1-2. (a) Fẽẽre maa hõn wo ga jar goŋ Jeofa mbraw wo ti ɓaara là? (b) Naa ko mayse yaŋ wo ɓil hadge sen la là?

 JEE táabay maa hõnla ɓuy, klee kluu joŋ de mbrawge a de ngar ngeel maa po wo. Naa ngaɓ wee ba ne de Sedeewa Jeofa po klee ga wii jag see ɓe ga Jeofa mbe na de kaŋ ɗiggi ti se yawla ɗa. Maapo ga á bay go de bawge jag jiili ɓe maa joŋ batem wa. Saɓlaŋ maa tigriŋ ti hẽnbe maaga hay ɓo’ joŋre maa ni Jeofan go peel fẽẽren ɓuy ti jõõ ɓe, ti maaga se mo hay kiɗ suŋgu debaŋ mono. Patala se gar go so, se bay da’ suŋgu debaŋ maa re jar maa liŋ ni ɓe wo wa so. Maapo ga á wii jag see ɓe so ga se joŋ mbe na ni de maaga se maŋ ga se goŋ Jeofa sag sag ti jõõ se mo yawlà. Noga naa ɗig wee ti mãygemanbe po go de garge ga ẽgre ɓe bay patala de kããge wa so ɗa. Maapo ga á go de woo do werga ẽgre ɓe bay kããge maa joŋ joŋre ne Jeofa doo maaga se hay joŋge ne wa so. Ndo wii jag see ɓo we go ti boŋ ti wiigi jag maa de maŋ maa ti’ wo la yawlà: ‘Jeofa mbe na de kaŋ ɗiggi ti ɓi yawlà? Jeofa mbe de ko fẽẽre maaga ndi men ra go maa joŋ joŋre ne hẽn mo yawlà? Kayge ɓi na yaŋ mbe nen Jeofa ɗa pa yawlà?’

² Hayga naa bay wee kiɗ yiŋgi jag ti wiigi jag maa de maŋ sen wo wa no, maapo ga hãge ɓil naa woo ge go, lan naa men ge goŋ Jeofa go. Ɓil hadge sen la, naa ko yaŋ ga de maaga naa kaŋ  ti naa we ti ‘principes’ maa ɓil Bible wo no, á kay naa yaŋ de maaga naa yaŋ mbrawge ga: (1) Jeofa mbe na de kaŋ ɗiggi ti naa yawlà, (2)  Jeofa mbe de ko fẽẽre maaga naa men ra go maa joŋ joŋre ne hẽn mo yawlà, noga (3) Naa mbe na de kayge nen Jeofa ɗa pa yawlà.

NAA JOŊ JOŊGE MAA NAA BLUM MBRAWGE NAAN WO LÀ

3. Ɗeŋ maa boŋ maa hõn kay naa maa naa blum mbrawgen wo là?

³ Hayga ndo yaŋ de mbrawge no, á de el maaga ndo mo kiɗ yiŋgi jag ti wiigi jag ɓon wo ɓil Bible. Hayga naa joŋ sen we no, hãge ɓil naa ti Jeofa wo de barge naa de ɓe kol yaŋ kwũy, lan naa joŋ yaŋ de kããge ɗawa maa ‘lagge de hã ɓil naa ne krisi’. —1 Kor. 16:13.

4. Naa ‘lam fẽẽren ɓuy’ na lamge là? (1 Tesalonig wo 5:21)

⁴ Jaŋ 1 Tesalonig wo 5:21. Ko maaga Bible wii ga naa mo “lam we fẽẽren ɓuy” mo ɗa. Hayga naa bay we go de bawge jag jiili ti mopo wa no, ni naa ko maaga Bible wãã ti ɓe mono. Ko ba ɗa, wee jõõ maaga naa wãã le ti ɓe ciŋ la ga ɗig ga Jeofa mbe na de kaŋ ɗiggi ti se yawla, hay yãã ga ɗiggi sen diŋ cwãy mbe tu yawlà? Baywa, á de hay ‘lam fẽẽren ɓuy’ de frug nen wããre Baa maa koge ga Jeofa ɗig ti se na ɗiggi la.

5. De ɗeŋ maa hõn ga Jeofa yiŋ jag ne naa ti wiigi jag naan wo là?

⁵ De maaga naa jaŋ Bible mono, sen doo ga Jeofa ti wããre ne naa nono. Maaga naa mo da’ ɗiggi Jeofa ti mopo go de woore ta’ mono, á wii durgi do naa debaŋ ɗa. Jaŋge naan mo hay debaŋ diŋ ti fẽn maaga kay naa yaŋ maa yiŋ jag ti wiigi jag naan dera tu mono. Maa joŋ sen mono, naa mo hay kiɗ fẽẽre ɓil kefder naa wo. (Jõõ. 2:​3-6) Naa de hay tos Jeofa, lan wii ne hẽn ga á mo kay naa maa da’ yiŋgi jag ti wiigi jag naa wo no. Blam sen naa mo hay kiɗ ‘principes’ maa ɓil Bible wo de wããre maaga kay wo naa jag re naan mono. Maapo ga á de el maaga naa mo jaŋ mbaa ti jar maa ɓil Bible ga hay yiŋ wo de tee re sen mono.

6. Hayga naa yaŋ mbrawge no, de ɗeŋ maa hõn ga taygeti kay wo naa maa ɗiigi go ne hẽn ti là?

⁶ Naa “laa” mbe wããre Jeofa pa de maaga naa wo ti taygeti wo mono. Hayga naa yaŋ woge ti taygeti tum no, maapo ga naa laa siigi wããre, noga jobo fer wããre maaga diŋ yiŋgi jag ti wiigi jag naan tew tew tu . (Jõõ. 27:17) Naa ko wee fẽn maaga kay naa maa da’ yiŋgi jag ti wiigi jag naa ti fẽẽre maa po wo ɗa.

HAYGA NDO YAŊ MBRAWGE GA JEOFA BAY KAŊ ƊIGGI TI ƁO WA NO

7. Jar maapo wii wo jag see ɓaara ga hãylà?

⁷ Ndo hay wii jag see ɓo we go ti boŋ ga: ‘Jeofa mbe na de kaŋ ɗiggi ti ɓi yawla yaw?’ Hayga ndo bay we ko see ɓo go halla wa no, maapo ga kolge bar Jeofa, jee joŋ fẽẽren wo ɓuy, joŋ ge diŋ mopo maa de gayri debaŋ nen ɓo. Maapo ga Waŋ Dafid hay ɗig de maŋ sen lay. Á hay ngris ne debaŋ ti maaga Jeofa kaŋ ɗiggi ti jar téebeere wo mono. Day se wãã ga: “O Jeofa, je táabay diŋ wose maga ndo kãã ma koge ɓe la? Wel je tabayn diŋ wose maga ndo ɗig ti ɓe lay la?” (Siŋ. 144:3) Ndo da’ yiŋgi jag ti wiigi jag sen na la genlà?

8. Doo maaga naa da’ ɓil 1 Samyel 16:​6, 7, 10-12 no mono, Jeofa ko may see jar là?

⁸ Jeofa kaŋ ɗiggi ti jar maaga à bay go ko rage halla wa mono. Ko ba ɗa, Jeofa ɓo’ Samyel wo liŋ ni Jese, maa kaa noo ne mbarga ɓe, maaga kol ge yaŋ waŋ Israyel ti. Jese ɗe weere ɓe maa 7 wo le maa age peel Samyel, amaa se ɗe Dafid, jag pããn, le ni ga. b Amaa,  Jeofa hay de baage diŋ Dafidi. (Jaŋ 1 Samyel 16:​6, 7, 10-12, TMN.) Jeofa hay go de ko jiili Dafid de woore: ga á hay diŋ weejõõ po maaga da se debaŋ.

9. Wer mayse ga ndo go de bawge jag jiili ɓo ga Jeofa de kaŋ ɗiggi ti ɓo là? (Ko foton lay.)

⁹ Ɗig ti ɗeŋ maaga Jeofa go de ngaɓge ga se kaŋ ɗiggi ti ɓo mo ɗa. Á baa yaŋ maaga daŋgo maa kay moge jag re maaga ndo nen ɓe mono. (Siŋ. 32:8) Sen ɓo’ nen go ga á go de ko ndo de woore. (Siŋ. 139:1) Hayga ndo joŋ jonre we de yaŋ maaga Jeofa hã ra ne ndo, lan ko ɗeŋ maaga yaŋ sen kay wo ndo we lay no, ni ndo joŋ yaŋ go de bawge jag jiili ɓo ga Jeofa de kaŋ ɗiggi ti ɓo. (1 Kro. 28:9; Joŋre 17:​26, 27) Jeofa de ko durgi ɓo maaga ndo dur maa joŋ joŋre ne hẽn, lan maa yãã jag ɓe mono. Á de ko joŋre ɓo maa de wooren wo, lan de sãy kolge bar ɓo ti. (Jer. 17:10) Day á joŋ ge de fruygi debaŋ hayga ndo yaŋ de sãy kolge bar ɓe ti lay no.—1 Jaŋ 4:19.

HAYGA NDO YAŊ MBRAWGE GA ƊIGGI MAAGA NDO FAR RA LE GO ƁAA HAY BAY WO DE WOORE WA NO

10. De maaga naa ɗig we ti ɗiggi maaga naa far ra le ɓaa no, maapo ga naa wii jag see naa ga hãylà?

¹⁰ Day de ngar ngeel maa po, jar maa po fer wo ɗiggi blam ti ɗiggi maaga saara hay far ra le go ɓaa mono. Maapo saara wii jag see ɓaara ga ɗiggi maaga saara hay far ra mbaara de woore yawlà. Maapo á men wo joŋre ɓaara maa de woore, noga men wo treere ɓaara maaga á hay wo da’ suŋgu wer ɓe debaŋ go, maa hã see ɓaara go sag sag ti joŋre maa ni Jeofa no. Maapo á hay joŋ wo sen kiŋgi go pur debaŋ. Maapo á wo de ko kããre ɓaara maaga maŋ wo ɗiggi ga saara kiɗ suŋgu debaŋ; day patala saara ko de da’ ti see ɓaara. Wersen, saara wii jag see ɓaara ga: ‘Faage maaga ndi maŋ maa goŋ Jeofa sag sag mbe de woore yawlà? Ndi hay bay nen joŋ joŋre maa kiɗ suŋgu debaŋ wa an yawlà?’

11. Mayse hay hãy ɗiggi jee yer Siŋ wora 73 là?

 ¹¹ Hayga wiigi jag sen yaŋ hãy ndo no, ɗig ti fẽn maaga hay ɗig jee yer Siŋ wora 73. Á hay ko jar maaga bay wo goŋ Jeofa wa, ga hay wo koge de da’ see ɓaara, wo de hroge, lan ga hay wo koge doo ga re po bay see saara wa nono. (Siŋ. 73:​3-5, 12) De maaga á hay koge doo ga jar sen wo de da’ ti see ɓaara mono, se kal ɗiggi ga goŋge Jeofa bay diŋ ɗiggi maa de woore wa so. Á wãã ga ɗiggi se maa debaywooren hay “jag ɓum mege nen naw tum”. (Siŋ. 73:​13, 14) Á joŋ joŋge maa ɗiigi go ne ɗiggi ɓe se debaywooren ti là ?

12. Doo maaga naa da’ ɓil Siŋ wora 73:​16-18 no mono, mayse kay jee yer siŋ sen maa ɗiigi go ne ɗiggi maa debaywooren ti là?

¹² Jaŋ Siŋ wora 73:​16-18. Jee yer siŋn raw ɓil tiŋ maa bay ɗag maa ni Baa no. Wo ti ngeel sen ni se le’ ɗiggi de woore. Á ko ga, koh de maaga naw jar maa po hay mbaara koge gus laybla mono, naw ɓaara maa peeln hay koge de gaali debaŋ. Wer ɗiggi se de wooren, se da’ jam maa jag jiili, lan ko ga seege wer fẽẽre maa ti nenterse wo diŋ ɗiggi maaga tee ɓe baywa. Ɓo’ge ti ɓen so, á fer baa wer see ɓe go maa ya’ wer joŋre ne Jeofa ciŋ ni.—Siŋ. 73:​23-28.

13. De ɗeŋ maa hõn ga ndo da’ jam de maaga ndo yaŋ mbrawge ti ɗiggi maaga ndo hay far ra le ɓaa là? (Ko foton lay.)

¹³ Wããre Baa kay mo yaŋ maa da’ jam maa jiili sen lay. De ɗeŋ maa hõnlà? Fer ɗiggi ti fẽẽre maa de woore maaga Jeofa hã ra ne ndo, —doo bosa’ maaga á kaŋ ra ne ndo ti mono— lan fer ɗiggi ga jar maaga bay wo goŋ Jeofa wa, bay wo da’ kayge sen wa. Wer maaga á bay wo ɗiggi ti naw maa peeln wa so mono, ɗiggi ɓaara ɓuy go de kaŋge ti fẽẽre maaga á joŋ wo ra wara mono. Day Jeofa taw bay diŋ de hã fẽẽre maa de woore wo ne ndo wara tawa wa; amaa, á de wããge ga se hã fẽẽre maaga daŋ  wo go yaŋ ne ndo, ti naw maa peel no. (Siŋ. 145:16) Ɗig ndo ga ndo de hay bay we sag sag goŋ Jeofa wa no, naw ɓon de hay ẽla, ndo bay de koge wa. Cwãyn diŋ ga hayga ndo maŋ ɗiggi we ti mopo werga ndo da Jeofa, lan ndo da jar lan wo lay no, hay go de kaŋge ti ɓo ga Jeofa hã fẽẽre maaga ndo de sãy ɓaara ti, maaga ndo mo hay de fruygi yaŋ mo.

HAYGA NDO YAŊ MBRAWGE GA KAYGE ƁO BAY NEN JEOFA WA SO NO

14. Wer mayse ga jar maapo bay wo de kaŋ ɗiggi ti see ɓaara wa là, lan ɗiggi maa hõn hãy ra là?

¹⁴ Jar goŋ Jeofa maa po kãã wo maa joŋ joŋre ne Jeofa doo maaga á hay wo joŋge le ɓaa no ga. Maapo diŋ werga á wo go de garge, noga de cege, noga á wo go rewre, grumri. . .Wersen, maapo ga saara ɗig ga kayge saara bay nen Jeofa wa so. Maapo wosela ɓuy yoo ɓaara wii jag see ɓe ga: ‘Kayge ɓi yaŋ mbe nen Jeofa ɗa pa yawlà?’

15. Jee yer Siŋ wora 71 hay go de bawge jag jiili ɓe ti maylà?

¹⁵ Jee yer Siŋ wora 71 hay ɗiggi de maŋ sen lay. Á tos ga: “De maga egre ɓi taw we go no, tob ndi go wa!” (Siŋ. 71:​9, 18) Amaa, koh de maaga á hay mbe ko see ɓe go de hoo ẽgre laybla mono, jee yer siŋn hay go de bawge jag jiili ɓe ga, hayga se yaŋ goŋ Jeofa de deele no, á joŋ yaŋ tum kay sege. Doo jee yer siŋ sen no lay, á co jag Jeofa de maaga naa yaŋ go durgi de ẽgre naa ɓuy maa goŋge ɓe, koh de maaga ẽgre naa bay mbe kããge wa mono.—Siŋ. 37:​23-25.

16. Ti ɓaŋ maa hõn ga jar de garge kay mbaara ti joŋre maa ni Jeofan pa là? (Siŋ. 92:​12-15)

¹⁶ Hayga ndo yaŋ go de garge no, ko see ɓo doo maaga Jeofa ko ndo no lay. Á kay mo yaŋ maaga ndo mo hay goŋ sege de deele, koh ndo mo hay ba de ẽgre wa so. (Jaŋ Siŋ wora 92:​12-15.) Nen maaga ndo mo hay kaŋ ɗiggi ɓo ti  fẽn maaga ndo kãã maa joŋge ɓe ga so mono, kaŋ ɗiggi ɓo diŋ ti fẽn maaga ẽgre ɓo kãã maa joŋge ɓe mono. Ko ba ɗa, ndo mbo de kããge maa kay jar lan de saɓlaŋ ɓo maa de deele no, lan de ngaɓge ne hara ga ndo da ra. Ndo mbo de kããge maa sii ɗeŋ maaga Jeofa hay kay mo nen kiŋgi puri; lan fẽẽre maaga Baa joŋ ge ra yaŋ ti naw maa peeln mono. Ni pa mono, ti ɓo mo yõõ go ga tosge maaga ndo tos ti jar lan wo kay ra debaŋ wa. (1 Pi. 3:12) Naa mo hay ba nen re maa ẽla, naa mbe de kããge maa hã mopo ne Jeofa, lan ne jar lan wo.

17. Wer mayse ga naa mo ngaɓ jag see naa de jar lan wo wa là?

¹⁷ Hayga ndo yaŋ lawge werga ndo bay de kããge maa joŋ joŋre ne Jeofa doo maaga ndo hay joŋge le ɓaa no wa so no, hay go de bawge jag jiili ɓo ga, fẽn maaga ndo de joŋge ɓe patala de woore debaŋ nen ɓe. Maapo ndo ngaɓ jag see ɓo de jar lan wo. Joŋ hayya ne see ɓo ti se no! Wer mayse là? Werga Jeofa bay joŋ sen wa. (Gal. 6:4) Ko ba ɗa, Mari kaa trusa maaga yee suŋgu pur ne Yeso ti. (Jaŋ 12:​3-5) Wãy dwur maaga laa suŋgu ti tiŋ-Baa hã diŋ suŋgu maa kleere ɓoge. (Lug 21:​1-4) Amaa, Yeso ko kado naare sen wo ɓog ɓuy doo ɗeŋ maaga á naa wo nen hãge ɓil ɓaara go de ɓe nono. Koh na mo hay ba ɗiggi ga fẽn maaga naa joŋ bay go halla wa, Jeofa Pan Yeso fruy debaŋ ti fẽẽre maaga naa joŋ ra ɓuy de dage maa goŋge ɓe mono.

18. Mayse kay naa maa ɗiigi go ne mbrawge naan wo ti là? (Ko ngeel maa de gaɗge “ Wããre Baa kay mo maa naa blum ɗiggi mbrawge.”)

¹⁸ Naa ɓuy, naa mbraw de ngar ngeel maa po wo. Amaa, doo maaga naa had ti artikle sen la no mono, Bible kay naa maa ɗiigi go ne ɗiggi sen ti. Wersen, dur go de ẽgre ɓo ɓuy maa da’ yiŋgi jag ti wiigi jag ɓon wo, nen maaga ndo mo hay woo do go wa. Jeofa go de ko ndo de woore. Hãge see ɓo maaga ndo hã go ne hẽn de cõõre jag ɓe, day se de sãy poɗ ndo ti. Hay go de bawge jag jiili ɓo ga jar maaga goŋ wo Jeofa boŋ boŋ ɓuy wo de cõõre jag ɓe!