Pol wãã ne Kretiyẽ maa Tesalonig wo ga: “Je maga day we yãã wããre hadge maga wùr yaʼn wo we ɓil kefdern mokay la gà no, kon we go.” (2 Tes. 3:14) Tayge maa ni Jeofan hay wããge taŋgu ga maŋ ɗiggi sen diŋ jar maa peel tayge wo. Hayga hẽnbe po day we hoo sug ti yaŋ maaga à baa ne hẽn ga no, jar maa peel tayge hay sii wo wããre go peel tayge maa ɓo’ sug jar ti seele ɓe maa debaywoore no. Blam sen, hẽẽrebe tay wo iggi de ɓaara ga so.

Amaa, naa mo hay coo ɗiggi naa ti laage wer verse se no. Patala naa laa ga yaŋ Pol sen wãã diŋ ti ɗiggi maaga Kretiyẽ maa hõnla ɓuy maŋ diŋ se ti re maa po wo. Wersen, á bay maaga jar maa peel tayge sii wo wããre go peel maa ɓo’ sug jar ti seele Kretiyẽ po maaga de ɓlagge wa. À coo sen wer mayse là? Ɗig ba ti fẽn maaga srog glog Pol baa yaŋ sen mo ɗa.

Pol hay ko jar po wo ti tayge, ga hay bay wo “seege ti hadge [wa].” Á hay bay wo kaŋ ti ti yaŋ maaga a le ɓil wããre Baa mo wa. De maaga á hay wo ko rage taŋgu mono, Pol hã jag liŋgi ga: “Je maga day joŋ joŋre gà mono, á mo re hoole wa has lay.” Amaa, jar maa po hay bay wo dayge joŋ joŋre maa ya’ re maa see ɓaara wo go wa; koh de maaga á hay mbaara de kããge maa joŋge ɓe. Ni pa mono, saara hay her see ɓaara nen re maaga maŋ ra ga. Kretiyẽ maa de deele mo hay joŋ wo see jar se ga bay wo seege ti ngeel ɓe wa na joŋge là?—2 Tes. 3:​6, 10-12.

Pol wãã ga: “Kon we go”. Wããre maa jag greg ga à wãã wããre sen de ɓe da wããge ga naa mo ko jee ɓe no, lan naa mo joŋ hayya ne seele ɓe, nen maaga á mo ya’ naa wa. Pol hã jag liŋgi sen bay diŋ ne jar maa peel taygen wo tawa wa; amaa ne taygen ɓuy. (2 Tes. 1:1; 3:6) Wersen, Kretiyẽ maa hõnla ɓuy ko hẽnbe po we ga seele ɓe bay de woore wa no, hay maŋ ɗiggi ga se “tay de ɓe [ga] hase” diŋ se.

Sen da wããge ga à hay joŋ see hẽnbe sen doo ga à go de naage ɓe ti tayge no yawlà? Baywa, werga Pol wãã blam ɓe ni ga: “kaŋ we nen ɓe go ti ɓlagge ɓen doo hẽn ɓay nono.” Wersen, Kretiyẽ maa de deele de hay joŋ mbaara tum tayge de ɓe ti taygeti, lan ti siigi wããre Baa; amaa maapo ga á maŋ wo ga saara tay iggi see ɓe ga. Wer mayse là? Pol wãã pa ga: “maga sõõre mo joŋ ne.” Hayga naa men tayge we go de hẽnbe po de maŋ sen no, maapo ga sõõre joŋ ne yaŋ, lan á coo seele ɓe yaŋ.—2 Tes. 3:​14, 15.

Kretiyẽ joŋ wo joŋre de yaŋ sen wara na joŋge là? Taŋgu ɗa, naa mo hay go de koge cwãy ga seele jee ɓen bay de woore wa doo maaga Pol wãã nono. Á hay bay wããge diŋ ti fẽẽre maaga co wo jag naa ga, ga Bible bay caa põõ ɓaara wa mo wa. Á hay bay wããge diŋ ti jar maaga fẽẽre co wo jag ɓaara sara de maa ni naan wa pa. Á hay bay wããge diŋ ti jar maaga ma’ wo ɓil naa mo wa pa. Pol hay wããge diŋ ti jar maaga hay wo go de laa wer ne wããre Baa de woore, day saara hoo sug ti ɓe ga mono.

Wara lay, hayga naa ko hẽnbe po we ga bay hoo sug ti jag liŋgi maa ɓil Biblen wa no, a naa maŋ ge ɗiggi diŋ naa de see naa ga naa tay iggi de jee ɓen ga. Werga á diŋ ɗiggi maaga wosela ɓuy maŋ so mono, naa bay maa ndalge ti ɓe de jar maa tigriŋ sara de jar maa liŋ ni naa wo wa. Day naa tay mbe see kẽẽ de jee ɓen tum ti taygeti wo, lan ti siigi wããre Baa. De maaga jee ɓen coo joŋre ɓe wo we de seele ɓe no, naa fer mbe tayge iggi see ɓe ɗa pa.