1. Kado maa hõn wo ga Yeso hã ne jar téebeere wo là?

 JEE táabay po kay jar ti boŋ dedaŋ Yeso ga. De maaga á hay gesiŋ la mono, á hay joŋ fẽẽre mbuɗgi maa kay jare. (Lug 9:​12-17) Á hã kado maa dedaŋ lan wo ɓuy de hã see ɓe go húugi wer naa. (Jaŋ 15:13) Hãã ti wur maaga á bir go mono, á men kay jar go ti boŋ ga. Doo maaga á hay wããn go no mono, á wii Jeofa maaga á mo hã nenterse ɓe maa bay ɗagn le ne naa maa had naa lan maa coɓ naa. (Jaŋ 14:​16, 17; 16:13) Lan de taygeti naan wo, Yeso mbe tum kay naa maa kol jar go jar maa wer ɓe.—Mat. 28:​18-20.

2. Kado se ga wo diŋ “jar téebeere wo” ga naa da’ ɓil Efes wo 4:​7, 8 wãã diŋ ti wose wo là?

² Naa ko wee kado maa tigriŋ ga Yeso hãn ɗa pa. Apotre Pol yer ga blam maaga Yeso raw ciŋ mono, á raw “hã kado maaga diŋ jar téebeere wo” ne naa (Jaŋ Efes wo 4:​7, 8.) Pol naa wer ɓe ga Yeso hã kado sen wo maa coɓ taygen wo de wer ɗeŋ ngaɓa. (Efe. 1:​22, 23; 4:​11-13) Jar kay jar maa peel tayge wo, jar maa peel tayge wo, lan jar raŋ tayge wo wara yoo ‘kado se maaga diŋ jar téebeere wo’ ni lay. a Cwãy tu, jar sen wo diŋ jar téebeere maa de ɓlagge see wo, á joŋ mbaara fẽẽre maaga bay wo ti ngeel ɓaara wa. (Jag. 3:2) Amaa, Waŋ naa Yeso joŋ joŋre de ɓaara maa kay naa; á wo diŋ kado maaga á hã ra ne naa.

3. Ngaɓ ɗeŋ maaga wosela ɓuy yoo naa de kããge maa kay jar se ga, Yeso wo de Jeofa lag wo ra ne naa peel, ti joŋre ɓaaran wo mo ɗa.

³ Yeso hã joŋre ne jar sen wo do maa kay tayge wo. (Efe. 4:12)  Amaa, wosela ɓuy yoo naa de kããge maa kay rage ti joŋre maa de woore maaga á joŋ wo mono. Naa ngaɓ ne de booge tiŋ-Baa ɗa. Jar debaŋ joŋ wo joŋre booge tiŋ-Baa. Jar maa po kay wo jar joŋre sen wo de rege, de mooda ɓaara wo, noga de ɗeŋ maa tigriŋ wo. De maŋ sen lay, naa kay jar maa kay jar maa peel tayge wo, jar maa peel tayge wo, lan jar raŋ tayge wo diŋ nen wããre naa wo, lan fẽẽre maaga naa joŋ ra. Naa ɗig wee ti ɗeŋ maaga joŋre ɓaaran kay naa, lan ti ɗeŋ maaga naa ɓo’ nen go ne hara, lan ne Yeso maaga hã kado se ga diŋ “jar téebeere wo”, ga joŋre ɓaara de woore nen naa mo ɗa.

JAR KAY JAR MAA PEEL TAYGE WO DIŊ “JAR MAA KAY JAR WO”

4. Joŋre maa hõn wo ga “jar maa kay jar wo” hay wo joŋ rage ti siyekle maa taŋgun là?

⁴ Ti siyekle maa taŋgun mono, à hay lag hẽẽrebe po wo diŋ jar kay jar maa peel tayge wo. (1 Tim. 3:8) Maapo ga diŋ ti jar sen wo ga apotre Pol hay wãã de maaga à yer ti “jar maa kay jar wo.” (1 Kor. 12:28) Sen da wããge ga jar kay jar maa peel tayge joŋ wo joŋre maa po wo go puri, nen maaga jar maa peel tayge mo hã wo see ɓaara diŋ ti hadge, lan ti joŋre koɗge jar maa ni Baa no. Ko ba ɗa, maapo ga á hay wo kayge maa joŋ ‘copies’ Wããre Baa; noga maa yeeɗ fẽẽre maa joŋ rage.

5. Joŋre maa hõn wo ga jar maa kay jar maa peel tayge joŋ wo ra wara là

⁵ Ɗig ba ti joŋre maaga jar maa kay jar maa peel taygen joŋ wo ti tayge mo ɗa. (1 Pi. 4:10). Maapo ga á joŋ wo joŋre keege suŋgu maa ti tayge; noga joŋre carge ngeel maaga tayge mo hay wo sii wããre ni. Á mbaara de kããge maa wii kefder maa ɓesge ne jar maa ti taygen wo no. Maapo ga á bag wo jag fẽẽre joŋre audiyo wo de videyo wo no; noga á joŋ wo joŋre maa yãã waare jar ti tiŋ-Baa, noga joŋ wo maaga tiŋ-Baa mo hay tum bay ɗage. Joŋre sen wo mo deŋ kay wo maaga taygen mo hay seege ciŋ. (1 Kor. 14:40) Ni pa mono, jar maa kay jar maa peel tayge sii wo wããre ti taygeti wo, lan joŋ wo joŋre ti taygeti maa nen naw renam wo pa. À baa mbe jee kay jar maa peel tayge maa kay jee seege de taygeti maa sii wããre Baa lay. De ngar ngeel maa po, jee kay jar maa peel tayge kaŋ mbe jee maa peel tayge ti joŋre coɓge jar maa ni Baan lay.

6. Wer mayse wo ga joŋre jar maa kay jar maa peel taygen wo de cõõre jag naa là?

⁶ Ti ɓaŋ maa hõn ga joŋre jar maa kay jar maa peel tayge wo kay jar maa ti taygen là? Beberly b, mãygemanbe po wo Bolivi wãã ga: “Taygeti co wo jag ɓi debaŋ, wer maaga jar kay jar maa peel tayge wo ni mono. “Wer joŋre ɓaaran, ndi ‘waa siŋ, fer wããre ti taygeti, laa siigi, wããre, lan ndi had fẽẽre ti videyo wo de foto wo. Á joŋ wo nen maaga mopo mo joŋ hẽẽre naa maaga a wo ti taygeti mo wa. Lan saara kay jar maaga ẽgre ɓaara kãã maa age ti taygeti wo ga maaga á mo laa wo siigi wããren le liŋ ni ɓaara. Blam taygeti mokay, saara kay ti torge tiŋ-Baa, ti keege suŋgu, lan ko wo maaga kefder mbe ni maa hãge ne jar ɗa pa yawla. Joŋre ɓaara co jag ɓi debaŋ!” Lesli, maaga wo ɓi sir Kolombi, ga war ɓe diŋ jee maa peel tayge, wãã ga: “War ɓi de sãy kayge jar maa kay jar maa peel tayge wo ti maa bag jag joŋre maa do ɓen go. Hay diŋ saara ga no, á joŋ go de joŋre do debaŋ, day ndi joŋ suse’ ne hara debaŋ ti kayge, lan hãge see ɓaara de dage no.” Sen go tinoo tu ga naa de fruygi ti joŋre maaga jar maa kay jar maa peel tayge joŋ wo mono.—1 Tim. 3:13.

7. Naa ngaɓ go ga naa de joŋ suse’ ne jar maa kay jar maa peel taygen wo ti joŋre ɓaaran na ngaɓge là? (Ko foton lay.)

⁷ Á de el ti maaga joŋre jar maa kay jar maa  peel tayge joŋ wo see ne naa de woore mono, amaa Bible jor glog naa ga: naa mo “hay we joŋ suse’.” (Kol. 3:15) Kristof, jee maa peel tayge po wo Finlande, wãã ga se joŋ suse’ de ɗeŋ maa kay la no, “Ndi ɓo’ karte postal noga ndi yer mesaaje maaga de verse ɓili. Lan ndi wãã fẽn maaga jee kay jar maa peel taygen joŋ ga coɓ me, noga ndi wãã fẽn maaga fruy me wer joŋre ɓen ne hẽne.” Paskal wo de Jayel, ga wo ɓi sir Nouvelle-Calédonie, tos wo ti jar kay jar maa peel tayge wo. Paskal wãã ga: “La maŋ, wùr tos ti jar maa kay jar maa peel tayge wo debaŋ. Wùr joŋ suse’ ne Jeofa ti ɓaara; wii ne hẽn ga á mo ɗaw ra do ɓe, lan mo kay ra.” Jeofa laa tosge maa de maŋ sen wo, lan taygen ɓuy da’ wer ɓe.—2 Kor. 1:11.

JAR MAA PEEL TAYGE MAAGA “JOŊ WO JOŊRE YOO ƁAY”

8. Wer mayse ga Pol wãã ga jar maa peel tayge maa ti siyekle maa taŋgun hay wo ‘joŋ joŋre debaŋ’ là? (1 Tesalonig wo 5:​12, 13)

⁸ Jar maa peel tayge maa ti siyekle maa taŋgun hay wo joŋ joŋre ti tayge debaŋ. (Jaŋ 1 Tesalonig wo 5:​12, 13; 1 Tim. 5:17) Á hay wo “koɗ” jar maa ti taygen—seege de taygeti wo, lan far wo ɗiggi doo tayge jar maa peel tayge wo nono. Á hay wo “ruɗ” hẽẽre ɓaara wo de mãyregemaare ɓaara wo—de baa yaŋ ne taygen de dage nen maaga á mo hay tum de ẽgre de hã ɓili. (1 Tes. 2:​11, 12; 2 Tim. 4:2) Jar sen hay wo joŋ joŋre debaŋ maa hã fẽẽre maaga jar maa liŋ ni ɓaara wo de sãy ɓaara ti lay, lan maaga á mo hay wo de ẽgre ti nenterse.—1 Tim. 3:​2, 4; Tid 1:​6-9.

9. Joŋre maa hõn wo ga jar maa peel tayge joŋ wo ra wara là?

⁹ Jar maa peel tayge maa waran wo de joŋre do debaŋ lay. Á wo diŋ jar joŋ joŋre siigi wããre maa de cõõre no. (2 Tim. 4:5) Á hã wo saɓlaŋ ne jar ti siigi wããre Baa de baa wuu, kiɗ wo ngeel maaga taygen wo sii wããre Baa ni, lan had wo maa sii wããre lan maa hadge ɓe go de woore. Á wo diŋ jar caa kiida maa de koge decoo, lan bay ti ɓaŋ wa pa. De maaga jobo maa ti tayge joŋ ɓlagge maa kwũy we no, jar maa peel tayge dur wo go ɓuy maaga á mo fer ‘wũy holaŋ ɓe de Jeofa. Amaa, saara dur go ɓuy maaga taygen mo hay go de fããge. (1 Kor. 5:​12, 13; Gal. 6:1) Taŋgu ɗa, jar maa peel tayge wo diŋ jar koɗge wo. (1 Pi. 5:​1-3) Á bag wo jag see ɓaara go de woore maa sii wããre ti tayge, dur wo maa ko jar maa ti taygen go ɓuy, lan ɗe wo hẽẽrebe wo ti telfon maa teŋ nen ɓaara. Jar maa peel tayge maa po kay wo ti booge tiŋ-Baa wo, lan ti ‘wũygi ɓaara. Maa po kay wo ti joŋre taygeti maa kluuri wo, noga joŋ wo joŋre ti ‘Comités de Liaison Hospitalier’, lan ti ‘Groupes de Visites aux Malades’. Ciŋ ti joŋre sen wo la mono, á wo de joŋre maa tigriŋ wo do pa. Jar maa peel tayge joŋ wo joŋre debaŋ maa kay naa!

10. Mayse jor wo glog naa maa ko de el joŋre maaga jar maa peel tayge joŋ wo debaŋ là?

¹⁰ Jeofa hay go de wããge peel bol ga jar maa peel tayge koɗ wo naa yaŋ de woore, day “hẽẽne joŋ ge [naa] ga so. [Naa] daɗ ge . . . gà so hase.” (Jer. 23:4) Sen diŋ tee fẽn maaga Johanna, mãygemanbe po wo Finlande hay yiŋ de ɓe blam maaga man ɓe hay le’ cege maa kwũy mono. Á wãã ga: “á hay bay gus me maa wãã fẽn maaga hay gay megen wa. Amaa jee maa peel tayge po ga ndi hay bay go de koge ɓe de woore wa, co’ sug ɓi de woore de maaga ndi hay de sãy wãã re maa see ɓin ne hẽn ti mono. Blam se tos de ɓi, lan hã bawge go me jiili ga Jeofa da me. Fẽẽre maaga á wãã ra bay wo ti ɓi ɓuy wa so, amaa ndi ɓi de ɗiggi an ga ndi hay ko see ɓi go wur sen blam de woore. Ndi ɗig ga Jeofa hay ɓo’n le maa kay mege ti wur ɓe.” Jar maa peel tayge maa ti tayge ɓon kay wo ndo na kayge là?

11. Naa ngaɓ go ga joŋre jar maa peel tayge wo nen naa de woore na ngaɓge là? (Ko foton lay.)

 ¹¹ Jeofa da ga naa mo hay ngaɓ go ne jar maa peel tayge wo ga joŋre maaga á joŋ wo de woore nen naa debaŋ.” (1 Tes. 5:​12, 13) Henriette, maaga wo ɓi sir Finlande lay wãã ga: “Jar maa peel tayge kay wo jar go de ɓil ɓaara ɓuy, amaa sen bay da wããge ga á wo de wur do, lan de ẽgre debaŋ dedaŋ jar lan wa. Noga ga á bay wo de re see wa na wa pa. De ngar ngeel maa po, ndi wãã ne hara tu ga: ‘Ndo mbo de koge ga ndo diŋ jee maa peel tayge maa ti ngeel ɓe yawlà? Ndi hay de sãy maaga ndo mo ko sen tawa tu.’ ” Sera mãygemanbe po wo Turquie wãã ga: “Maaga jar maa peel tayge mo bag wo jag joŋre maa do ɓaaran go de woore mono, á wo de sãy jorge glog ti lay. Á de woore de maaga naa yer leder wo ne hara, ɗe ra le rege liŋ ni naa, noga sii wããre Baa de ɓaara.” Jee maa peel tayge po yaŋ ti tayge ɓo ga joŋ joŋre debaŋ, ga ndo de sãy joŋ suse’ ne hẽn ti yawlà? Ngaɓ go ne hẽn ga joŋre maaga á joŋ ra wo de woore nen ɓo.—1 Kor. 16:18.

JAR RAŊ TAYGE WO DE SÃY COƁGE TI LAY

12. Yeso joŋ joŋre de jar maa hõn wo maa coɓ tayge wo pa là? (1 Tesalonig wo 2:​7, 8)

¹² Yeso Kris hã joŋre ne jar maa po wo do maa kay tayge de ɗeŋ maa tigriŋ. Á hay joŋ joŋre de jar maa peel tayge maa Jerusalem wo maaga á mo laa wo Pol, Barnabas lan jar maa tigriŋ wo doo jar raŋ tayge wo nono. (Joŋre 11:22) Wer mayse là? Doo maaga à hoo jar maa kay jar maa peel tayge wo, jar maa peel tayge wo maa coɓ tayge wo no lay mono, à hoo jar maa raŋ tayge wo maa coɓ tayge wo lay. (Joŋre 15:​40, 41) Jar sen hã wo tenen ɓaara wo de see ɓaara ɓuy go maa had wããre Baa lan jor glog jare.—Jaŋ 1 Tesalonig wo 2:​7, 8.

13. Joŋre jar raŋ tayge wo diŋ maa hõn wo là?

 ¹³ Jar raŋ tayge raŋ wo debaŋ. Á see wo klewmeder pur debaŋ maa raŋ tayge wo. Nen naw renam tum, jee raŋ tayge sii wããre ngaɓa, joŋ ‘visite pastorale’ ne hẽẽrebe wo, joŋ taygeti maa teŋ nen piyoniyẽ wo, joŋ taygeti de jar maa peel tayge wo, lan taygeti wo maa sii wããre. Á bag jag see ɓe go maa sii wããre, lan bag jag joŋre maaga à joŋ ti taygeti maa kleere, lan maa kluuri wo. Á had ti lakol piyoniyẽ wo, joŋ taygeti de piyoniyẽ maa ti prog wo. Ciŋ ti joŋre sen wo mo deŋ, á joŋ joŋre maaga filiyal hãn le ne hẽn, ga wo go maa joŋge deparday mono.

14. Wer mayse ga joŋre jar raŋ tayge co wo jag naa là?

¹⁴ Jar maa ti tayge da’ wo wer joŋre jar raŋ taygen wo na da’ge là? Hẽnbe po wo Turquie wãã ti maaga jee raŋ tayge wo raŋ tayge ga: “Tum de maaga á raŋ tayge mono, sen jor glog ɓi maa kay hẽẽrebe wo debaŋe. Ndi yiŋ de jar raŋ tayge wo ngaɓa debaŋ, amaa jobo yoo ɓaara joŋ mopo ti boŋ ga ngaɓ ga se go de joŋre do debaŋ ga; noga se bay da’ nen maa ndalge de jar wa ga.” Johanna, ga naa wãã le ti ɓe ciŋ la, sii wããre de jee raŋ tayge. Amaa saara da’ jobo liŋ koh boŋ ga. Á wãã ga: “Ndi bay go yõõ ti wur sen ti boŋ wa. Mãyregemaare ɓi po wo ɓog hay ur wo defay, lan sãy ɓaara hay baa mege debaŋ. Jee raŋ tayge teŋ nen ɓi, lan kay me maa koge ga ti joŋre maa ni Jeofan, naa joŋ go see kããra hãã maa tum ga. Amaa ɓi sir maa defayn mono, naa da’ nen yaŋ debaŋ maa iggi see kããra.” Hẽẽrebe wo ngaɓa le’ wo da jar raŋ tayge ɓaaran wo wer kayge maaga á kay wo ra.—Joŋre 20:37–21:1.

15. (a) Doo maaga 3 Jaŋ 5-8 wãã no mono, naa joŋ joŋge maa ngaɓge go ga joŋre maaga jar raŋ tayge joŋ wo ra wo de cõõre jag naa là? (Ko foton lay.) (b) Wer mayse ga naa mo hay ɓo’ nen go ga naa joŋ suse’ ne naare jar raŋ tayge wo là? (Ko ngeel maa de gaɗge : “ Yõõ ti go ti naare ɓaaran wo wa.”)

¹⁵ Apotre Jaŋ jor glog Gayus maaga á mo yãã  waare hẽẽrebe maaga a wo le coɓ tayge mono, lan maaga á “mo kaŋ waare ɓaara go de el doo maga ɓil Baa da” nono. (Jaŋ 3 Jaŋ 5-8.) Ɗeŋ po boŋ maaga naa joŋ sen diŋ de ɗe jee raŋ tayge maa rege de naa. Ɗeŋ maa tigriŋ pa diŋ ga naa wo ti sii wããre de maaga á a wo we raŋ tayge naa no. Lesli, maaga naa hay wãã le ti ɓe ciŋ la ngaɓ go ga se joŋ suse’ ne jee raŋ tayge de ɗeŋ maa tigriŋ wo ga: “Ndi tos Jeofa ga á mo hã fẽẽre maaga á wo de sãy ɓaara ti ne hara. Wùr de war ɓi wùr yer leder maa wããge ne hara ga age ɓaaran kay wùr debaŋ.” Hay de kaŋge ti ɓo ga jar raŋ tayge yiŋ wo de re, lan de wur maa po á joŋ wo go de gayri doo naa no lay. De ngar ngeel maa po, á le’ wo cege, á ɗig wo go hãy hãy, lan woo wo do go lay. Maapo ga wããre maa de el, noga kado po mẽ’ joŋ ge diŋ yiŋgi jag ti tosge ɓaara!—Jõõ. 12:25.

NAA DE SÃY “KADO MAAGA WO DIŊ JAR TÉEBEERE WO” TI

16. Doo maaga Jag Jõõ wo 3:27 wãã ne mono, wiigi jag maa hõn wo ga hẽẽrebe mo hay wii wo jag see ɓaara là?

¹⁶ Go ti tamsir ɓuy, naa de sãy “kado maaga wo diŋ jar téebeere wo” ti. Hayga ndo yaŋ diŋ hẽnbe po ga go de joŋ batem no, ndo mbo de kããge maa kayge de ɗeŋ maa sen yawlà? (Jaŋ Jag Jõõ wo 3:27.) Ndo mbo de sãy kol jee maa kay jar maa peel tayge wo ti yawlà? Hayga ndo yaŋ go diŋ jee kay jar maa peel tayge wo no, ndo mbo de sãy kol jee maa peel tayge c maa kay hẽẽrebe wo ti yawlà? Ndo mbo de kããge maa coo fẽẽre po wo nen naw ɓo maa woge ti Lakol jar Sii Wããre maa ti Twaywaŋ wo yawlà? Lakol sen had mo, lan kay mo yaŋ maaga Yeso mo joŋ joŋre de ɓo de peel ni. Hayga ndo ko we ga ndo bay de kããge maa joŋ fẽẽre sen wo wa no, tos Jeofa. Wii ne ga á mo hã nenterse ɓe maa bay ɗagn mo maaga ndo mo bag jag joŋre maaga à hã ra ne ndo do go.—Lug 11:13; Joŋre 20:28.

17. “Kado maaga diŋ jar téebeere wo” had mayse ne naa ti Waŋ naa, Yeso Kris là?

¹⁷ Joŋre hẽẽrebe maaga Yeso lag ra doo “kado maaga wo diŋ jar téebeere wo”, ngaɓ wo go ne naa ga Yeso de koɗ naa ti wur se maa blam la no. (Mat. 28:20) Naa de fruygi ti maaga naa da’ Waŋ maa de dage, lan de yaŋ, ga de ko fẽẽre maaga naa de sãy ɓaara ti; lan ga lag hẽẽrebe maaga kay wo naa ne naa mono! Wersen, kiɗ ɗeŋ maa joŋ suse’ ne jar sen wo ti joŋre ɓaara maaga á joŋ wo ra debaŋ mono. Lan hay tum jon suse’ ne Jeofa, maaga diŋ Jee maaga hã “fẽẽre ma de eln wo mo deŋ ɓuy.”—Jag 1:17.