1-2. (a) Jeofa ɗig ti jar maaga joŋ wo ɓlagge maa kwũy, ga bay wo mbuɗ faale ne hẽn wa na ɗiggi là? (b) Jeofa da ga jar maaga joŋ wo ɓlagge maa kwũy mo joŋ wo mayse là?

 JEOFA bay diŋ Baa maaga yãã ga wosela ɓuy mo joŋ fẽn maaga ɓil ɓe da wa. Á hee de ɓlagge. (Siŋ. 5:​4-6) Jeofa da ga naa mo hoo sug ti jag liŋgi se maa ɓil Biblen wo no. Á mbe cwãy ga Jeofa de koge ga naa bay de kããge maa hoo sug ti jag liŋgi ɓen wo keɗed ɓuy wa, werga naa diŋ jar téebeere maa de ɓlagge see. (Siŋ. 130:​3, 4) Amaa á bay yãã jar maaga ‘ɗĩɗ wo wããre maga wãã ti woore Baa naan go, maga à mo riŋ ga seele saara maga bay ti ngeel ɓe wa mbe de ele’ wa pa. (Jud 4) Kidolgi, Bible wãã ti “tawge jar maga bay wo hoo sug ti Baa wa” go nen durgi maa ni Baa, kaŋ nen ga Harmagedoŋ.—2 Pi. 3:7; Naa. 16:16.

² Amaa, Jeofa da ga koh jobo boŋ mo bas go wa. Ɓil hadge maa ɓil Ngeel Gor ti Jare sen wo la, naa da’ ni ga Bible wãã ga Jeofa “da ɓen ga jar ɓuy mo da’ wo faage ma coo ɗiggi ɓaara ma de ɓlaggen de deele tigriŋ”. (2 Pi. 3:9) Doo Jeofa ne lay, jar maa peel tayge gor wo desãy de maaga á kay wo jobo maaga joŋ ɓlagge, maa coo ɗiggi ɓe maa de ɓlaggen de deele tigriŋ, day mo fer le see Jeofa. Amaa jar po maaga joŋ wo ɓlagge yãã wo kayge sen ga, coo wo ga. (Esa. 6:9) Koh de maaga jar maa peel tayge dur wo mbaara debaŋ maa kay jar maa po wo  mbuɗ faale ne ɓlagge ɓaaran mono, saara baa mbaara wùu jag ɓe joŋge. Jar maa peel taygen joŋ wo jag re maa de maŋ sen na joŋge là?

“NAA WEE JEE MAA JOŊ ƁLAGGEN GO TI YOO ƁAY”

3. (a) Bible wãã ga joŋ jobo maaga bay dayge mbuɗ faale ne ɓlagge ɓen wa na joŋge là? (b) Jobo bay we dayge mbuɗ faale ne ɓlagge ɓe wa no, wer may ga naa mbe maa wããge ga á nii see ɓe go ti taygen diŋ se là?

³ De maaga jobo joŋ ɓlagge maa kwũy we, day mbuɗ faale we ne hẽn ga no, jar maa peel tayge joŋ wo joŋre de wããre maaga à da’ ɓil 1 Korente wo 5:13 mono. Verse sen wãã ga: “Naa wee jee maa joŋ ɓlaggen go ti yoo ɓay, (TMN)” Naa mbe maa wããge ga jee ɓen da doo sen ne diŋ se, werga á de weege diŋ fẽn maaga á a jo’ mono. (Gal. 6:7) Wer mayse ga naa wãã doo sen ne là? Werga jee sen laa dayge coo seele ɓe ga, koh de maaga jar maa peel taygen dur wo mbaara maa kayge ɓe mbuɗ faale ne ɓlagge ɓen mono. (2 Waŋ. 17:​12-15) Joŋre ɓe ngaɓ wo ga á bay de sãy hoo sug ti jag liŋgi maa ni Baan wo wa.—Dog. 30:​19, 20.

4. Wer may ga à ɓo’ sug jar maa ti taygen de maaga à naa jobo maaga bay we mbiɗ faale ne ɓlagge ɓe wa we go ti tayge là?

⁴ De maaga à naa jobo we go ti tayge no, à ɓo’ sug taygen ga á bay diŋ Sedeewa Jeofa wa so. b Ɓo’ge sug sen bay diŋ maa mbuɗ sõõre jee ɓen wa. Amaa diŋ maaga hẽẽreben mo hoo wo sug ti jag liŋgi maa ɓil Bible ga wãã ga à mo men ‘seege go wer’ jee se no, ‘koh rege dra’ à mo re’ de ɓe wa lay. (1 Kor. 5:​9-11) Jeofa de ko re maaga se hã jag liŋgi sen wer ɓe mono. Apotre Pol yer ga: “Defõõre no me’ kay ur coo ma de cããgen go ɓuy.” (1 Kor. 5:6) Hayga jobo laa dayge we mbuɗ faale ne ɓlagge ɓe maa kwũyn ga, day ga à naa ne we go ga no, jar maa po mbaara de kããge maa ɗiggi ga saara bay maa hoo sug ti jag liŋgi maa ni Baan wo naŋ wa lay.—Jõõ. 13:20; 1 Kor. 15:33.

5. Naa mo ko jobo maa ti tayge ga à naa ne go na koge là? Wer maylà?

⁵ Day so, naa ko jobo maa ti tayge ga à naa ne go na koge là? Koh de maaga naa bay mbe maa seege de ɓe wa so laybla no, naa de kon doo sam maaga yee go nono, amaa bay doo sam maaga bas go ne wa. Sam maaga caa go mbe de kããge maa ferge le yoo lan wo pa. Naa mo hay de koge ga sam sen ga caa go hay go de hã see ɓe ne Jeofa. Amaa ren so diŋ ga, seele ɓe bay ɓo’ nen go ga á de hoo sug ti hãge see maaga á hay hãn go ne Jeofa nen tosge mo wa, day sen diŋ rew po peel ɓe kluu debaŋ. (Ese. 18:31) Amaa werga wur bay go de rawge maaga Jeofa naa nen koge decoo ɓen go see jar wa ɗa mono, naa mbe maa ɗiggi ga jee sen coo ge yaŋ. Jar maa peel tayge kay wo jobo maa ti tayge ga à naa ne go na kayge so là?

JAR MAA PEEL TAYGE KAY WO JAR MAAGA À NAA RA GO TI TAYGEN NA KAYGE LÀ

6. Jar maa peel tayge joŋ wo diŋ mayse maa kay jobo maaga à naan go ti tayge là?

⁶ De maaga à naa jobo we go ti tayge no, jar maa peel tayge men wo kayge ɓe go maa ferge le see Jeofa yawlà? Baywa! De maaga jar maa peel tayge wãã wo ne jobo ga à naa ge ne go mono, á ngaɓ wo ɗeŋ maa ferge le ti taygen ne hẽne. Day, jar maa peel taygen joŋ wo fẽn maa tigriŋ ni pa. Daŋge mono, á wãã wo ne hẽn ga few hres we go mbag no, saara joŋ ge de sãy yiŋgi de ɓe ti, maa koge ga seele ɓe coo we yaw baywa yawlà. Hayga few hres we go mbage, day ga jee sen yãã mbe ga á mo a mbaara da’ sege no, jar maa peel taygen jor wo glog ɓe maaga á mo mbiɗ faale ne re ɓlagge no. Koh á mo hay ba go de mbuɗ faale ne ɓlagge ɓen wa  ɗa, jar maa peel taygen joŋ mbaara tum kiɗgi maa yiŋgi de ɓe, maa jor glog ɓe ga á mo coo seele ɓe.

7. Maaga à yaŋ go de naa jobo ti tayge no, jar maa peel tayge dur wo maa ko decoo ɓe doo Jeofa no lay na durgi là? (Jermi 3:12)

⁷ Jar maa peel taygen dur wo maa ko decoo jar doo Jeofa no lay, de maaga á wo wo yiŋgi de jobo maaga à naan go ti tayge mono. Ko ba ɗa, le ɓaa mono, jar Israyel hay bay wo mbuɗ faale go ne ɓlagge ɓaaran taŋgu maaga Jeofa kay ra mo wa. Á hay laa profed ɓen wo wo see ɓaara taŋgu maaga saara coo ɗiggi ɓaara. Hadge maa de ɓog ɓil Ngeel Gor ti Jare sen la ngaɓ ga Jeofa ko decoo jare. Wãy Ose hay joŋ ɓlagge maa kwũy debaŋ. Amaa de maaga á bay go de men joŋ ɓlagge ɓen wa ɗa mono, Jeofa wii Ose ga á mo fug ɓil go ne hẽn ti, mo fer ne le liŋ see ɓe. De saɓlaŋ sen, Jeofa hay da ngaɓge ne jar maa ɓen wo ga koge decoo maa sen kluu debaŋ. (Ose 3:1; Mal. 3:7) Doo Jeofa no lay, jar maa peel tayge wo de de sãy maaga jar maaga joŋ wo ɓlagge maa kwũy mo mbuɗ wo faale ne ɓlagge ɓaara no, day mo fer wo le ti tayge no. Á joŋ wo maaga á mo hay de gayri see ɓaara maa ferge le wa.—Jaŋ Jermi 3:12.

8. Saɓlaŋ Yeso maaga wãã ti weel maaga hay yee go, ngaɓ go de woore ga Jeofa ko decoo jar maaga à go de naa rage ti tayge na ngaɓge là? (Lug 15:7)

⁸ Ti hadge maa de ɓog ɓil Ngeel Gor ti Jare sen la, naa hay wãã ti saɓlaŋ weel maaga yee go mono. Ɗig ba mbo ti maaga pan ɓe joŋ na joŋge la mo ɗa. De maaga á ko weel ɓen le de ferge liŋ mokay, á ‘caa pel ɓe de ɗee, raw klewge ɓe, raw togoɗge ɓe.’ (Lug 15:20) Naa ko ni ga pan mbargan gor ga á mo wii fuggi ɓil do se de kam sege ga. Ba yaw mono, á ur ɗee wo see mbarga ɓen werga se da ne. Jeofa see jar maaga à go de naa rage na doo sen nono, day jar maa peel tayge dur wo maa joŋge doo sen ne lay. Á da wo ga sam maaga yee go mo “fer le liŋ.” (Lug 15:​22-24, 32) De maaga jee maaga hay joŋ ɓlagge mbuɗ faale we ne ɓlagge ɓen no, Jeofa, Yeso, jar peele Baa wo, de jar maa ti tayge wo ɓuy joŋ wo fruygi debaŋ!—Jaŋ Lug 15:7.

9. Jeofa jor glog jar maaga hay joŋ wo ɓlagge ga á mo joŋ wo mayse là?

⁹ Hãã patala naa ko ga, jar maaga joŋ wo ɓlagge, day ga mbuɗ wo faale ne hẽn ga mono, Jeofa day men rage ti tayge ni ga. Amaa á tob ra go ga lay. Á tum kiɗgi maa kay rage. Á da ga á mo fer wo le. Day de maaga á fer wo le mono, Jeofa ɗig ti ɓaara na ɗiggi là? Ose 14:5 wãã ga: “ ’Ndi pẽẽ ge ra yaŋ go jag ndarge gog ɓaara no, ndi da ge ra yaŋ de dage maga go sog boŋ, wer[ga] ɓil de waŋ ɓin bay ti ɓaara wa so.” Werga jar maa peel tayge ko wo ɗiggi Jeofa ti jar maaga hay joŋ wo ɓlagge so mono, á kiɗ wo maysela ɓuy maaga ngaɓ go ga jar sen wo de cooge. Wããre sen ɓo’ nen go ne wosela ɓuy maaga hay men Jeofa go, ga á da ne, day da ga á mo fer le see se deparday.

10-11. Jar maa peel tayge dur wo maa kay jar maaga à naa ra le go ɓaa na durgi là?

¹⁰ Jar maa peel tayge kay wo jar maaga hay wo go de naage ɓaa ɓaa, maapo ga kiŋgi go pur debaŋ na kayge là? Maapo ga jar sen wo go de men joŋ re ɓlagge maaga à hay naa ra go wer ɓe mono. Maapo ga pa saara bay ba de ko re maaga à hay naa ra go wer ɓe wa so ɓuy yaw. Koh jar sen mo hay ba wo go de joŋ kiŋgi siigi gãyla, jar maa peel tayge dur wo maa kiɗ ngeel maaga á wo ni mono, lan maa yiŋgi de ɓaara. De maaga á wo wo ko rage mono, jar maa peel tayge wii wo ra ga saara mo tos mbe de ɓaara yawlà, lan jor wo glog ɓaara maa ferge le ti tayge no. Hayga jobo joŋ kiŋgi we go siigi pur debaŋ no, sen go tinoo tu ga á joŋ de sãy maaga fer had sege de cwãy maa ɓil Biblen wo ti tigriŋ, maa ferge da’ wer ne Jeofa. Wersen,  hayga jee ɓen wãã we ga se de sãy ferge le ti taygen ti no, jar maa peel taygen joŋ wo nen maaga jobo mo had Bible ne hẽne, koh à mo hay ba le de ferge ɓe yoo tayge wa ɗa. Ti re maa de maŋ sen, joŋ ga jobo mo fer had Bible ne jee ɓen diŋ jar maa peel tayge wo tawa.

¹¹ Jar maa peel tayge dur wo maa ko decoo jar doo Jeofa nono. Diŋ wersen so ga á kiɗ wo wosela ɓuy maaga hay men Jeofa go, jor wo glog ɓe maa ferge le see ɓe. De maaga jee maaga hay joŋ ɓlagge ngaɓ we go ga se de coo seele se no, à fern le ti tayge deparday tu seŋ.—2 Kor. 2:​6-8.

12. (a) Jar maa peel tayge mo hay joŋ wo go de ɗeŋ nen re maa hõn wo là? (b) Wer may ga naa mo hay ɗig ga jar maa po bay wo maa da’ fuggi ɓil maa ni Jeofan wa na wa là?(Ko ngeel naa wer maa gesiŋ lay.)

¹² Ti ngeel maa po wo, jar maa peel tayge de joŋ wo hayya ne see ɓaara taŋgu maaga á fer wo jobo maaga joŋ ɓlagge maa kwũy le yoo tayge mono. Ko ba ɗa, hayga jobo hay suu we de mbarga maa klee, noga hay diŋ aposta,  noga hay joŋ re do re’ maaga se mo bus go de wãy se, noga de war se no, jar maa peel tayge de hay joŋ wo go de bawge jag jiili ɓaara ɗa ga á mbe go de mbuɗ faale ne ɓlaggen cwãy cwãy. (Mal. 2:14; 2 Tim. 3:6) Á mo koɗ wo hẽẽrebe maa ti taygen wo do jar sen wo no. Amaa mbe de sen ɓuy, naa mo hay wee de koge ga, jee maaga men joŋ ɓlagge ɓen go, ga mbuɗ faale go ne hẽn cwãy mono, Jeofa fer mbe yããge ɓe tigriŋ pa. Wersen de maaga á kiɗ wo maa koge ga jee ɓen mbe go de mbuɗ faale ne ɓlagge ɓen cwãy yawla mono, jar maa peel tayge mo ɗig wo ga jee sen bay maa fug ɓil go ti wa na wa. c—1 Pi. 2:10.

JAR MAA TI TAYGEN JOŊ WO JOŊGE LÀ

13. Sar maa ti holaŋ joŋre naa see jee maaga jar maa peel tayge ruu wo ne wo de joŋre naa see jee maaga à naa ne go ti tayge diŋ maylà?

¹³ Doo maaga naa hay ko le ti hadge maa blam la ne mono, de ngar ngeel maa po à ɓo’ sug tayge ga à ruu jobo. Ti ngeel maa se, naa mbe de kããge maa seege de ɓe, werga á coo ɗiggi ɓe, coo seele ɓe lay. (1 Tim. 5:20) Á joŋ mbe tum yoo tayge no, day se de sãy maaga hẽẽrebe mo jor wo glog se tum joŋ fẽẽre maa de el wo ti. (Heb. 10:​24, 25) Amaa sen la sar de maaga à naa jobo go ti tayge mono. Naa men ‘seege go wer’ jee se no, ‘koh rege dra’ à re’ de ɓe ga lay —1 Kor. 5:11.

14. Maaga jobo maaga à naa ne go ti tayge nduu we ti taygeti no, hẽẽrebe mbaara de kããge maa joŋge see jar sen wo joŋge là? (Ko foton lay.)

¹⁴ 1 Korente wo 5:11 da mbe wããge na ga naa bay maa ɗe jobo maaga à go de naage ɓe ti taygen le ti taygeti wa yawlà? Á da mbe wããge na ga jee ɓen nduu we ti taygeti no, naa mo hee jag ne hẽn wa yawlà? Baywa. Á mbe cwãy ga naa bay maa seege wer ɓe wa. Amaa hayga jee ɓen yaŋ diŋ jee maa ɓi feele naa, noga hay we diŋ bar naa no, naa mbe de kããge maa ɗege ɓe le ti taygeti wo. Day hayga jee maaga à naa ne go nduu we ti taygeti no, naa joŋ see ɓe joŋge là? Ɓaa naa hay bay hee jag ne jar sen wo wa. Amaa wosela ɓuy mo joŋ joŋre de ɗiggi ɓe maaga Bible had ne maa ko fẽn maaga se joŋ ti ngeel sen mono. Jar maa po maŋ  wo ga saara ɗe jee ɓen le ti taygeti. Maapo ga jee ɓen hay diŋ bar ɓe noga jobo maa ɓi feele ɓe. Le ɓaa à hay bay hee jag ne jobo maaga go de naage ti tayge wa. Amaa patala, wosela ɓuy maŋ ga se joŋ sen diŋ se de see ɓe. Jar maa po maŋ wo ga saara hee mbe jag ne hẽne, noga saara joŋ mbe suse’ age ti taygeti ne hẽne. Amaa naa bay maa baa jag ndalge wo de jee sen de pããge wa, bay maa iggi see ɓe joŋ fẽẽre po wo wa lay.

15. 2 Jaŋ 9-11 wãã diŋ ti jar ɓlagge maa ese wo là? (Ko ngeel maa de gaɗge “ Jaŋ wo de Pol wãã wo diŋ ti ɓlagge sen boŋ yawlà?”)

¹⁵ Bible wãã ga naa bay maa hee jag ne jee maaga hay joŋ ɓlagge maa po wo wa. Hayga naa hee jag we ne hẽn no, sen doo ga naa “go de tay jag de ɓe ti joŋre ɓe ma de ɓlaggen wo lay” (Jaŋ 2 Jaŋ 9-11.) Wããre maa ɓil ‘chapitre’ sen ngaɓ ga verse sen la wãã diŋ ti aposta wo, lan ti kretiyẽ maaga jor glog jar lan wo joŋ fẽẽre maa de ɓlagge wo mono. (Naa. 2:20) Wersen, hayga jobo yaŋ had hadge aposta wo, noga yaŋ jor glog jar joŋ ɓlagge maa de hãã wo no, jar maa peel tayge bay wo maa woge da’ge ɓe wa. Amaa naa kaŋ ɗiggi ta’ ga á coo ge yaŋ mbe. Taŋgu maaga á coo mono, naa hee jag ne hẽn ga lay, ɗen le ti taygeti ga lay.

HAY KO DECOO JAR DOO JEOFA NO LAY

16-17. (a) Jeofa da ga jar maaga joŋ wo ɓlagge mo joŋ wo mayse là? (Esekiyel 18:32) (b) Jar maa peel tayge joŋ wo joŋre de Jeofa maa kay jar maaga joŋ wo ɓlagge na joŋge là?

¹⁶ Hãã patala naa had ti ɓaŋ sen na ga hãy so là? Jeofa da ga jobo mo bas go koh boŋ wa! (Jaŋ Esekiyel 18:32.) Á da ga jar maaga hay joŋ wo ɓlagge mo fer wo le see se. (2 Kor. 5:20) Diŋ wersen so ga, le hãã ɓaa ɓaa tu, Jeofa hay tum kam jar maa ɓe maaga hay menn wo go, ga á mo mbuɗ wo faale ne ɓlagge ɓaara no, mo fer wo le see se. Jeofa joŋ joŋre de jar maa peel tayge wo, maaga jar maaga joŋ wo ɓlagge mo mbuɗ faale ne ɓlagge ɓaara no, mo fer wo le see se.—Rom. 2:4; 1 Kor. 3:9.

¹⁷ Ɗig ba ti fruygi maaga le ciŋ de maaga jobo mbuɗ faale we ne ɓlagge ɓe mo ɗa! Jeofa Pan naa maa ciŋn, joŋ fruygi tum de maaga jee maaga hay cel go fer le yoo tayge mono. Dage naa see Jeofa tum de gẽẽge ciŋ de maaga naa ɗig ti koge decoo jar ɓen mono.—Lug 1:78.