Seɓaa de maaga ndo taw frug nen wããre Baa go ne kay tu, á de gayri see ɓo maa ferge ɗig ti fẽẽre maaga ndo hay frug nen ɓaara mo yawlà? Sen diŋ fẽn maaga a wosela ɓuy. Mayse kay naa jag sen là? Fer ɗiggi ti kluuri wããren wo no.

De maaga ndo de frug nen wããre Baa mono, ni ndo oo mẽ’ maa ɗiggi ti fẽn maaga ndo jaŋ ne mono. Sen diŋ fẽn maaga apotre Pol jor glog hẽẽrebe wo ga á mo joŋ wo de maaga á le’ wo we frug nen leder maaga se yer wo ne hara no. Á wãã ga: “re ma kluu maga naa de wããge ɓe diŋ” maa ta’ la no. (Heb. 8:1) De ɗeŋ maa sen, á hay kay rage maa ko maaga á hay da wããge ga hãyla, lan maa ko maaga fẽẽre maaga se wãã ra ɓuy see wo wer kẽẽ ɓuy.

Maapo ga go ti tawgeti fruggi nen wããre ɓon, ndo hoo weere boore po 10 maa ɗiggi ti fẽn maaga ndo jaŋn mono. Hayga ti ɓo bay we ferge ɗiggi ti fẽẽre maaga ndo jaŋ ra wa no, ni ndo fer ko nen ti wããre maa kluuri ɓil hadge no, noga fer jaŋ wããre maa taŋgu ti paragraf wo maa kay ndo maa ferge ɗiggi ti ɓaara. De maaga ndo had mopo we defay no, kiɗ ga ndo naa wer ɓe go de wããre maa jag ɓo. Hayga ndo fer we ɗiggi ti fẽn maaga ndo hay frug nen ɓe no, á joŋ ge go ne ndo gus maa ferge ɗiggi ti ɓe. De sen mokay, ndo ko maaga á kay ndo kayge nen naw ɓo la lay.