofan ya’ ciŋ ni debaŋ.—Rom. 12:2.

7. Yeso hay siɗgi diŋ wããre maa hõn là, day de ɗeŋ maa hõn ga tayge maa ni Jeofan maŋ saɓlaŋ ɓe là?

⁷ Yeso hay sii “Wããre maa de cõõre maa ti twaywaŋ mani Baan go.” (Lug 4:​43, 44) Day se wii jar maa wer ɓe maa 12 wo ga á mo sii wo wããre maa ti twaywaŋn go lay. (Lug 9:​1, 2; 10:​8, 9) Wara lay, jar maaga wo de sa’ see ɓaara see tayge maa ni Jeofan ɓuy sii wo wããre maa ti twaywaŋn go ti ngeel maaga saara da’ see ɓaara ni mo ɓuy, koh de joŋre maa de hãge ne hara do ti tayge mo ɓuy.

8. Togoɗge mayse ga naa de ɓe là?

⁸ Á diŋ togoɗge maa naa de maaga naa sii cwãy go ne jar ti twaywaŋ maa ni Baan mono! Togoɗge sen bay go diŋ maa jar ɓuy wa. Ko ba ɗa, de maaga Yeso hay gesiŋ la mono, á laa men faage ne sõõre wo maa hã sedeewa ti ɓe ga. (Lug 4:41) Wara, taŋgu maaga jobo mo kol go jee sii wããre yoo sedeewa Jeofa wo mono, say á mo hay coo seele ɓe de woore peel Jeofa ɗa. Naa ngaɓ go ga togoɗge maa wer siigi wããren de cõõre jag naa diŋ de joŋ sedeewa go ti ngeel ɓuy, lan tum de maaga ẽgre naa kãã we maa joŋge ɓe no. Naa da ga naa joŋ doo Yeso ne lay, diŋ wersen so ga naa dur go de ẽgre naa ɓuy maa sii wããre Baa ne jare, lan maa had cwãy ne hara.—Mat. 13:​3, 23; 1 Kor. 3:6.

9. Tayge maa ni Baa naa nen ɗuu Baa go na naage là?

⁹ Yeso kaŋ nen jar ti ɗuu Baa. Nen tosge ɓe maaga á tos Pan ɓe maa ciŋ mono, Yeso wãã ga: “Ndi kaŋ nen ɓaara we ti ɗuu ɓo.” (Jaŋ 17:​26, NWT) Doo Yeso ne lay, tayge maa ni Jeofan dur go de ẽgre ɓe ɓuy maa kaŋ nen jar ti  ɗuu Baa. La Bible,Traduction du monde nouveau fer ɗuu Baa le ti ngeel maaga á hay wo ni mo ɓuy. Bible maa sen go patala de yerge ɓuy noga see ɓe de daŋ jag 270. Ɓil apendis A4 lan A5 maa ɓil Bible sen la, ndo ko yaŋ wer mayse ga à hay fer ɗuu Baa le ti ngeel ɓaara ɓil kefder sen la yaŋ. Apendis C, maaga à da’ ɓil Bible sen, ngaɓ wer mayse ga ɗuu Baa mo hay joŋ ɓaale 237 ɓil kefder maa de yerge jag gregn là.

10. Ndo had mayse see saɓlaŋ wãy maaga tiŋ ɓe Myanmar là?

¹⁰ Doo Yeso no lay, naa de sãy kay jar ti ngaɓa debaŋ maa ko ɗuu Baa. De maaga wãy po kiŋgi 67 wo Myanmar laa ga ɗuu Baa yaŋ mono, á du’ jiili ɓe hãã nen maaga se raa. Day se wãã ne mãygeman naa maaga had ne ga: “Ndi tĩĩ laage ga ɗuu Baa ga Jeofa taŋgu nen naw ɓi diŋ wara ɗa. . . . Ndo had fẽn maaga daŋ go ga ndi hay had sen ti boŋ ga me”. Saɓlaŋ sen ngaɓ go ga de maaga jobo maaga kiɗ cwãy laa we ga ɗuu Baa yaŋ no, sen coo naw ɓen deɓaŋ.

HAY WEE TUM ƁO’ NEN GO GA TAYGE MAA NI JEOFAN DE CÕÕRE JAG ƁAY

11. Jar maa peel tayge naa wo nen de el tayge maa ni Jeofan go na naage là (Ko foton lay)?

¹¹ Jar maa peel tayge ɓo’ wo nen go ɓo’ge ga tayge maa ni Baan de cõõre jag saara là? De maaga tayge maa ni Jeofan ɓo’ faage mopo we le ne jar maa peel tayge wo no, saara ko nen go ti ɓe de woore taŋgu ɗa, maaga saara joŋ joŋre de ɓe ti ngeel ɓe keɗede. Ko ba ɗa, á daɗ wo yaŋ bay diŋ ti ɗeŋ siigi wããre maa ti taygetin wo de joŋge tosge tawa wa, amaa, ti ɗeŋ maa koɗ sããre maa ni Krisn wo lay. Jar maa peel tayge maaga joŋ wo joŋre de fẽẽre maaga tayge maa ni Jeofan ɓoɗ faage ɓe kay wo jar maa ɓil taygen maaga á mo ko wo see ɓaara go de yããge, lan de dage.

12. (a) Wer mayse ga jag naa mo hay de tayge de jar maa peel taygen wo là? (Hebre wo 13:​7, 17) (b) Wer mayse ga naa mo ko diŋ fẽẽre maa de el maa see jar maa peel taygen wo là?

¹² Hayga jar maa peel tayge hã wo jag liŋgi we ne naa no, naa mo hoo sug ti ɓe go de jiili naa ɓuy. Naa joŋ we doo sen ne no, saara bag jag joŋre maa do ɓaaran go gus lay. Bible jor glog naa ga naa mo hoo sug, lan mo hay yãã jag jar maa peel naa wo no. (Jaŋ Hebre wo 13:​7, 17.) Amaa, á bay gus de ngar ngeel maa po wo wa. Wer maylà? Werga á wo diŋ jar maa ti mnaysee. Amaa, hayga naa kaŋ ɗiggi we diŋ ti joŋre ɓaara maa de baywooren wo, ga bay we diŋ ti maa de wooren wo wa no, ni naa de kayge diŋ jar hee naa wo no. Wer mayse ga naa wãã doo sen ne là? Jar hee naan da wo ga naa mo hay de ɓrawge ga Jeofa joŋ joŋre de tayge maa ɓen maa ɓo’ faage fẽẽre wo ne naa. Naa joŋ joŋge maaga naa mo da’ wer go ne gete’ jar hee naa wo no, lan mo ɗee go see ɓe là?

MEN JOBO GO HÃY KAŊGE ƊIGGI ƁO TI TAYGE MAA NI JEOFAN WA

13. De ɗeŋ maa hõn ga jar hee Baa kiɗ wo ga saara joŋ tayge maa ɓen de ɓlagge là?

¹³ Jar hee Baa kiɗ wo ga saara mo kol fẽẽre maa de woore ti tayge naan wo go diŋ fẽẽre maa de baywoore. Ko ba ɗa, Jeofa gor do jar maa goŋge ɓen wo ga á mo hay wo go de fããge nen ɗiggi, nen joŋre, lan ti nenterse. Á wãã go de woore tu ga wosela ɓuy maaga seele ɓe bay de woore wa, lan ga bay we dayge cooge wa no, mo hay joŋ ti taygen wa. (1 Kor. 5:​11-13; 6:​9, 10) Naa hoo sug ti jag liŋgi se maaga Bible wãã ne naa mono. Amaa, werga naa hoo sug ti jag liŋgi sen so mono, jar hee naan wãã wo ga naa bay da jar wa, naa sa’ jare, lan ga naa bay ko decoo jar maaga joŋre ɓaara sara de maa ni naan wa.

14. Le wer gete’e maaga à caa ne tayge maa ni Baa see diŋ wo là?

 ¹⁴ Da’ wer go ne ngeel maaga gete’n a wo le ni mono. Manhúuli dus gete’ ne tayge maa ni Jeofan see. Á diŋ “pan gete’ lay.” (Jaŋ 8:44; Tĩĩ. 3:​1-5) Naa mo hay go de kaŋge ti naa ga Manhúuli joŋ joŋre de jar hee naa wo maa caa gete’ ti tayge maa ni Jeofa no. Sen hay le joŋge ti wur maa ni Yeson wo de kretiyẽ maa taŋgun wo le lay.

15. Jar maa peel jag-Baa maaga bay wo ti ngeel ɓe wa joŋ wo Yeso wo de jar maa wer ɓen wo na joŋge là?

¹⁵ Koh de maaga Yeso hay bay mbe de ɓlagge see wa, lan hay mbe joŋ fẽẽre mbuɗgi maa de woore wo debaŋ mo laybla no, Manhúuli joŋ joŋre de jar po wo maa dus gete’ ti ɓe. Ba doo maaga jar kluuri maa peel jag-baa maaga bay wo ti ngeel ɓe wa wãã wo ne jar ga hã ẽgre ne Yeso maa nii sõõre wo go ne jar ti diŋ “ Belsebul waŋ sõõren wo no.” (Mark 3:22) De maaga à de caa kiida Yeso mono, jar kluuri maa peel jag-baa caa wo re ne hẽn see ga á diŋ jee ɗar ɗuu Baa, lan jor wo glog ngaɓan maaga á mo wãã wo ga ‘war Yeso go. (Mat. 27:20) Go blam hãã de maaga jar maa wer Yeson hay wo sii wããre maa de cõõren mono, jar hee ɓaaran “raw wo jãɗ nen jar maaga bay wo jar Jwif wan wo ne [hara] ti” maaga á mo joŋ wo bon ɓaara. (Joŋre 14:​2, 19) Doo maaga Joŋre 14:2 wãã ne mono, Ngeel Gor ti Jare maa 1 Few Bããre 1998 naa wer ɓe ga : “Jar maaga hay wo wer Manhúuli hay bay wo de sãy laa siigi wããre maaga kretiyẽ siin wo ti wa, lan saara hay wãɗ wããre maa de baywoore ti ɓaara nen maaga jar mo co’ sug ɓaara wa, lan ni pa, hay wo caa hee de ɓaara pa.”

16. Naa mo hay fer ɗig ti ti mayse de maaga naa laa gete’ we ti tayge maa ni Jeofan là?

¹⁶ Hãã le ti siekle maa taŋgun Manhúuli bay de men gete’ ɓen wa. Á wara de “jãɗ jar ma ti  tamsir wo kruɓ ɓuy” ɗa pa. (Naa. 12:9) Hayga nday laa wããre maa de baywoore we ti tayge maa ni Jeofan noga ti hẽẽre naa maaga see wo de taygen no, fer wee ɗiggi ti ɗeŋ maaga jar hee Baa hay wo joŋ bon Yeso, wo de jar maa wer ɓe maa taŋgun wo no. Wara, à de joŋ bon jar maa ni Baan wo, lan à wãã ti ɓaara de baywoore doo maaga Bible hay le go de wããge ɓe nono. (Mat. 5:​11, 12) Hayga naa yaŋ go de ko jee gete’ no, lan naa yaŋ joŋ hayya ne see naa maa koɗ see naa no, naa hã ɓil ti gete’ sen wo ga. Day naa joŋ joŋge maa koɗ see naa là?

17. Naa joŋ joŋge maaga gete’ maaga à caa ne tayge maa ni Jeofan see mo hãy naa wa là? (2 Timote 1:13) (Ko ngeel maa de gaɗge “ Ndo joŋ joŋge de maaga ndo laa gete’ we là”)

¹⁷ Co’ wee sug gete’n wo wa. Apotre Pol ngaɓ fẽn maaga naa mo joŋ hayga naa laa wããre maa de baywoore wo we ti naa no. Á wãã ne Timote ga á mo wãã ne jar maa po wo ga “á mo had wo hadge maga bay ti ngel ɓe wa wa” lan ga á mo “men [wo] wããre ma ɓaaɓaa ma de dog jagn wo go.” (1 Tim. 1:​3, 4; 4:7) Ko ba ɗa, weeklee maaga bay de ko mopo wa da’ mopo gesiŋ, maŋ ne, heen jag ɓe. Amaa, jee maaga go kluu, ga go de ko re joŋ sen ti boŋ ga. Naa yãã gete’ wo ga werga naa go de ko ngeel maaga á a wo le ni mono. Naa kaŋ ti diŋ ti “wããre maa cwãyn” no.—Jaŋ 2 Timote 1:13.

18. Naa ngaɓ go ga tayge maa ni Jeofan de cõõre jag naa na ngaɓge là?

¹⁸ Naa ko fẽẽre po wo 3 yoo maa ngaɓa ga tayge maa ni Jeofan wara maŋ saɓlaŋ Yeso see ɓaara mono. De maaga ndo de frug nen wããre Baa mono, kiɗ ɗeŋ maaga tayge maa ni Jeofan see wer saɓlaŋ maaga Yeso men mono. Kay jar maa ti taygen wo maaga á mo ya’ wo wer kaŋ ɗiggi ti tayge maa ni Jeofa no. Lan ya’ wer kaŋ ɗiggi ti ɓe de goŋ Jeofa go de jiili ɓo ɓuy, lan hay de sa’ see ɓo see tayge maa ɓen ga á joŋ joŋre de ɓe maa bag jag ɗiggi ɓe go mono. (Siŋ. 37:28) Daga naa mo hay tum ya’ wer ko de el sa’ge naa see tayge maa de dage lan de deele ni Jeofa no.