1-2. Re mayse hay da’ jar maa wer Yeso maa ɓogn wo de maaga á hay wo rawge Emawus mo là?

 NEN Few Nisan ti naw maa 16, kiŋgi maa 33 N.W.N., jar maa wer Yeson wo ɓuy hay wo nen lawge lan joŋ hẽẽne. Jar maapo wo ɓog yoo ɓaara men wo Jerusalem go maa rawge Emawus, ɓi leege po kelewmeder 11 ti jeŋ Jerusalem. Jar sen hay wo go de caa jiili wer maaga à hay ĩĩ Yeso, blo maaga á hay wo seege wer ɓe go mono. Á hay ɗig wo na ga Mesi de hay joŋ mopo yaŋ de woore ne jar Jwif wo, amaa patala se húu go. Amaa, fẽn maaga á hay bay wo gorge ɓe wa ɗuu ra.

² Jobo a le waare, ya’ seege wer ɓaara. Jar se ɓog wãã wo fẽn maaga hay da’ Yeso ne blo se no. Blam sen, waaren tĩĩ wer wããge ti fẽẽre po maaga á yõõ wo ti ɓaara go ti boŋ ga hase. Á joŋ joŋre de Wããre Baa lan de profesi maa ɓil ɓen wo maa ngaɓge ga wer mayse ga Mesin joŋ bon lan húu go la. De maaga á day wo Emawus mokay, á da’ wo ga waare maaga hay wer saara hay diŋ Yeso, maaga Baa bir le go mono! Sen go tinoo tu ga á hay wo de fruygi debaŋ ti maaga á da’ wo ga Mesin tenen mono!—Lug 24:​13-35.

3-4. Mayse hay da’ jar maa wer Yeson wo là, day naa ko mayse yaŋ ɓil hadge sen la là? (Joŋre 1:3)

³ Yeso naa nen see ɓe ne jar maa wer ɓen wo ɓaale ngaɓa nen naw ɓe maa glog 40 gesiŋ la no. (Jaŋ Joŋre 1:3.) Nen naw se maa 40 mono, Yeso jor glog jar maa wer ɓe maaga hay wo go nen lawge, lan de hẽẽne mono. Day saara fruy debaŋ, da’ wo coɓge  maa sii wããre Baa, lan had wo wããre maa de cõõre maa ti Twaywaŋ no. a

⁴ Naa da’ hadge yaŋ debaŋ see fẽẽre maaga Yeso joŋ ti naw sen, hayga naa frug nen ɓaara we no. Ɓil hadge sen la, naa ko ge diŋ ɗeŋ maaga Yeso joŋ joŋre de naw sen (1) maa jor glog jar maa wer ɓen wo, (2) maa kay rage frug wer wããre Baa de peel ni, lan (3) maa kay rage bag jag see ɓaara go see joŋre maaga hay gor rage wo peel mono. Ti ɓaara boŋ boŋ ɓuy, naa ko ge ɗeŋ maaga naa maŋ saɓlaŋ Yeso na maŋge la yaŋ.

JOR GLOG JAR LAN WO NO

5. Wer mayse ga jar maa wer Yeson hay wo de sãy jor glog ti là?

⁵ Jar maa wer Yeson hay wo de sãy jor glog ti. Wer mayse là? Jar maa po wo yoo ɓaara hay men wo tiŋ ɓaara, ɓi feele ɓaara, treere ɓaara wo le go glog maaga saara mo hay de Yeso. (Mat. 19:27) À hay joŋ bon jar maa po wo yoo ɓaara wer maaga á kol wo go jar maa wer Yeso mono. (Jaŋ 9:22) Á hay wo go gorge maa coo naw ɓaaran wer maaga á hay wo de hã ɓil ga Yeso diŋ Mesi maaga a ge le mono. (Mat. 16:16) Amaa de maaga à ‘war Yeso go mono, á hay gwan wo go nen lawge debaŋ lan wo go de caa jiili, wer maaga á hay wo ɗiggi ga fẽẽre maaga saara hay gor rage bag ge wo jag ga so.

6. Yeso hay joŋ mayse blam birgi ɓe le go ciŋ mo là?

⁶ Yeso ko ga á ti ngeel ɓe ga jar maa wer sen ko wo see ɓaara go nen lawge de maaga se húu go mono. Lan se hay de koge ga á hay wo nen lawge, bay diŋ wer de bay hãge ɓil ɓaara wa. Wersen, ti wur maaga á hay bir le go mono, se tõõ wer jor glog bar ɓen wo tu. Sen diŋ doo maaga á naa nen see ɓe ne Mari maa Magdala, de maaga á hay raage ti tipaale ɓe mono. (Jaŋ 20:​11, 16) Á hay naa nen see ɓe ne jar maa wer ɓe maa ɓog maaga hay wo rawge Emawus mo pa. Lan se naa nen see ɓe ne apotre Piyer. (Lug 24:34) Naa had mayse see saɓlaŋ Yeso là? Naa ko fẽn maaga hay hres ti wur maaga á naa nen see ɓe ne Mari maa Magdala mo ɗa.

7. Doo maaga naa da’ ɓil Jaŋ 20:​11-16 ne mono, Yeso ko Mari joŋ mayse de jag toŋ mbu’ wur naw maa 16 nen Few Nisan là?, day sen jor glog ɓe joŋ mayse là? (Ko foton lay.)

⁷ Jaŋ Jaŋ 20:​11-16. De toŋ mbu’ wur naw  maa 16 nen Few Nisan mono, naare maa po wo de deele hay wo ti ngeel maaga à hay tee Yeso ni mono. (Lug 24:​1, 10) Naa ko fẽn maaga hres ti Mari maa Magdala mo ɗa. De maaga á a jag tipaalen mono, á da’n go ɓil koɗe. Á raw rawge siigi ɓe ne Piyer wo de Jaŋ. Jar se ɓogn raw wo wo de ɗeere ni, Mari maŋ glog ɓaara lay. Blam maaga Piyer wo de Jaŋ da’ wo ga tipaalen go ɓil koɗ mono, saara fer le go liŋ. Amaa, Mari gwan wo ti jeŋ tipaalen ti ro ni. Koh de maaga á hay bay de koge ga Yeso de ko se ge mo wa laybla no, Yeso hay mbe ti jeŋ ni. Á ko ga á hay raage ti se, day se hay de sãy maaga se mo coɓ ne ti. Wersen, se naa nen see ɓe ne Mari, lan se joŋ mopo maaga jor glog ɓe debaŋ. Á wãã wããre ne hẽne, lan se hã joŋre maa kluu ne hẽne—woge sii wããre birgi se le go ciŋ ne hẽẽre sen wo.—Jaŋ 20:​17, 18.

8. Naa maŋ saɓlaŋ Yeso na maŋge là?

⁸ Naa maŋ saɓlaŋ Yeso na maŋge là? Naa maŋ saɓlaŋ Yeso de maaga naa jor glog hẽẽre naa wo ti joŋre maa ni Jeofan mono. Doo Yeso no lay, naa mo kiɗ wer ne re maaga hẽẽre naa yiŋ wo de ɓaara mono. Naa mo kol see naa ti tu ɓaara maa ko maaga á joŋ see ne hara joŋge là, lan teŋ nen ɓaara. Naa maŋ wee saɓlaŋ Joselyn, ga mãygeman ɓe joŋ ‘accident’ lan húu go mo ɗa. Á wãã ga: “Nen few ngaɓa, ndi hay da’ see ɓi nen lawge debaŋ”. Amaa, hẽnbe po wo de wãy ɓe ɗen wo wo liŋ ni ɓaara, co’ wo sug ɓe de koge decoo, lan hã wo bawge go ne hẽn jag jiili ga á de el nen Jeofa. Joselyn wãã ga: “Ndi hay ko see ɓi go nen lawge debaŋ, doo ga ndi hay go hã bii nen marog maa kuɗum nono. Amaa Jeofa joŋ joŋre de hẽẽrebe sen wo maa yãã me go jag re se no. Á kay wo ndi maaga ndi mo da’ fruygi maa ya’ wer joŋ joŋre ne Jeofa.” Naa lay, naa jor glog jar lan wo de maaga naa yaŋ men rage wãã fẽẽre maaga le jiili ɓaara, lan naa yaŋ co’ sug fẽn maaga á wãã wo ne de woore lay no. Doo sen nokay, naa kãã maa coɓ rage, lan maa kay rage maa ya’ wer joŋ joŋre ne Jeofa.—Rom. 12:15.

KAY JAR MAA LAA WER NE WÃÃRE BAA

9. Re maa hõn ga jar maa wer Yeson hay yiŋ wo de ɓe là, day á kay ra na kayge là?

⁹ Jar maa wer Yeson yãã wo wããre Baa, lan dur wo maa joŋ joŋre de ɓe nen naw ɓaara. (Jaŋ 17:6) Amaa, maaga Yeso húu go jag koo, doo jee le’ faage, hay hãy ra debaŋ. Yeso hay de koge ga jar maa wer sen hay wo de hã ɓil, lan da wo Jeofa. Lan se da’ ga á hay wo de sãy laa wer ne wããre Baa ti de peel ni. (Lug 9:​44, 45; Jaŋ 20:9) Wersen se kay ra maa laa wer ne wããre Baa maaga á jaŋ wo ne mono. Naa ko maaga á hay joŋ sen de maaga á naa nen see ɓe ne jar maa wer ɓe maa ɓogn wo ti faage Emawus mo ɗa.

10. Yeso hã bawge go ne jar maa wer ɓen wo ga se hay diŋ Mesi cwãy na hãge là? (Lug 24:​18-27)

¹⁰ Jaŋ Lug 24:​18-27. Hay de koge ga Yeso bay de ngaɓge ne jar sen wo deparday tu ga se hay diŋ wosela wa. Nen maaga á de hay joŋ doo sen nono, se wii jag ɓaara. Wer mayse là? Maapo ga á hay de sãy maaga á mo wãã wo ɗiggi ɓaara lan fẽn maa jiili ɓaaran go ne se ti. Day se diŋ fẽn maaga á joŋ wo mo tu lay. Á wãã wo ne hẽn ga saara hay gorge ga Yeso mo yãã saara go jag bon maaga jar Rom hay wo ɓo’ge ɓe ne jar Jwif wo ti mono. Blam maaga á wãã wo ɗiggi ɓaara go de woore wãã mono, Yeso joŋ joŋre de Wããre Baa maa kay jar sen wo maa laa wer ne fẽn maaga hay hres mono. b Go glog de suŋ hãã, Yeso hay iggi ti jeŋ jar maa wer ɓe lan wo, maa naa wer profesi maa ɓil Wããre Baa ne hara. (Lug 24:​33-48) Naa had mayse see mbaa sen là?

11-12. (a) Naa da’ mayse see ɗeŋ maaga Yeso hay had cwãy maa ɓil wããre Baa mo là? (Ko foton wo lay.) (b) Hẽnbe po kay jee maaga se had wããre Baa ne hẽn na kayge là?

¹¹ Naa maŋ saɓlaŋ Yeso na maŋge là? Taŋgu, wii jag jar maaga ndo had Bible ne hara, maaga á mo wãã wo fẽn maa jiili ɓaara ne ndo. (Jõõ. 20:5)  Hayga ndo ko fẽn maa jiili ɓaara we go no, sii ɗeŋ maaga á da’ wo verse maa kay rage jag re maaga á yiŋ wo de ɓaara wo mono. Blam sen, tem wããge ne hara ga á mo joŋ wo nokay wa. Ndal de ɓaara ti verse maaga nday jaŋn mono. Jor glog ɓaara maaga á mo ɗig wo ti fẽn maaga á jaŋ wo, lan ti ɗeŋ maaga á joŋ wo joŋre de ɓaara nen naw ɓaara mono. Naa ko wee saɓlaŋ hẽnbe po Ghana, ga á ɗen ga Nortey mo ɗa.

¹² Nortey tõõ wer had Bible de maaga kiŋgi ɓe hay 16 mono. Amaa blam ɓe maŋ tu, jar maa liŋ ni ɓaara kaŋ wo ne hẽn nene. Mayse kay ne maa ya’ wer had wããre Baa ɓen la? Hẽnbe maaga hay had wããre Baa ne hẽn joŋ joŋre de Matiye 10 maa ngaɓge ne hẽn ga à joŋ ge bon jar jag-Baa maa ti ngeel ɓen ge wo yaŋ. Nortey wãã ga: “De maaga joŋge bon tõõ wer nokay, ndi hay go de bawge jag jiili ɓi ga ndi da’ diŋ jag-Baa maa ti ngeel ɓe no”. Hẽn naan ngaɓ Matiye 10:16 ne hẽn ga wãã ga naa mo hay joŋ see naa de ɗeŋ mono. Blam, saara ndal ti ɗeŋ maaga verse sen de hay kay Nortey maa fer wããre ti hãge ɓil ɓe ne jar maa liŋ ni ɓaaran wo, de hooge sugi. Blam batem ɓe mono, Nortey hay de sãy kol piyoniyẽ ti, amaa pan ɓe hay gorge maaga á mo see ti ‘Université’ lay. Nen maaga hẽn naan de hay wãã fẽn maaga Nortey mo hay joŋ ne hẽn mono, se wii jag ɓe maa kayge ɓe ɗiggi ti verse wo, lan maaga á mo maŋ ɗiggi maa de ko re. Day Nortey joŋ ge na joŋge ne? Nortey maŋ ɗiggi ga se mo tõõ diŋ wer joŋre piyoniyẽ no. Pan ɓe ga á mo kal go ne se liŋ. Nortey ɗig ti re maaga hres ge na ɗiggi là? Á wãã ga:“Ndi hay go de bawge jag jiili ɓi ga ndi maŋ diŋ ɗiggi maa ti ngeel ɓe.” Hayga naa yaŋ jor glog jar lan wo maa ɗiggi ti wããre Baa lay no, ni naa de kay rage maa ya’ hãge ɓil ɓaara ciŋ ni, lan maaga á mo hay wo tum ti joŋre maa ni Jeofa no.—Efe. 3:​16-19.

KAY JAR MAAGA Á MO KOL WO GO DIŊ “KADO MAAGA DIŊ JAR TEBEERE WO”

13. Yeso joŋ diŋ mayse maaga à mo hay tum sii wããre Baa blam ferge ɓe ciŋ là? (Efes wo 4:​8, TMN)

¹³ De maaga Yeso hay gesiŋ la mono, á hay joŋge diŋ fẽẽre maaga Pan ɓe hay wii rage do ɓe mo taw taw tu seŋ. (Jaŋ 17:4) Amaa Yeso hay bay ɗiggi ga hay de kããge maa joŋ joŋre maaga Jeofa dan diŋ se boŋ tawa wa. Nen kiŋgi ɓe maa swa’ de reeda ga á joŋ sii wããre Baa gesiŋ la mono, á hay had jar maa tigriŋ wo. Taŋgu maaga á fer ciŋ mono, Yeso kaŋ ɗiggi ti jar maa wer ɓen wo no. Á hã joŋre siigi wããre Baa, hadge wããre maa de cõõren, lan joŋre koɗge jar maa ni Baa ne hara do. Yoo jar maaga yãã wo joŋre  koɗge jar maa wer Yeso maa lan wo mono, jar maa po wo yoo ɓaara hay bay wo go kiŋgi 30 wa ɗa. (Jaŋ Efes wo 4:​8, TMN.) Jar sen hay joŋ wo joŋre de Yeso debaŋ, lan saara hay lag see ɓe de deele lay. Amaa taŋgu maaga Yeso raw ciŋ mono, á had ra debaŋ ɗa pa, nen maaga á mo hay kol wo go diŋ “kado maaga diŋ jar tebeere wo”. Day, á hay had ra na de ɗeŋ maa hõnlà?—Ko ngeel naa wer maa gesiŋ ɓil Efes wo 4:​8, TMN.”

14. Yeso had mayse ne jar maa wer ɓen wo nen naw ɓe maa 40 glog gesiŋ la là? (Ko foton lay)

¹⁴ Yeso baa yaŋ maaga jar maa wer ɓen hay wo de sãy ɓe ti ne hara. Á baa yaŋ sen ne hara de dage debaŋ. Ko ba ɗa, á hay ko ga jar maa po wo yoo ɓaara hay bay wo de hã ɓil ga se húu go lan fer le go birgi wa; day se kay ra maa ko cwãy sen de baa yaŋ ne hara. (Lug 24:​25-27; Jaŋ 20:27) Á wãã ne hara pa ga á de hay koɗ wo jar maa ni Baan wo de peel ni, ti maaga á kaŋ wo ti go wer kiɗgi horog mono. (Jaŋ 21:15) Á hay fer ɓo’ sug ɓaara pa ga á de hay tab wo joŋre maaga á joŋ wo ne Jeofan de joŋre maaga jar lan wo de kããge maa joŋge ɓe mo wa. (Jaŋ 21:​20-22) Lan se kay ra maa coo ɗiggi ɓaara maaga bay wo ti ngeel ɓe wa ti ɓaŋ Twaywaŋ maa ni Baan, lan se kay ra maa kaŋ ɗiggi ti siigi wããre maa de cõõre no. (Joŋre 1:​6-8) Jar maa peel tayge had wo mayse see saɓlaŋ Yeso là?

15-16. (a) De ɗeŋ maa hõn wo ga jar maa peel tayge de hay maŋ wo saɓlaŋ Yeso là? Naa wer ɓe ɗa. (b) Yaŋ kay Patrig na kayge là?

¹⁵ Jar maa peel tayge had wo mayse see saɓlaŋ Yeso là? Á de hay kay wo hẽẽrebe wo, koh maa jõõre wo maa joŋ joŋre ti tayge de peel ni debaŋ. c Jar maa peel taygen mo hay gor wo ga jar maaga saara had ra mo hay joŋ wo fẽẽren go de woore ɗa wa. Á de hay baa wo yaŋ ne hara de dage nen maaga á mo hay wo fer ti see ɓaara gesiŋ, de deele, lan mo hay wo go gorge maa kay jar lan wo no.—1 Tim. 3:1; 2 Tim. 2:2; 1 Pi. 5:5.

¹⁶ Ɗig ba ti ɗeŋ maaga yaŋ kay hẽnbe po ga à ɗen ga Patrig mo ɗa. De maaga á hay jõõ mono, á hay wãɗ wããre ne jar de põõ, lan hay bay de yaŋ see hẽẽrebe wo de mãyregemaarebe wo wa. Jee maa peel tayge po ga go de ruggi ko ga Patrig  hay maa cooge ti ɓaŋ se no, day se baa yaŋ maa kayge ɓe ne hẽne, amaa de dage. Patrig wãã ga: “Ndi de fruygi ti maaga jee maa peel taygen ngaɓ ɗeŋ maaga ndi de hay coo ne ndi mono. Seɓaa de maaga à hã joŋre maaga ndi hay de sãy joŋge ɓe ti ne hẽẽrebe maa tigriŋ wo ti tayge mono, se hay woo do ɓi go debaŋ. Amaa, yaŋ jee maa peel taygen kay me maa naa nen ferge ti gesiŋ wo de dage go see hẽẽre ɓi wo; lan maaga ndi mo kaŋ ɗiggi ti joŋre maaga à hã ra me mono.” Ɓo’ge ti ɓen so, Patrig kol jee maa peel tayge de maaga kiŋgi ɓe hay 23 mono.—Jõõ. 27:9.

17. Yeso ngaɓ go na ngaɓge ga se hay de kaŋ ɗiggi ti jar maa wer sen wo là?

¹⁷ Yeso hã ne jar maa wer ɓen wo do bay diŋ joŋre siigi wããre Baa tawa wa, amaa joŋre hadge ni lay. (Ko “leur enseignant” ɓil note d’étude maa ɓil Matiye 28:​20, La Bible. Traduction du monde nouveau (édition d’étude)) Maapo ga jar maa wer Yeson ɗig wo ga saara bay de kããge maa joŋ fẽn maaga Yeso wii ga saara mo joŋ mo wa. Amaa, Yeso hay go de bawge jag jiili ga á wo de kããge maa joŋ joŋre se no. Day á wãã ne hara ga: “Doo maaga Pan ɓi ɓo’ me le nono, ndi laa we we lay.”—Jaŋ 20:21.

18. Jar maa peel tayge maŋ wo saɓlaŋ Yeso na maŋge là?

¹⁸ Jar maa peel tayge maŋ wo saɓlaŋ Yeso na maŋge là? Jar maa peel tayge maa de ko re had wo jar lan de hã joŋre maa po wo go ne hara. (Flp. 2:​19-22) Ko ba ɗa, jar maa peel tayge mbaara de kããge maa hã joŋre torge wo de yogge tiŋ-Baa ne maa jõõre wo do, lan kne’ge ɓe. Blam maaga á hã wo joŋre we go ne maa jõõre wo do no, á mo had wo ra, blam sen á mo naa wo nen go ga saara de hã ɓil ti ɓaara ga á bag ge wo jag joŋre sen yaŋ go de woore. Matiye, hẽnbe po ga kol jee maa peel tayge defay wãã ga á co jag se debaŋ ti maaga jar maa peel tayge maa de ko re had wo se de woore maa joŋ joŋre, lan kaŋ wo ɗiggi ti se maa bag jag joŋre sen go mono. Á wãã ga: “De maaga ndi joŋ mopo we ti ngeel ɓe ga no, á kay wo ndi maa ko ɗeŋ maa joŋge ɓe de woore ɗawa de peel ni.” d

19. Naa mo hay go de baa wer maa joŋ mayse là?

¹⁹ Yeso joŋ joŋre de naw ɓe maa 40 glog ti tamsir la maa jor glog jare, ma had jar de wããre Baa, lan maa had jar de joŋre. Da ga naa mo hay go de baa wer maa joŋge doo se ne tew tew. (1 Pi. 2:21) Á kay ge naa yaŋ maa joŋ se no. De daŋ sen ɓuy mono, á wãã ga: “Ndi joŋ ge yaŋ see ɓay ti naw tum ɓuy, hãã go ti wur tawge tamsir no.”—Mat. 28:20.