1. Wer mayse ga profet Danyel hay ngris jar Babilon wo debaŋ là?

 PROFET Danyel hay jõõ de maaga jar Babilon baa wo ne gebee wo go see sir ɓen hãã. Amaa Danyel ngel jar kluuri maa ɓi sir Babilon wo debaŋ. Á ko wo ɓaaran diŋ “fen maga nen[je táabay] baa sen mono”​—Danyel hay “bay ɗarge see de woore lay”, lan hay ɓi feele maaga de horoge (1 Sam. 16:7). Wer re sen wo mo deŋ, jar Babilon had wo ne maaga á mo kol go diŋ jobo maa kluu ɓi sir Babilon ni​—Dan. 1:3, 4, 6.

2. Jeofa hay ko Danyel na koge là? (Esekiyel 14:14)

² Jeofa hay da Danyel bay diŋ wer woore ɓen noga wer ɓi feele maaga á hay ni mo wa, amaa wer maaga á maŋ ga se mo hay diŋ jee maa ẽla mono. De maaga Jeofa wãã ga Danyel doo Nowe wo de Job ne mono, maapo kiŋgi ɓe hay ɓil 20 ne kay ɗa. Amaa de sen ɓuy Jeofa ngaɓ Danyel de deele doo Nowe wo de Job, jar maaga hay joŋ wo joŋre ne hẽn de deele nen kiŋgi pur mono (Tĩĩ. 5:32; 6:9, 10; Job 42:16, 17; Jaŋ Esekiyel 14:14). Jeofa hay mbe tum da Danyel nen naw ɓen ɓuy​—Dan. 10:11, 19.

3. Naa koge nen hadge sen la diŋ maylà?

³ Ɓil hadge sen la, naa ko joŋre po yaŋ wo ɓog ga Jeofa hay da Danyel wer ɓaara mono. Taŋgu naa wãã yaŋ ti ɓaara boŋ boŋ ɓuy, lan naa fer yaŋ ko re maaga Danyel naa nen ɓaara go ni mono. Blam naa ko fẽn maaga hay kay Danyel maa naa nen joŋre se de woore wo go mono. Ti tawgeti ɓen naa wãã yaŋ ti ɗeŋ maaga naa joŋ doo Danyel ne joŋge la mono. Koh de maaga hadge sen la mo hay ba de yerge diŋ ne maa jõõre wo laybla no, wosela ɓuy da’ ɓe mbe see saɓlaŋ Danyel lay.

4. Danyel ngaɓ go ga se de coɓge na ngaɓge là? Hã saɓlaŋ boŋ ɗa.

⁴ Danyel hay diŋ wee jõõ po ga bay de hẽẽne wa debaŋ. Naa ko re po wo ɓog ga Danyel ngaɓ go jag ɓaara ga se bay de hẽẽne wa ɗa. Maa taŋgun joŋ kiŋgi ɓog blam maaga jar Babilon ɓlag wo Jerusalem go mono. Waŋ Babilon Nebukadnesar lwa’ lwa’ge po maaga joŋ hẽẽne ti foto po kluu debaŋ. Á hã jag liŋgi ne jar ko re maa ɓi sir Babilon wo no, Danyel ni lay, ga á mo sii wo lwa’gen ne se, mo naa wo wer ɓe ne se ni pa. Bay we wa no, se ‘war ra go ɓuy (Dan. 2:3-5). Danyel mo hay joŋ mopo deparday maaga jar mo húu go wa. Á “raw woge se waŋ day kemn nen maga á mo hã naw ne se nen maga se naa wer lwa’gen go ne waŋ” (Dan. 2:16). Sen hay wii coɓge wo de hãge ɓil. Bible bay wããge ga Danyel hay go de naa wer lwa’ge taŋgu sen wa. Á raw wii bar ɓe​—Sadrag, Mesag wo de Abednego​—ga “á mo joŋ wo kam kam ne Baa ma ciŋn ti fen ma de yoŋre seno” (Dan. 2:18). Jeofa yiŋ jag ti tosge ɓaara no. Wer kayge maa ni Baan mono, Danyel naa wer lwa’ge Nebukadnesar go. À ‘war Danyel wo de bar ɓen wo go ga.

5. Re maa wii coɓge maa hõn ga Danyel hay yiŋ de ɓe pa là?

⁵ Ig go mẽ’ blam maaga Danyel naa wer lwa’ge foton mono, re po hres ga á hay de sãy ngaɓge go ni ga se coɓ jag re wo pa. Nebukadnesar lwa’ lwa’ge po maa tigriŋ ga joŋ hẽẽne. Lwa’ge sen hay wããge ti koo po kluu debaŋ. Danyel teŋ nen see ɓe, naa wer lwa’gen go ne waŋ no. Se wãã ba ne hẽn ni pa yaw ga á loɗ ge go, á joŋ ge ti waŋ ga nen kiŋgi po rab ta’a (Dan. 4:25). Waŋn hay mbe nen ɗiggi ga Danyel diŋ jee hee se, hay ‘war ne go. Amaa Danyel ngaɓ go ga se de coɓge, naa wer mbaan go de woore.

6. Mayse joŋ hay kay Danyel maaga á mo hay de coɓge là?

⁶ Mayse hay kay ba Danyel maaga nen naw ɓen ɓuy á mo hay de coɓge ne? Maaga á hay jõõ mono, sen go tinoo tu ga á hay koge see saɓlaŋ pan ɓe wo de man ɓe. Á hay wo hoo sug ti jag liŋgi maaga Jeofa hay de hãge ne pããrebe maa Israyel wo mono, had wo jag liŋgin wo ne mbarga ɓaara no (Dog. 6:6-9). Danyel hay koge see saɓlaŋ mbaa maa ti jar maa ni Baa wo no, lan hay de ko re maaga hay da’ ra ge de maaga á hoo wo sug we ti jag liŋgi maa  ni Baan wo ga no b (Lef. 11:4-8; Dan. 1:8, 11-13). Re maaga Danyel yiŋ de ɓaara nen naw ɓen ɓuy baw wo ne go jag jiili ga koh mayse mo hres ba la, Jeofa wo de jar peele ɓe maa de ẽgren kay wo ne yaŋ.​—Dan. 2:19-24; 10:12, 18, 19.

7. Mayse maa tigriŋ kay Danyel maa da’ coɓge pa là?

⁷ Danyel hay frug nen wããre maaga jar ndar nen wããre maa jag Baa yer wo mono; maa ni profet Jeremin ni lay. Nen fruggi nen wããre ɓen mono, Danyel wo da’ge ga gebee maaga jar jwif wo ti ɓe ɓi sir Babilon tawge yaŋ go maŋ (Dan. 9:2). Bagge jag profesi wo go ya’ hãge ɓil Danyel ti Jeofa ciŋ ni; jar maaga wo de kaŋ ɗiggi ti Baa joŋ wo mbaara de coɓge lay (Tab ne de Rom wo 8:31, 32, 37-39). De daŋ sen ɓuy pa so yaw mono, Danyel hay tos Pan ɓe maa ciŋn tum (Dan. 6:10). Á sii ɓlagge ɓen wo ne Jeofa, lan hay sii ɗiggi ɓe wo ne hẽne pa. Danyel wii kayge do ɓe (Dan. 9:4, 5, 19). Á hay diŋ jee táabay doo naa ne lay, kaŋ nen ga á bay le go de biŋgi de coɓge sen wa. Maapo á gẽẽ joŋre se de woore ɓil ɓe diŋ de fruggi nen wããre Baa, de tosge, lan de kaŋge ɗiggi ti Jeofa.

8. Naa kol de coɓge na kolge là?

⁸ Maaga naa mo kol de coɓge mono, naa de sãy joŋ mayse ti là? Maapo pããre naa jor glog naa yaŋ maaga naa mo hay de coɓge. Amaa, á bay wo de kããge maaga saara ya’ joŋre sen ne naa wa, koh á mo hay ba wo ti see ɓaara de coɓge. Joŋge ga ndo mo hay de coɓge diŋ doo hadge mopo maa defay ne no. Ɗeŋ maaga ndo had fẽn sen diŋ koge jee had mogen jag joŋ joŋren de woore, lan joŋge doo se ne lay. Doo sen ne lay mono, naa kol de coɓge diŋ de koge see jar maaga ngaɓ wo go ga saara de coɓge nen joŋre ɓaara wo mono, lan de joŋge doo saara ne lay. Day so mono, naa had see Danyel na diŋ mayne? Doo Danyel ne lay mono, naa de da’ wer go ne Wããre Baa de woore. Naa sa’ holaŋ naa de Jeofa de wããge wããre ne hẽn ceɓ ceɓe, lan de sii fẽn maaga de gay naa nen ɗiggi ne hẽne. Naa nen kaŋ ɗiggi naa ti Jeofa, go de bawge jag jiili naa ga á joŋ yaŋ kay naa tum. De sen mokay, de maaga mopo hãy hãge ɓil naa we no, naa joŋ yaŋ de coɓge.

9. Naa da’ mayse wer maaga naa yaŋ de coɓge jag re wo là?

⁹ Naa da’ wer maaga naa joŋ coɓge debaŋ. Naa ko saɓlaŋ Ben ɗa. Á hay ti lakol po ɓi sir Almãy ga jar maa ɓil ɓen wo ɓuy hay wo ɗiggi ga wããre maaga à wãã ga joŋ fẽẽren ɓuy diŋ Baa bay cwãy wa. Wurpo à wãã ne hẽn ga á mo oo peele, mo wãã wer mayse ga á hã ɓil ga joŋ fẽẽren ɓuy diŋ Baa là. Á coɓ nen see ɓe, naa wer ɓe go de woore ga wer mayse ga se hã ɓil ga joŋ fẽẽren diŋ Baa la. Se ɓo‘ ti go na ɓo’ge ne? Ben wãã ga “Jee had wùr co’ sug ɓi de woore, fotokopiye fẽẽre maaga ndi joŋ joŋre de ɓaara maa naa wer wããre ɓin mono, ɓrew ne weere lakol maa tiŋman wo boŋ boŋ ɓuy.” Kããre Ben maaga á wo ti lakol tiŋma boŋ joŋ wo na joŋge là? Ben wãã pa ga: “Daŋge ɓaara laa fẽn maaga ndi wãã mono. Á wãã wo ga saara hoo sug ti ɓi.” Doo maaga saɓlaŋ Ben ngaɓ ne mono, à hoo sug ti jar maaga coɓ wo jag re. Á jãã wo jar maa de deele wo le see Jeofa pa. Sen go tinoo tu ga re maaga naa mo kol de coɓge wer ɓaara mbaara deŋ.

10. De deele diŋ maylà? (2 Samyel 22:26)

¹⁰ Ɓil Bible mono, wããre maa jag Hebre ga “de deele,” noga “ɓil de el” wãã ti dage maaga  Jeofa joŋ see jar maa wer ɓen wo mono. Wããre sen wãã ti dage maaga jar maa ni Baan naa wo nen ɓe go see kããra mo lay (Jaŋ 2 Samyel 22:26). De maaga naw go de hresge mono, de deele naa ya’ ciŋ ni lay. Naa ko maaga de deele Danyeln ya’ ciŋ ni na ya’ge la ɗa.

11. Danyel naa nen de deele go de maaga á hay gar go na naage là? (Ko foto maa nen faale no).

¹¹ Nen naw ɓen ɓuy, de deele Danyeln yiŋ de re maa de gayri wo ɓaale ngaɓa. Amaa á yiŋ de re po maa de gayri debaŋ de maaga kiŋgi ɓe hay cegaɗ 90 go mono. Le ti wur sen mono, jar Mede wo de jar Perse hay naa wo blum sir Babilon, day hay wãã re ɓe diŋ waŋ Dariyus. Jar maaga hay wo joŋ joŋre siigi ni waŋ Dariyus hay bay wo de sãy Danyel ti wa, lan hay bay wo hoo sug ti Baa debaŋ wa. Diŋ wersen so ga saara ɓo’ jag go ga saara mo ‘war Danyel go mono. Á joŋ wo nen maaga waŋ mo hã jag liŋgi po maaga joŋ yaŋ ga Danyel mo maŋ go yoo waŋn wo de Jeofa boŋ. Fẽn maaga Danyel hay nen joŋge ɓe ga ngaɓ ga se de deele see waŋ no, lan ga se ɓo’ wer ngaɓan diŋ de men tos Jeofa go nen naw 30. Danyel maŋ ga se mo hay de deele diŋ see Jeofa. Ɓo’ge ti ɓen so diŋ ga à ɓo’n go ɓi tu ne migir wo. Amaa Jeofa poɗ de deele Danyeln diŋ de yããge ɓe go jag migir wo no (Dan. 6:12-15, 20-22). Naa lag de deele peel Jeofa doo Danyel ne lagge lay là?

12. Mayse kay Danyel maaga á mo hay de deele see Jeofa là?

¹² Doo maaga naa ko le ciŋ la ne mono, joŋ ga naa mo hay de deele diŋ dage. De deele Danyeln hay kwũy debaŋ diŋ werga á hay da Pan ɓe maa ciŋn debaŋ. Sen go tinoo tu ga Danyel ya’ wer da Jeofa ciŋ ni diŋ de ɗiggi ti joŋre ɓe maa de wooren wo no, lan de ɗiggi ti ɗeŋ maaga Á naa nen ɓaara go mono (Dan. 9:4). Danyel ɗig ti fẽẽre maa de woore wo ga Jeofa hay joŋ ne hẽn lan ne jar maa ni Ɓen wo ɓuy mono, lan se joŋ suse’ ne hẽn ti ɓaara​—Dan. 2:20-23; 9:15, 16.

13. (a) Re maa hõn wo de gayri ga weere jõõre naan yiŋ wo de ɓaara là? Hã saɓlaŋ po boŋ ɗa. (b) Doo maaga à ko ɓil videyon ne mono, hayga jobo wii jag ɓo we ga sedeewa Jeofa ɗig wo ti werpiiri maaga suɗ wo de kããra na ɗiggi la no, ndo yiŋ jag na ga hãylà?

¹³ Doo Danyel, maa jõõre naan wo wara yoo jar maaga bay wo hoo sug ti Jeofa wo de jag liŋgi ɓen wo wa. Maapo ga jar sen joŋ wo de sãy jar maaga da wo Jeofa ti ga. Jar maa po  joŋ wo bon maa jõõre naan wo maaga á mo hay wo de deele see Jeofa wa. Naa ko ba fẽn maaga hay da’ wee jõõ po ɓi sir Ostrali ga à ɗen Grim mo ɗa. Á yiŋ de re po maa de gayri de maaga á hay ti “lycée” mono. Jee had ragen wii jag ɓaara ga hayga bar ɓaara po wãã we ne hara ga se diŋ jee twar maa suɗgi de werpiiri wo lay no, á joŋ wo joŋge là. Jee had ragen wãã ne jar maa tiŋman wo ɓuy ga jar maaga da wo joŋge doo jee sen ne mo lag wo go ti nene, jar maaga bay wo de sãy joŋge ti doo sen ne wa mo lag wo ti nen ɓaŋla lay. Grim wãã ga “Jar maa tiŋman wo ɓuy lag wo go ti ɓaŋ jar maaga wo de sãy joŋge doo sen ne mono, wùr de weel po tiŋma ni diŋ sedeewa Jeofa, wùr lag go ti ɓaŋ lan lay.” Re maaga hres hay diŋ fẽn maaga hay hãy de deele Grim see Jeofa. Grim wãã ga: “Weere lakol maa lan wo de jee hadgen ɓuy ig wo ɗar wùr debaŋ. Ndi dur de ngar ẽgre ɓi maa wããge ne hara desãy, de hooge sug lay; wer mayse ga ndi day joŋge doo sen ne ga la; saara laa ba dayge co’ sug wããre po maaga ndi wãã koh boŋ ga ɓuy yaw.” Re se de gayrin hãy Grim na hãyge là? Á wãã ga: “á hay bay de cõõre jag ɓi de maaga kããre ɓin ɗar wo ndi mo wa, amaa ɓil ɓi hay go feh wer maaga ndi wãã go ti hãge ɓil ɓin bay daɗge mono.” c

14. Naa joŋ joŋge maaga naa mo hay tum de deele peel Jeofa là?

¹⁴ Doo Danyel ne mono, naa yaŋ da Jeofa debaŋ no, naa joŋ go de baa wer see naa maa lagge de deele peel ɓe lay. Naa ya’ wer da Jeofa ciŋ ni debaŋ debaŋ diŋ de da’ge wer ne joŋre ɓe maa de wooren wo no. Ko ba ɗa, naa mbe de kããge maa kiɗ wer fẽẽre maaga á joŋ ra mono (Rom. 1:20). Hayga ndo da we ga ndo ya’ wer da Jeofa lan ya’ wer hoo sug ti ɓe ciŋ ni debaŋ no, ni ndo jaŋ artikle maa jag de dogleere wo ɓil “rubrique” “Hasard ou conception ?”, noga ko videyon wo no. Ndo da we ndo jaŋ mbo kefder maa kleere La vie a-t-elle été créée? Wo de Cinq​—questions à se poser sur l’origine de la vie pa. Ko maaga mãygeman naa Ester ɓi sir Danemark wãã ti kefder sen wo mo ɗa: “Wããre maa ɓil ɓaaran wo de seege de woore debaŋ. Kefdern bay wo wãã mo maaga ndo mo hã ɓil ti ɓe wa, á sii wo fẽẽren wo go mo de ɗeŋ maaga ndo mo laa ra go gusi, day men wo ndo maŋ ɗiggi diŋ ndo de see ɓo.” Ben maaga à hay wãã le go ti ɓe la wãã ga: “Kefder sen ya’ wo hãge ɓil ciŋ debaŋ. Á ngaɓ wo go ga caa fẽẽren ɓuy diŋ Baa.” Blam maaga ndo jaŋ kefder sen wo we no, ndo baw yaŋ go jag jiili ɓo ti maaga Bible wãã ga: “Waŋkluu wùr no, Baa wùr no, ndo de kããge maga wùr togoɗ mo, wùr ra ɗúu ɓo, wùr maŋ ti kluu ɓon ciŋ werga joŋ fẽẽren wo ɓuy diŋ ndo, diŋ wer dage ɓo, ndo hay joŋ ra day saara wara deŋ ɓuy ɗa lay”​—Naa. 4:11. d

15. Ɗeŋ maa tigriŋ ga naa sa’ barge de Jeofa de ɓe diŋ maa hõnlà?

¹⁵ Ɗeŋ maa tigriŋ maa ya’ wer da Jeofa ciŋ ni pa diŋ kiɗgi wer ne naw Weel ɓe Yeso no. Mãygeman naa po à ɗen ga Samira ɓi sir Almãy joŋ se no. Á wãã ga: “Ndi da’ wer go ne Jeofa de woore diŋ wer Yeso.” De maaga á hay tigli mono, á hay see Samira de gayri debaŋ maa yããge ga Jeofa de ɗiggi. Amaa á hay mbe de koge ga re cee Yeso ane. Á wãã pa ga: “Ndi da Yeso werga á hay fegge de jar debaŋ, lan da kamliiri wo.” De maaga á ya’ wer ko Yeso mono, se ya’ wer ko Jeofa ciŋ ni lay. Wer mayne? Á wãã ga: “Mẽ’ mẽ’ ndi wo da’ge ga Yeso hay joŋ fẽẽre doo Pan ɓe ne taw taw tu. Á joŋ wo fẽẽre de maŋ kããra debaŋ. Ndi wo da’ge ga á diŋ re po boŋ yoo maa tigriŋ wo maaga  Jeofa ɓo’ Yeso le go gesiŋ la, maaga jar téebeere mo da’ wo wer ne se” (Jaŋ 14:9). Hayga ndo yaŋ de sãy sa’ barge de Jeofa ti kwũy no, ndo bay ba maaga ndo maŋ wur maa sa’ holaŋ ɓo de Yeso wa yawlà? Hayga ndo joŋ we doo sen ne no, dage ɓo see Jeofa, lan de deele ɓo see ɓe gẽẽ yaŋ ciŋ.

16. Wer mayse ga naa mo hay de deele là? (Siŋ wora 18:25; Mise 6:8)

¹⁶ Hayga naa yaŋ de deele see jar no, naa da’ barge maaga joŋ wo de deele see naa yaŋ lay (Rud 1:14-17). Lan hayga naa yaŋ de deele see Jeofa no, naa ko see naa ti desãy, go ɓil feh lay. Wer maylà? Werga Jeofa de wããge ga se joŋ yaŋ de deele se jar maaga wo de deele see se mo lay (Jaŋ Siŋ wora 18:25; Mise 6:8). Ɗig ba mbo ti mopo la ɗa​—koh de maaga naa mbe kleere debaŋ de daŋ jee caa fẽẽre mo laybla no, á ga se joŋ yaŋ tum da naa! Maaga naa baa barge maa de maŋ sen we de Jeofa no, mo hay ba re po, mo hay ba jee hee, noga húulí yaw, kãã maa caa holaŋ naa go de ɓe ga (Dan. 12:13; Lug 20:37, 38; Rom. 8:38, 39). Á de woore maaga naa mo hay doo Danyel ne no, mo hay de deele peel Jeofa!

17-18. Naa had mayse see Danyel pa là?

¹⁷ Ɓil hadge sen la naa ko joŋre Danyel maa de woore po wo ɓog tawa tu. Amaa maa tigriŋ mbaara ngaɓa deŋ ga naa had ti ɓe see ɓaara pa. Ko ba ɗa, Jeofa dog mbuɗ nen Danyel ɓaale puri, joŋ ga á mo lwa’ ɓaale puri, lan hã ẽgre ne hẽn maa naa wer profesi wo. Daŋge profesi sen wo go de bag jage. Maa tigriŋ wãã wo ti fẽẽre maaga hresge wo ti naw maa peel no, ga du’ ge wo wosela ɓuy yaŋ ti sir la mono.

¹⁸ Ti hadge maa peeln wo la mono, naa frug nen profesi po wo yaŋ ɓil kefder Danyel ɓoge. Laage wer ne hara kay naa ɓuy, ndo wee klee noga jee kluu yaw, maa maŋ ɗiggi maa de woore patala ɓaa. Á kay wo naa pa, maaga naa mo hay go de bag jag see naa see ngeel maa peel no, werga naa joŋ ge de sãy maaga naa mo hay coɓge jag re wo ti, lan de deele peel Jeofa.