1. Jeofa ɗig ti jar maa goŋge ɓen wo na ɗiggi là?

 JEOFA ko mayse see jar maaga wo de goŋge ɓe ti tamsir la mo là? Á ko naa ti wur maaga naa de fruygi, lan ti wur maaga naa go de car jiili mono. (Siŋ. 37:18) De maaga á ko ga naa dur go de ẽgre naa ɓuy maa goŋge ɓe, koh de maaga jiili naa mbe go de carge mono, sen co jag ɓe debaŋ! Ni pa mono, á joŋ go gorge maa kay naa lan maa coɓ nen naa lay.

2. Jeofa joŋ mayse ne jar maaga jiili ɓaara go de carge mo là, day naa da’ mayse wer ɓe lay là ?

² Siŋ wora 147:3 wãã ga Jeofa ‘sad wããge’ jar maaga jiili ɓaara go de carge mono. Verse sen ngaɓ ɗeŋ maaga Jeofa kay jar maaga wo go de car jiili mono. Naa joŋ diŋ mayse maa da’ge wer koge de el maaga Jeofa ko de el naa mo là? Ko saɓlaŋ po ɗa. Dogtor maaga de ko joŋre ɓen de woore de kããge maa kay jee maaga wããge see ɓe. Amaa, maaga jee ɓen mo pẽẽ go mono, á mo hay hoo sug ti jag liŋgi maaga dogtorn wãã ne hẽn mono. Ɓil artikle sen la, naa ko wããre maaga Jeofa wãã ɓil Wããre ɓen ne jar maaga jiili ɓaara go de carge mono yaŋ. Naa ko ɗeŋ maaga naa joŋ joŋre de yaŋ ɓe maa de dagen yaŋ pa.

JEOFA HÃ BAWGE GO NE NAA JIILI GA NAA DE EL NEN SE DEBAŊ

3. Wer mayse ga jar maa po ko wo see ɓaara go halla ga là?

³ Jar wara ngaɓa debaŋ bay da kããra wa. Ɓo’ge ti ɓen so diŋ ga saara joŋ bon jar lan wo no, lan joŋ wo ga á mo ko wo see ɓaara go halla wa. Mãygeman naa po ga á ɗen ga Elen a wãã ga: “Pããre ɓi hay bay wo da wùr wa. Pan ɓi hay da waŋ debaŋ, lan  se hay wããge ne wùr tum ga kayge wùr baywa.” Maapo ga jobo joŋ ndo de baywoore debaŋ, tum ndar ndo, noga joŋ maaga ndo mo ko see ɓo go halla wa. Hayga á yaŋ no, maapo ga se joŋ de gayri see ɓo maa hã ɓil ga à da mo.

4. Doo maaga naa da’ ɓil Siŋ wora 34:19 no mono, Jeofa ɗig ti jar maaga wo go de car jiili na ɗiggi là, day á wãã ga se joŋ ge mayse yaŋ ne hara là?

⁴ Koh jar mo hay ba ko ndo go halla wa, hay mbo go de bawge jag jiili ɓo ga Jeofa da ndo, lan ga kayge ɓo yaŋ nen ɓe. Á “maŋ see jar maga jiili ɓaara go de carge mono.” (Jaŋ Siŋ wora 34:19.) Hayga ‘ɗiggi ɓo yaŋ mbar ndo no’, fer ɗiggi ga Jeofa de ko fẽẽre maa de woore wo see ɓo, lan ga á jãã mo le diŋ se. (Jaŋ 6:44) Á tum go gorge maa kay ndo werga ndo de el nen ɓe debaŋ.

5. Naa had mayse see ɗeŋ maaga Yeso hay joŋ jar maaga à bay go ko rage halla wa mo là?

⁵ Naa had fẽẽre ti ɗiggi Jeofa de frug nen saɓlaŋ Yeso. De maaga Yeso hay gesiŋ la mono, á hay joŋ de el see jar maaga bay wo go ko see ɓaara halla wa mono. (Mat. 9:​9-12) De maaga wãy maaga cíi hay yuugi ne hẽn glog du’ õõbe Yeso de kaŋ ɗiggi ga se pẽẽ yaŋ go mono, Yeso coɓ nen ɓe, lan joŋ suse’ ne hẽn ti hãge ɓil ɓe no. (Mark 5:​25-34) Joŋre Yeso hay de maŋ maa ni Pan ɓen taw taw tu. (Jaŋ 14:9) Wersen, hay go de bawge jag jiili ɓo ga Jeofa de ko de el ɓo, lan ga á de ko joŋre ɓo maa de wooren wo no, kaŋ nen ga hãge ɓil ɓo, lan dage ɓo see ɓe.

6. Ndo joŋ joŋge hayga ndo bay we ko see ɓo go halla wa là?

⁶ Ndo joŋ joŋge hayga ndo yaŋ ko see ɓo bay go halla wa là? Jaŋ verse maaga hã wo bawge go mo jag jiili ga ndo de el nen Jeofa, lan ɗig ti ɓaara. b (Siŋ. 94:19) Ngaɓ jag see ɓo de jar  wa, lan kaŋ ɗiggi ɓo ti fẽn maaga ndo bay de kããge maa joŋge ɓe wa mo wa pa. Jeofa bay gorge ga ndo mo joŋ fẽn maaga ndo bay de kããge maa joŋge ɓe wa mo wa. (Siŋ. 103:​13, 14) Hayga jobo hay mbar mo noga suu de ɓo de waŋ le ɓaa laybla no, caa hee de see ɓo ti fẽn maaga jee joŋ moge de ɓlaggen joŋ mo wa. Werga ren bay diŋ see ɓo wa. Kaŋ ti ɓo ga Jeofa wii ge diŋ jag jee ɓlaggen ti fẽn maaga á joŋn mono, amaa bay diŋ jar maaga à joŋ ra de ɓlagge mo wa. (1 Pi. 3:12) Sandra maaga à hay joŋ bon ɓe le ti klee ɓe wãã ga: “Ndi hay tum wii Jeofa nen tosge ga á mo kay me maaga ndi mo ko see ɓi doo maaga á ko ndi no lay no.”

7. Fẽẽre maaga naa hay yiŋ le de ɓaara nen naw naa kay wo naa ti joŋre maa ni Jeofan na kayge là?

⁷ Ti ɓo mo yõõ go ti boŋ ga Jeofa de kããge maa joŋ joŋre de ɓo maa kay jar lan wo wa. Á hã togoɗge ne ndo de joŋge ga ndo mo hay diŋ jee joŋ joŋre de se ti siigi wããre Baa. (1 Kor. 3:9) Wer fẽẽre maa de gayri maaga ndo hay yiŋ le de ɓaara mono, maapo ga se joŋ go ne ndo gus maa ko gayri maaga jar lan yiŋ wo de ɓaara mo lay no. Ndo mbo de kããge maa joŋ fẽẽre wo ngaɓa maa kay rage. Elen maaga naa hay wãã le ti ɓe ciŋ la hay da’ kayge, lan patala se de kããge ɗawa maa kay jar lan wo no. Á wãã ga: “Taŋgu, ndi hay bay ko see ɓi go halla wa. Amaa Jeofa joŋ ga ndi mo ko ga à da me, lan se joŋ joŋre de ɓi maa kay jar lan wo lay.” Elen patala de fruygi debaŋ ti maaga á ti joŋre piyoniyẽ mono.

JEOFA DA GA NAA MO YÃÃ FUGGI ƁIL MAA NI SE NO

8. Jeofa wãã mayse ne naa ɓil Esay 1:18 là?

⁸ Sedeewa Jeofa maa po mbaara tum ɗiggi ti ɓlagge maaga saara hay joŋ le go ɓaa, noga taŋgu batem, noga pa blam batem. Amaa ti naa mo yõõ go ga Jeofa da naa debaŋ, lan ga á hã weel ɓen go maa fug ɓil go ti ɓlagge naan wo wa. Cwãy tu, á de sãy maaga naa mo yãã kado sen ti. Jeofa hã bawge go ne naa jag jiili ga de maaga naa “cag reen” c we go de se no, se kaŋ ti ti ɓlagge naan ga so. (Jaŋ Esay 1:18.) Naa de fruygi debaŋ ti maaga Jeofa, Pan naa maa de dagen men ɓlagge naa wo go ne naa mono! De maaga á men ɓlagge naa wo go ne naa mono, á yõõ ti go ti de el maaga naa joŋn go ti boŋ ga hase.—Siŋ. 103:​9, 12; Heb. 6:10.

9. Wer mayse ga naa mo hay tum ɗiggi ti ɓlagge maaga naa joŋ ra le go ɓaa mo wa là?

⁹ Hayga fẽẽre maaga ndo joŋ ra le ɓaa yaŋ wo hãy ɗiggi ɓo no, dur maaga ndo mo ɗig diŋ ti fẽẽre maaga ndo de joŋ rage patala, lan maaga ndo joŋ ge ra wo peel mono. Naa ko saɓlaŋ apotre Pol ɗa. Á fer go ɗiggi ti maaga se hay joŋ bon kretiyẽ wo mono, amaa se hay go de koge de woore ga Jeofa go de fug ɓil ne se ti. (1 Tim. 1:​12-15) Á hay tum ɗiggi ti ɓlagge maaga se hay joŋ ra le ɓaa mo yawlà? Á joŋ doo sen ne ga has, doo maaga se hay bay tum ɗiggi ti fẽẽre maaga se hay joŋ rage de maaga se hay diŋ jee farisiyẽ maa kluu mo wa lay mono. (Flp. 3:​4-8, 13-15) Nen maaga á de hay joŋ doo sen no mono, Pol hã see ɓe go ɓuy ti joŋre siigi wããre Baa no, lan kaŋ ɗiggi ɓe ti naw maa peeln lay. Doo Pol no lay, ndo kãã maa coo fẽẽre maaga ndo joŋ ra le nen naw maa glogn wo le mo ga. Amaa, ndo mbo de kããge maa togoɗ Jeofa, lan joŋge de cõõre jag ɓe patala ane. Lan ndo mbo de kããge maa ɗiggi ti fẽẽre maa de woore maaga Jeofa wãã ga se joŋ ra yaŋ wo nen naw maa peeln mono.

10. Hayga joŋre naa maa ɓaan hay we ma’ ɓil jar no, naa joŋ joŋge là?

 ¹⁰ Maapo ga ɗiggi ɓo hãy mbe ndo wer fẽẽre maa po wo ga ndo hay joŋ rage ɓaa, ga joŋ wo see ne jar lan wo de baywoore mono. Day mayse kay ndo là? Joŋ fẽn maaga ẽgre ɓo kãã yaŋ maa kne’ re no, lan wii fuggi ɓili. (2 Kor. 7:11) Tos Jeofa maaga á mo kay jar maaga joŋre ɓo ma’ ɓil ɓaara mono. Jeofa kay nday de jar maaga joŋre ɓo ma’ ɓil ɓaara maa soɗ re no, lan maa ferge da’ jam.

11. Naa had mayse see saɓlaŋ profed Jonas là? (Ko Foto maa nen lay.)

¹¹ Da’ koge re wer ɓlagge ɓo maaga ndo joŋ ra le ɓaa, lan men Jeofa joŋ joŋre de ɓo de ɗeŋ maaga á dan mono. Naa ko saɓlaŋ Jonas ɗa. Nen maaga á de hay raw Ninif doo maaga Baa hay wãã ne hẽn ne mono, Jonas maŋ faage maa tigriŋ kara. Jeofa liŋ Jonas, day se da’ koge re wer fẽn maaga se joŋ de baywoore mono. (Jonas 1:​1-4, 15-17; 2:​7-10) Jeofa tob Jonas go ga. Baa ngaɓ ɗeŋ maa tigriŋ ne hẽn maa woge Ninif, day de sen la Jonas hoo sug deparday tu. Koh de maaga Jonas hay mbe ɗig fẽn maaga á joŋ de baywoore mo laybla, á raw mbe joŋ joŋre maaga Jeofa hã ne hẽn do mono.—Jonas 3:​1-3.

JEOFA COƁ NAA DE NENTERSE ƁE MAA BAY ƊAG NO

12. De maaga naa yiŋ we de gayri no, Jeofa hã jam maa jiili ne naa na hãge là? (Filip wo 4:​6, 7)

¹² De maaga naa yiŋ we de re maa de gayri wo no, Jeofa coɓ naa de nenterse ɓe maa bay ɗag no. Naa ko re maaga hay da’ Ron wo de Karol mo ɗa. Weel ɓaara maa kiŋgi 39 ‘war see ɓe go. Á wãã wo ga: “Wùr hay go de da’ re maa de gayri wo debaŋ, amaa maa ta’ la sen raw ẽgre wùri. Wùr joŋ naw pur debaŋ jag tosge, bay le’ naa wa, lan wùr raw da’ jam maaga de yerge ɓil Filip wo 4:​6,7 mono.” (Jaŋ ne.) Hayga jiili ɓo yaŋ go de caage do re maa de gayri po no, wãã fẽn maaga de gay ndo dera tu ne Jeofa nen tosge nen naw po ta’, lan jag de pããge doo ga ndo da nono. (Siŋ. 86:3; 88:1) Wii Jeofa ɓaale ngaɓa maaga á mo hã nenterse ɓe maa bay ɗagn mo. Á joŋ ge yaŋ mbe tum kay ndo.—Lug 11:​9-13.

13. Nenterse maa bay ɗagn kay naa maa goŋ Jeofa de deele na kayge là? (Efes wo 3:16)

¹³ Re maa de gayri po da’ mo we go ti boŋ, ga men mo go de hoo ẽgre yawlà? Nenterse maa bay ɗagn hã ẽgre maaga ndo de sãy ɓe ti maa ya’ wer goŋ Jeofa de deele yaŋ mo. (Jaŋ Efes wo 3:16.) Naa ko re maaga hay da’ mãygemanbe po ga à ɗen ga Flora mo ɗa. Á hay wo misiyoner de war ɓe; day war ɓe kol bay de deele see ɓe wa so; ya’ saara bus kẽẽ go. Á wãã ga: “Ndi hay ko see ɓi go nen lawge debaŋ wer maaga á hay bay de deele see ɓi wa mono. Ɗiggi ɓi hay tum de kaŋge diŋ ti re se no. Ndi raw tos Jeofa maaga á mo hã nerterse ɓe maa bay ɗagn me maa soɗ re se no. Jeofa coɓ me, lan koh de maaga re sen hay ko ndi taŋgu mbe de gayri debaŋ mo laybla no, ndi kol de ẽgre debaŋ, lan de kayge maa ɓen ndi ɗii go ne re sen ti.” Flora ko ga Baa kay se maa kaŋ ɗiggi de peel ni, lan ga á kay ge se yaŋ jag re maaga se yiŋ ge de ɓaara wo mo ɓuy. Á wãã ga: “wããre maa ɓil Siŋ wora 119:32 ngaɓ ɗeŋ maaga Jeofa kay me mono: ‘Ndi ɗee diŋ ti faage jag liŋgi ɓon wo no, werga ndo kaŋ jiili ɓi joŋ fruygi.’ ”

14. Naa joŋ joŋge maaga nenterse Baa mo kay naa là?

¹⁴ Blam maaga ndo wii Jeofa ga á mo hã nenterse ɓe maa bay ɗagn mo mono, ndo de hay joŋ mayse là? Joŋ joŋre maaga kay wo ndo yaŋ maa da’ nenterse Baa de peel ni mono; doo woge ti taygeti wo, lan woge ti siigi wããre Baa. Baa ɗiggi ɓo go de ɗiggi Jeofa de jaŋ wããre Baa tum. (Flp. 4:​8, 9) De maaga  ndo jaŋ Bible mono, ɗig ti mbaa jar maa ɓil Bible maaga hay yiŋ wo de re maa de gayri wo mono, lan ɗig ti ɗeŋ maaga Jeofa kay ra maa soɗ re sen wo pa. Sandra, maaga naa wãã le go ti ɓe ciŋ la, yiŋ de wer re maa de gayri wo ngaɓa debaŋ. Á wãã ga: “Mbaa Josef jor glog ɓi debaŋe. Á men re maaga á hay yiŋ de ɓaara ɓlag holaŋ ɓe de Jeofa ga.”—Tĩĩ. 39:​21-23.

JEOFA JOŊ JOŊRE DE HẼẼRE NAA WO MAA COƁ NAA

15. Naa da’ coɓge diŋ see wose wo là, lan á coɓ wo naa de ɗeŋ maa hõnlà? (Ko foton lay.)

¹⁵ De maaga naa ti bon mono, hẽẽre naa “coɓ wo nen [naa] debaŋ”. (Kol. 4:11) Kayge maaga hẽẽre naa kay wo naa diŋ ɗeŋ maaga Jeofa ngaɓ go ne naa ga se da naa mono. Á coɓ wo naa diŋ de iggi see naa, lan co’ wo sug naa de maaga naa wãã re maa see naan ne hara mono. Maapo ga saara jaŋ verse maa ɓil Bible ne naa, noga tos wo de naa. d (Rom. 15:4) De ngar ngeel maa po, maapo ga hẽẽre naa ɓo’ wo sug naa ti ɗiggi Jeofa, day sen kay naa maa lagge ɗegede. Hẽẽre naa maa po kay wo naa de ɗeŋ maa tigriŋ, doo hãge rege ne naa maaga naa mo ko see naa ɗawa.

16. Maapo ga naa joŋ mayse maa da’ kayge jar lan wo là?

¹⁶ Maa da’ kayge do hẽẽre naa wo mono, maapo ga naa mo hay wii ra. Hẽẽre naa da wo naa, lan saara de sãy kay naa ti. (Jõõ. 17:17) Amaa maapo ga á bay wo de ko fẽn maaga de  cog naa jiili, noga fẽn maaga naa desãy ɓe ti mo wa. (Jõõ. 14:10) Hayga re po ce mo we no, wãã fẽn maaga á joŋ see mo ne bar ɓo maa ti ngeel ɓe wo. Wãã fẽn maaga gay mo ne hara. Maa po ga ndo mo hay wãã ne jee maa peel tayge po boŋ, noga ɓog, ga jag ɓay de laa kẽẽ. Mãyregemaarebe maa po da’ wo coɓge de maaga à wãã wo ti fẽn maaga cog wo ra jiili ne mãyregemaarebe maaga wo go de ruggi mono .

17. Re gayri maa hõn wo ga maŋ wo jag naa go maaga naa mo hay de jor glog là, day naa ɗii go ne hara ti na ɗiigi là?

¹⁷ De ngar ngeel maa po, maapo ga ndo bay de sãy hayge yoo jar ti wa, wer re maaga de cog moge jag jiili mono. Maapo ga hẽẽre naa bay wo de ko fẽn maaga de cog jiili ne naa mo wa, noga á wãã wo ti fẽn maaga ce jiili ne naa debaŋ. (Jag 3:2) Amaa, ɗee go see hẽẽre ɓo wo hãã wa. Jeofa joŋ joŋre de ɓaara maa coɓ ndo. Jee maa peel tayge po ga à ɗen Gavin hay ti bon do cege ‘dépression’, day wãã ga: “Naw pur debaŋ, ndi hay bay de sãy wãã wããre noga hayge ti jeŋ hẽẽrebe wo wa.” Amaa, Gavin dur debaŋ maaga se mo hay see hẽẽrebe wo. Day se ko see ɓe ɗawa de maaga se joŋ sen mono. Mãygemanbe po ga à ɗen ga Ami wãã ga: “Á hay joŋ see ɓi de gayri debaŋ maa hã ɓil ti jar wer re maaga ndi hay yiŋ de ɓaara nen naw ɓi wo mono. Amaa ndi had da jare, lan kaŋ ɗiggi ti hẽẽrebe wo doo Jeofa no lay. Ndi de koge ga á hã fruygi ne Jeofa, lan ne ndi lay.”

FẼẼRE MAAGA JEOFA JOŊ GE RA WO PEEL COƁ WO NAA

18. Naa de gor mayse ti naw maa peeln là, day naa mo hay joŋ mayse patala là?

¹⁸ La maŋ, Jeofa caa ge wer fẽẽre maaga ɓo’ wo naa nen lawge, lan fẽẽre maaga cog wo naa jiili yaŋ wo go ɓuy. (Naa. 21:​3, 4) Ti wur sen, fẽẽre maaga cog wo jiili ga naa yiŋ de ɓaara fer wo “a ge ne jobo ti ga so.” (Esa. 65:17) Koh wara, Jeofa ko el naa de maaga naa ti bon mono. Jeofa hã fẽẽre maa coɓ naa wo de maa kay naa ne naa debaŋ. Yãã kayge se ga Jeofa hãn mo mono. Hay tum go de bawge jag jiili ga “á ko el [ɓo].”—1 Pi. 5:7.