1. Mayse kay naa maa da fruggi nen profesi maa ɓil Bible là?

 HẼN naa po à ɗen Ben wãã ga “Ndi da frug nen profesi maa ɓil Biblen wo debaŋ.” Ndo lay? Noga ndo joŋ hẽẽne fruggi nen profesi wo yawlà? Maapo fruggi nen profesi wo joŋ cwããge mo. Amaa de maaga ndo ya’ wer ko re maaga Jeofa yer ra ɓil wããre ɓen wer ɓaara we ciŋ ni no, saara kol de cõõre jag ɓo.

2. Naa wãã yaŋ ɓil hadge sen la diŋ ti mayse là?

² Ɓil hadge sen la naa ko yaŋ wer mayse ga naa de frug nen profesi maa ɓil Bible wo la, lan naa ko ɗeŋ maaga naa frug nen ɓaara fruggi la yaŋ lay. Naa frug nen profesi maa ɓil kefder Danyel po yaŋ wo ɓoge maa ko ge ga laage wer ne hara kay naa patala ɓaa na kayge là. 

3. Naa de sãy joŋ mayse ti hayga naa yaŋ de sãy laa wer profesi maa ɓil Bible wo ti là?

³ Naa de sãy wii kayge ti maa laa wer profesi maa ɓil Biblen wo. Ko saɓlaŋ po la ɗa. Ɗig ba doo maaga ndo de woge ti ngeel po maaga ndo hay bay de wo ge ni ti boŋ wa, amaa bar ɓo maaga nday wer kããra go de koge ɓe de woore. Á go de ko ngeel maaga nday ni de woore lan de ko faage maaga wo ni mo lay. Sen go tinoo tu ga ɓil ɓo joŋ go feh debaŋ hayga á yãã we ga se kaŋ ndo no! Jeofa diŋ doo bar naa se ga da kay naa mono. Á de ko re maaga a ge wo le peel mono. Doo sen no kay maaga naa mo laa wer profesi maa ɓil Biblen wo mono, say naa wii kayge do Jeofa de fer ti see naa gesiŋ​—Dan. 2:28; 2 Pi. 1:19, 20.

4. Wer mayse ga Jeofa yer profesi wo ɓil Wããre ɓen là (Jermi 29:11)? (ko foton lay)

⁴ Doo pããbe maa de el maa hõnla ɓuy nono, Jeofa da ga weere sen mo hay joŋ wo naw maa peeln de fruygi (Jaŋ Jermi 29:11). Amaa Jeofa sar de jee táabay, á de kããge maaga se wãã  fẽn maaga joŋ ge yaŋ wo peel ne naa ti ngeel ɓe. Á joŋ ga yer profesi wo ɓil kefder ɓen nen maaga naa da’ wer go ne fẽẽre maaga age yaŋ wo le peel go taŋgu maaga á hresge wo mono (Esa. 46:10). Prosefi maa ɓil Biblen wo diŋ kado maa de dage ga a wo le do Pan naa maa ciŋ no. Day ndo joŋ go de bawge jag jiili ɓo ga fẽẽre maaga Bible wãã ra bag wo jag yaŋ go ti ngeel ɓaara cwãy na bawge là?

5. Weejõõ had mayse see saɓlaŋ Magse là?

⁵ Ti lakol mono, weere naan wo yoo jar maaga bay wo hoo sug ti wããre maa ɓil Biblen debaŋ wa, noga bay ba wo hoo sug ti ɓe wa has ɓuy yaw. Fẽn maaga á wãã wo, noga joŋ wo srog glog ɓaara maaga á mo le’ wo ɓod faare ti hãge ɓil ɓaaran wo no. Ko saɓlaŋ hẽn naa po à ɗen Magse ɗa. Á wãã ga: “De maaga ndi hay bay go jõõ ɓuy wa ɗa mono, ndi le’ ɓod faare jag jiili ɓi ga hadge maaga pããre ɓi hay wo had mege hay diŋ cwãy, Ian ga à yer mbe Bible na diŋ de ẽgre nenterse Baa cwãy yawlà.” Pããre ɓe joŋ wo na maylà? Á wãã ga: “Á fer wo wããre me desãy; koh de maaga á hay mbaara go de caa jiili mono.” Pããre Magse yiŋ wo jag ne hẽn diŋ de Bible. Magse ti see ɓe joŋ mopo lay. Á wãã ga: “Ndi hay frug nen profesin wo diŋ ndi de see ɓi tu, lan ndi ndal ti fẽn maaga ndi laa ne de kããre ɓi wo no.” Se ɓo’ ti go na ɓo’ge ne? Magse wãã ga: “Blam sen ndi hay go de bawge jag jiili ɓi ga à yer Bible diŋ de ẽgre nenterse Baa mbe cwãy!”

6. Ndo hay joŋ may de maaga ndo yaŋ ɓod faare jag jiili ɓo là, day wer maylà?

⁶ Hayga ndo le’ ɓod faare we jag jiili ɓo doo Magse ga wããre maa ɓil Bible bay cwãy wa lay no, ni sõõre mo joŋ ndo wa. Amaa ndo hay joŋ mopo deparday tu. Ɓodge faare diŋ doo da’ge wày ne no. Maaga mopo da’ way we go no, se ɓlag woore fẽn sen go mẽ’ mẽ’ẽ. Maa tĩĩ wer naa da’ge wày maaga ɓlag hãge ɓil ɓon go mono, wii jag see ɓo ga: ‘Ndi mbi na de hã ɓil ti mo maaga Bible wãã ti naw maa peel wo mo yawlà?’ Hayga ndo yaŋ bay we go de bawge jag jiili ɓo wa no, ni ndo frug nen profesi maa ɓil Bible ga wo go de bag jag mono. Ko maaga ndo joŋ joŋge là mo ɗa.

7. Mayse hay kay Danyel maa frug nen profesi wo là (Daniel 12:10)?

⁷ Danyel men saɓlaŋ maa de woore ti ɓaŋ fruggi nen profesi maa ɓil Bible ne naa ɓuy. Á hay frug nen profesi wo ti re po maa de woore: maa da’ wer ne cwãy. Danyel hay fer ti se ɓe gesiŋ lay. Á hay de koge ga Jeofa kay jar maaga hoo wo sug ti ɓe lan wo de koge ɓe maa laa wer profesi (Dan. 2:27, 28; Jaŋ Danyel 12:10). Á ngaɓ go ga se hay fer ti see se gesiŋ diŋ de wii kayge do Jeofa nen tosge (Dan. 2:18). Danyel hay frug nen fẽẽre kuɗum kuɗum debaŋ pa. Á hay kiɗ wer fẽẽre ɓil kefder maaga hay wo go de yerge ti wur maa ɓen mono (Jer. 25:11, 12; Dan. 9:2). Ndo joŋ doo Danyel ne na joŋge lay là?

8. Wer mayse ga jar maa po bay wo hã ɓil ga profesi maa ɓil Biblen bag wo jag yaŋ go wa là, day naa de hay joŋ diŋ maylà?

⁸ Ko re maaga ndo frug nen profesi wo wer ɓaara mono. Ndo joŋ mbo ne na diŋ werga ndo da da’ wer ne cwãy kidolgi? Hayga á yaŋ doo sen  ne no, ni Jeofa kay mo yaŋ (Jaŋ 4:23, 24; 14:16, 17). Amaa jar maa po frug wo nen Bible diŋ wer re maa tigriŋ wo? Jar maa po frug wo nen ɓe diŋ maa kiɗ fẽn maaga wãã yaŋ ga Bible bay wããre Baa wa mono. Á ɗig wo ga hayga Bible bay we le de age diŋ see Baa wa no, saara ko fẽn maaga mo ta’ ti ngeel ɓe noga de ɓlagge yaŋ mbe diŋ saara tu. Amaa re maaga naa frug nen Bible wer ɓaara mo hay wo de woore. Ni pa mono, joŋre po maa de woore ga kay naa laa wer ne profesi maa ɓil Biblen wo yaŋ.

9. Joŋre maa hõn de kay maa laa wer ne profesi maa ɓil Bible wo là? Naa wer ɓe ɗa.

⁹ Hay fer ti see ɓo gesiŋ. Jeofa de wããge ga se kay jar maaga fer wo ti see ɓaara gesiŋ mono (Jag 4:6). Wersen so naa de sãy tosge maa da’ kayge maa laa wer ne profesi maa ɓil Biblen wo no ti. Hayga naa yaŋ fer ti see naa gesiŋ no, naa yãã kayge maaga a wo le see weejõõ maa de deele, de ti layn ga Jeofa hay ne maa hã rege maa ti nenterse ne naa mono (Lug 12:42). Jeofa bay diŋ Baa maa de hãy hãy wa, sen mbe ti ngeel ɓe ga á joŋ joŋre diŋ de kããge po ka’ boŋ tawa tu maa kay jar maa laa wer ne cwãy maaga wo ɓil wããre ɓen mono​—1 Kor. 14:33; Efe. 4:4-6.

10. Ndo da’ hadge mayse see saɓlaŋ Ester là?

¹⁰ Hay frug nen wããre kuɗum. Tĩĩ wer fruggi diŋ nen profesi maaga ndo da sen mono. Mãygeman naa po à ɗen Ester hay joŋge doo sen ne no. Á da ga se mo da’ wer ne profesi maaga hay wããge ti age Mesin mono. Á wãã ga: “De maaga kiŋgi ɓi hay 15 mono, ndi le’ frug wer ne fẽẽre maaga ngaɓ wo go ga profesi sen hay wo go de yerge taŋgu wur maa ni Yeson cwãy.” Fẽẽre maaga á laa ti «rouleaux de la mer Morte» hãã bawge go ne hẽn jag jiili. Á wãã ga: “Maapo wo yoo ɓaara hay wo de yerge taŋgu wur maa ni Yeso no, kaŋ nen ga profesi maa ɓil ɓaara a wo le diŋ see Baa.” Ester yãã ga: “Ndi dog jaŋ wããre maa ɓil ɓaara ɓaale pur maaga ndi mo laa wer ne hara.” Amaa ɓil ɓe go de fruygi debaŋ ti maaga se dur maa joŋ sen mono. Blam maaga á frug nen profesi maa po wo go de woore mono, á wãã ga: “Ndi da’ mbi wer go de see ɓi tu seŋ ga Bible diŋ wããre Baa cwãy!”

11. Naa da’ mayse de maaga naa go de bawge jag jiili naa ga Bible diŋ cwãy là?

¹¹ De maaga naa ko ɗeŋ maaga profesi maa po wo ɓil wããre Baa bag wo jag go bagge la mono, kaŋge ɗiggi naa ti Jeofa lan ti ɗeŋ maaga á bag yaŋ ne naa ya’ wer ciŋ ni debaŋ. Ni pa mono, profesi maa ɓil Biblen kay wo naa maaga ɗiggi naa mo hay de kaŋge ti ngeel maa peeln de woore, koh gayri maaga naa nen ɓaara patala mo hay ba wo ẽlà. Naa ko profesi po maaga Danyel yer ra ɓog ga wo go de bag jag patala ɗa. Laage wer ne hara kay naa maa far ɗiggi de ko re.

12. Ɓaale foto maaga diŋ “boo de neege see pãy” ngaɓ diŋ maylà? (Danyel 2:41-43)

¹² Jaŋ Danyel 2:41-43. Nen lwa’ge maaga Danyel naa wer ɓe ne waŋ Nebukadnesar mono, ɓaale foton hay de joŋge diŋ de “boo de neege see pãy.” Maaga naa tap profesi sen we de maa tigriŋ wo ɓil kefder Danyel lan ɓil kefder Naage nene no, naa da’ ga ɓaale foton ngaɓ diŋ tayge  jag sir Amerig wo de sir Aŋgleter, sir maaga daŋ wo go do ẽgre wara ti tamsir ɓuy mono. De maaga naa ko sir sen ga daŋ go do ẽgre ti tamsir ɓuy mono, Danyel wãã ga “sir waŋ sen joŋ ge plaŋ de egre, plaŋ de de gayre.” Wer mayse ga plaŋ de gayre là? Werga jar maa ɓil sir sen ga de ngaɓge de pãyn joŋ wo maaga sir maa de ngaɓge de boo mo naa nen ẽgre ɓe maa doo boo go wa. b

13. Profesi sen had naa de cwãy maa hõn de woore là?

¹³ See naage wer maaga Danyel naa wer foto maa nen lwa’gen, debaŋ ɓe see naage wer ɓaale ɓen mono, naa da’ cwãy wo ni pur debaŋ. Taŋgu ɗa mono, tayge jag sir Amerig wo de Aŋgleter maaga daŋ wo go do ẽgre ti tamsir ɓuy ngaɓ go ga se de ẽgre debaŋ. Ko ba ɗa, sir Amerig wo de sir Aŋgleter hay wo yoo sir maaga naa wo blum ti durgi maa kluu maa taŋgun ti tamsir  la, lan maa de ɓog no. Amaa ane, sir sen ga daŋ wo go do ẽgre ti tamsir ɓuy hay wo de hugli, lan joŋge wo tum de hugli werga jar maa ɓil sir sen leɗ wo kããra, lan leɗ wo ngomnan lay. Maa de ɓog no, sir sen ga daŋ wo go do ẽgre ti tamsir diŋ maaga joŋ ge blam taw taŋgu maaga Twaywaŋ maa ni Baan caa wer ngomna maa ti tamsir lan wo go ɓuy mono. Koh sir maa tigriŋ mo hay ba mbaara giŋ tayge jag sir Amerig wo de Aŋgleter laybla no, á coo wo ra ge ti boŋ ga. Werga naa de koge ga “húulí[n]” ngaɓ diŋ Twaywaŋ maa ni Baan so mono, á ɓlag ge ɓaale foton go, ga ngaɓ diŋ tayge jag sir Amerig wo de Aŋgleter mono​—Dan. 2:34, 35, 44, 45.

14. Laage wer ne profesi maaga wãã ti ɓaale foto maaga diŋ boo de neege see pãy kay naa maa far ɗiggi de ko re na kayge là?

¹⁴ Ndo mbo go de bawge jag jiili ɓo ga profesi maa ɓil Danyel ga wãã ti ɓaale foto maaga diŋ boo de neege see pãy diŋ cwãy yawlà? Hayga ndo yaŋ hã ɓil ti ɓe no, ɗeŋ maaga ndo joŋ naw ɓon coo yaŋ. Ndo kiɗ ge ga ndo mo da’ suŋgu noga fẽẽre debaŋ ti tamsir maaga á ɓlag ne ge go la mbaŋ ga (Lug 12:16-21; 1 Jaŋ 2:15-17). Laage wer ne profesi sen kay mo maa ko de el joŋre siigi wããre Baan wo de hadge ɓe no (Mat. 6:33; 28:18-20). Blam maaga ndo frug nen profesi sen we no, wii jag see ɓo ga: “Ɗiggi maaga ndi far ra mbaara go de ngaɓge ga Twaywaŋ maa ni Baan caa ge wer ngomna maa ti tamsirn wo go la mbaŋ yawlà?”

15. “Waŋ maa ɓaŋ gloŋ hweden” wo de “waŋ maa ɓaŋ ni wãybann” wo diŋ sir maa hõn wo wara là? (Danyel 11:40)

¹⁵ Jaŋ Danyel 11:40. Danyel maa kluu 11 wãã ti ngomna po wo ɓog ga leɗ wo kããra. Maaga naa tap profesi sen we de maa tigriŋ wo ɓil Bible no, naa da’ ga “waŋ maa ɓaŋ gloŋ hwede[n]” diŋ sir Rusi wo de sir maaga wo de tay jag de ɓe mono, lan “waŋ maa ɓaŋ ni wãyban[n]” diŋ tayge jag sir Amerig wo de sir Aŋgletere, ga daŋ wo go do ẽgre ti tamsir la ɓuy mono. c

16. “Waŋ maa ɓaŋ gloŋ hweden” joŋ jar maa ni Baan wo joŋge là?

¹⁶ À de joŋ bon jar maa ni Baa maaga wo ɓi sir “waŋ maa ɓaŋ gloŋ hwede[n]” debaŋ. Sedeewa Jeofa maa po wo à jwag ra, ɓod ra ti daŋgay wer hãge ɓil ɓaara. Nen maaga joŋge bon maaga “waŋ maa ɓaŋ gloŋ hwede[n]” hay caa hẽẽne hẽẽre naa wo mono, sen fer ya’ hãge ɓil ɓaara ciŋ yaw. Wer maylà? Werga hẽẽre naan wo de koge ga joŋge bon maaga joŋ bon jar maa ni Baan wo go de bagge diŋ jag profesi maa ɓil kefder Danyel no d (Dan. 11:41). Naa yaŋ de koge ɓe ne no, sen kay naa maaga naa mo hay tum  gorge de ɗiggi maa de woore, lan mo hay de deele peel Jeofa lay.

17. Re mayse wo de gayri ga jar maa ni Baa maa ɓi sir maa ni “waŋ maa ɓaŋ ni wãyban” wo de yiŋgi de ɓaara là?

¹⁷ Le ɓaa mono, “waŋ maa ɓaŋ ni wãyban” joŋ bon jar maa ni Baan wo lay. Ko ba ɗa, ti durgi maa kluu maa taŋgun wo de maa de ɓogn mono, à laa hẽẽre naa wo ti daŋgay debaŋ werga á laa wo dayge woge ti durgi ga, lan à nii weere maaga wo diŋ sedeewa Jeofa le go ti lakol debaŋ werga à laa wo dayge goŋ drapo ga. Nen kiŋgi maa blam wo le la mono, jar maa ni Baa maaga wo ɓi sir waŋ sen yiŋ wo de bon wo debaŋ. Ko ba doo maaga à joŋ kampãy maa vod wo mo ɗa, maapo ɗiggi jobo maaga diŋ kretiyẽ joŋ wer parti poltig po noga wer kaŋdida po. Koh á mo day ba go de ɓe vodge wa laybla, maapo le jiili ɓe se de ɗiggi ga mo hay daŋ diŋ jee maa kay no. Wersen so, maaga naa mo maŋ ti ɓaŋ wa has mono, naa de hay joŋ haya ne see naa ti fẽẽre maaga naa joŋ ra, maaga naa ɗig ra, lan maaga á joŋ wo see ne naa joŋge la mo lay!​—Jaŋ 15:18, 19; 18:36.

18. Durgi maa ti holaŋ “waŋ maa ɓaŋ gloŋ hwede[n]” wo de “waŋ maa ɓaŋ ni wãyban[n]” joŋ see ne naa joŋge là? (Ko foton lay)

 ¹⁸ Jar maaga bay wo hã ɓil ti profesi maa ɓil Biblen wo wa caa wo jiili go debaŋ de maaga “waŋ maa ɓaŋ ni wãyban[n]” giŋ “waŋ maa ɓaŋ gloŋ hwede[n]” mono (Dan. 11:40 ). Waŋre sen wo ɓog ɓuy wo de bombe maa de ẽgre debaŋ do, ga kãã maa do’ tamsir go ɓuy. Amaa naa de koge ga Jeofa men fẽn sen ti boŋ joŋge ga (Esa. 45:18). Wersen so, nen maaga durgi maa ti holaŋ “waŋ maa ɓaŋ gloŋ hwede[n]” wo de “waŋ maa ɓaŋ ni wãyban[n]” de hay caa hẽẽne naa, sen fer ya’ wer hãge ɓil naa ciŋ ni yaw. Sen ɓo’ nen go ga tawge tamsir maa debalan go de kosge.

19. Naa de hay joŋ de ko mayse ti profesi maa ɓil Biblen wo là?

¹⁹ Naa bay de ko maaga profesi maa po wo ɓil Bible bag ge wo jag bagge la wa. Koh profet Danyel dra’ hay bay laa wer ne fẽn maaga se hay yer rage mo ɓuy wa (Dan. 12:8, 9). Amaa bay diŋ ga naa bay laa wer ne profesi po de woore wa ga se bag ge jag go ga na wa. Sen go tinoo tu ga Jeofa naa wer fẽn maaga naa nen laa wer ɓe ne naa ti wur ɓe dera, dega’ doo maaga á hay joŋ le ɓaa ne pa​—Amos 3:7.

20. Profesi maa hõn wo de woore ga bag ge wo jag yaŋ ti naw maa peeln là, naa mo hay joŋ tum joŋ maylà?

²⁰ Wããre “ngel go patala desãy jam so” joŋ ge yaŋ (1 Tes. 5:3). Blam mokay ngomna maa ti tamsir wo la ɓuy le’ ge wo jag-Baa maaga bay wo ti ngeel ɓe wa yaŋ, caa wo wer ɓaara go (Naa. 17:16, 17). Á le’ ge wo jar maa ni Baan wo lay (Ese. 38:18, 19). De sen mokay durgi Armagedoŋ tĩĩ wer so (Naa. 16:14, 16). Naa mo hay joŋ go de bawge jag jiili naa ga fẽẽre sen mo deŋ wo go de kos age. Tĩĩ wer wara ka’ mono, naa mo hay we joŋ suse’ ne Pan naa maa ciŋn de kiɗ laage wer ne profesi maa ɓil Biblen wo no, lan de kay jar maa joŋge doo sen ne lay.