1. Jee peele Baa po de wããge ga hãylà, day wããre sen de maŋge see naa ti maylà?

 HAYGA jee peele Baa yaŋ de wããre jag maa wããge mo no, ndo co’ mbo sug ɓe yaŋ yawlà? Wara, jee peele Baa po de wãã wããre “ne jar ma ti tamsir wo ɓuy, ne wer jar wo ɓuy, ne ɓĩĩni jar wo ɓuy, de jag jar ɓuy, ne ngaɓa jar ɓuy.” Á de wããge na ga hãyne? “Hoo we sug ti Baa, togoɗ we ne . . . Goŋ we je ma joŋ ngel ma ciŋ wo de sir no” (Naa. 14:​6, 7). Jeofa diŋ Baa maa cwãy boŋ tu ga wosela ɓuy hay goŋ ne. Ɓil naa go de fruygi debaŋ ti maaga á men naa goŋge ɓe ɓil Tiŋ-Baa maa kluu maa ti nenterse no!

2. Tiŋ-Baa maa ni Jeofa maa ti nentersen diŋ maylà? (Ko ngeel maa gaɗge “ Á bay diŋ mayse wa là.”)

² Day Tiŋ-Baa maa ti nentersen diŋ mayse cwãy so là? À da’ wããre maa laa wer go ne hẽn de woore na la genlà? Tiŋ-Baa maa ti nentersen bay diŋ tiŋ po de booge ka’ wa. Á diŋ fẽẽre maaga Jeofa knẽ’ de húulí Yeso maaga goŋge naan mo co jag se. Apotre Pol naa wer fẽẽre sen wo ne krétiyẽ Hebre wo, ga hay wo Jude, ɓil leder maaga á yer ne hara mono. b

3-4. Pol hay go de caa jiili ti re krétiyẽ Hebre wo, maaga hay wo Jude wer maylà?

³ Pol yer leder ne krétiyẽ sen wo diŋ wer mayne? Maapo wer re po wo ɓoge. Taŋgu, maa coɓ rage. Daŋge ɓaara hay gẽẽ diŋ ti jag-Baa jar jwif wo. Maapo jar maaga hay wo peel ti jag-Baa  sen hay wo mbuɗ foo ɓaara werga á kol wo go krétiyẽ mono. Wer mayne? Werga tiŋ-Baa maa kluu debaŋ ga krétiyẽ hay goŋ wo Baa ni, ngeel maaga á hay joŋ wo siɗ jag ne Baa ni, lan jar joŋ siɗ jag ti ɓaara hay bay wo wa. Sen hay woo do jar maa wer Krisn wo go, hay woo hãge ɓil ɓaara go lay (Heb. 2:1; 3:​12, 14). Maapo ga jar po wo yoo ɓaara hay fer wo ɗiggi ga saara fer ti jag-Baa jar jwif wo tigriŋ.

⁴ Maa de ɓog no, Pol wãã ne krétiyẽ sen wo ga á bay wo durgi maa laa wer ne hadge maa defay wo, noga maa kuɗum kuɗum wo wa. Hadge sen wo diŋ “Hoole ma de ɓo’ge kiŋkiŋ” ga à da’ ɓil Wããre Baa mono (Heb. 5:​11-14). Sen go tinoo tu ga jar maa po hay wo hoo sug ti jag liŋgi maa ni Moyisn ɗa. Amaa Pol ɓo’ sug ɓaara ga á da’ wo fuggi ɓil ti ɓlagge ɓaaran wo wer siɗgi jag maa ti jag liŋgi maa ni Moyis wo ga. Diŋ wer sen so ga jag liŋgin maa ni Moyisn hay go de “ɓo’ge ti jeŋ” mono. Pol ya’ had cwãy maa kuɗum kuɗum wo ne hara. Á ɓo’ sug hẽẽre ɓe krétiyẽn wo ga “ɗiggi gorge maaga daŋ go”, wer húulí Yeso kay ra yaŋ maa “ya’ge see Baa”—Heb. 7:18, 19 [NWT].

5. Naa mo hay laa wer ne mayse ɓil kefder Hebre wo la, wer maylà?

⁵ Pol wãã ne hẽẽre ɓe krétiyẽn wo ga ɗeŋ maaga á wo de goŋ Baa de ɓe patala de daŋ maa ɓaa no. Ɗeŋ maaga jar jwif hay wo goŋ Baa de ɓe hay wo diŋ “nenceere fẽẽre maaga a ge wo le wurpo mono, ama ma cwãy ɓen tu diŋ Krisi” (Kol. 2:17). Nenceere mopo de maŋ fẽn ɓen maŋge koɗe. Á bay diŋ fẽn ɓen tu wa. Doo sen ne lay mono, ɗeŋ goŋge Baa maa ni jar jwifn wo hay diŋ nenceere mopo maaga hay a ge koɗe. Naa mo hay laa wer ne fẽẽre maaga Jeofa knẽ’ ra maaga ɓlagge naa mo hay wo go de fããge, nen maaga naa goŋ doo maaga á da ne no. Doo maaga à naa wer ɓe ne jar Hebre wo ne mono, naa gaf wee “nenceere” no (kaŋ nen ga ɗeŋ goŋge Baa maa ni jar jwif wo no), de “cwãy” no, (kaŋ nen ga ɗeŋ goŋge Baa maa ni krétiyẽ wo no) ɗa. Doo sen ne kay, naa laa wer yaŋ ne Tiŋ-Baa maa ti nentersen ɗawa, lan maaga á de maŋge see naa maŋge là.

6. À hay joŋ joŋre de mburyugn na joŋge là?

⁶ Maa ni jar jwif wo no. Nen wããre ɓen mono, Pol wãã debaŋ diŋ ti mburyug maaga Moyis knẽ’n nen kiŋgi maa 1512 T.W.N. (Ko taablo “Ɗeŋ goŋge Baa maa ni jar jwif wo no—Ɗeŋ goŋge Baa maa ni krétiyẽ wo no”). Mburyugn hay diŋ mopo de maŋ taale ga jar  Israyel hay wo tum seege de ɓe do de maaga á ya’ wo we ti ngeel tigriŋ no. Á joŋ wo joŋre de ɓe go de kos kiŋgi kiskis dwee, hãã ti wur maaga à boo tiŋ-Baa go Jerusalem ka’ mono (Laa. 25:8, 9; Kee. 9:22). “Tiŋ Yiŋgi de Baa” sen hay diŋ ngeel maaga jar Israyel hay wo ya’ge see Baa ni, hay wo joŋ siɗgi jag wo ni, lan hay wo goŋ Baa ni (Laa. 29:43-46). Amaa mburyug sen hay ngaɓge diŋ fẽn po maa kluu debaŋ ga Jeofa hay de knẽ’ge ɓe ne krétiyẽ wo.

7. Tiŋ-Baa maa ti nentersen nduu hunlà?

⁷ Maa ni krétiyẽ wo no. Mburyugn hay diŋ “nenceere tiŋ ma cwãyn le ciŋ.” Á hay ngaɓge diŋ Tiŋ-Baa maa kluu ti nenterse maa ni Jeofa. Pol wãã ga “re sen la diŋ nenceere re maga wo de nduu gi patalam maga naa mo ko see ɓe ni” (Heb. 8:5; 9:9). De maaga á yer leder sen wo ne jar Hebre wo mono, tiŋ-Baa maa ti nentersen hay go de age. Á nduu ti kiŋgi maa 29 N.W.N. Kal sen mono, Yeso joŋ batem go, nenterse maa bay ɗagn a ne hẽn ti. Blam se le’ joŋ joŋre ne Jeofa doo “Je kluu [ . . . ] ma [ . . . ] siɗ jag go ti naa” ɓil tiŋ-Baa maa ti nenterse no. c—Heb. 4:14; Joŋre 10:37, 38.

8-9. Doo maaga à da’ ɓil Hebre wo 7:23-27 ne mono, sar maa ti holaŋ jee siɗ jag maa kluu maa Israyel wo de jee siɗ jag Maa Kluu Yeso Kris diŋ maylà?

⁸ Maa ni jar jwif wo no. Jee kluun hay ooge peel Baa ti tu ngaɓan ɓuy. Jee kluu maa taŋgun hay diŋ Aaron. Jeofa baa ne de maaga à tĩĩ wer goŋ Baa ɓil mburyugn mono. Amaa Pol wãã ga “jar siɗ jag ma ɓaa wo le, sen wo ngaɓa, kol wo kããra kol ge, werga á huɗ wo go mono” d (Jaŋ Hebre wo 7:23-27). Ni pa mono, á hay wo diŋ jar téebeere maa de ɓlagge see, wersen saara joŋ siɗgi jag ti ɓlagge ɓaara lay. Yeso Krisi, jee siɗ jag maa kluu no, sar de jar siɗ jag maa kluuri maa Israyeln wo na ti sen so.

⁹ Maa ni krétiyẽ wo no. Werga á diŋ jee kluu maa siɗ jag go ti naa so mono, Yeso Kris “de joŋ joŋre . . . ɓi mburyug ma de woore no, maga Baa baa ne mono, bay jar téebeere wo wa” (Heb. 8:1, 2). Pol wãã ga “[Yeso] tenen tum ye’ huu ga siɗ gi jag ma ɓen taw ge jag ɓe bay wa.” Pol wãã pa ga Yeso bay “ɗage, á bay de joŋ ɓlagge ti boŋ wa.” Lan á bay doo jar kluuri maa siɗ jag maa Israyeln wo “ga siɗ wo jag ti naw tum” maa fãã ɓlagge maa ɓaara ti see ɓaara go wa. Patala naa ko wee sar maa ti holaŋ ngeel siɗ jag maa ɓaa no, de maa wara, lan maa ti holaŋ siɗgi jag maa ɓaa no, de maa waran lay.

10. Siɗgi jag maa ti ngeel siɗ jag maa de boo dobn hay wo da wããge ga hãylà?

¹⁰ Maa ni jar jwif wo no. Go faale ngeel kalge ɓil mburyug mono, naa da’ ngeel siɗ jag de joŋge de boo dobe, ga à hay joŋ siɗgi jag maa de horog wo ne Jeofa ni (Laa. 27:1, 2; 40:29). Amaa siɗgi jag sen hay bay wo fãã ɓlagge jar sirn wo go ɓuy wa (Heb. 10:1-4). Siɗgi maaga à hay joŋge tum ɓil mburyugn hay ngaɓge diŋ siigi jag maa ɓaale boŋ ga yãã ge jar téebeere wo go ɓuy tu mono.

11. Yeso joŋ siigi jag go de hõõgesee ɓe diŋ ti ngeel siigi jag maa ẽlà (Hebre wo 10:5-7, 10)?

¹¹ Maa ni krétiyẽ wo no. Yeso hay go de koge ga Jeofa ɓo’ se le gesiŋ la diŋ maa hã hõõgesee ɓe go, maa coo jar téebeere wo le go (Mat. 20:28). Wersen, de maaga à de joŋ batem mono, Yeso hã see ɓe go maa joŋge diŋ dage Jeofa (Jaŋ 6:38; Gal. 1:4). Yeso joŋ siigi jag  go de hõõgesee ɓe ti ngeel sii jag maaga nen bay koge ɓe wa. Ngeel siigi jag sen ngaɓ diŋ “dage” Baa ga yãã ga Weel sen mo hã tenen ɓe maa bay ɗagn go. Yeso hã tenen ɓe go “ɓaale boŋ wo go maa tum ɓuy tuu”, maa fãã ɓlagge, noga maa yoŋ ɓlagge wosela ɓuy maaga hã ɓil we ti Krisn no (Jaŋ Hebre wo 10:5-7, 10). Patala naa ko wee maaga fẽẽre maa ɓil mburyug hay wo ngaɓge diŋ maysela ɗa pa.

12. Wose hay de kããge maa kalge ɓil carge ɓil mburyugn wo là?

¹² Maa ni jar jwif wo no. Mburyug wo de tiŋ-Baa maaga à boo ge ra blam Jerusalem, hay wo de far kẽẽ nen ɓil debaŋ. Ɓil tiŋn hay de caage ɓoge—“ngel ma de bay ɗag has” no, lan “ngel ma de bay ɗag” no,—ga hay wo go de caa nen de õõbe maa de ɓo’ge (Heb. 9:2-5; Laa. 26:31-33). À da’ mo maa her lampa de boo biŋni, ngeel maa roɗ aŋsaŋ, lan taable maa kaŋ hoole pẽẽ maa hãge wo ɓil ngeel maa bay ɗagn no. À hay de hã faage diŋ ne “jar ni Aaron maga à kaa noo ne hara ti” tawa maa laage ti ngeel maa bay ɗag maa bag jag joŋre siɗ jag ɓaara no. (Kee. 3:3, 7, 10). Ɓil Ngeel maa bay ɗag hasn mono, à da komrom maa booge de boo biŋni wo ni. Komrom sen hay ngaɓge diŋ ga Jeofa ti ngeel sen ni (Laa. 25:21, 22). Faage hay de ɓo’ge diŋ ne jar siɗ jag maa kluuri wo tawa, maa cegaɗge wo go ɓil õõbe maa kalge wo ti ngeel maa bay ɗag has wur maa poorge ɓaale boŋ nen kiŋgi (Lef. 16:2, 17). Nen kiŋgi tum, á kal wo ni de cíi horogre wo do maa poor ɓlagge maa ɓe ti see ɓen wo go, lan maa poor maa ni ngaɓa sirn ɓuy  lay. De nenterse ɓe maa bay ɗagn mono, Jeofa naa wer fẽẽre sen ga hay wo ɓil mburyun go ne naa—Heb. 9:6-8. e

13. Ngeel maa de bay ɗag hasn wo de ngeel maa de bay ɗagn ngaɓ wo diŋ mayse wo ni krétiyẽ wo là?

¹³ Maa ni krétiyẽ wo no. Baa hay sreŋ jar po wo mẽ’ tawa de nenterse. Jar sen fruy wo wer holaŋ ɓaara maa sar de woore de Jeofa no. Jar see wo 144,000 joŋge wo joŋre ti jeŋ Yeso ciŋ doo jar siɗ jag wo (Naa. 1:6; 14:1). Ngeel maa de bay ɗag ɓil mburyug ngaɓ ga á hay wo de hooge doo weere Baa de maaga á hay mbaara wo gesiŋ la ɗa mono (Rom. 8:15-17). Ngeel maa de bay ɗag has ɓil mburyugn ngaɓ diŋ ngeel maa ciŋ, ga Jeofa le de hayle ni mono. “Õõbe” maaga hay caa nen ngeel maa de bay ɗag hasn go de ngeel maa de bay ɗagn ngaɓ diŋ hõõgesee Yeso. Werga á hay de hõõgesee maa ni jee tabay so mono, á hay bay de kããge maaga se raw ciŋ doo jee siɗ jag maa kluu ɓil tiŋ Baa maa ti nerterse wa. De maaga hã see ɓe go maa joŋ siigi jag ti jar teebeere wo mono, Yeso buŋ faage maa woge ciŋ go ne kretyẽ maaga nenterse Baa de sreŋ rage ɓuy. Á wo ti see ɓaara mo hay tob wo hõõgesee ɓaara go lay maa da’ poɗge ɓaara maa ciŋ no (Heb. 10:19, 20; 1 Kor. 15:50). Blam birgi ɓe, Yeso kal ɓil ngeel maa de bay ɗag has ɓil tiŋ-Baa maa ti nenterse no, ngeel maaga jar maa de sreŋge de nenterse woge wo ni ɓuy mono.

14. Doo maaga à da’ ɓil Hebre wo 9:12, 24-26 ne mono, wer mayse ga goŋge Jeofa ɓil tiŋ-Baa maa ti nentersen ɗawa de daŋ ɗeŋ maaga jar jwif hay wo goŋ Baa de ɓe là?

¹⁴ Naa ko mbe go so ga fẽẽre maaga Jeofa knẽ’ ra maaga goŋ se ti faage ɓe daŋ wo go. Á knẽ’ fẽẽre sen wo diŋ maa ɓo’ faage goŋge maa ti ngeel ɓen wer tenen maaga Yeso hãn go mono, lan wer joŋre siɗgi jag ɓe no. Jee kluu maa siɗ jag maa Israyeln hay kalge diŋ ti ngeel maa de bay ɗag has, ga joŋ ne diŋ jee táabay, de cíi horogre wo do maa joŋ siigi jage ne mono. Amaa Yeso kal ɓen diŋ “ciŋ ti ngel maga Baa ni mono,” ngeel maaga go de fããge de daŋ lan wo ɓuy, maa woge peel Jeofa. Á poɗ go ti naa wo na diŋ ni, peel Jeofa, “raw da’ faage ma yãã naa wo go hãã tum kol ge tenen ti’ tum mo so no” (Jaŋ Hebre wo 9:12, 24-26). Siigi jag maa ni Yeson diŋ maa ti ngeel ɓen, ga fãã ɓlagge go maa tum. Doo maaga naa kon ge yaŋ wo peel la ne mono, naa mo hay ba diŋ maa rawge ciŋ, noga maa hayge gesiŋ la, naa ɓuy, naa mbe de kããge maa goŋ Jeofa ɓil tiŋ-Baa maa ti nenterse no.

15. Wose hay joŋ joŋre ɓi feele mburyugn là?

¹⁵ Maa ni jar jwif wo no. Mburyugn hay de feele—ngeel po go de ɓo’ mahol ti, ga jar joŋ siɗgi jagn hay joŋ wo joŋre ɓaaran wo ni. Ngeel siɗ jag maa kluu de boo dobe, ga à joŋ siigi jag maaga à roɗ fẽn ɓen go ɓuy, hay ɓi feelen ni. Gesããge maa de boo dob, ga jar joŋ siɗgi jagn hay wo fãã see ɓaara go ni, taŋgu maaga saara joŋ joŋre ɓaaran hay de kaŋge ni lay (Laa. 30:17-20; 40:6-8). Tiŋ-Baa maaga à boo ne blam hay de feele maa nen faale, ga jar maaga hay bay wo joŋ siigi jag wa, hay goŋ wo Baa ni.

16. Ɓi feele maa ti nenterse maa hõnlà ɓuy mono, de joŋ joŋre ni diŋ wose wo là?

¹⁶ Maa ni krétiyẽ wo no. Taŋgu maaga á raw wo ciŋ joŋ joŋre doo jar siɗgi jag wo ne mono, jar maaga nenterse Baa de sreŋ rage joŋ wo peele ne Baa ɓil feele maa nen ɓil tiŋ-Baa maa ti nenterse no. Gesããge maa kluu ga hay ɓil mburyug no, lan blam ɓil tiŋ-Baan, diŋ maa ɓo’ sug ɓaara ga á mo lag wo go de fããge nen  ɗiggi, lan ti nenterse. Day jar maa “ngaɓa” ga wo de kay hẽẽre Krisn joŋ wo joŋre ne Jeofa na la gene? Apotre Jaŋ ko ra “pel paale no.” “Á wo de [ . . . ] joŋ peele ne [Baa] de suŋ de cege ɓi tiŋ ɓe no”, kaŋ nen ga ɓi feele maa nen faale no (Naa. 7:9, 13-15). Naa joŋ suse’ ne Jeofa ti maaga á men naa goŋge ɓe ɓil tiŋ ɓe maa kluu ti nentersen mono!

17. Naa de fruygi maa joŋ siɗgi jag maa hõn wo ne Jeofa là?

¹⁷ Wara mono, faage de ɓo’ge ne krétiyẽ wo ɓuy maa goŋ Jeofa de wur maa do ɓaaran wono, de ẽgre ɓaara, de fẽẽre maa do ɓaaran wo no, maa ya’ wer joŋre maa ni Jeofan ciŋ ni. Doo maaga Pol wããn ne krétiyẽ maa Hebre wo ne mono, naa mbe de kããge maa “togoɗ ge ɓe tum, jag naa mo hay ra ɗúu ɓe tum” (Heb. 13:15). Naa mbe de kããge maaga naa ɓo’ nen go ga goŋge Jeofa de cõõre jag naa. Naa joŋ sen diŋ de joŋ peele ne hẽn de fẽẽre maaga daŋ wo go nen naa mono.

18. Doo maaga naa da‘ ɓil Hebre wo 10:22-25 ne mono, fẽẽre maaga naa mo hay joŋ rage tum diŋ mayse wo la, day naa mo hay yõõ ti go ti mayse wa là?

¹⁸ Jaŋ Hebre wo 10:22-25 [NWT]. Ti tawgeti leder ɓe maaga á ɓo’ ne jar Hebre wo mono, apotre Pol ngaɓ fẽẽre maaga naa mo hay joŋ rage tum ti goŋge Jeofa mono. Fẽẽre sen wo diŋ tosge Jeofa, siigi wããre Baa go ne jare, woge ti taygeti wo, lan diŋ jorge glog kããra werga “debaŋ ɓe de maaga [naa] de koge ga wur maa ni [Jeofan] go de kos age mono.” Ti kosge tawgeti wããre maa ɓil Naage nene mono, jee peele Jeofan dog wããge ɓaale ɓog ga: “Goŋ diŋ Baa!” (Naa. 19:10; 22:9). Nen daga fẽẽre maaga naa laa ra ti tiŋ-Baa maa ti nenterse maa ni Jeofan mo ɓuy, lan fẽn maaga Baa men naa goŋge ɓe, naa mo joŋ hrag de ɓaara wa, lan ti naa mo yõõ ra go wa!