HADGE 33
SIŊ 130 Naa hay tum fug ɓil go ne kããra ti
Jeofa da ga joŋ jee maaga joŋ ɓlagge maa kwũy joŋge là
“Hayga jobo joŋ ɓlagge we laybla’ no, je ma kay naa yaŋ.” —1 JAŊ 2:1.
FẼN MAA KLUU ƁIL HADGE SEN LA
Hadge maaga naa da’ ti fẽn maaga hay hres ti tayge maa Korente de maaga hẽnbe po hay joŋ ɓlagge maa kwũy mono.
1. Dage Jeofa ti jar téebeere wo ɓuy na ga hãylà?
Jeofa joŋ naa nen maaga naa mo far ɗiggi diŋ naa de see naa. Tum naa far ɗiggi wo. Maa po wo yoo ɓaara de woore dedaŋ lan wo. Ɗiggi maaga daŋgo ga jee táabay maŋ ne diŋ hãge see ɓe go ne Jeofa nen tosge, lan kolge go jee maa ɓi feele maa ni Jeofa no. Jeofa de sãy maaga wosela ɓuy mo joŋ doosen nono. Wer mayse là? Werga á da jare, day se da diŋ de el ɓaara. Á da ga á mo fruy wo wer holaŋ ɓaara de se, lan mo hay wo tum tenen ti’i.—Dog. 30:19, 20; Gal. 6:7, 8.
2. Jeofa da ga joŋ jar maaga bay wo go de mbiɗ faale ne ɓlagge ɓaaran wo wa ɗa joŋge là? (1 Jaŋ 2:1)
2 Amaa, Jeofa bay joŋ doole jobo maa goŋge ɓe wa. Á ɓo’ faage ne wosela ɓuy maa maŋ ɗiggi ti fẽn maaga se joŋ ne. Re mayse hres hayga jobo maaga go de joŋ batem ɗii we go ne jag liŋgi ti, de joŋ ɓlagge maa kwũy là? Hayga á mbiɗ faale we ne ɓlagge ɓen ga no, à naa ne go ti tayge. (1 Kor. 5:13) Day koh de maaga à mbe go de naage ɓe ti tayge mo laybla, Jeofa de sãy maaga á mo mbiɗ faale ne ɓlagge ɓe no, mo fer baa barge de se de woore tigriŋ. Wersen, fẽn maaga daŋgo ga Jeofa hã Weel ɓen go ti re ɓe—diŋ ga se fug ɓil go ne jar maaga mbiɗ wo faale ne ɓlagge ɓaaran wo mo ti. (Jaŋ 1 Jaŋ 2:1.) Jeofa diŋ Baa maa de dage debaŋ, á wii jar maaga joŋ wo ɓlagge maa kwũy maaga á mo mbiɗ wo faale ne ɓlagge ɓaara no.—Sak. 1:3; Rom. 2:4; Jag 4:8.
3. Naa ko yaŋ ɓil hadge sen la diŋ mayse là?
3 Jeofa wãã fẽn maaga se ɗig ti ɓlagge wo de jar maaga joŋ wo ɓlagge maa kwũy ne naa. Day á da ga naa mo ɗig de maŋ sen lay. Ɓil hadge sen la, naa ko yaŋ diŋ fẽn maaga Pol wãã ga tayge maa Korenten mo joŋ de maaga hẽnbe po joŋ ɓlagge maa kwũy we no. Blam naa ko yaŋ diŋ fẽn maaga Pol wãã ga taygen mo joŋ blam maaga jee ɓen mbiɗ faale we ne ɓlagge ɓen no. Lan naa had fẽn maaga Jeofa ɗig ti jar maaga joŋ wo ɓlagge maa kwũy mono.
FẼN MAAGA TAYGE JOŊ DE MAAGA HẼNBE PO JOŊ ƁLAGGE MAA KWŨY WE NO
4. Re mayse hay hres ti tayge maa Korenten là? (1 Korente wo 5:1, 2)
4 Jaŋ 1 Korente wo 5:1, 2. Ti seele misiyoner ɓe maa de swa’n mono, Pol laa wããre po maa de baywoore ga hres ti tayge maa de caage de fay Korente no. Hẽnbe po ti taygen ni hay suɗgi de wãy pan ɓe. Koh jar maaga bay wo goŋ Baa wa hay wo de koge ga á bay de baywoore wa. Amaa, taygen hay ɗiggi ga, á hay mbe de woore maaga hẽnbe maaga joŋre ɓe de maŋ sen hay mbe maa hayge ti taygen ni. Maapo ga jar maa po wo ti taygen hay wo ɗiggi ga á diŋ ɗeŋ maaga saara naa nen koge decoo go see jar doo Jeofa no lay. Amaa, Jeofa bay men joŋre maa debaywoore yoo tayge maa ɓen wa. Sen go tinoo tu ga wer seele ɓe maa debaywooren, blo sen hay dem ɗuu tayge no. Day hayga á hay hay we ti taygen ni no, maapo ga Kretiyẽ maa tigriŋ hay le’ wo joŋge doo sen no lay. Day Pol hã jag liŋgi ne jar maa ti taygen wo ga á mo joŋ wo maylà?
5. Pol hay wãã ne taygen ga á mo joŋ mayse là, day se hay da wããge ga hãylà? (1 Korente wo 5:13) (Ko foton lay.)
5 Jaŋ 1 Korente wo 5:13. Nenterse Baa srog glog Pol maa yerge ga à mo hay naa jee maaga bay mbiɗ faale ne ɓlagge ɓen wa go yoo tayge no. Kretiyẽ maa de deelen mo hay joŋ wo see ɓe na joŋge là? Pol wãã ne hara ga á mo “men wo tayge go de ɓe.” Sen da wããge ga hãylà? Pol naa wer ɓe ga jag liŋgi sen da wããge ga koh “rege hoole dra’ laybla’, re we de jee ma doo caw no wa.” (1 Kor. 5:11) Maaga ndo yaŋ rege de jobo no, se go gus maaga nday joŋ de tayge see kẽẽ de woore. Sen go tinoo tu ga Pol hay da wããge ga Kretiyẽ lan mo tay wo de blo sen wa. Sen hay koɗ taygen jag seele ɓe maa debaywoore no. (1 Kor. 5:5-7) Nipa mono, maapo sen de kay blo sen maa koge ga fẽn maaga á hay joŋn, de baywoore debaŋ. Á de hay joŋ sõõre ne hẽne, lan mo hay srog glog ɓe maa mbiɗ faale ne ɓlagge ɓe no.
Jeofa jor glog Pol maaga á mo yer wo ne tayge maa Korenten ga à mo naa jee maaga bay de mbiɗ faale ne ɓlagge ɓen wa go. (Ko paragraf 5)
6. Leder maaga Pol ɓo’n wo joŋ see ne taygen wo de jee joŋ ɓlaggen na joŋge là?
6 Blam maaga Pol ɓo’ leder sen wo ne Kretiyẽ maa Korente wo mono, á tĩĩ wii jag see ɓe ga taygen ɗig gi ti ɓe na ɗiggi là. Tid wãã fẽn po maaga hã fruygi ne Pol debaŋ. Jar maa ti taygen yãã wo wããre Pol no, lan saara naa blo sen go yoo tayge no. (2 Kor. 7:6, 7) Ni pa mono, fẽn maa de wooren diŋ ga de maaga taygen joŋ joŋre de leder maaga Pol ɓo’n le mono, blon mbiɗ faale ne ɓlagge ɓen tu. Á coo seele ɓe wo de joŋre ɓe, lan tĩĩ wer seege ti jag liŋgi maa ni Baa no. (2 Kor. 7:8-11) Pol wãã ne taygen ga á mo joŋ mayse blam sen là?
TAYGEN JOŊ JEE MAAGA MBIƊ FAALE WE NE ƁLAGGE ƁEN NA JOŊGE LÀ
7. Blo maaga hay joŋ ɓlagge ti tayge joŋ mayse blam maaga à hay naan go yoo taygen mo là? (2 Korente wo 2:5-8)
7 Jaŋ 2 Korente wo 2:5-8. Pol wãã ga: “Liŋgi maga jar debaŋ liŋ wo bloo sen mo deŋ kãã ne we.” Sen da wããge ga liŋgi sen hay bag jag joŋre ɓen go see blo se no. Joŋre ɓe maa hõnlà? Maa srog glog ɓe mbiɗ faale ne ɓlagge ɓe no.—Heb. 12:11.
8. Pol hay wãã ga taygen mo hay joŋ mayse blam là?
8 Wersen, Pol hã jag liŋgi ne taygen ga: “Fug we ɓil go ne hẽn ti ɓlagge sen so, coɓ we nen ɓe lay”. Kaŋ ti ɓo ga Pol hay bay dage ga taygen mo yãã blo sen le yoo tayge maa ni Jeofan tawa wa. Pol hay dage ga á mo ngaɓ wo go ne blo sen nen wããre ɓaara wo de joŋre ɓaara, ga saara go de fug ɓil ne hẽn ti, lan saara da ne. Joŋre ɓaara de hay hã bawge go ne hẽnbe sen ga taygen go de fruygi ti maaga se fer le mono.
9. Wer mayse ga jar maa po hay bay wo de sãy fug ɓil go ne blo maaga mbiɗ faale ne ɓlagge ɓen ti wa là?
9 Maapo ga jar maa po hay bay wo de fruygi de maaga á laa wo ga blo sen le de ferge yoo taygen mo wa. Wer mayse ga naa wãã sen là? Maapo ga ɓil jar sen hay sõõ wo wer maaga joŋre blo sen hay hãy jar maa ti taygen wo ɓuy mono. Lan maapo ga jar maa po hay yiŋ wo de re maa de gayri wer joŋre ɓe maa de ɓlaggen wo no. Jar maa po yoo taygen hay wo durgi debaŋ maa hoo sug ti jag liŋgi maa ni Jeofa no. Wersen, maapo ga se hay bay ti ngeel ɓe nen ɓaara wa, de maaga á ko wo jobo maaga hay joŋ ɓlagge maa kwũy ferge le ti tayge yoo ɓaara mono. (Tab ne de Lug 15:28-30.) Day, wer mayse ga á de el maaga tayge mo hay naa nen dage go see hẽnbe maaga fer le mo là?
10-11. Re mayse de hay hres ge, hayga jar maa peel taygen mo hay fug wo ɓil we go ne blo sen ti ga là?
10 Á de hay joŋ see ne blo sen na joŋge hayga jar maa peel tayge hay day wo we yãã blo sen le ti taygen ga là? Noga á de hay joŋ see ne hẽn na joŋge hayga hẽẽrebe day wo we naa nen dage go see ɓe blam ferge ɓe le ga là? Maapo ga á de hay “caa jiili go debaŋ”. Maapo ga á de hay ɗig ga se goŋ Jeofa ti boŋ ga so hase. Maapo ga á de hay men durgi ɓe maa ‘wũy barge ɓaara de Jeofan go.
11 Dedaŋ sen ɓuy pa so yaw, hayga hẽẽreben hay fug wo ɓil we go ne hẽn ti ga no, sen de hay hãy barge ɓaara de Jeofa lay. Wer mayse là? Werga joŋre ɓaara de hay maŋ maa ni Jeofan ga, amaa de maŋ maa ni Manhúulí no. Jeofa fug ɓil go ne jar maaga joŋ wo ɓlagge ti, amaa Manhúulí bay ko decoo jar wa, go graŋ see jare. Á de hay men wo blo sen we le ferge yoo tayge ga no, ni Manhúulí hay joŋ joŋre de ɓaara maa maŋ jag blo sen go ferge joŋ joŋre ne Jeofa.—2 Kor. 2:10, 11; Efe. 4:27.
12. Taygen de hay joŋ doo Jeofa ne na joŋge là?
12 Wersen, tayge jar Korente de hay joŋ wo doo Jeofa ne na joŋge là? Day á hay joŋ wo doo Manhúulí ga na joŋge lay là? De joŋge see jar maaga mbiɗ wo faale ne ɓlagge ɓaaran doo Jeofa ne no. Ko maaga jar yer Bible maa po wãã wo ti Jeofa mo ɗa. Dafid wãã ga Jeofa “de ele, fug ɓil go ne jar ti.” (Siŋ. 86:5) Mise yer ga: “Wose diŋ Baa doo ndo no ga fug ɓil go ti debaycõõre, day cegaɗ go ne hun ti sagsag [là]?” (Mis. 7:18) Day Esay wãã pa ga: “Daga je ɓlaggen mo men faage ɓen go, je ma bay ngarn mo men ɗiggi ɓen wo go. Á mo fer le see [Jeofa] ni se ko de coo ɓe yaŋ, á mo fer le see Baa naa maga bay gayge doo fug ɓil ne jar ti wa mono.”—Esa. 55:7.
13. Wer mayse ga á hay ti ngeel ɓe maaga à mo fer jee maaga mbiɗ faale ne ɓlagge ɓen le yoo taygen là? (Ko ngeel maa de gaɗge ““ à hay fer blo maaga hay mbiɗ faale ne ɓlagge ɓen le na hunlà?”)
13 Maa joŋge doo Jeofa ne mono, tayge maa Korenten de hay yãã wo blo sen le tigriŋ, lan de hay hã wo bawge go ne hẽn jag jiili ga saara da ne. De hoo sug ti jag liŋgi maaga Pol hãn, ga tayge mo yãã jee maaga mbiɗ faale ne ɓlagge ɓen mono, saara hay ngaɓge ga saara “yãã jag. . .ti reen wo ɓuy.” (2 Kor. 2:9) Á mbe cwãy ga à hay naa blo sen go yoo tayge bay go de iggi wa ɗa. Amaa maaga à naan go yoo tayge hay joŋ ga á mo mbiɗ faale ne ɓlagge ɓe no. Diŋ wersen so ga jar maa peel tayge de hay gor wo debaŋ maaga á mo fer le yoo tayge no.
NAA JOŊ DE DEELE LAN KO DECOO JAR DOO JEOFA NA KOGE LÀ?
14-15. Naa had mayse ti ɗeŋ maaga à ‘wũy re maaga hres ti tayge maa Korente mo là? (2 Piyer 3:9) (Ko foton lay.)
14 Ɗeŋ maaga à hay ‘wũy re maaga blo maa ti tayge maa Korenten hay joŋn de yerge ɓil Bible “ma had naa.” (Rom. 15:4) Wããre sen had naa ga Jeofa bay yãã ɓlagge maa kwũy yoo jar maa ɓen wa. Jar maa po ɗig wo ga wer maaga Jeofa diŋ Baa maa ko decoo jar mono, á men mbe jee ɓlagge le ti tayge ɓe no. Amaa, Jeofa naa nen koge decoo ɓen go bay diŋ de maŋ sen mokay wa. Á mbe ti ngeel ɓe ga Jeofa ko decoo jare, amaa á bay yãã joŋre maa de ɓlagge wo wa. Jag liŋgi ɓe ti de el wo de ɓlaggen bay cooge wa. (Jud 4) Hayga Jeofa men jar maaga bay wo mbiɗ faale ne ɓlagge ɓaaran wo wa we ti tayge ɓen no, ni sen bay diŋ koge decoo wa so. Wer mayse là? Werga joŋre sen de hay hãy tayge no.—Jõõ. 13:20; 1 Kor. 15:33.
15 Amaa Jeofa bay de sãy maaga jobo mo bas go boŋ ti wa. Á de sãy maaga jar mo da’ yããge go ngaɓa debaŋ ti. Á naa nen koge decoo ɓen go see jar maaga coo wo ɗiggi ɓaara, lan ga wo de sãy ferge ‘wũy barge ɓaara de ɓe ti mono. (Ese. 33:11; jaŋ 2 Piyer 3:9.) Diŋ wersen so ga de maaga blo jee Korenten coo ɗiggi ɓe lan mbiɗ faale ne ɓlagge ɓen mono, Jeofa joŋ joŋre de Pol maa ngaɓge ne Kretiyẽ maa Korente wo ga, á de hay fug wo ɓil go ne hẽn ti, lan de yãã wo ne le ti taygen tigriŋ.
Naa yaŋ da hẽẽre naa maaga fer wo le yoo tayge lan yaŋ joŋ de el see ɓaara lay no, ni naa de joŋge doo Jeofa no lay. (Ko paragraf 14-15)
16. Á joŋ see mo na joŋge de maaga ndo ko ɗeŋ maaga Jeofa ‘wũy re maa Korenten mo là?
16 Ɗeŋ maaga à ‘wũy re le ti tayge maa Korenten ngaɓ ne naa ga Jeofa de dage ɓili, de deele, lan keɗede. (Siŋ. 33:5) Sen bay ba jor glog ɓo maa togoɗ Jeofa wa yawlà? Cwãyn diŋ ga naa ɓuy de ɓlagge see, lan naa ɓuy de sãy maaga á mo fug ɓil go ne naa ti. Diŋ wersen so ga wosela ɓuy mo hay joŋ suse’ ne Jeofa ti raŋsoŋ, ga joŋ ga Jeofa mo fug ɓil go ne naa ti mono. Sen coɓ naa debaŋ de maaga naa ko ga Jeofa da jar maa ɓen wo debaŋ, lan de sãy maaga á mo hay wo tum nen ngeel maa de woore mono!
17. Naa ko ge mayse yaŋ wo ti hadge maa peeln là?
17 Wara lay, jar maa ti taygen joŋ wo see jobo maaga hay joŋ ɓlagge maa kwũy na joŋge là? Jar maa peel tayge joŋ wo doo Jeofa na joŋge, maa kay jee ɓlaggen mbiɗ faale ne ɓlagge ɓen là? Taygen de hay joŋ wo joŋge de maaga jar maa peel tayge naa wo jobo we go ti tayge noga fern we le là? Naa yiŋ jag ti wiigi jag sen wo ti hadge maa peel no.
SIŊ 109 Naa baa wee wùu da kããra go de jiili naa ɓuy
