1. Mayse joŋ blam maaga jobo joŋ ɓlagge maa kwũy we là?

 TI HADGE maa blam le, naa hay ko fẽn maaga Pol wãã ne tayge maa Korenten, ga á mo joŋ wo blo maaga hay joŋ ɓlagge maa kwũy mono. Jee joŋ ɓlaggen hay bay de mbiɗ faale ne ɓlagge ɓen wa ɗa, day se hay go nen naage yoo tayge no. Doo maaga verse kluu hadge naa wãã no mono, Jeofa men jee sen maaga á mo coo ɗiggi ɓe. (Rom. 2:4) Jar maa peel tayge kay wo ne kayge maaga á mo mbiɗ faale ne ɓlagge ɓen là?

2-3. Naa joŋ joŋge hayga naa laa we ga hẽn naa po joŋ ɓlagge maa kwũy là, day wer maylà?

² Taŋgu maaga jar maa peel tayge kay wo jee ɓen mono, á mo joŋ wo go de da’ wer ne ren ɗa. Naa joŋ joŋge hayga naa laa we ga hẽn naa po joŋ ɓlagge maa kwũy là? Naa jor glog jee joŋ ɓlaggen maaga á mo wo wii kayge do jar maa peel tayge wo.—Esa. 1:18; Joŋre 20:28; 1 Pi. 5:2.

³ Day hayga á day we wããge ɓe ne jar maa peel tayge wo ga là? De sen naa raw wii jar maa peel tayge wo de see naa tu maaga á mo da’ kayge. Hayga naa joŋ we doo sen nono, ni naa go de ngaɓge ga naa da hẽn naa noga mãygeman naan, werga naa de koge ga jar maa peel tayge wo de kããge maa kayge ɓe. Hayga á ya’ wer joŋ fẽn ɓe maa de ɓlaggen we no, á ɓlag holaŋ ɓaara go de Jeofa blam. Maapo ga se dem ɗuu taygen pa. Á bay mbe gus wa, amaa, naa ɓo’ sug jar maa peel tayge wo, werga naa da Jeofa wo de hẽn naa noga mãygeman naa no.—Siŋ. 27:14.

 JAR MAA PEEL TAYGE KAY WO JAR MAAGA JOŊ WO ƁLAGGE MAA KWŨY NA KAYGE LÀ

4. Ɗiggi jar maa peel tayge wo diŋ ga hãy de maaga á wo wo we yiŋgi de jobo maaga joŋ ɓlagge maa kwũy là?

⁴ De maaga jobo joŋ ɓlagge maa kwũy we yoo tayge no, tayge jar maa peel taygen, hoo wo jar po wo yoo ɓaara swa’ maa woge da’ jee ɓe no. a Jar sen de hay joŋ wo desãy, mo hay wo fer ti see ɓaara gesiŋ. Koh de maaga á mbaara de kay jee joŋ ɓlaggen maaga á mo mbiɗ faale ne ɓlagge ɓen layblay’ mono, á wo de koge ga saara joŋ doole ɓe maa cooge ga. (Dog. 30:19) Jar maa peel tayge wo de koge ga jar joŋ ɓlagge wo ɓuy mbiɗ wo faale ne ɓlagge ɓaaran doo Dafid no ga. (2 Sam. 12:13) Jar joŋ ɓlagge maa po maŋ wo ga saara laa yaŋ maa ni Jeofan ga. (Tĩĩ. 4:​6-8) Amaa, ɗiggi jar maa peel taygen wo diŋ ga saara kay jee ɓen maaga á mo mbiɗ faale ne ɓlagge ɓe no. ‘Principes’ maa hõn kay wo ra de maaga á yiŋ wo de jee ɓen là?

5. Jar maa peel tayge hay kaŋ wo go ti ɓaara ga hãy de maaga á wo wo yiŋgi de jee joŋ ɓlagge mo là? (2 Timote 2:​24-26) (Ko foton lay.)

⁵ Jar maa peel tayge ko wo jee joŋ ɓlaggen doo sam maaga go de yeege nono. (Lug 15:​4, 6) De maaga á yiŋ wo de jee ɓen taŋgu tu mono, á ma’ wo ɓil ɓe nen wããre ɓaara wo de joŋre ɓaara ga, day ruu wo ne ga pa. Á ɗig wo ga yiŋgi ɓaara de jee ɓen diŋ maa wii jag ɓe lan gor yiŋgi jag ɓe tawa tu na wa. Amaa á naa wo go diŋ nen joŋre maa de woore wo ga naa da’ ra ɓil 2 Timote 2:​24-26. (Jaŋ ne.) Jar maa peel taygen lag wo desãy werga á wo de sãy kay jee joŋ ɓlaggen ti maa coo ɗiggi ɓe.

6. Jar maa peel tayge bag wo jag see ɓaara go peel bol bagge maa yiŋgi de je joŋ ɓlaggen là? (Rom wo 2:4)

⁶ Jar maa peel tayge bag wo jag ɗiggi ɓaara go. Á ɗig wo ti wããre maaga Pol wãã ga: “Baa ko decoo ɓo mo caw maga ndo mo coo ɗiggi ɓo.” Wersen so saara bir jag Jeofa de joŋ jee ɓlaggen desãy (Jaŋ Rom wo 2:4.) Jar maa peel taygen ɗig wo taŋgu tu ɗa ga saara diŋ jar koɗ hrog wo. Á de hay hoo wo sug ti jag lingi maa ni Kris no, lan de hay maŋ wo saɓlaŋ ɓe ti ɓaŋ koge de el tayge no. (Esa. 11:​3, 4; Mat. 18:​18-20) Taŋgu maaga á yiŋ wo de jee joŋ ɓlaggen, jar maa peel tayge tos wo Jeofa maaga saara mo kay jee sen maa mbiɗ faale ne ɓlagge ɓe no. Á frug wo wer Bible wo de kefder naan wo go de woore maaga saara mo da’ wer go ne ren wo de jee joŋ ɓlagge no. Á kiɗ wo maa da’ wer go ne fẽẽre, noga jee maaga srog glog ɓe wo go hãã joŋ ɓlagge sen mono.—Jõõ. 20:5.

7-8. De maaga jar maa peel tayge wo wo we yiŋgi de jee maaga joŋ ɓlagge po no, á maŋ wo saɓlaŋ gorge desãy maa ni Jeofan na maŋge là?

 ⁷ Jar maa peel tayge bir wo jag gorge desãy maa ni Jeofa no. Á de ɗig wo ti fẽn maaga Jeofa hay joŋge ɓe see jar maaga joŋ wo ɓlagge le ɓaa mono. Naa ko ba ɗa, Jeofa hay gor Kayin desãy. Á wãã ne hẽn ti fẽn maaga da’ ge ne hayga á coo we ga no, day hayga á hoo sug we lay no, se da’ ge diŋ bosa’ lay. (Tĩĩ. 4:​6, 7) Jeofa ɓo’ profed Nataŋ wo maa woge baa yaŋ ne Dafidi. Maa kay Dafid ga á mo mbiɗ faale ne ɓlagge ɓen mono, Nataŋ raw maŋ saɓlaŋ po ne hẽne. (2 Sam. 12:​1-7) Day Jeofa “hay lag” profed ɓen wo “tum nen naw” see tayge jar Israyel maa de mbiɗ faale ne Baa no. (Jer. 7:​24, 25) Á gor ga á mo mbiɗ wo faale ne ɓlagge ɓaaran ɗa maaga se kay ra kway ga. Ba yaw mono, á ur de see ɓe tu wii rage ga á mo mbiɗ wo faale ne ɓlagge ɓaara no.

⁸ Jar maa peel tayge maŋ wo saɓlaŋ Jeofa de maaga á kiɗ wo ga saara kay jar maaga joŋ wo ɓlagge maa kwũy mono. Doo maaga 2 Timote 4:2 wãã ne mono, á ndal wo de ɓaara “desãy de ele”. Doo sen nokay, jee maa peel tayge hay joŋ tum desãy, lan gorge desãy maa kay jee ɓlaggen maaga á mo joŋ fẽn maa de deele. Hayga jee maa peel taygen sõõ ɓil we de maaga á de baa yaŋn no, maapo jee ɓlaggen day laa yaŋ ga noga day mbiɗ faale ne ɓlagge ɓen ga.”

9-10. Jar maa peel tayge kay wo jee maaga joŋ ɓlagge maa ɗiggi ti fẽn maaga á joŋn na kayge là?

⁹ Jar maa peel tayge kiɗ wo maa da’ wer ne fẽn maaga kaŋ wer jee ɓen joŋ ɓlagge mono. Ba doo maaga, á joŋ ɓlagge werga á men frug nen wããre Baa go noga men sii wããre go yawlà? Á hay men tos Jeofa go tum yawlà? Á hay men durgi go jag slagge nen ti fẽẽre maa de baywoore wo yawlà? Á hay joŋ hrag maa debaywoore wo noga baa barge maa debaywoore wo yawlà? De ɗeŋ maa hõn ga barge sen wo de hrag sen hãy wo ɗiggi ɓe là? Á mbe de ko fẽn maaga Jeofa ɗig ti fẽn maaga á joŋn mo yawlà?

¹⁰ Jar maa peel tayge wii wo jag ɓe maaga, á mo ɗig ti fẽẽre maaga hãy wo holaŋ ɓe de Jeofa, lan kaŋ wo wer ɓe joŋ ɓlagge mono. Á wii wo jag ɓe desãy, day wii wo jag ɓe ti fẽẽre maa see ɓe ga bay wo maa wããge wa ga. (Jõõ. 20:5) Jar maa peel tayge mbaara de kããge maa joŋge doo Nataŋ no lay; á mbaara de kããge maa maŋ saɓlaŋ maaga jee joŋ ɓlaggen mo ɗig ga se joŋ ɓlagge. Maapo ga de maaga á yiŋ de jar maa peel tayge wo taŋgu tu, á tĩĩ wer koge yaŋ ga se joŋ ɓlagge, law ti fẽn maaga se joŋn debaŋ. Maapo ga á mbiɗ faale yaŋ ne ɓlagge ɓen.

11. Yeso hay joŋge see jar ɓlagge wo na joŋge là?

¹¹ Jar maa peel tayge dur wo maa maŋ saɓlaŋ Yeso. De maaga Yeso bir le go, yiŋ de Sol taŋgu tu mono, á wii jag ɓe ga: “Sol, Sol ndo joŋ bon ɓi le la?” De maaga Yeso wii jag ɓe mono, á hay de sãy kayge ɓe maa koge ga fẽn maaga á joŋn bay de woore wa. (Joŋre 9:​3-6) De maaga á wãã wããre ne tayge maa Tiyatir ti “wãy Jesabel” mono, Yeso wãã ga: “Ndi men faage ne hẽn ga á mo mbuɗ faale ne ɓlagge ɓen wo no.”—Naa. 2:​20, 21.

12-13. De ɗeŋ ma hõn ga jar maa peel tayge hã wo wur ne jee joŋ ɓlagge, maaga á mo mbiɗ faale ne ɓlagge ɓen là? (Ko foton lay.)

¹² Doo Yeso no lay, jar maa peel tayge mo ɗig wo go deparday tu ga jee joŋ ɓlaggen mbiɗ gi faale ne ɓlagge ɓen ga na wa. Maapo ga jar maa po mbiɗ wo faale ne ɓlagge ɓaaran wur maaga jar maa peel tayge yiŋ wo de ɓaara taŋgu mo tu, jar maa po se wii wur do ɓaara ɗa. Wersen, jar maa peel tayge mo dog wo woge see ɓe ɓaale puri. Maapo ga blam maaga à yiŋ de ɓe taŋgu tu mono, Kretiyẽ  maaga joŋ ɓlagge tĩĩ wer ɗiggi ti fẽn maaga se hay wããn debaŋ. Maapo ga á tos Jeofa de fer ti gesiŋ maaga á mo fug ɓil go ne se ti. (Siŋ. 32:5; 38:19) Maapo ga á coo ɗiggi ɓe sara de maaga á fer wo yiŋgi de ɓe blam mono.

¹³ Maa jor glog ɓe mbiɗ faale ne ɓlagge ɓen mono, jar maa peel tayge de hay naa wo nen koge decoo, lan de el go see ɓe. Á tos wo Jeofa maaga á mo kaŋ bosa’ ne durgi ɓaara maaga á dur wo maa kay jee joŋ ɓlaggen ti. Á kaŋ wo ɗiggi pa ga ti ɓe fer yaŋ le see kẽẽ, day á mbiɗ faale yaŋ ne ɓlagge ɓe no.—2 Tim. 2:​25, 26.

14. De maaga jobo maaga joŋ ɓlagge mbiɗ faale we ne ɓlagge ɓen no, suse’ ɓen fer diŋ ne wose là, day wer maylà?

¹⁴ De maaga jee joŋ ɓlagge mbiɗ faale we ne ɓlagge ɓen no, naa ɓuy naa joŋ de fruygi! (Lug 15:​7, 10) Suse’ ɓen fer diŋ ne wose là? Ne jar maa peel tayge wo yawlà? Fer ɗiggi ti wããre maaga Pol wãã ti jar joŋ ɓlagge wo ga : “Tiga Baa hã faage yaŋ ne hara ma coo seele ɓaara [ . . . ] laybla’ no.” (2 Tim. 2:25) ‘Note d’étude’ po wãã ti verse sen ga: “ De maaga jobo mbiɗ faale we ne ɓlagge ɓen no, naa joŋ suse’ bay diŋ ne jee táabay po wa, amaa, diŋ ne Jeofa. Werga kay jee joŋ ɓlaggen maa coo ɗiggi ɓe diŋ se. Pol wãã ti fẽẽre maa de woore maaga jee joŋ ɓlaggen da’ ra de maaga á mbiɗ faale we ne ɓlagge ɓen mono—á kay jee joŋ ɓlaggen maa da’ wer go ne cwãyn de woore, á kay ne maa ɗiggi de woore, day se kay ne maa yããge go jag rew maa ni Manhúulín pa.—2 Tim. 2:26.”

15. Jar maa peel tayge ya’ wo wer kay jee maaga joŋ ɓlagge na kayge là?

¹⁵ De maaga jobo mbiɗ faale we ne ɓlagge ɓen no, jar maa peel tayge maaga hay kay wo ne taŋgu mo hay wo woge tum koge ɓe maa coɓ hãge ɓil ɓe, maa kayge ɓe maa ooge jag liwgi maa ni Manhúulí no, lan maa kayge ɓe maa joŋge diŋ fẽn maa ti ngeel ɓe. (Heb. 12:​12, 13) Jar maa peel tayge wãã wo fẽn maaga jee ɓen joŋ ne ne jobo ga hase. Amaa, à hay ɓo’ sug jar maa ti tayge ti maylà?

 “RUU JAR MAGA JOŊ WO ƁLAGGE GO TINOO NEN JAR POƊAGE”

16. De maaga Pol wãã ɓil 1 Timote 5:20 ga ‘nen jar poɗage’ mono, jar sen diŋ wose wo là?

¹⁶ Jaŋ 1 Timote 5:20. Pol wãã fẽn maaga à mo hay joŋ “jar maaga joŋ wo ɓlagge” ne Timote, jee maa peel tayge po maa tigriŋ. Á hay da wããge ga hãylà? De maaga Pol wãã ga à mo ruu ra go ‘nen jar poɗage’ mono, á bay da wããge ga à liŋ ne peel taygen ɓuy wa. Amaa, á hay da wããge ga liŋ ne peel jar maaga hay wo de da’ wer ne fẽn maaga jee sen joŋn mono. Maapo ga diŋ jar maaga hay ko wo fẽn maaga á joŋn mono; noga maapo diŋ jar maaga jee joŋ ɓlaggen hay sii wããren ne hara mono. Jar maa peel tayge hay yiŋ wo de jar sen wo, maa wããge ne hara ga saara yiŋ we de jee joŋ ɓlagge no, lan ga saara liŋ ne we.

17. Hayga ɓlagge maa kwũy yaŋ de joŋge ti tayge ga jar go de koge ɓe debaŋ, noga à kon ge yaŋ go no, à ɓo’ sug jar ga hãylà, day wer mayse là?

¹⁷ Day maapo, jar debaŋ joŋ wo go de ko fẽn maaga jee ɓlaggen joŋn mono; noga à kon ge go doole. Ti ngeel maa sen, wããre maaga wãã ga ‘ruu ra nen jar poɗage’ ɓil 1 Timote 5:20 de maŋge see taygen ɓuy. Wersen, jee maa peel tayge po boŋ ɓo’ sug taygen ga à liŋ hẽnbe po noga mãygemanbe po. Wer mayse là? Pol wãã ga: “nen maga jar lan mo joŋ wo hẽẽne”, lan ga á mo joŋ wo ɓlagge maa kwũy wa.

18. Jar maa peel tayge joŋ wo mayse de maaga Kretiyẽ maaga kiŋgi ɓe bay go 18 wa ɗa joŋ ɓlagge maa kwũy we là? (Ko foton lay.)

¹⁸ Hayga jobo maaga go de joŋ batem, ga kiŋgi ɓe bay go 18 wa joŋ ɓlagge maa kwũy we no, à joŋ ne na joŋge là? Tayge jar maa peel tayge laa wo jar maa peel tayge po wo ɓoge.  Á wo wo da’ge ɓe de pããre ɓe maaga wo diŋ Kretiyẽ mono. Jar maa peel tayge wii wo wer fẽẽre maaga pããre ɓe wo go de joŋge ɓe, ga kay mbargan maa coo seele ɓe, lan maaga á mo mbiɗ faale ne ɓlagge ɓe mono. Hayga pããreben hay kay wo ne we, day ga mbargan yaŋ go hoo sug ti yaŋ maa ni pããre ɓen wo no, ga le’ coo seele ɓe we lay no, maapo ga jar maa peel tayge sen maŋ wo ɗiggi ga pããreben mo ya’ wo wer kay mbargan de peel ni. Jar maa peel tayge wo de koge ga Jeofa hã joŋre liŋgi weere wo de dage diŋ ne pããre ɓaara wo taŋgu ɗa. (Dog. 6:​6, 7; Jõõ. 6:20; 22:6; Efe. 6:​2-4) Jar maa peel tayge joŋ wo mbaara tum tum wii pããrebe wo ga mbargan mbe de da’ kayge maaga á de sãy ɓe ti maa joŋ joŋre maa ti ngeel ɓe yawlà. Day, hayga mbarga maaga kiŋgi ɓe bay go 18 wa ɗa day we mbiɗ faale ne ɓlagge ɓen ga là? Ti re maa de maŋ sen, jar maa peel tayge po wo 3 yiŋ wo de mbargan wo de pããre ɓe maaga wo diŋ Kretiyẽ mono.

“JEOFA DIŊ JEE MAA KO DECOO JAR DEBAŊ”

19. Jar maa peel tayge joŋ wo doo Jeofa na joŋge de maaga jobo joŋ ɓlagge maa kwũy we là?

¹⁹ Jeofa da ga jar maa peel tayge mo koɗ wo taygen do jar maaga bay wo de sãy hoo sug ti jag liŋgi ɓen ti wa mono. (1 Kor. 5:7) Day á dur wo go de ẽgre ɓaara ɓuy maa kay jee ɓen maaga á mo mbiɗ faale ne ɓlagge ɓe no. De maaga á kay wo jobo mono, saara kaŋ ɗiggi ga jee ɓen coo ge seele ɓe yaŋ. Wer mayse là? Werga á wo de sãy joŋge doo Jeofa, ga “ko decoo jar debaŋ” mono. (Jag 5:11) Naa ko maaga apotre Jaŋ hay joŋ hẽẽrebe wo de dage mo ɗa. Á yer ga: “Weere ɓi no, ndi yer wããre sen wo we maga nday mo joŋ ɓlagge wa hase. Mbe de sen ɓuy, hayga jobo joŋ ɓlagge we layblaʼ no, je ma kay naa yaŋ le see Pããbe no, diŋ Yeso Kris Je ma de deele no.”—1 Jaŋ 2:1.

20. Naa wãã mayse yaŋ ti hadge maa glog tew ɓil Ngeel gor ti Jare sen la là?

²⁰ Day maapo, Kretiyẽ maa po day wo mbiɗ faale ne ɓlagge ɓaaran wo ga. Hayga sen a we no, à naa hẽnbe sen wo go ti tayge no. Jar maa peel tayge joŋ wo mayse hayga re maa de maŋ sen a we là? Naa wãã ge yaŋ ti sen ɓil hadge maa glog tew ɓil Ngeel gor ti Jare sen la no.