1. Doo maaga naa da’ ɓil Hebre wo 12:1 ne mono, naa mo hay joŋ mayse maa taw ti ɗee maa da’ tenen maa tumn go là?

 BIBLE ngaɓ naw naa kretiyẽ de ɗee. Jar ɗee maaga day wo go ti ngeel maaga ɗeen taw ti ni mo ɓuy da’ wo poɗge tenen maa tum (2 Tim. 4:7, 8). Naa nen durgi go de ẽgre naa ɓuy maa lagge ti ɗee no werga naa go see ngeel maaga ɗeen taw ti ni mbaŋ debaŋ. Apotre Pol maaga ɓo’ ti ɗeen go ngaɓ fẽn maaga kay maa daŋge ti ɗee no. Á baa yaŋ ne naa ga “naa mo ɓod re maa põɗ naan wo go . . . naa mo ɗee wo pel naa de deele diŋ ti ngel maga a wo bag jag ɗeen ni mono”​—Jaŋ Hebre wo 12:1.

2. “Ɓod[ge] re maa põɗ naan wo go” da wããge ga hãylà?

² Maaga Pol yer ga “naa mo ɓod re maa põɗ naan wo go” mono, á hay da wããge diŋ ga naa mo maŋ põõre po ti naa wa yaw? Bay wa. Á hay da wããge diŋ ga naa mo ɓod põõre maaga sen kay wo naa ga go. Maapo põõre maa de maŋ sen bag wo ti naa, gay wo naa go. Maa durgi jag ɗeen mono, naa mo hay da’ wer go ne fẽẽre maaga põɗ wo naa mono, hay ɓod ra go. Amaa, naa day ɓod põõre maaga naa nen far rage go ga lay. Hayga naa men soɗ põõre sen wo we go no, naa lag ti ɗeen ni ga so (2 Tim. 2:5). Põõre maaga naa maa far rage diŋ mayse wo là?

3. (a) Doo maaga à da’ ɓil Galad wo 6:5 ne mono, fẽn maaga naa nen maŋge ɓe diŋ mayselà? (b) Ɓil hadge sen la naa ko yaŋ diŋ mayse wo là, wer maylà?

³ Jaŋ Galad wo 6:5. Pol ngaɓ fẽn po maaga naa maa maŋge ɓe. Á yer ga: “Wosela ɓuy soɗ ge põõre re ɓen yaŋ diŋ se de see ɓe.” Pol wãã la ni diŋ ti joŋre maaga Baa de gorge ɓe do wosela ɓuy yoo naa mono. Nen hadge sen la naa ko yaŋ diŋ maaga “põõre [naa]” diŋ mayse wo la, lan ɗeŋ maaga naa soɗ ra mono. Ni pa mono, naa ko põõre maaga bay wo kay naa wa ga  maapo naa de soɗ rage, lan had ɗeŋ maaga naa ɓod ra go mo lay. Farge põõre naa maa ti see naan wo, laŋ ɓodge maaga sen kay wo naa wo go, kay naa yaŋ maaga naa mo day go ti tawgeti ɗee maa da’ tenen maa tum no.

4. Wer mayse ga hooge sug ti ha’ge maaga naa wãã ne Baa nen tosge bay de gayri debaŋ wa là? (Ko foton lay)

⁴ Hãge see naa go ne Baa nen tosge no. Maaga naa hã see naa go ne Jeofa nen tosge mono, naa ha’ go peel ɓe ga naa goŋ ne yaŋ tum, joŋ dage ɓe yaŋ tum lay. Naa de hay hoo sug ti ha’ge naa no. Hooge sug ti hãge see naa go ne Baan diŋ fẽn maaga naa hay joŋ tum ɗiggi ti ɓe, amaa á bay diŋ põõre wa. Sen diŋ werga Jeofa joŋ naa diŋ maa joŋ dage ɓe (Naa. 4:11). Á joŋ naa nen maaga naa mo hay de sãy ko se ge ti, de sãy goŋ se ge ti. Á joŋ naa de maŋ see ɓe. Diŋ wersen so ga naa de kããge maa ya’ see naa see ɓe, lan maa da’ fruygi wer joŋge dage ɓe (Siŋ. 40:8). Ni pa mono, maaga naa yaŋ joŋ dage Baa, yaŋ maŋ blam Weel ɓen lay no, naa “lagge yaŋ iggi eŋ lag cwãy”​—Mat. 11:28-30.

5. Mayse kay naa maa bag jag fẽn maaga naa wãã ne Baa nen tosge go là (1 Jaŋ 5:3)?

 ⁵ Ndo soɗ põõren soɗge là? Fẽẽre maa kay ndon wo ɓoge. Taŋgu ɗa, ya’ wer dage ɓo see Jeofa ciŋ ni. Ndo joŋ sen diŋ de ɗiggi ti fẽẽre maaga á joŋ ne ndo de woore mo ɓuy, lan ti bosa’ maaga á de kaŋ rage ne naa ciŋ peel mono. Dage ɓo see Baa ya’ we ciŋ ni no, se kol go gus ne ndo maa hoo sug ti ɓe lay (Jaŋ 1 Jaŋ 5:3). Maa de ɓog no, maŋ blam Yeso. Á joŋ dage Baa de woore tum diŋ werga á hay tosge ɓe, lan hay de kaŋ ɗiggi ti poɗge ɓe no (Heb. 5:7; 12:2). Doo Yeso ne lay mono, tos Jeofa maaga ndo mo hay de ẽgre, lan maaga ɗiggi ɓo mo hay de kaŋge ti tenen maa tumn de woore. De maaga dage ɓo see Baa de ya’ge ciŋ ni, lan de maaga ndo maŋ blam weel ɓen mono, ndo joŋ yaŋ de kããge maa bag jag fẽn maaga ndo wãã ne Jeofa go.

6. Wer mayse ga naa de bag jag joŋre maaga wo nen do naa ɓi feele wo go là? (Ko foton lay)

⁶ Joŋre maaga wo nen do naa ɓi feele. Ti ɗee naa maa da’ tenen maa tumn mono, naa da Jeofa wo de Yeso de daŋ jar maa liŋ ni naa wo (Mat. 10:37). Amaa sen bay da wããge diŋ ga naa mo yõõ ti go ti joŋre maaga wo nen do naa ɓi feele wo doo ga á maŋ wo jag naa go maa hoo sug ti Baa wo de Kris na wa. Maaga naa mo hay de cõõre jag Baa wo de Yeso mono, naa de bag jag joŋre maaga wo nen do naa ɓi feele wo go (1 Tim. 5:4, 8). Hayga naa joŋ sen we no, naa joŋ yaŋ de fruygi debaŋ. Jeofa de koge ga ɓi feele joŋ ti desãy diŋ de maaga war wo de wãy yaŋ wo joŋ kããra de dage, de hooge sug no; pããreben yaŋ wo da weere ɓaara wo; yaŋ wo gẽẽ rage de el no; lan weeren yaŋ wo hoo sug ti pããre ɓaara wo lay no​—Efe. 5:33; 6:1, 4.

7. Ndo bag jag joŋre maa ɓi feele ga Jeofa de gorge ɓe do ɓo go na bagge là?

⁷ Ndo soɗ põõren soɗge là? Ndo mo hay ba diŋ jee tware, wãy noga mbarga, joŋ joŋre de yaŋ maa de koge re ɓil Biblen wo no. Joŋ fẽẽren doo maaga ndo ɗig ga á hay joŋ wo ne wa, noga doo maaga jar maa ɓaŋ ɓay joŋ wo ne wa, noga pa doo maaga jar maaga ɗig wo ga saara de ko wer fẽẽre debaŋ joŋ wo ne wa lay (Jõõ. 24:3, 4). Joŋ joŋre de kefder naa maaga naa wo wer Bible de woore mono. Ndo da’ ɗeŋ maa joŋ joŋre de wããre maa ɓil Bible maa kay jar yaŋ ɓil ɓaara. Ko ba ɗa, ɓil hadge maaga wo ɓil rubrig “De l’aide pour les familles” mono, naa da’ yaŋ maa soɗ re maa de gayri maaga jar maa de da kããra wo, pããrebe wo, weere maaga bay wo de day jõõre noga tiglliri wa ɗa yiŋ wo de ɓaara ni. b Hay go de baa wer see ɓo maa joŋ joŋre de fẽẽre maaga Bible wãã ra mono, koh jar maa liŋ ni ɓay mo hay ba wo joŋ rage wa. Ndo joŋ we doo sen ne no, ɓi feele ɓo da’ yaŋ wer ɓe, day ndo fruy yaŋ wer bosa’ maa ni Jeofan debaŋ lay​—1 Pi. 3:1, 2.

8. Ɗiggi maaga naa far ra hãy wo naa na hãyge là?

⁸ Soɗ re maaga a wo le wer ɗiggi maaga ndo far ra mono. Jeofa men naa ga naa mo far ɗiggi diŋ naa de see naa, lan se da ga naa fruy wer ɗiggi maa de woore maaga naa far ra mono. Amaa á bay go yãã naa jag re maaga a wo le wer ɗiggi maaga naa far ra de baywoore wo mo wa (Gal. 6:7, 8). Diŋ wersen so ga naa yãã re maaga a le wer ɗiggi maaga naa far ra de baywoore, wer wããre maaga naa wãã de baywoore, lan wer joŋre maaga naa joŋ de baywoore. Maapo ɗiggi naa ruu naa wer fẽẽre maaga naa joŋ ra. Amaa hayga naa yaŋ soɗ  re maaga a wo le wer ɗiggi maaga naa far ra no, se srog glog naa maa sii fẽẽre maaga naa joŋ ra de ɓlagge go, maa ‘wũy ra ge, lan maaga naa mo fer joŋ ra ge wa so. Hayga naa yaŋ tum joŋ fẽẽre sen wo no, se kay naa maaga naa mo hay tum ti faage ma da’ tenen maa tum no.

9. Ndo joŋ joŋge hayga ndo maŋ ɗiggi maa de baywoore we là? (Ko foton lay)

⁹ Ndo soɗ põõren soɗge là? Hayga ndo maŋ ɗiggi maa de baywoore we no, ndo joŋ joŋge là? Hay de koge ga ndo coo fẽn maaga go de joŋge mo ga. Gay see ɓo wããge ga ndo hay joŋ ni ga, noga wãã ga kaŋ wer ɓo maŋ ɗiggi maa de baywoore diŋ jar lan wo wa. Amaa, yãã ga ndo joŋ ɓo we ni ga, lan dur maa joŋ fẽn maaga ẽgre ɓo kãã maa joŋge patala. Hayga ɗiggi ɓo yaŋ ruu ndo ti fẽn maaga ndo joŋ de ɓlagge no, tos Jeofa de fer ti see ɓo gesiŋ, sii fẽn maaga ndo joŋ de ɓlagge go, lan wii fuggi ɓil do ɓe (Siŋ. 25:11; 51:3, 4). Wii fuggi ɓil do jar maaga ndo ma’ ɓil ɓaara mono, lan wii kayge jar maa peel tiŋ-Baa wo hayga á yaŋ diŋ ɓlagge maa kluu no (Jag. 5:14, 15). Da’ koge re see fẽẽre maaga ndo joŋ ra de baywoore mono, lan dur maaga ndo mo fer joŋ ra ge wa so. De joŋge doo sen no no, ndo joŋ yaŋ go de bawge jag jiili ɓo ga Jeofa ko decoo ɓo yaŋ, lan hã kayge maaga ndo de sãy ɓe ti yaŋ mo​—Siŋ. 103:8-13.

10. Wer mayse ga á diŋ põõre de maaga naa yaŋ ɗig joŋre maa de raw ti see naa là (Galad wo 6:4)?

¹⁰ Ɗiggi joŋre maa de raw ti see ɓo. De maaga naa le’ ngaɓ jag see naa we de jar no, ni naa de maŋge ti see naa diŋ joŋre maa de raw ẽgre naa (Jaŋ Galad wo 6:4). Hayga naa yaŋ tum ngaɓ jag see naa de jar no, naa kol de huni, lan de ɗiggi maaga naa mo daŋ jar lan ɓili (Gal. 5:26). Hayga naa wãã we ga naa joŋ fẽẽre doo maaga jar lan joŋ wo nono, amaa ga naa bay we de kããge wa no, ni naa de joŋ bon see naa. Day hayga “Mopo maaga jobo gor ne, day a gus gà, car jag jiili ɓe go”, yo’ ma’ ne mopo maaga jobo gor ne ga a ga mo yawlà (Jõõ. 13:12)! Hayga naa yaŋ joŋge doo sen no no, naa joŋge go de woo do debaŋ nen maaga ẽgre naa joŋ maa ɗeege ti faage maa da’ tenen maa tumn ga so​—Jõõ. 24:10.

11. Mayse kay ndo maaga ndo mo ɓod põõre maaga soɗ wo do ɓo ga go là?

¹¹ Ndo ɓo’ põõre sen go na ɓo’ge là? Ɗig ga ndo joŋ fẽn maaga Jeofa bay gorge ɓe do ɓo wa wa. Jeofa bay gorge ga ndo ne hã fẽn maaga bay do ɓo wa ne se wa (2 Kor. 8:12). Á mo hay nen ɓo ga Jeofa bay ngaɓ ndo de jar tigriŋ wo wa (Mat. 25:20-23). Á kee joŋre ɓo maaga ndo joŋ ne hẽn go de ɓil ɓo ɓuy mono, kee de deele ɓo no, lan durgi ɓo no. Hay fer ti see ɓo gesiŋ de koge ga ndo kãã maa joŋ fẽn maaga ɓil ɓo da ne ga werga ndo bay holaŋ wa, ndo go de garge, noga wer fẽẽre maa tigriŋ wo. Hayga à hã joŋre we ne ndo do, day ga ẽgre ɓo kãã maa joŋge ɓe ga so werga ndo de ceege noga go de garge no, yãã ne wa doo Barsilayi ne lay (2 Sam. 19:35, 36). Doo Moyis ne lay no, yãã kayge jare, lan hã joŋre go ne jar tigriŋ wo do hayga á yaŋ nen joŋge no (Laa. 18:21, 22). Hayga ndo yaŋ de ko ngar hugli see ɓo, ndo ɗig maa joŋ fẽẽre maaga maŋ wo jag ɓo go ɗeege ti faage maa da’ tenen maa tumn ga.

12. Kaŋ wer jar far ɗiggi maa de baywoore diŋ naa yawlà? Naa wer ɓe.

¹² Diggi maaga kaŋ wer jar go ɗig ɗiggi maa de baywoore diŋ naa. Naa bay de kããge maa maŋ ɗiggi ti tu jar wa; lan naa yãã ra go jag re maaga a wo le wer ɗiggi ɓaara maaga á maŋ wo de baywoore tum ga lay. Ko ba ɗa, maapo ga mbarga maa twar noga maa twãy po men goŋ Jeofa go. Ɗiggi sen mokay caa jiili pããre ɓe wo go debaŋ debaŋ. Amaa, pããre  maaga ɗig wo ga mbargan maŋ ɗiggi maa de baywoore diŋ wer saara maŋ wo põõre maa kluu ti ɓaara. Jeofa bay gorge ga á mo maŋ wo põõre maa de maŋ sen ti ɓaara wa​—Rom. 14:12.

13. Pããbe joŋ joŋge hayga mbarga ɓe maŋ ɗiggi maa de baywoore we là?

¹³ Ndo ɓo’ põõre sen go na ɓo’ge là? Hay de koge ga Jeofa men wosela ɓuy yoo naa far ɗiggi diŋ se de see ɓe. Á men wosela ɓuy joŋ fẽn maaga ɓil ɓe da. Sen da wããge ga jobo mbe de kããge maaga se yãã ga se goŋ ne, noga se goŋ ne ga. Jeofa de koge ga ndo bay diŋ pããbe maa keɗed wa; á da ga ndo mo dur de ngar ẽgre ɓo tawa tu. Soɗ re maa wer ɗiggi maaga mbargaa ɓon maŋ ne diŋ se de see ɓe tu, bay diŋ ndo wa (Jõõ. 20:11). Amaa maapo ga ndo pããben ndo joŋ mbo tum ɗig fẽẽre maaga ndo hay joŋ de baywoore. Hayga á yaŋ doo sen ne no, sii fẽn maaga de ɗig ndo ne Jeofa, lan wii fuggi ɓil do ɓe. Á de koge ga ndo fer blam coo fẽn maaga go de hresge mo ga. Amaa á bay dage ga ndo mo yãã mbarga ɓon go jag re maaga a wo le wer ɗiggi maaga á maŋ ne de baywoore mo wa lay. Hay de koge ga mbarga ɓon dur we maaga se mo fer le see Jeofa no, á joŋ go temge deŋ maa yããge ɓe de fruygi​—Lug 15:18-20.

14. Wer mayse ga lawge debaŋ diŋ põõre maaga naa mo ɓo’n go là?

¹⁴ Lawge tum ti ɓlagge maaga naa joŋ ra. Á mbe ti ngeel ɓe maaga naa law ti ɓlagge maaga naa joŋ ra mono. Amaa Jeofa bay de dage ga naa mo hay tum lawge wa. Á diŋ põõre maaga naa mo ɓo’n go. Naa ko tẽ’ ga naa de lawge debaŋ là? Hayga naa sii ɓlagge naa we go, naa men joŋge ɓe we go, lan naa dur de ẽgre naa ɓuy maaga naa fer joŋge ɓe ga so no, ni naa mo hay go de bawge jag jiili naa ga Jeofa go de fug ɓil ne naa ti (Joŋ. 3:19). Jeofa bay dage ga naa mo hay tum nen lawge blam maaga naa joŋ fẽẽre sen wo we ga so no. Jeofa de koge ga naa yaŋ tum lawge no, naa joŋ bone (Siŋ. 31:10). Hayga naa men see naa we nen lawge debaŋ no, maapo ga naa men ɗee maa ti faage tenen maa tumn go​—2 Kor. 2:7.

15. Mayse kay ndo maaga ndo mo law debaŋ wa là (1 Jaŋ 3:19, 20)? (Ko foton lay)

 ¹⁵ Ndo ɓo’ põõre sen go na ɓo’ge là? Hayga ndo yaŋ ko see ɓo tum nen lawge no, ni ndo kaŋ ɗiggi diŋ ti “fuggi ɓil maa cwãy” ga a le diŋ see Baa mono (Siŋ. 130:4, [NWT]). Maaga á fug ɓil go ne jar maaga men wo joŋ ɓlagge ɓaaran go ti cwãy cwãy mono, se wãã ga: “Ndi fug gi ɓil yaŋ go ne [hara] ti debaycõõre ɓaara no” (Jer. 31:34, [NWT]). Sen da wããge ga Jeofa bay ferge ɗiggi ti ɓlagge maaga se go de fug ɓil ne ndo ti ɓaara mo wa so. Wersen so ɗig ga bon maaga ndo de yiŋgi de ɓaara patala wer ɓlagge maaga ndo hay joŋ da wo wããge ga Jeofa bay go fug ɓil mo ti wa na wa. Sõõ ɓil ne see ɓo ti wer maaga ndo bas joŋre maaga hay wo de hãge ne ndo do ɓil tiŋ-Baa go wa. Jeofa bay tum ɗiggi ti ɓlagge maaga ndo joŋ ra mo wa, day ɗig ti ɓaara wa lay​—Jaŋ 1 Jaŋ 3:​19, 20.

16. Naa jar ɗeen naa mo hay de koge ga hãylà?

¹⁶ De maaga naa de ɗee ɗee maa da’ tenen maa tumn mono, naa mo “ɗee maga [naa] mo wo da’ poɗge no” (1 Kor. 9:24). Naa joŋ de kããge maa joŋ sen diŋ de maaga naa yaŋ de ko põõre maaga naa maa soɗ rage, lan põõre maaga naa nen ɓo’d rage wo go mono. Ɓil hadge sen la naa ko saɓlaŋ fẽẽre maaga naa maa soɗ rage wo de maaga naa maa ɓod rage wo go mbag ko ɗe. Amaa maa tigriŋ yaŋ mbaara pa. Yeso wãã ga “men we ɗiggi ɓay de kaŋ ge sagsag ti kurwuy wo de taɗ ge de yii wa, hãy we see ɓay ɗig fẽẽre ma patalan wo wa” (Lug 21:34). Verse sen wo la de maa tigriŋ wo kay wo ndo maa ko fẽẽre maaga ndo nen coo rage de maaga ndo de ɗeege ti faage tenen maa tum mono.

17. Wer mayse naa go de bawge jag jiili naa ga naa day go ti tawgeti ɗee tenen maa tumn là?

¹⁷ Naa go de bawge jag jiili naa ga naa day go ti tawgeti ɗee no werga Jeofa hã ẽgre maaga naa de sãy ɓe ti ne naa (Esa. 40:29-31). Wersen bag see ɓo wa! Joŋ doo Apotre Pol ne ga ɗee go de ẽgre ɓe ɓuy maa da’ poɗge maaga à hã ne hẽn mono (Fil. 3:13, 14). Jee tigriŋ ɗee ɗee sen go ti tu ɓo ga, amaa wer kayge maa ni Jeofan ndo kal mbo ti yaŋ go. Jeofa de kããge maa kay ndo hoo põõre maaga ndo maa hoo rage ti ɓo, lan maa ɓod põõre maaga kay wo ndo ga go lay (Siŋ. 68:19). Wer kayge maa ɓen, ndo joŋ yaŋ de kããge maa durgi jag ɗee no, lan ndo day yaŋ go!