Nen kiŋgi sen mono, tayge maa ni Jeofan coo fẽẽre po wo nen joŋre ɓaaran wo no. Fẽẽre sen kay wo maaga jar frug nen Bible mo hay wo go de tay jag boŋ ti goŋge Baa ɓaara no. Kefder Ngeel gor ti Jare tĩĩ wer naa wer verse maaga naa had ra ti taygeti maa Tosge, maa Togoɗ Baa, lan maa hã Sedeewa maa nen naw renam no. Á joŋ wo program maa had verse maa nen naw renam wo tum, lan siŋ maa ‘waage ti fruggi nen wããre maaga ndo boŋ ɓo, lan maa ɓi feele.

Ti taygeti ɓaaran mono, saara hã sedeewa ti joŋre siigi wããre Baa maaga saara siin mono; joŋ wo suse’ ne Jeofa; ‘waa wo siŋ; lan tos wo. Eva Barney, ga joŋ batem kiŋgi 15, nen kiŋgi 1923 fer ɗiggi ga: “Hayga ndo da we ga ndo hã sedeewa no, ni ndo tĩĩ wer wãã mopo de maŋ maaga: ‘Ndi de sãy joŋ suse’ ne Waŋkluu ti ɓil de el ɓe maaga á joŋ ra see ɓi mo ɓuy no.’” Hẽẽrebe maa po hay wo da hã sedeewa. Mãygeman naa Barney wãã ni pa ga: “Hẽn naa Godwin, ga go de garge, hã sedeewa jag de pããge debaŋ ti fẽẽre maaga Jeofa hã ra ne hẽn mono. Amaa de maaga wãy ɓe ko we ga hẽnbe maaga de seege de taygetin gay we do gorge maaga á mo taw wããre go no, se fuŋ õõbe maa ti war ɓe no, se hay gesiŋ.”

Ɓaale boŋ nen few, taygen wo boŋ boŋ ɓuy joŋ wo taygeti maa po ka’ ɓaale boŋ maa tosge, togoɗ Baa, lan maa hã sedeewa. Maa wããge ti taygeti sen mono, Ngeel gor ti jare maa naw 1 Few Ɓurgi 1923 wãã ga: “Reeda wur taygetin de hãge maa hã sedeewa ti joŋre siigi wããre, lan ti jorge glog jar sii wããre no. . . . Wùr de hã ɓil ga tayge jag see de baa wuu ya’ holaŋ jar maaga wo barge see kããra.”

Taygetin kay wo Charles Martin, jee sii wããre Baa maaga kiŋgi ɓe hay 19 debaŋ. Á hay diŋ jee Vancouver, ɓi sir Kanada. Á wo go wããge blam ga: “Diŋ de sen so ga ndi tõõ wer had siigi wããre maa jag tiŋ jag tiŋ taŋgu tu mono. Tum tum tu jar wãɗ ti fẽẽre maaga á daɗ wo le ti siigi wããre maa jag tiŋ jag tiŋ mono. Sen hã koge re me ti ɗeŋ maaga ndi wãã wããre, lan ɗeŋ maaga ndi mo fer wããre ne jar maaga kiɗ wo ga saara car wããre me jag mono.”

Hẽẽreben ya’ wo wer sa’ holaŋ ɓaara see kããra de siigi sii wããre Baa wer kẽẽ. Ngeel gor ti jare maa naw  1 Few Ɓurgi 1923 hay wãã ga: “Maaga jag naa ɓuy mo hay de tayge diŋ ti joŋre sen boŋ mono . . . , Wur Halge, naw 1 Few Kabge 1923 de maŋge maaga naa sii hẽẽ sii wããre Baa wer kẽ’ ɓuy. Blam sen mokay, Wur fuggi maa taŋgu ti few maa hõnla ɓuy, naa joŋ ge na doo sen ne no . . . Wosela maa ti tayge maa hõnla ɓuy mo wo ti joŋre se no.”

Koh Jar frug nen wããre Baa (sedeewa Jeofa) maaga hay wo kleere, hay wo woge ti siigi wããre se no. Hazel Burford, ga kiŋgi ɓe hay 16 kal sen fer ɗiggi ga: “Le Bulletin hay ngaɓ ɗeŋ siigi wããre maaga go gus maa ɗawge ti. a De kayge maa ni mõõ ɓi pan man ɓi mono, ndi wo ti siigi wããre sen wo ɓuy.” Amaa, jobo ẽg ga mãygeman naa Burford mo sii wããre Baa wa. Day joŋre sen ngris ne debaŋ. Á wãã ga: “Hẽnbe po go de garge ẽg go hase, ga ndi sii wããre ne jar ga. Ti wur sen jar debaŋ hay bay de koge ga jee frug nen wããre Baa maa hõnla ɓuy (sedeewa Jeofa), koh ‘weere jõõre wo de mãyre tigliiri wo’, hay wo maa woge ti joŋre maaga hã togoɗge ne Jee joŋ naan maa kluu” wa (Siŋ. 148:​12, 13, King James Version). Amaa mãygeman naa Burford joŋ mbe tum sii wããre Baa no. Blam mokay, se raw ti lakol Galaad, blam sen à ɓo’ ne misiyoner ɓi sir Panama. Day ge mokay, jar sen coo wo ɗiggi ɓaara ti weere maa kleere wo ga hay wo woge ti siigi wããre Baa mono.

Taygeti maa kluurin kay wo hẽẽrebe wo maaga jag ɓaara mo hay go de tayge boŋ lay. Ti taygeti maa po wo mono, à hay hoo wur maapo wo diŋ maa sii wããre Baa. Ba doo maa ti taygeti maa kluu ga à joŋ Winnipeg ɓi sir Kanada mono, jar maaga hay wo ti taygetin ɓuy hay wo de ɗege maa laage go si wããre Baa wur naw maa 31 nen Few Mene. À sii wããre Baa ne jar wur sen ngaɓa debaŋ, day saara hay yãã wããren de woore lay. Ti wur naw maa 5, nen few joŋfẽnsõõrewa mono, ngaɓa tay 7.000 ti taygeti maa kluu ga à joŋn Winnipeg tigriŋ pa mono. Le ti wur sen mono, ngaɓa hay tay go ti taygeti maa kluu ɓi sir Kanada doo sen ti boŋ ga ɗa.

Taygeti maa kluu ga sedeewa Jeofa joŋn wo nen kiŋgi 1923, ga ngaɓa tay ni debaŋ diŋ maaga joŋ ti naw 18 hãã ti naw maa 26, nen Few joŋfẽnsõõrewa mono. Taygeti sen hay joŋ diŋ ɓil prog maa  Los Angeles, ɓi sir Kaliforni. Lumo maa taŋgu taygeti sen wo mono, jar debaŋ ɓod wo sug jar ti taygeti sedeewa Jeofa sen de journal wo. Sedeewa Jeofa ɓrew wo kefder maa ɗe jar le ti taygetin de daŋ 500.000. À hay ɓal poster noga wo go see moota maa hoor jar wo. Jar maa po ɓal wo ‘affiches wo’ see ‘ train’ wo lan see mooda maa ɓaara ti see ɓaara wo lay.

Wur Ɓesge, ti naw maa 25 nen Few Joŋfẽnsõõrewa mono, hẽn naa Rutherford sii wããre po. Kluu ɓen hay ga “Sããre wo de ɓẽẽre wo.” Nen siigi wããre sen se ngaɓ “sããren” diŋ doo jar maaga ɗiggi ɓaara wo de woore ga joŋ ge wo ti paradis gesiŋ la mono. Á sii wããre maa tigriŋ pa. Ɓil ɓe ni se jaŋ ɓo’ge sug po ga à ɗen ga “A Warning.” Ɓo’ge sug sen hay diŋ maa ɓo’ wer jag-Baa krétiyẽ maaga bay wo ti ngeel ɓe wa go, lan hay wii jar ga á mo caa wo ɓil go de “Babilon ma kluu no” (Naa. 18:​2, 4). Go blam, jar frug nen wããre Baa (Sedeewa Jeofa) maaga wo ti wer sir genlà ɓuy, ɓrew wo kefder ne jar maa ɓod sug ɓaara de wããre se no.

Wur tawgeti taygetin mono, jar de daŋ 30.000 co’ wo sug hẽn naa Rutherford sii wããre maa ne jar ɓuy ga kluu ɓen ga: “All Nations Marching to Armageddon, but Millions Now Living Will Never Die.” Sedeewa Jeofa hay wo de koge ga jar a ge ni laa siigi wããre sen ngaɓa debaŋ, se diŋ wersen so ga á maŋ wo tiŋ maa kluu maaga á ɗen ga ‘Coliseum Los Angeles’ mono. Maaga jar ɓuy mo laa wããren mono, hẽẽreben joŋ wo joŋre de bafle maaga hay ti estaden ni mono. Á hay diŋ Bafle maaga kal le defay ti wur sen no. Jar maa tigriŋ ngaɓa co’ wo sug programn ti radio.

Nen kiŋgi maa 1923 mono, à ya’ wer sii wããre Baa ciŋ ni debaŋ ɓil Afrig, ɓil Europe, ɓil Inde, lan ɓil Amerig maa sudi. Ɓi sir Inde mono, hẽn naa Adavimannathu J. Joseph de maaga á hay soɗ wãy ɓe wo de weere ɓe maa hiira mono, se kay maa caa kefder wããre maa jag hindi, jag tamul, jag telugu, lan jag urdu.

Ɓi sir Sierra Leone mono, Alfred Joseph lan Leonard Blackman ga hay wo diŋ Sedeewa Jeofa, yer wo leder wo ne ngeel kluu sedeewa Jeofa wo, ga hay ɓil prog maa Brooklyn, ɓi sir New York maa wii kayge. Ti naw maa 14 nen few Ɓurgi 1923, à yiŋ jag le ne hara ti leder ɓaara no. Alfred wãã ga: “Ti wurpo de suŋ wur ɓesge, jobo ɗe me ti telefon gẽẽge kluu, wiigi ga: “Yer le ne Watchtower maa wii jar sii wããre na ndo?” Ndi yiŋ jag ga “ãã”. Jee ɓen wãã le ga : “Wur a we so.” Á hay diŋ gẽẽge  William Roland Brown. Á a wo le Karayib wur sen de wãy ɓe Antonia, lan mãyre ɓe Louise wo de Lucy. Hẽẽrebe maa ti ngeel sen ni ig wo gorge debaŋ maa yiŋgi de hẽẽrebe maaga a wo le mo ga.

Alfred wãã ga: “toŋ ɓe de toŋ mono, wur ndal ti wããre Baa de Leonard doo maaga wur ndal tum nen naw renam nono. Jobo de gẽẽre de nay a le jag tiŋ. Á hay diŋ hẽn naa Brown. Á hay da joŋre maani Baa debaŋ. Diŋ wersen so ga á hay de sãy siigi wããre Baa ti peel new ɓe tu.” Few boŋ tu sen, Brown hã kefder maa do ɓen go ɓuy ne jare. Blam à coŋ kefder maa tigriŋ wo le ne hẽn 5,000 pa. Naw blam me’ se taw ra go ɓuy pa. Amaa á bay de ko Brown doo jee trere kefder no wa. Ti joŋre ɓe de woore ne Jeofa mo ɓuy no, hadge ɓen ɓuy a wo le ɓil Bible. Diŋ wersen so ga jar kol ɗege ɓe ga ‘Brown Bible’.

De ngar ngeel sen, à ya’ filiyal maaga hay le Barmen ɓi sir Alemãy ti ngeel maa tigriŋ; werga á hay go me’e. Day France hay desãy kiɗ waŋ de prog se no. Hẽẽrebe hay da’ wo ngeel maa de woore maaga saara lag ni maa caa kefder wo. Ngeel sen hay Magdeburg. Hẽẽre naa taw wo hoo fẽẽre maa caa kefder de fẽẽre maa tigriŋ wo, maa laage wo go ti Betel maa Magdeburg ti naw maa 19 nen few Mbiiriwaygara. Blam wur maaga à wãã ne jar maa ti ngeel kluu sedeewa Jeofa wo ga à ya’ Beteln wo go Magdeburg mono, France yãã prog Barmen tu. Hẽẽreben joŋ wo suse’ ne Jeofa ti maaga á kay ra, lan se yãã ra go lay mono.

George Young hay raŋ debaŋ maa sii wããre Baa go. Blam sen se caa filiyal wo Brésil nen kiŋgi 1923, lan se ya’ caa kefder Ngeel gor ti jare maa jag portugè. Few blam me’ tu se hã kefder go 7,000 ne jare. Ɓil Sarah Ferguson hay go feh de maaga hẽn naa Young wo ko feele maani ɓen mono. Sarah hay go jaŋ kefder Ngeel gor ti jare hãã le go nen kiŋgi 1899 no. Amaa se hay bay go de joŋ batem wa ɗa. Few go blam mbag mokay, mãygemaan naa Ferguson wo de weere ɓe maa 4 joŋge wo mbaara batem go so.

Ti tawgeti kiŋgin mono, Ngeel gor ti Jare maa nen naw 15 nen Few Bããre 1923 wãã ti maaga cooge fẽẽre maa ti taygeti wo, ti siigi wããre lan ti taygeti maa kluurin wo hãy Jar frug nen Bible wo mono. Á wãã ga: “à ko go cwãy tu ga taygen . . . De ẽgre ti nenterse . . . Naa mo grag go de fẽẽre durgi no, lan ni naa mo joŋ joŋre kwũy de baa wuu, de coɓge lay, day naa mo fruy de peel de peele.”

Kiŋgi maa 1924 hay de el debaŋ maa Jar frug nen Bible wo no. Hẽẽrebe maa ti Betel hay wo go de joŋ few pur jag boor tiŋ wo Staten Island. Ngeel sen hay ti jeŋ Betel maa Brooklyn maŋ. Joŋre boorge tiŋ maa defay sen taw wo go ti tõõge wer kiŋgi maa 1924 no. Joen kay maa tay hẽẽrebe wo go boŋ, lan maa sii wããre maa de cõõren go dedaŋ maa ɓaan ɓuy.