▪ Naa laa ɓil hadge sen ga fẽn po yaŋ boŋ daŋ go ga jar téebeere wo de jar peele Baa wo ɓuy hay fer wo wããre ti ɓe: á diŋ koge ɗuu maa kluu maa ni Jeofa no, lan hooge sug ti ɗuu se no. Wããre maaga Jeofa diŋ Waŋ waŋren wo ɓuy (kaŋ nen ga á diŋ waŋ maa keɗed yaw mbala maa de hãã yawlà) diŋ re po mẽ’ see re maa kluu ti koge ɗuu Jeofa lan ti hooge sug ti ɗuu se no. De sen ni pa mono, wããre maa ti de deele jar téebeere wo peel Jeofa (á joŋ wo tum goŋ Jeofa yaw bay wa yawlà) diŋ re po mẽ’ see re maa kluu ti koge ɗuu Jeofa, lan ti hooge sug ti ɗuu sen pa.

Wer mayse ga hãã patala naa baa wùu wããge ga re maa kluun diŋ ti koge ɗuu Jeofa, lan ti hoge sug ti ɗuu sen là? Naa ko re po wo ti sen 3 ɗa:

Taŋgu: ɓil pay sug nee maa Eden mono, Manhúulí wãã ti Jeofa de bay woore, dem ɗuu ɓe. Wiigi jag maaga á wii Efa da wããge ga Jeofa bay diŋ Baa maa de deele wa, lan ga jag liŋgi maaga á hã ne Adam wo de Efa bay ti ngeel ɓe wa. Blam sen Manhúulí raw wãã wããre maa ɓen sar de maa ni Jeofa debaŋ, ga Jeofa diŋ jee gete’e. Á dem ɗuu Jeofa. Se kol go “Manhúulí”, ga da wããge ga “jee dem ɗuu jare” (Jaŋ 8:44). Efa yãã jag Baa ga, sen da wããge ga á laa yããge ga á mo hay Waŋ se ga (Tĩĩ. 3:1-6). Hãã go wara, Manhúulí yaŋ caa gete’ ne Jeofa see maa dem ɗuu ɓe ɗa. Jar maaga hã wo ɓil ti gete’ sen wo go mbaŋ maa ngiɗ faale ne Jeofa. Se diŋ wersen so ga kaŋge ɗag ne ɗuu Jeofa see nen jar maaga joŋ wo peele ne hẽn diŋ ɓlagge maa kluu mono. Ɓlagge wo de debaycõõre wo ti tamsir mo deŋ na diŋ wer re se no.

Maa de ɓog no, say Jeofa fããge ɗuu ɓen yaŋ go naŋ maa kay jar peele ɓe maa ciŋn wo de maa gesiŋ lan wo ɓuy. Sen diŋ fẽn maaga daŋ go nen Jeofa. Á wãã ga : “Ndi fãã ge ɗúu ɓi ma kluu[n] [ . . . ] yaŋ go” (Esek. 36:23). Day Yeso ngaɓ fẽn maaga jar maa wer Jeofan wo ɓuy mo hay tos wo ti ɓe mono. À wãã ga: “Daga ɗuu ɓo mo hay go de fããge” (Mat. 6:9,[NWT]). Bible wãã ti fããge ɗuu Baan go ɓaale ngaɓa ngaɓa debaŋ. Naa ko wee ba saɓlaŋ maa po wo la ɗa: “Togoɗ we ɗúu Manwuri [Jeofa].” (1 Kro. 16:29; Siŋ. 96:8). “Maŋ we ti ɓe ciŋ de togoɗge ɗúu ɓe” (Siŋ. 66:2). “Ndi togoɗ ge ɗúu ɓo yaŋ ma tum” (Siŋ. 86:12). Wur po boŋ Yeso tos Pan ɓe ɓi tiŋ-Baa Jerusalem ga: “Baba, joŋ ren ɓuy ma ra ɗúu ɓo go”; Jeofa yiŋ jag ne Yeso ni ga : Ndi go de ra ɗúu yaw, day ndi fer yaŋ rage ɓe go tigriŋ pa”​—Jaŋ 12:28. a

Maa de swa’ no, fẽẽre maaga Jeofa joŋge ra ti naw maa peeln wo ɓuy wo diŋ maa fãã ɗuu ɓen go. Ko ba ɗa, blam maaga Yeso taw kiŋgi maa ndarn we go ti waŋ no, mayse joŋge yaŋ ti wur liwgi maa blam tawn ne? Jar peele Baa wo de jar téebeere ɗiggi wo ti ɗuu Jeofa na ɗiggi là? Maa yiŋ jag ti wiigi jag sen mono, naa fer wee ko re po wo ɓog ga naa hay wãã le go ti ɓaara taŋgu la ɗa: de deele jar téebeere wo de kluu waŋ maa ni Jeofa  no. Blam liwgin mono, jar téebeere maaga hay lag wo de deele dur wo maa ngaɓge go ga saara de deele pa yawlà? Ti wur sen mono, jar téebeere joŋ wo de sãy ngaɓge go ti ga saara de deele ga so. Jeofa hã ge tenen maa tumn yaŋ ne hara. Jar peele Baa maa ciŋ wo de jar téebeere maa gesiŋ wo la joŋ mbaara ɗiggi ti kluu waŋ maa ni Baan sar sar pa yawlà? Bay wa. Jar maa ciŋ wo de maa gesiŋ wo la ɓuy joŋ ge wo go de tayge boŋ. Day ti wur sen ɗuu Jeofa joŋ ge diŋ fẽn maaga daŋ go nen jar maa ɓen wo pa yawlà?

Ti wur sen wosela ɓuy joŋ go de ko cwãy ti ɗuu Jeofa, day ɗuu ɓen joŋ ge go de fããge maa tum. Amaa, jar maaga joŋ wo peele ne hẽn mo ɓuy joŋ wo yaŋ tum ɗiggi ga ɗuu ɓen diŋ fẽn maaga daŋ go ti sir krub ɓuy. Wer mayse ne? Werga á ko wo Jeofa yaŋ tum joŋ fẽẽre maa de woore debaŋ. Se diŋ wersen so ga Yeso fer see ɓe yaŋ gesiŋ, lan hã wããge re fẽẽren yaŋ ne Jeofa ga “Baa [mo] hay Waŋ go ti fẽẽren ɓuy” (1 Kor. 15:28). Blam sen mono, jar téebeere fruy wo “yaŋ go ɓiŋ weere mani Baan wo de gragge de togoɗge lay” (Rom. 8:21). Day Jeofa bag ge jag ɗiggi ɓe maa taŋgun yaŋ go: á tay ge jar peele ɓe maa ciŋn wo de maa gesiŋ lan wo yaŋ go doo ɓi feele po boŋ nono​—Efe. 1:10.

Á joŋ ge see ne jar peele Baa wo de jar téebeere maaga wo de goŋ Jeofa blam maaga fẽẽre sen wo mo deŋ joŋ wo we go ɓuy na joŋge là? Á mbe ti ngeel ɓe ga naa joŋ ge mbe tum de sãy togoɗ ɗuu Jeofa maa de wooren ti. Dafid yer de nenterse Baa ga: “Suse’ ne Manwuri [Jeofa]…suse’ ne ɗúu ɓe ma de togoɗgen tum” (Siŋ. 72:18, 19). Hãã peel tum mono, naa joŋ yaŋ mbe tum da’ fẽẽre maa defay wo ga srog wo glog naa togoɗ Baa.

Ɗuu Jeofa wãã ti fẽẽre maaga wo de maŋge see ɓe mo ɓuy. Day de maaga naa ɗig ti ɗuu ɓen mono, naa ɗig ti dage ɓen lay (1 Jaŋ 4:8). Naa joŋ yaŋ ɗiggi tum ga Jeofa joŋ naa diŋ wer dage, ga á men Yeso go húugi maa fug ɓil go ti ɓlagge naa wo diŋ wer dage; day se ngaɓ go ga se diŋ Baa maa de deele ti ɗeŋ wããge re jar ɓen diŋ wer dage. Naa joŋ yaŋ mbe tum koge ga Jeofa da naa. Hãã peel tum ɓuy naa joŋ yaŋ ge de jor glog maa ya’ge ti jeŋ ɓe doo Pan naa ne no, lan ‘waa siŋ maa togoɗ ɗuu ɓe maa de woore no​—Siŋ. 73:28.